Ukuqoqa Abantu Bazo Zonke Izilimi
1 IZwi likaNkulunkulu liyagcwaliseka! Abantu ‘bazo zonke izilimi zabezizwe’ bamukela ukukhulekela kweqiniso. (Zak. 8:23) OFakazi BakaJehova babasiza kanjani abantu bazo zonke ‘izizwe, nabantu, nezilimi’ ukuba babe nokuma okuhlanzekile phambi kukaJehova, benethemba lokusinda “osizini olukhulu”?—IsAm. 7:9, 14.
2 Inhlangano KaNkulunkulu Iyasabela: INdikimba Ebusayo iye yahlela ukuba kutholakale izincwadi zeBhayibheli ngezilimi ezingaba ngu-380 ukuze abantu emhlabeni wonke bakuqonde ngokucacile ukubaluleka kwezindaba ezinhle. Ukulungiselela nokunyathelisa izincwadi ngezilimi eziningi kangaka kuwumsebenzi omkhulu. Kuhilela ukuhlela amaqembu abahumushi abaqeqeshiwe nokubanikeza amathuluzi abawadingayo ukuze bahumushele izincwadi zethu kuzo zonke lezi zilimi, futhi kuhilela nokuzinyathelisa kanye nokuzithumela. Nokho, indima eyinhloko ifezwa abamemezeli boMbuso, okuyibona abayisa kubantu isigijimi seBhayibheli esisindisa ukuphila.
3 Ukuvuma Inselele: Insimu yethu inabantu bezizinda ezihlukahlukene, abakhuluma izilimi eziningi zomdabu nezakwamanye amazwe. Ukuze zifinyelele wonke la maqembu ezilimi ngezindaba ezinhle, izinceku zikaNkulunkulu eziningi ngokwandayo zenza umzamo wokufunda olunye ulimi olukhulunywa endaweni yakubo. Ezinye zifunda uLimi Lwezandla. Ensimini yegatsha laseNingizimu Afrika kunamabandla namaqembu abalelwa ku-1 630 ashumayela ngezilimi ezingu-11 noma ngaphezulu. Abanye abantu abangakaze bezwe ngoJehova noma abangazi lutho ngeBhayibheli bamukela iqiniso leZwi likaNkulunkulu.—Roma 15:21.
4 Singakwazi yini ukuzikhandla ngokwengeziwe ekumemezeleni izindaba ezinhle kubantu abasensimini yethu abangebona abengabadi? (Kol. 1:25) Amanye amabandla ahlela umsebenzi wokushumayela ngolunye lwezilimi eziningi zendawo. Abamemezeli baqale bafunde okuthile ngalolo limi ukuze banikeze intshumayelo emfushane, njengokuthi: “Sawubona. Ngikuphathele izindaba ezinhle. [Yibe usuhambisa ipheshana noma incwajana engangomagazini yalolo limi.] Usale kahle.” UJehova uyayibusisa ngempela imizamo enjalo yokucathula!
5 Isigijimi soMbuso sikhanga abantu bazo zonke izizinda nezilimi. Masibambe wonke amathuba okubazisa sona.