Ukuthuthukisa Amakhono Ethu Enkonzweni—Ukuqala Ingxoxo Ukuze Ufakaze Ngokwethukela

Okwenza Kubaluleke: Lapho sisenkonzweni yendlu ngendlu, sivame ukuthola abantu abaningi bengekho emakhaya. Nokho, singase sihlangane nabo lapho sigibele izinto zokuhamba zomphakathi, lapho sisegunjini lokulinda likadokotela, lapho sisekhefini emsebenzini noma esikoleni, njalonjalo. Kuyintando kaJehova ukuba bonke abantu bathole ithuba lokuzwa isigijimi soMbuso. (1 Thim. 2:3, 4) Ngokuvamile, ukuze sishumayele, kumelwe sithathe isinyathelo sokuqala ingxoxo.

Indlela Yokukwenza:

Mkhethe umuntu ozokhuluma naye. Ingabe ubonakala enobungane futhi ezimisele ukuxoxa? Ingabe izimo ziyanivumela ukuba nixoxe ngokukhululekile? Abanye abamemezeli baqale bambheke umuntu bese bemoyizela. Uma naye emoyizela, bazama ukuqala ingxoxo.
Thandaza kafushane buthule uma ungenaso isibindi sokukhuluma.—Neh. 2:4; IzE. 4:29.
Qala ngokusho amazwi alula, mhlawumbe umbingelele. UJesu akaqalanga ingxoxo yakhe nowesifazane ongumSamariya ngokukhuluma ngoMbuso. (Joh. 4:7) Ngezinye izikhathi singaqala ingxoxo ngokuncoma: “Izingane zakho ziyalalela!” Enye indlela yokuqala ingxoxo ukubuza umbuzo: “Uzibukile izindaba izolo?”
Uma usuyiqalile ingxoxo, funa ithuba lokwethula izindaba ezinhle, kodwa ungajahi. Vumela ingxoxo iqhubeke ngendlela engokwemvelo. Mhlawumbe ungasho okuthile okuzomenza abe nelukuluku lokwazi okwengeziwe bese ekubuza umbuzo. Ngokwesibonelo, uma nixoxa ngezindaba zomkhaya, ungase uthi, “Ngithole amacebiso awusizo okukhulisa izingane.” Uma nixoxa ngombiko othile wezindaba, ungase uthi, “Ngisanda kujabulela ukufunda izindaba ezinhle, okuyinto engasavamile.” Ungadangali uma ingxoxo iphela ngaphambi kokuba unikeze ubufakazi.
Phatha amapheshana noma ezinye izincwadi ongazihambisela umuntu obonisa isithakazelo.

Zama Lokhu Phakathi Nenyanga:

Isonto ngalinye zama ukuqala ingxoxo okungenani nomuntu oyedwa unomgomo wokufakaza ngokwethukela.