2 | ‘Induduzo Evela EmiBhalweni’

IBHAYIBHELI LITHI: “Ngoba zonke izinto ezalotshwa kusengaphambili zalotshelwa ukuba kufundiswe thina, ukuze kuthi ngokukhuthazela kwethu nangenduduzo evela emiBhalweni sibe nethemba.”—ROMA 15:4.

Lokho Okukushoyo

IBhayibheli linamazwi aduduzayo asisiza sithole amandla futhi asikhuthaze sikwazi ukulwisana nemicabango engakhi. Umyalezo weBhayibheli uphinde usinikeze ithemba lokuthi ubuhlungu obungokomzwelo esibuzwayo maduzane buzophela.

Indlela Lokhu Okungasiza Ngayo

Sonke ngezinye izikhathi sike sizizwe sikhathazekile; kodwa labo abanesifo sokucindezeleka nokukhathazeka kakhulu bangase bakuthole kunzima ukubhekana nemizwa ebuhlungu nsuku zonke. Lingabasiza kanjani iBhayibheli?

IBhayibheli lingasisiza siyeke ukucabanga izinto ezimbi, sicabange izinto ezinhle. (Filipi 4:8) Lingasenza siduduzeke futhi sizole, sikwazi ukulawula imizwa yethu.—IHubo 94:18, 19.
IBhayibheli lingasisiza siyeke ukucabanga ukuthi asilusizo lwalutho.—Luka 12:6, 7.
Amavesi amaningi eBhayibheli asiqinisekisa ngokuthi asisodwa nokuthi uNkulunkulu, uMdali wethu, uyiqonda ngokuphelele indlela esizizwa ngayo.—IHubo 34:18; 1 Johane 3:19, 20.
IBhayibheli lithembisa ukuthi uNkulunkulu uzoyiqeda imicabango esizwisa ubuhlungu. (Isaya 65:17; IsAmbulo 21:4) Lesi sithembiso singasinikeza amandla okuqhubeka sikhuthazela uma silwisana nemicabango nemizwelo esizwisa ubuhlungu.

Indlela IBhayibheli Elimsiza Ngayo UJessica

Indlela Okungithinta Ngayo Ukuba Nesifo Sokucindezeleka

“Ngesikhathi ngineminyaka engu-25, odokotela bathi nginesifo sokucindezeleka esibi (severe depression). Ngangihlushwa ukucabanga izinto ezibuhlungu ezazenzeke kudala. Odokotela bangisiza ngaqonda ukuthi ukucindezeleka kwami kwakubangelwa ukucabanga izinto ezimbi ezazenzeke ekuphileni kwami. Nakuba ngangidla imithi efanele, ngangisadinga ukwelulekwa ukuze ngikwazi ukubona indlela yokucabanga engafanele futhi ngiyilungise.”

Indlela IBhayibheli Elingisiza Ngayo

“Ngesikhathi ngisacindezeleka kakhulu, ngangiba novalo, ngikhathazeke kakhulu ngize ngiqwashe. Ngokuvamile, ebusuku ingqondo yami yayivele iyaluze. Kunjengoba incwadi yeHubo 94:19 ichaza, uNkulunkulu angasiduduza lapho sikhungethwe izinkathazo. Ngakho ngangibeka iBhayibheli nencwadi engibhala kuyo amavesi eBhayibheli angikhuthazayo eduze kombhede wami. Uma kungalaleki, ngangifunda iBhayibheli ukuze ngivumele uJehova angiduduze.

“IBhayibheli lisikhuthaza ukuba sinqobe imicabango ephikisana nalokho esikwaziyo ngoNkulunkulu. Esikhathini esedlule ngangiqiniseka ngokuthi angilusizo lwalutho futhi angithandeki. Ngiye ngafunda ukuthi lokho akuvumelani nalokho okufundiswa iBhayibheli, elichaza uNkulunkulu njengoBaba onothando nonozwela futhi okhathalela ngamunye wethu. Kunokuba ngilawulwe imicabango yami, ngakwazi ukuyilawula kancane kancane. Ngiyazama ukuzibheka ngendlela uNkulunkulu angibheka ngayo. Lokho kwaba yisinyathelo esibalulekile esangisiza ngalwisana nokuzibheka njengongelusizo lwalutho.

“Ngilangazelela isikhathi lapho zonke izinto ezibuhlungu ezake zasehlela siyobe singasazikhumbuli nokucabanga okungafanele kuyobe kungasekho. Ukwazi ukuthi izifo zokuphazamiseka kwengqondo ziyobe zingasekho kuyangiqinisa, kungenze ngamukele ukuthi kunezinto engingeke ngikwazi ukuzenza okwamanje, kunginikeze nethemba elimangalisayo lekusasa lapho ngiyobe ngingasenaso isifo sokucindezeleka.”