Yiba Nesithakazelo Sothando ‘Ezintandaneni’
1 UJehova ‘unguyise wezintandane.’ (IHu. 68:5) Indlela ayikhathalela ngayo inhlalakahle yazo ibonakala emyalweni awunikeza isizwe sasendulo sakwa-Israyeli: “Aniyikuhlupha mfelokazi nentandane. Uma ubahlupha nakanjani, bakhale kimi nakancane, ngiyakuzwa nokuzwa ukukhala kwabo.” (Eks. 22:22, 23) UMthetho kaNkulunkulu wawunanelungiselelo lokusiza abantu abanjalo ngezidingo zabo ezingokomoya. (Dut. 24:19-21) Ngaphansi kwelungiselelo lobuKristu, abakhulekeli beqiniso banikwa umyalo ‘wokunakekela izintandane nabafelokazi osizini lwabo.’ (Jak. 1:27) Singasilingisa kanjani isithakazelo sothando sikaJehova kulabo abakhulela emikhayeni enomzali oyedwa noma ehlukene ngokwenkolo?
2 Ukuqeqesha Okungokomoya: Uma ungumzali ongayedwa noma unomngane womshado ongakholwa, kungase kube inselele ukuqhuba isifundo somkhaya seBhayibheli sasikhathi sonke nezingane zakho. Kodwa kubalulekile ukuba nesifundo seBhayibheli esizuzisayo nesiqhutshwa njalo, ukuze zikhule zibe abantu abadala abalinganiselayo nabavuthiwe. (IzAga 22:6) Ukuxoxa nazo nsuku zonke ngezinto ezingokomoya nakho kubalulekile. (Dut. 6:6-9) Ngezinye izikhathi, ungase uzizwe udangele, kodwa ungapheli amandla. Phendukela kuJehova ukuze uthole amandla nesiqondiso njengoba ‘uqhubeka ukhulisa abantwana bakho ngesiyalo nangokuqondisa umqondo kukaJehova.’—Efe. 6:4.
3 Uma udinga usizo ekunakekeleni imithwalo yakho engokomBhalo, yazisa abadala ngezidingo zakho. Bangase bakwazi ukukunika amacebiso awusizo noma bakusize ube nesimiso esihle sezinto ezingokomoya emkhayeni wakho.
4 Indlela Abanye Abangasiza Ngayo: Ekhulwini lokuqala, uThimothewu waba inceku kaJehova eshisekayo naphezu kokuba akhulela emkhayeni ohlukene ngokwenkolo. Akungabazeki ukuthi imizamo yenkuthalo kanina noninakhulu yokumfundisa imibhalo engcwele esemncane yaba nendima enkulu kulokhu. (IzE. 16:1, 2; 2 Thim. 1:5; 3:15) Nokho, wazuza nasebudlelwaneni ayenabo namanye amaKristu, kuhlanganise nomphostoli uPawulu, owabiza uThimothewu ngokuthi ‘umntanakhe othandekayo nokholekileyo eNkosini.’—1 Kor. 4:17.
5 Ngokufanayo namuhla, yeka ukuthi kuzuzisa kangakanani lapho abafowethu nodadewethu abavuthiwe ngokomoya beba nesithakazelo ezintandaneni ebandleni! Ingabe uzazi zonke ngamagama? Uyaxoxa yini nazo emihlanganweni yebandla nangezinye izikhathi? Zimeme ukuba zihambe nawe enkonzweni yasensimini. Mhlawumbe ngezinye izikhathi ungase ukwazi ukuzimemela esifundweni somkhaya wakho noma emalungiselelweni okuzijabulisa okwakhayo, kanye nomzali wazo ongayedwa noma okholwayo. Uma lezi zingane zikubheka njengomngane wazo, cishe ziyosilingisa isibonelo sakho futhi zamukele nesikhuthazo sakho.—Fil. 2:4.
6 UJehova unesithakazelo esijulile ezintandaneni, futhi uyayibusisa imizamo yethu yothando yokuzisiza zenze iqiniso libe ngelazo. Abaningi abakhulele emikhayeni enomzali ongayedwa noma ehlukene ngokwenkolo bathola isikhuthazo esinjalo futhi manje bakhonza ngokwethembeka njengamaphayona, izinceku ezikhonzayo, abadala, ababonisi abajikelezayo, izithunywa zevangeli, noma amalungu omkhaya waseBethel. Kwangathi sonke singafuna izindlela ‘zokwanuleka’ othandweni lwethu ngezintandane, silingisa uBaba wethu wasezulwini.—2 Kor. 6:11-13.