Lingisa Ukholo Lwabo
1. Sizoxoxa ngani eSifundweni SeBhayibheli Sebandla kusukela ngesonto eliqala ngo-October 19?
1 Kusukela ngesonto eliqala ngo-October 19, 2015, sizoqala ukufunda incwadi ethi Lingisa Ukholo Lwabo eSifundweni SeBhayibheli Sebandla. Le ncwadi ilandisa ngamadoda nabesifazane abangu-14 ababonisa ukholo okukhulunywa ngabo eBhayibhelini. Ukulandisa okukule ncwadi kubekwe ngendlela eyenza la madoda nabesifazane abathembekile babe ngokoqobo ezingqondweni zethu, okusisiza ukuba sibabone njengabantu abangokoqobo ababhekana novivinyo njengoba bekhonza uJehova. Le ncwadi inanezifundo esingazisebenzisa ngokoqobo ekuphileni kwethu namuhla.—Heb. 6:12.
2. Chaza ezinye izici zencwadi ethi Lingisa Ukholo Lwabo.
2 Izici Zayo: Le ncwadi inohlu lwezikhathi zezenzakalo namabalazwe okuzosisiza sibone ukuthi umuntu ngamunye wayehlalaphi. Ngaphezu kwalokho, isahluko ngasinye sinengxenye ethi “Ongacabanga Ngakho . . . ,” ezosisiza ukuba sizindle ngalokhu kulandisa futhi sizisebenzise ngokoqobo izifundo esizifundile. Le ncwadi inemifanekiso eminingi enemibala emihle, imininingwane nezithombe ezicatshangelwe kahle, konke okwenza ukuba izindaba ezikuyo ziphile.
3. Yini esingayenza ukuze sizuze ekutadisheni le ncwadi?
3 Indlela Ongazuza Ngayo: Incwadi yokuvula evela eNdikimbeni Ebusayo isikhuthaza ngala mazwi: “Kubone ngeso lengqondo okufundayo; hilela izinzwa zakho. Zama ukuzwa lokho abakuzwa abantu okukhulunywa ngabo eBhayibhelini, ubone lokho abakubona. Qhathanisa indlela abasabela ngayo ezimweni ezithile nendlela wena cishe owawuyosabela ngayo.” Yiqiniso, ukusebenzisa iso lengqondo akusho ukuthi sekufanele siqagele, kunalokho, kusho ukubona ukuthi ukulandisa okuphefumulelwe kuthini futhi uzwelane nabantu okukhulunywa ngabo. Ukwenza kanjalo kudinga isikhathi nokuzindla. (Neh. 8:8) Uma isifundo siqala phakathi nesahluko, umqhubi uyoqale abukeze okwafundwa ngokudlule imizuzwana engu-30 kuya kwengu-60. Kungase kubuzwe umbuzo owodwa noma emibili ekuphetheni uma isifundo singayihlanganisi ingxenye ethi “Ongacabanga Ngakho . . . ”
4. Kungani kudingeka sitadishe incwadi ethi Lingisa Ukholo Lwabo?
4 Siphila ezweni elifuna ukuqeda noma ukwenza buthaka ukholo lwethu nsuku zonke. Le ncwadi—kanye nochungechunge olukuyi-Nqabayokulinda esekelwe kulo—iyisipho esivela kuJehova esizosisiza siqinise ukholo lwethu. (Jak. 1:17) Masisisebenzise ngokugcwele lesi sipho ngokuba khona njalo eSifundweni SeBhayibheli Sebandla nangokuhlanganyela kuso ngokugcwele ngangokunokwenzeka njengoba sitadisha ndawonye!