Sinamagugu Esingawahlanganyela Nabanye
1 IZwi likaNkulunkulu linenqwaba yamagugu angokomoya esiwazisayo. (IHu. 12:6; 119:11, 14) UJesu wake wasebenzisa imifanekiso ebonisa izici ezihlukene zoMbuso, wabe esebuza abafundi bakhe: “Ingabe niwutholile umqondo wazo zonke lezi zinto?” Ngemva kokuvuma kwabo, wathi kubo: “Uma kunjalo, wonke umfundisi wasobala, lapho efundiswa ngokuqondene nombuso wamazulu, unjengomuntu, umninindlu, okhipha emtatsheni wakhe wengcebo izinto ezintsha nezindala.”—Math. 13:1-52.
2 Amaqiniso eBhayibheli esawazi uma siqala ukufunda angase abhekwe njengamagugu amadala. Njengoba siqhubeka sifunda izinto ezijulile zeZwi likaNkulunkulu, sithola amanye amaqiniso eBhayibheli, angamagugu amasha kithi. (1 Kor. 2:7) Futhi, ‘ngenceku ethembekileyo neqondayo,’ siqonda amagugu amasha.—Math. 24:45.
3 Siwazisa ngempela la magugu angokomoya, amadala namasha. Lokhu kusishukumisela ukuba sifune ukuqeqeshwa futhi sibe nolwazi njengabafundisi beZwi likaNkulunkulu, siwahlanganyele nabanye ngomusa amaqiniso ayigugu esiwafundile.
4 Funda Esibonelweni SikaJesu: Ebonisa indlela ayezizwa ngayo ngala magugu, uJesu wenza konke okusemandleni akhe ukuze awahlanganyele nabanye. Ngisho nalapho ekhathele, akayekanga ukukhipha amagugu “enqolobaneni” yakhe.—Joh. 4:6-14.
5 Uthando lukaJesu ngalabo abasesimweni esibi ngokomoya lwamshukumisela ukuba abatshele ngamagugu anikeza ukuphila eqiniso likaNkulunkulu. (IHu. 72:13) Wayebahawukela abalambile ngokomoya futhi washukumiseleka ukuba ‘abafundise izinto eziningi.’—Marku 6:34.
6 Lingisa UJesu: Uma siwazisa njengoJesu amagugu angokomoya esinawo, siyofuna ukuwabonisa abantu ngokuqondile eBhayibhelini. (IzAga 2:1-5) Nakuba kungenzeka sikhathele ngezinye izikhathi, siyokhuluma ngamaqiniso angokomBhalo ngentshiseko esuka enhliziyweni. (Marku 6:34) Ukwazisa kwethu okujulile ngamagugu esinawo kuyosishukumisela ukuba sizikhandle njalo enkonzweni, sifune indlela yokuhlanganyela kuyo ngokugcwele.