INDLELA YOKUQEDA UKUZONDANA OKUNGAPHELI

3 | Khipha Inzondo Engqondweni Yakho

IBhayibheli Lithi:

“Maniguqulwe ngokushintsha ingqondo yenu, ukuze nizitholele ngokwenu okuyintando kaNkulunkulu enhle neyamukelekayo nephelele.”—ROMA 12:2.

Lokho Okukushoyo:

Izinto esizicabangayo zibalulekile kuNkulunkulu. (Jeremiya 17:10) Kumele senze okungaphezu nje kokugwema izenzo noma amazwi alimazayo. Ukuzondana okungapheli kuqala engqondweni nasenhliziyweni. Ngakho, kumele sisiphule yonke iminonjana yenzondo esemicabangweni yethu nasezinhliziyweni zethu. Kungaleyo ndlela kuphela ‘esingaguqulwa’ ngayo ngempela futhi sinqobe ukuzondana okungapheli.

Lokho Ongakwenza:

Hlola ngobuqotho indlela ozizwa nocabanga ngayo ngabanye—ikakhulukazi labo bolunye uhlanga noma ubuzwe. Zibuze: ‘Ngibabheka kanjani? Ingabe indlela engibabheka ngayo isekelwe kulokho engikwaziyo ngabo? Noma isekelwe obandlululweni?’ Gwema izinkundla zokuxhumana, amamuvi noma ezinye izinhlobo zokuzijabulisa eziveza inzondo nodlame.

IZwi likaNkulunkulu lingasisiza sinqobe inzondo esengqondweni nasenhliziyweni yethu

Akulula ngaso sonke isikhathi ukuhlola imicabango nemizwa yethu ngendlela enobulungisa. Kodwa iZwi likaNkulunkulu lingasisiza sikwazi “ukuqonda imicabango nezinhloso zenhliziyo.” (Hebheru 4:12) Ngakho qhubeka uhlola iBhayibheli. Qhathanisa lokho elikufundisayo nalokho okucabangayo bese wenza konke okusemandleni ukuze uvumelanise lokho okucabangayo nalokho okufundiswa yiBhayibheli. IZwi likaNkulunkulu lingasisiza sinqobe inzondo ‘embelwe ngokuqinile’ engqondweni nasenhliziyweni yethu.—2 Korinte 10:4, 5.

Indaba Yokuphila—USTEPHEN

Wayishintsha Indlela Ayecabanga Ngayo

UStephen nomndeni wakhe babhekana nenzondo eyayivela kwabamhlophe. Ngenxa yalokho, wathonywa yiqembu lezombusazwe elalaziwa ngokulwela amalungelo abantu. Ngokuhamba kwesikhathi, waqala ukuhlanganyela ebugebengwini obabugqugquzelwa yinzondo. UStephen uthi: “Ngezinye izikhathi mina nabangane bami sasihamba siyobuka amabhayisikobho abonisa ukuhlukunyezwa kwezigqila zase-Afrika e-United States. Sicasulwe yilokho kungabi nabulungisa, sasivele sishaye intsha emhlophe khona lapho endaweni yokubuka amabhayisikobho. Ngemva kwalokho, sasiya ezindaweni okuhlala kuzo abamhlophe, sifune abantu esingabashaya.”

Indlela yokucabanga kaStephen yashintsha ngokuphelele lapho eqala ukufunda iBhayibheli noFakazi BakaJehova. Uyakhumbula: “Ngenxa yokuthi ngangijwayele ukubona ubandlululo lobuhlanga oluningi, izinto engazibona koFakazi zangimangaza kakhulu. Ngokwesibonelo, lapho uFakazi omhlophe kwakudingeka athathe uhambo oluya kwelinye izwe, washiya izingane zakhe nomndeni onsundu. Omunye umndeni wabamhlophe wamukela ekhaya lawo ingane ensudu eyayidinga indawo yokuhlala.” UStephen waqiniseka ngokuthi oFakazi BakaJehova banothando lobuzalwane lolo uJesu ayebikezele ukuthi lwaluyotholakala kumaKristu eqiniso.—Johane 13:35.

Yini eyasiza uStephen wayeka ukuba nodlame nokuzonda abanye? Wasizwa umBhalo wabaseRoma 12:2. UStephen uthi: “Ngaqaphela ukuthi kwakudingeka ngishintshe indlela yami yokucabanga. Kwadingeka ukuba ngiguqule ingqondo yami ukuze ngibe umuntu onokuthula futhi ngibone ukuthi lena indlela engcono kakhulu yokuphila.” Manje, uStephen usejabulele ukuphila ngaphandle kwenzondo iminyaka engaphezu kuka-40.