“Ngilandele Njalo”
1 Abantu abaningi baphilela ukuzijabulisa, kodwa abajabule. UJesu watusa inkambo ehlukile. Watusa ukupha okungenabugovu okuletha injabulo yangempela. (IzE. 20:35) Wathi: “Uma umuntu efuna ukungilandela, makazidele . . . angilandele njalo.” (Marku 8:34) Lokhu kuhlanganisa okungaphezu kokuzincisha izinjabulo ezithile ngezikhathi ezithile. Kusho ukuphila usuku ngalunye ngenjongo yokujabulisa uJehova, hhayi thina.—Roma 14:8; 15:3.
2 Cabanga ngesibonelo somphostoli uPawulu. Ngenxa “yenzuzo edlula zonke izinto, yolwazi ngoKristu Jesu,” wayeka ukuphishekela izifiso zakhe siqu, wazinikela ukuze athuthukise izithakazelo zoMbuso. (Fil. 3:7, 8) Wathi: “Mina ngizokuthokozela kakhulu ukusebenzisa konke enginakho nokuba ngisetshenziswe ngokuphelele” ekukhonzeni ebanye. (2 Kor. 12:15) Ngamunye wethu wenza kahle ngokuzibuza: ‘Ngisisebenzisa kanjani isikhathi, amandla, amakhono nezinto zami? Ingabe ngigxile ekuthuthukiseni izinto ezithandwa yimi, noma ngifuna ukujabulisa uJehova?’
3 Amathuba Okupha: Unyaka ngamunye, abantu bakaNkulunkulu banikela ngamahora angaphezu kwezigidi eziyinkulungwane emsebenzini osindisa ukuphila wokushumayela ngoMbuso. Ebandleni, abasha nabadala benza imisebenzi ehlukahlukene ezuzisa abanye. Kwenziwa umsebenzi omkhulu futhi ngokuqondene nemihlangano yesifunda neyesigodi kanye nokwakhiwa nokulungiswa kwezakhiwo ezisetshenziselwa ukuthuthukisa ukukhulekela kweqiniso. Cabanga futhi nangosizo olubonisa uthando olunikezwa ngabazalwane abakhonza emaKomitini Okubonisana Nezibhedlela Namaqembu Avakashela Iziguli. Yonke le mizamo yokuzidela iyisibusiso ebuzalwaneni bethu njengamaKristu!—IHu. 110:3.
4 Amathuba okusiza ngezindlela ezihlukahlukene angase avele lapho kuba nenhlekelele no-ma lapho kuvela isimo esiphuthumayo. Nokho, ezimweni eziningi amathuba okusiza abanye cishe ayovela lapho umKristu othile edinga usizo noma isikhuthazo. (IzAga 17:17) Lapho sizidela ngokuzithandela sikhonze abanye futhi sithuthukise izithakazelo zoMbuso, sisuke silandela isibonelo sikaJesu. (Fil. 2:5-8) Kwangathi singalwela ukukwenza njalo lokhu.