Ukuthuthukisa Amakhono Ethu Enkonzweni​—Ukubhala Imininingwane Yabanesithakazelo

“Ziqaphele njalo wena nokufundisa kwakho.” (1 Thim. 4:16) Lesi seluleko esiphefumulelwe, umphostoli uPawulu asibhalela uThimothewu sibonisa ukuthi kufanele sizikhandle ukuze sithuthuke, kungakhathaliseki ukuthi sibasha noma singomakad’ ebona. Ukuze sisizwe ekwenzeni lokho, INkonzo Yethu YoMbuso izoba nezihloko ezintsha eziwuchungechunge ezinesihloko esithi, “Ukuthuthukisa Amakhono Ethu Enkonzweni.” Isihloko ngasinye sizoxoxa ngekhono elibalulekile futhi sisinikeze amacebiso athile okulithuthukisa. Phakathi nenyanga, sonke sikhuthazwa ukuba sisebenzele ngokukhethekile kulelo khono. Ngemva kokuphela kwenyanga, kuzoba nengxenye eMhlanganweni Wenkonzo ezosinika ithuba lokuchaza indlela esizuze ngayo ngokusebenzela kulelo khono. Kule nyanga sikhuthazwa ukuba sisebenzele ekubhaleni imininingwane yabanesithakazelo.

Okwenza Kubaluleke: Ukuze sifeze ukuthunywa kwethu kumelwe senze okungaphezu kokushumayela. Kumelwe siphindele kulabo ababonisa isithakazelo futhi sibafundise, sinisele imbewu yeqiniso esiyitshalile. (Math. 28:​19, 20; 1 Kor. 3:​6-9) Lokhu kudinga ukuba siphinde simthole lowo muntu, sikhulume ngezinto ezimkhathazayo bese siqhubeka nengxoxo yangesikhathi esidlule. Ngakho lapho sithola onesithakazelo, kubalulekile ukubhala imininingwane yakhe.