3 | Zuza Ezibonelweni EziseBhayibhelini

IBHAYIBHELI LIKHULUMA . . . Ngamadoda nabesifazane abanokholo ‘ababenemizwa efana neyethu.’—JAKOBE 5:17.

Lokho Okukushoyo

IBhayibheli likhuluma ngezindaba ezenzeka ngempela zamadoda nabesifazane ababenemizwa engafani. Lapho sifunda ngezibonelo zabo, singathola abanye ababenemizwa efana neyethu.

Indlela Lokhu Okungasiza Ngayo

Sonke siyadinga ukuthi abanye bayiqonde indlela esizizwa ngayo. Lokhu kuyiqiniso nakakhulu uma silwisana nesifo sokuphazamiseka kwengqondo. Lapho sifunda ngendaba ethile eseBhayibhelini, singase sithole abanye ababezizwa futhi becabanga njengathi. Lokhu kungasenza sibone ukuthi asisodwa, kunciphise nemizwa yokukhathazeka kakhulu.

IBhayibheli linamazwi ashiwo abantu ababezizwa bengelusizo lwalutho. Ingabe wake wawasho amazwi athi, ‘sekwanele, akusavumi’? UMose, u-Eliya noDavide bake bazizwa ngaleyo ndlela.—Numeri 11:14; 1 AmaKhosi 19:4; IHubo 55:4.
IBhayibheli lisixoxela ngowesifazane okuthiwa uHana ‘owayedabuke kakhulu’ ngoba wayengabatholi abantwana futhi umfazi owayeyimbangi yakhe wayehlale emgcona.—1 Samuweli 1:6, 10.
IBhayibheli lisixoxela ngendoda okuthiwa uJobe okungenzeka sisesimweni esifana nesayo. Nakuba ayeyindoda enokholo, wacindezeleka kakhulu waze wathi: “Ngiyakwenyanya ukuphila kwami; angisafuni ukuphila.”—Jobe 7:16.

Singathola amandla okubhekana nokucindezeleka esinakho, ngokufunda indlela la madoda nabesifazane okukhulunywa ngabo eBhayibhelini ababhekana ngayo ngokuphumelelayo nemizwa engemihle.

Indlela IBhayibheli Elimsiza Ngayo UKevin

Indlela Isifo Sokuguquguquka Kwemizwelo Esingithinta Ngayo

“Odokotela bathola ukuthi nginesifo sokuguquguquka kwemizwelo (bipolar disorder) lapho ngineminyaka ecela kwengu-50. Kuba khona izikhathi lapho ngibona sengathi ngingakwazi ukumelana nanoma yini. Ngezinye izikhathi, ngiye ngizizwe sengathi akukho engikuphilelayo.”

Indlela IBhayibheli Elingisiza Ngayo

“Umlingiswa iBhayibheli elikhuluma ngaye engingathi kukhona okuthile esifana ngakho umphostoli uPetru. Wenza amaphutha amenza wazizwa engento yalutho. Kunokuba aqhubeke nokuzizwa ngaleyo ndlela, uPetru wafuna usizo kubangane bakhe ababemthanda. Uma ngivukwe isifo sokuguquguquka kwemizwelo, ngivele ngiwakhumbule wonke amaphutha ami, usuku lungahambi kahle bese ngizizwa ngingento yalutho. NjengoPetru, ngiye ngazama ukuhlala ngiseduze nabangane abafuna ukungisiza ngingaliphonsi ithawula.

“Omunye umlingiswa iBhayibheli elikhuluma ngaye engithi uma ngifunda ngaye ngiduduzeke, iNkosi uDavide. Izikhathi eziningi wayezizwa ecindezelwe amaphutha ayewenze esikhathini esedlule futhi wayezisola. Ngiyayiqonda indlela ayezizwa ngayo, ngoba nami ngezinye izikhathi ngenza noma ngisho izinto engibuye ngizisole ngazo. Amazwi kaDavide akuyiHubo isahluko 51 ayangiduduza. Evesini 3, uDavide uthi: ‘Ngizazi kahle iziphambeko zami, nesono sami ngihlale ngicabanga ngaso.’ Lokhu kuyichaza kahle indlela engizizwa ngayo lapho ngicindezeleke kakhulu, ngoba kuba nzima ukucabanga izinto ezinhle ngami. Ngiyawaqonda futhi amazwi kaDavide asevesini 10: ‘O Nkulunkulu, hlanza inhliziyo yami, ufake ngaphakathi kimi umoya omusha, ozongisiza ngibe qotho.’ Nami ngimnxusa ngendlela efanayo uNkulunkulu ukuba angisize ngizizwe ngendlela efanele. Elinye ivesi elingiduduzayo, ivesi 17. Lithi: ‘O Nkulunkulu, inhliziyo ephukile nedabukile uyoyamukela.’ Leli vesi lingiqinisekisa ngokuthi uNkulunkulu uyangithanda.

“Ukugxila ezibonelweni eziseBhayibhelini nakulokho uNkulunkulu anginike kona manje, kuqinisa ithemba enginalo ngekusasa. Izithembiso zeBhayibheli ziba ngokoqobo kimi futhi lokhu kuyangisiza ngiqhubeke.”