“Ukunikeza Ubufakazi Obuphelele” NgoMbuso KaNkulunkulu
1. Yini esizoyifunda eSifundweni SeBhayibheli Sebandla kusukela ngesonto eliqala ngo-March 14?
1 Phakathi nesonto lika-March 14, 2011, sizoqala ukufunda incwadi ethi “Ukunikeza Ubufakazi Obuphelele” NgoMbuso KaNkulunkulu eSifundweni SeBhayibheli Sebandla. Le ncwadi ihlaziya incwadi yezEnzo ngendlela yokuba umfundi ajabulele ukulandelana okusheshayo kwezenzakalo ezilotshwe kuyo. Kunokuba ikhulumele ivesi nevesi, le ncwadi igxila ezifundweni ezitholakala ekulandiseni kwezEnzo futhi isisiza sibone ukuthi singazisebenzisa kanjani ekuphileni kwethu.—Roma 15:4.
2. Chaza ezinye zezinto ezisencwadini ethi Ukunikeza Ubufakazi.
2 Okuqukethwe Yile Ncwadi: Isethulo esisekhasini 2 siyincwadi efudumele evela eNdikimbeni Ebusayo eveza indlela efuna sizuze ngayo kule ncwadi. Kusukela esahlukweni sesibili, kunomusho oyisihluthulelo ochaza umongo waso nomBhalo obonisa ingxenye yencwadi yezEnzo okuzoxoxwa ngayo. Izahluko zayo eziningi zinamabhokisi anikeza umlando ngabantu, izindawo nezenzakalo. Izikhala ezibanzi ezisemaceleni singabhala kuzo amaphuzu. Yonke le ncwadi inezithombe ezichaza izenzakalo eziseBhayibhelini ezisisiza sizibone ngeso lengqondo izenzakalo ezibalulekile, futhi ekhasini lokugcina kunohlu oluwusizo lwezikhombo zezithombe oluchaza lokho okuvezwa yizithombe ezihlukahlukene. Ngaphakathi ekhasini lokuqala nelokugcina kunamabalazwe asisiza sibone izindawo abakhulekeli bakaNkulunkulu bekhulu lokuqala abashumayela kuzo izindaba ezinhle kwaze kwaba ‘sezingxenyeni ezikude kakhulu zomhlaba.’—IzE. 1:8.
3. Imiphi imibuzo ezophendulwa ukufunda kwethu incwadi yezEnzo?
3 Izimpendulo Zemibuzo Ebalulekile: Ukucabangela le ncwadi yezEnzo kuzosisiza ukuba siziqonde ngokucacile izimpendulo zemibuzo ebalulekile ngenkonzo yobuKristu. Ngokwesibonelo, yimuphi umsebenzi nesigijimi esibonakalisa abalandeli beqiniso bakaJesu Kristu? Ubani oqondisa umsebenzi wokushumayela, futhi kanjani? Imaphi amathuba ushushiso nokuphikiswa okwawavulela abashumayeli? Iyiphi indima efezwa umoya ongcwele enkonzweni yethu?
4. Singazuza kanjani ngokugcwele ngokufunda le ncwadi?
4 Ukuze uzuze ngokugcwele, yifunde kusengaphambili indaba, bese uzimisela ukuhlanganyela engxoxweni ebandleni. Yiba khona emhlanganweni ngamunye futhi ucabange ngendlela ongazisebenzisa ngayo izifundo ozithola enkonzweni yakho. Sengathi ukufunda kwethu le ncwadi ethakazelisayo kungasishukumisela ukuba sinikeze ubufakazi obuphelele ngoMbuso kaNkulunkulu!—IzE. 28:23.