Isimiso Esisha SoMhlangano Okhethekile Wosuku Olulodwa
Isihloko sesimiso somhlangano okhethekile wosuku olulodwa wonyaka wenkonzo ka-2008 sithi “Thina Siwubumba—UJehova UnguMbumbi Wethu,” sisekelwe ku-Isaya 64:8. Iseluleko esingokomBhalo esitholakala ngalesi simiso siyosenza sikwazise kakhulu ukuhlakanipha kukaJehova, ubulungisa bakhe, amandla nothando lwakhe njengoMbumbi Omkhulu.
Inkulumo yombonisi wesifunda, enesihloko esithi “Ukukhonza Njengezitsha Ezinodumo Enkonzweni,” iyobonisa indlela abaningi ngokwengeziwe abajabulela ngayo isibusiso esikhulu sokwazi iqiniso nokutshela abanye ngalo. Inkulumo ethi “Ukuzindla Kuyokuqapha” iyokwembula indlela ukuzindla ngezimiso zikaJehova zokulunga okusivikela ngayo. Isikhulumi esivakashile siyoxoxa nezilaleli ngesihloko esithi “‘Ningalolongwa Nifane Nalesi Simiso Sezinto’” nesithi “Vumela UMbumbi Omkhulu Ukuba Akulolonge.” Abazali nezingane bayothola isikhuthazo enkulumweni ethi “Intsha Ewusizo KuJehova” nethi “Indima Ebalulekile Yabazali Ekulolongeni.” Ngemiboniso nangezingxoxo, siyojabulela ukuzwa nokubona lokho abafowethu nodadewethu abakufezayo enkonzweni yabo. Labo abafisa ukubonakalisa ukuzinikezela kwabo kuNkulunkulu ngokubhapathizwa emanzini kufanele batshele umbonisi owengamele ngokushesha ngangokunokwenzeka. Qiniseka ukuthi uphatha umagazini wakho INqabayokulinda ozofundwa ngesonto lomhlangano okhethekile wosuku olulodwa.
Noma yini uMbumbi Omkhulu ayihlosile uyayifeza. Kodwa kukithi ngabanye ukuba sikhethe indlela esizosabela ngayo ekusilolongeni kwakhe. Labo abenza ngokuhlakanipha bazithobe ezindinganisweni nasekulungisweni uJehova njengesigaxa sobumba esondweni lombumbi, bangalolongwa, bapholishwe futhi bashintshwe babe yizitsha eziwusizo. Uma sibambisana noJehova, sikhazimulisa ubukhosi bakhe futhi sithola izibusiso eziningi.