Sigcine Kahle
Ukuqhuba Izifundo ZeBhayibheli Ezithuthukayo
Lesi senezelo sihlanganisa amaphuzu ayinhloko ochungechunge lwezihloko ezikhuluma ngokuqhuba izifundo zeBhayibheli ezithuthukayo oluye lwavela kuyi-Nkonzo Yethu YoMbuso. Sikhuthaza wonke umuntu ukuba asigcine kahle lesi senezelo futhi asihlole lapho eqhuba izifundo zeBhayibheli. Ngaphezu kwalokho, emihlanganweni yenkonzo yasensimini kungase kuqokonyiswe amaphuzu athile akulesi senezelo, futhi umbonisi wenkonzo angase asisebenzise njengesisekelo sezinkulumo azinikeza lapho ehambele amaqembu esifundo sencwadi.
INgxenye 1: Siyini Isifundo SeBhayibheli?
Usuke uqhuba isifundo uma uba nezingxoxo zeBhayibheli nomuntu othile njalo nangendlela ehleliwe, usebenzisa iBhayibheli nenye yezincwadi ezituselwe ukuqhuba isifundo, ngisho noma kuba isikhathi esifushane. Isifundo singabikwa lapho sesiqhutshwe izikhathi ezimbili ngemva kokuba umuntu eboniswe ukuthi siqhutshwa kanjani futhi kubonakala ukuthi isifundo sizoqhubeka.—km-ZU 7/04 k. 1.
Izincwadi Ezituswayo
◼ Yini UNkulunkulu Ayifunayo Kithi?
◼ Ulwazi Oluholela Ekuphileni Okumi Phakade
◼ Khulekela Okuwukuphela KukaNkulunkulu Weqiniso
◼ Ungaba Umngane KaNkulunkulu! Lena ingasetshenziselwa ukufunda nabantu abangafundile kangako noma abangakwazi ukufunda.
INgxenye 2: Ukulungiselela Ukuqhuba Isifundo
Kudingeka sidlulisele ukwaziswa ngendlela eyothinta inhliziyo yomfundi. Lokhu kudinga ukuba silungiselele kahle ngendlela eyomzuzisa.—km-ZU 8/04 k. 1.
Indlela Yokulungiselela
◼ Bheka isihloko, izihlokwana nezithombe ezisesahlukweni noma esifundweni.
◼ Thola izimpendulo zemibuzo esencwadini, udwebele kuphela amagama namabinzana ayinhloko.
◼ Nquma ukuthi yimiphi imiBhalo ozoyifunda lapho usuqhuba isifundo. Bhala amaphuzu kafushane eceleni encwadini efundwayo.
◼ Lungiselela imibuzo yokubukeza kafushane amaphuzu ayinhloko.
Vumelanisa Isifundo Nezidingo Zomfundi
◼ Mthandazele umfundi nezidingo zakhe.
◼ Cabangela kusengaphambili amaphuzu umfundi angase abe nobunzima bokuwaqonda noma ukuwamukela.
◼ Zibuze: Yini okudingeka ayiqonde noma asebenzele kuyo ukuze athuthuke ngokomoya? Ngingayifinyelela kanjani inhliziyo yakhe?
◼ Lapho kudingeka, lungiselela umfanekiso, incazelo, noma uhlu lwemibuzo ukuze usize umfundi aqonde iphuzu noma umBhalo othile.
INgxenye 3: Ukusebenzisa ImiBhalo Ngokuphumelelayo
Injongo yethu lapho siqhuba izifundo zeBhayibheli ‘ukwenza abafundi’ ngokusiza abantu baqonde futhi bamukele izimfundiso zeZwi likaNkulunkulu futhi bazisebenzise ekuphileni kwabo. (Math. 28:19, 20; 1 Thes. 2:13) Ngakho, isifundo kufanele sigxile emiBhalweni.—km-ZU 11/04 k. 4.
Fundisa NgeZwi LikaNkulunkulu
◼ Bonisa umfundi indlela yokuthola amavesi athile eBhayibhelini lakhe.
◼ Fundani futhi nixoxe ngemiBhalo ebonisa ukuthi zisekelwephi izinkolelo zethu.
◼ Sebenzisa imibuzo. Kunokuchazela umfundi amavesi eBhayibheli, mcele kube nguye okuchazela wona.
◼ Sigcine silula. Ungazami ukuchaza konke okushiwo umBhalo. Yisho kuphela lokho okudingekayo ukuze ucacise iphuzu enifunda ngalo.
◼ Bonisa ukuthi isebenza kanjani. Siza umfundi abone indlela imiBhalo esebenza ngayo kuye ngokwakhe.
INgxenye 4: Ukuqeqesha Abafundi Ukuba Balungiselele
Umfundi osifundayo isifundo kusengaphambili, adwebele izimpendulo, futhi acabange ngokuthi uzozisho kanjani ngamazwi akhe uthuthuka ngokushesha ngokomoya. Ngakho, uma seniqalile ukufunda njalo, lungiselelani isifundo esithile ndawonye ukuze ubonise umfundi ukuthi kwenziwa kanjani. Abafundi abaningi kuyobasiza ukulungiselela nabo isahluko noma isifundo sonke.—km-ZU 12/04 k. 1.
Ukudwebela Nokubhala Eceleni
◼ Chaza ukuthi zitholakala kanjani izimpendulo zemibuzo ebhaliwe.
◼ Bonisa umfundi incwadi yakho eniyifundayo odwebele kuyo amagama noma amabinzama ayinhloko kuphela.
◼ Msize umfundi abone ukuthi umBhalo ngamunye okhonjiwe usekela iphuzu elithile esigabeni, futhi umbonise ukuthi angabhala kanjani kafushane eceleni encwadini yakhe.
Ukuhlola Amabal’ engwe Nokubukeza
◼ Bonisa umfundi indlela yokucabangela isihloko sesahluko noma sesifundo, izihlokwana nezithombe ngaphambi kokuba aqale ukulungiselela ngokuningiliziwe.
◼ Khuthaza umfundi ukuba abukeze amaphuzu ayinhloko lapho eqeda ukulungiselela.
INgxenye 5: Ukunquma Ubungako Bendaba Okufanele Ihlanganiswe
Ubungako bendaba engase ihlanganiswe buyoxhomeka ekhonweni nasezimweni zabo bobabili umfundi nomfundisi wakhe.—km-ZU 1/05 k. 1.
Yakha Ukholo Oluqinile
◼ Ungajahi kakhulu libe lingamkhanyeli umfundi iZwi likaNkulunkulu.
◼ Nikeza umfundi isikhathi asidingayo ukuze umsize aqonde futhi amukele lokho akufundayo.
◼ Hlela ukuba usebenzise isikhathi esanele sokucabangela imiBhalo eyisihluthulelo enikeza isisekelo sezimfundiso.
Hlalani Endabeni Efundwayo
◼ Uma umfundi ethambekele ekuxoxeni isikhathi eside ngezindaba zomuntu siqu, kungase kudingeke nihlele ukuba nixoxe ngazo ngemva kwesifundo.
◼ Gwema ukukhuluma kakhulu phakathi nesifundo. Ukuxoxa ngamaphuzu aseceleni nokuhlangenwe nakho makungavami ukuze kungaphazamisi umfundi ekuzuzeni ulwazi olunembile lwezimfundiso eziyisisekelo zeBhayibheli.
INgxenye 6: Lapho Umfundi Ebuza Umbuzo
Lapho isifundo seBhayibheli sesiqhutshwa njalo, ngokuvamile kungcono kakhulu ukuba nicabangele izimfundiso zeBhayibheli ngendlela ehlelekile kunokuba nigcogcome nisuka kwesinye isihloko niya kwesinye. Lokhu kusiza umfundi ukuba akhe isisekelo solwazi olunembile nokuba athuthuke ngokomoya.—km-ZU 2/05 k. 6.
Bonisa Ukuqonda
◼ Ngokuvamile, imibuzo ehlobene nesihloko enisifundayo ingaphendulwa ngaso leso sikhathi.
◼ Imibuzo engahlobene nesifundo noma edinga ukucwaninga ingaphendulwa ngesinye isikhathi. Kungase kusize ukuyibhala phansi imibuzo enjalo.
◼ Uma umfundi ekuthola kunzima ukwamukela imfundiso ethile, fundani ezinye izincwadi ezixoxa ngokuningiliziwe ngaleyo ndaba.
◼ Uma umfundi engakagculiseki, yishiyele isikhathi esizayo leyo ndaba niqhubeke nesifundo.
Bonisa Ukuthobeka
◼ Uma ungayazi impendulo yombuzo othile, unganikezi umbono wakho.
◼ Mbonise kancane kancane umfundi indlela yokucwaninga.
INgxenye 7: Ukuthandaza Esifundweni
Kudingeka isibusiso sikaJehova ukuze abafundi beBhayibheli bathuthuke ngokomoya. Ngakho-ke, kufanelekile ukuba sisiqale futhi sisiphethe ngomthandazo isifundo esiqhutshwa njalo.—km-ZU 3/05 k. 4.
Ukwethula Indaba Yokuqala Ngomthandazo
◼ Uma umuntu ejwayelene nenkolo, ngokuvamile umthandazo ungenziwa kusukela esifundweni sokuqala ngqá.
◼ Kwabanye, kudingeka sibhekisise ukuthi singasiqala nini isifundo ngomthandazo.
◼ Singasebenzisa iHubo 25:4, 5 neyoku-1 Johane 5:14 ukuze sichaze ukuthi kungani sithandaza.
◼ Singasebenzisa uJohane 15:16 ukuze sibonise ukuthi kufanele sithandaze kuJehova ngegama likaJesu Kristu.
Okungase Kushiwo Emthandazweni
◼ Kuyafaneleka ukudumisa uJehova njengoMthombo wemfundo.
◼ Yisho amazwi aveza isithakazelo esiqotho onaso kumfundi.
◼ Yisho amazwi aveza ukwazisa onakho ngenhlangano uJehova ayisebenzisayo.
◼ Celela umfundi isibusiso sikaJehova emizamweni yakhe yokusebenzisa lokho akufundayo.
INgxenye 8: Ukuqondisa Abafundi Enhlanganweni
Umgomo wethu lapho siqhuba izifundo zeBhayibheli akukhona nje ukudlulisela kubantu izimfundiso kodwa futhi uwukusiza abafundi babe yingxenye yebandla lobuKristu. Zinike imizuzu embalwa isonto ngalinye lapho nifunda uchaze iphuzu elithile ngenhlangano kaJehova.—km-ZU 4/05 k. 8.
Imihlangano Yebandla
◼ Chaza umhlangano webandla ngamunye. Bameme ukuba babe khona nisaqala nje ukufunda.
◼ Baxoxele amaphuzu avelele avezwe emihlanganweni.
◼ Benze basilangazelele iSikhumbuzo, imihlangano emincane nemikhulu nokuhambela kombonisi wesifunda.
◼ Sebenzisa izithombe ezisezincwadini zethu ukuze ubasize babone ngeso lengqondo ukuthi kuqhubekani.
◼ Bakhuthaze ukuba bafunde incwajana ethi OFakazi BakaJehova—Bangobani? Yini Abayikholelwayo?
Sebenzisa Ama-video Ukuze Wakhe Ukwazisa
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
INgxenye 9: Ukuhlomisela Abafundi Ukushumayela Ngokwethukela
Lapho abafundi beBhayibheli beqala ukubonisa ukholo kulokho abakufundayo, bashukumiseleka ukuba bakhulume ngakho.—km-ZU 5/05 k. 1.
Bakhuthaze Ukuba Bashumayele
◼ Bakhona yini abanye njengabangane namalungu omkhaya umfundi angase abacele ukuba babe khona esifundweni sakhe?
◼ Bakhona yini asebenza nabo, afunda nabo, noma abanye abantu abaziyo abaye babonisa ukuthi bayazithanda lezi zindaba?
Baqeqeshe Ukuba Baxoxe Ngezinkolelo Zabo
◼ Ezindaweni ezithile phakathi nesifundo, mbuze umfundi, “Ungalisebenzisa kanjani iBhayibheli ukuze uchazele abakini leli qiniso?”
◼ Msize umfundi abone isidingo sokuba nenhlonipho nomusa lapho ekhuluma nabanye ngoNkulunkulu nangezinjongo zaKhe.
◼ Umfundi angasebenzisa incwajana ethi OFakazi BakaJehova—Bangobani? Yini Abayikholelwayo? ukuze asize abangane namalungu omkhaya baqonde izinkolelo zethu ezisekelwe eBhayibhelini nalokho esikwenzayo.
INgxenye 10: Ukuqeqesha Abafundi Enkonzweni Yendlu Ngendlu
Lapho abadala benquma ukuthi umfundi weBhayibheli uyakufanelekela ukuba ummemezeli ongabhapathiziwe, angaqala ukuhlanganyela nebandla emsebenzini wokushumayela obala.—km-ZU 6/05 k. 1.
Ngokulungiselela Ndawonye
◼ Bonisa ummemezeli osaqala ukuthi angazitholaphi izintshumayelo ezisikiselwayo.
◼ Msize akhethe intshumayelo elula esebenzayo ensimini yebandla.
◼ Mkhuthaze ukuba asebenzise iBhayibheli lapho esenkonzweni.
◼ Prakthiza naye. Mbonise indlela yokuziphendula ngobuhlakani izinto abantu abavame ukuzisho ensimini yebandla.
Ngokushumayela Ndawonye
◼ Mcele umfundi ukuba alalele njengoba unikeza intshumayelo eniyilungiselele ndawonye.
◼ Cabangela ubuntu namakhono omfundi. Kwezinye izimo, kungase kube ngcono kakhulu ukumcela ukuba enze ingxenye nje yaleyo ntshumayelo.
◼ Msize ummemezeli osaqala ukuba abe nesimiso sasikhathi sonke sokuhlanganyela enkonzweni.
INgxenye 11: Ukusiza Abafundi Ukuba Benze Izimpindelo
Ukulungiselela impindelo kuqala ekuhambeleni kokuqala. Mkhuthaze umfundi ukuba abe nesithakazelo esiqotho kubantu akhuluma nabo. Kancane kancane, mqeqeshe ukuba enze umninikhaya asho akucabangayo, amlalele lapho ekhuluma, futhi aphawule izinto ezimkhathazayo.—km-ZU 7/05 k. 1.
Ukulungiselela Ukwenza Impindelo
◼ Bukezani ingxoxo yokuhambela kokuqala, bese usiza umfundi akhethe indaba eyokhanga umninikhaya.
◼ Lungiselelani intshumayelo emfushane enomBhalo owodwa kanye nesigaba esisencwadini efundwayo.
◼ Lungiselelani umbuzo ongase ubuzwe ekupheleni kwengxoxo.
Landelela Isithakazelo Ngenkuthalo
◼ Mkhuthaze umfundi ukuba aphindele ngokushesha kubo bonke ababonisa isithakazelo.
◼ Msize umfundi abone isidingo sokuphikelela emizamweni yokuthola labo abangatholakali kalula.
◼ Bonisa umfundi omusha indlela yokubeka usuku nesikhathi sokuhambela okulandelayo, umsize aqonde isidingo sokuphindela njengoba ethembisile.
INgxenye 12: Ukusiza Abafundi Ukuba Bakwazi Ukuqala Nokuqhuba Izifundo ZeBhayibheli
Kubalulekile ngawe ukuba ulingise uJesu ngokubeka isibonelo esihle enkonzweni yakho. Njengoba umfundi eqaphela isibonelo sakho enkonzweni, uyoqonda ukuthi umgomo wokwenza izimpindelo uwukuqala izifundo zeBhayibheli.—km-ZU 8/05 k. 1.
Ukucela Ukuqhubela Umuntu Isifundo SeBhayibheli
◼ Chazela umfundi ukuthi ngokuvamile akudingeki ukuba sichaze yonke imininingwane ephathelene namalungiselelo esifundo.
◼ Ngokuvamile kungcono kakhulu ukuba umane ubonise lowo muntu indlela esiqhuba ngayo isifundo ngokusebenzisa mhlawumbe isigaba esisodwa noma ezimbili zencwadi esiqhuba ngayo izifundo.
◼ Bukezani futhi niprakthize indlela eyodwa kwezisikiselwe zokuqala izifundo zeBhayibheli.—km-ZU 8/05 k. 8; km-ZU 1/02 k. 6.
Ukuqeqesha Abafundi Ukuba Babe Abafundisi
◼ Bakhuthaze abafundi ukuba babhalise eSikoleni Senkonzo Esingokwasezulwini.
◼ Hlela ukuba abamemezeli abasaqala babe khona lapho kuqhutshwa ezinye izifundo zeBhayibheli futhi bangase bahlanganyele ngezinga elincane ekufundiseni.