Incwadi Yegatsha
Bamemezeli Abathandekayo:
Siyajabula ukubona intuthuko yomsebenzi ebe khona emasimini angaphansi kwegatsha laseNingizimu Afrika phakathi nonyaka wenkonzo ka-2007! Ngo-April safinyelela inani eliphakeme labamemezeli abangu-79 266 eNingizimu Afrika. Ngo-January iLesotho yabika inani elisha eliphakeme labamemezeli abangu-3 376, iBotswana yafinyelela inani elisha eliphakeme labamemezeli abangu-1 681. Ngo-March iNamibia yabika inani elisha eliphakeme labamemezeli abangu-1 499, iSwaziland yabika abamemezeli abangu-2 529 ngo-April. Nenze kahle bafowethu! Asizange siwufinyelele umgomo wamaphayona asizayo angu-14 000 ngo-April, njengoba kwasikiselwa esenezelweni se-Nkonzo Yethu YoMbuso ka-February. Nokho, bangu-9 036 abantu abahlanganyela enkonzweni yamaphayona asizayo kuwo wonke amazwe angaphansi kwegatsha lethu.
Ngo-September 2006 abaningi bakujabulela ukusakaza i-Phaphama! ekhethekile. Ngemva kwalokho saba nomkhankaso we-Kingdom News No. 37, ethi “Ukuphela Kwenkolo Yamanga Kuseduze!” Ngemva kokuthola nokufunda ikhophi yayo, udade owayesepholile akakwazanga ukulala. NgeSonto elilandelayo, waya esifundweni wafike wacela isifundo seBhayibheli. Isimemo esikhethekile somhlangano wesigodi naso senza abaningi ngokwengeziwe baba khona emihlanganweni yesigodi. Insizwa ethile KwaZulu-Natal yasamukela isimemo yaba khona. Kusukela ngaleso sikhathi ayikaze iphuthe emihlanganweni futhi manje isingummemezeli ongabhapathiziwe. Abanye endaweni baye babona izinguquko kule nsizwa nabo bacela isifundo seBhayibheli futhi baba khona emihlanganweni. Nakulo nyaka sizophinde sibe nethuba lokumemela abantu eMhlanganweni Wesigodi othi “Landela UKristu!”
Injongo yale mikhankaso iwukusiza abanhliziyo ziqotho ukuba bazi lokho okufundiswa iBhayibheli ngempela. (Math. 28:19, 20) Njengoba ushumayela, khumbula ukubhala phansi bonke abanesithakazelo, bese ubuyela kubo ngenjongo yokuqala isifundo seBhayibheli. Siyakujabulela ukubambisana nani kulo msebenzi obalulekile, futhi sikhonza kini ngothando olufudumele lobuKristu.
Abafowenu,
IHhovisi Legatsha LaseNingizimu Afrika