Indlela Yokufakaza Ngezinqola Namatafula

Ukufakaza ngezinqola namatafula kubonakala kuyindlela ephumelela kakhulu yokudonsela abantu abanhliziyo ziqotho eqinisweni. (Joh. 6:44) Ngakho, abadala baye bakhuthazwa ukuba bahlele ukufakaza ngezinqola namatafula ezindaweni zensimu yebandla ezinabantu abaningi abadlulayo. Njengoba izinqola namatafula kuyizinto esihamba nazo uma sesiqedile, ngokuvamile asikho isidingo sokucela imvume yeziphathimandla. Obani abafanelekela ukuhlanganyela kulokhu? Abamemezeli ababonisa ukwahlulela okuhle, abaziphatha ngenhlonipho nabanekhono elihle lokuxoxa. Ngezansi kubhalwe izinto abamemezeli okufanele bazenze nokungafanele bazenze, ezizobasiza baphumelele ngokwengeziwe.

Okufanele Ukwenze:

Yiba nobungane, ungeneke futhi ube usizo kubantu abadlulayo. Abanye abamemezeli bamoyizela ngobungane nangobuqotho bese bebingelela. Uma umuntu ebuka inqola noma itafula njengoba edlula, ungase uthi, “Ungazithathela okuthile uma uthanda.”
Qhela ngokwanele enqoleni noma etafuleni. Kwezinye izindawo abamemezeli bathola imiphumela emihle uma bengaqheli kakhulu enqoleni. Abanye bathola ukuthi lokho kwenza abadlulayo banqikaze ukuma, ngakho bathi ukuqhelaqhela balinde kuze kube yilapho umuntu ema eduze kwenqola noma kwetafula. Uma umuntu ema eduze kwenqola noma kwetafula, zama ukumhilela engxoxweni mhlawumbe ngokumbuza, “Ingabe uke wacabanga ngalo mbuzo ngaphambilini?”
Sebenzisa iBhayibheli kaningi ngangokunokwenzeka.
Chaza ilungiselelo lesifundo seBhayibheli kunoma ubani othatha enye yezincwadi zethu, njengencwadi ethi Okufundiswa IBhayibheli. Cela ukumdlalela i-video ethi Kungani Kufanele Utadishe IBhayibheli? ngomakhalekhukhwini noma nge-tablet.
Uma kungenzeka, thatha imininingwane yalabo ababonisa isithakazelo.