Imibiko Evelele Yonyaka Odlule
“WOZANI kimi, . . . ngizonenza niqabuleke.” Lawo mazwi kaJesu Kristu akuMathewu 11:28 abeyisihloko sethu sonyaka ka-2002. Ngonyaka wenkonzo odlule, abaningi beza nangempela—abangu-265 469 bamukela lesi simemo saphezulu, babhapathizwa futhi baqabuleka kanye nabanye abangaphezu kwezigidi eziyisithupha abakhonza ngaphansi kwejoka lomusa lokuba abafundi abangamaKristu.
Kula makhasi alandelayo uzofunda indlela uJehova aqhubeka ebabusisa ngayo ngokucebile abantu bakhe emhlabeni. Manje ake sizwe ngezinye zezenzakalo ezibalulekile zezinto ezingokomoya zangonyaka wenkonzo ka-2002.
Imihlangano Yesigodi Ikhuthaza Intshiseko
Njengoba bevame ukwenza, oFakazi BakaJehova baqoqana ezindaweni eziningi emhlabeni beye emihlanganweni yabo yesigodi yaminyaka yonke. Isihloko somhlangano ka-2002/03 sasithi “Abamemezeli BoMbuso Abashisekayo.” Inkulumo eyisihluthulelo yathi abantu bakaNkulunkulu namuhla balingisa intshiseko nesibindi sikaJesu Kristu lapho benza inkonzo yabo. Ezinye izinkulumo zachaza ukuthi intshiseko ihlakulelwa ngokutadisha iZwi likaNkulunkulu futhi ibonakala ngokwenza okuhle, ikakhulukazi ngokumemezela uMbuso kaNkulunkulu ngomdlandla.
Idrama egqokelwe ezasendulo enesihloko esithi “Yima Uqine Ngezikhathi Zobunzima” yagxila kumprofethi uJeremiya. Naye, njengoJesu, wabonisa intshiseko nokukhuthazela okuvelele naphezu kobunzima. UJeremiya wayethembele kuJehova futhi wamemezela isigijimi sikaNkulunkulu ngesibindi. Yeka isibonelo esihle kumaKristu namuhla!
Kwakhululwa izincwadi ezimbili kulo mhlangano. NgoLwesihlanu ababekhona bathola incwadi ethi Khulekela Okuwukuphela KukaNkulunkulu Weqiniso. Le ncwadi enamakhasi angu-192 izoba eyesibili ezofundwa nabantu abafundelwa iBhayibheli ukuze iqiniso leZwi likaNkulunkulu lingene ligxile ezinhliziyweni zabo. Siyaqiniseka ukuthi le ncwadi izosiza abasanda kuhlanganyela bakhule ngokomoya futhi bahambe endleleni encane eholela ekuphileni ezweni elisha likaNkulunkulu elinokulunga.
Incwadi ethi Sondela KuJehova yakhululwa ngoMgqibelo. Ihlukaniswe yaba izingxenye ezikhuluma ngezimfanelo zikaJehova ezine ezivelele: amandla, ubulungisa, ukuhlakanipha nothando. Injongo yayo ishiwo esingenisweni: “Kwangathi le ncwadi ingakusiza usondele ngisho nakakhulu kuJehova uNkulunkulu, wakhe isibopho naye esingasoze sagqashuka ukuze uphilele ukumdumisa kuze kube phakade.” Isimiso somhlangano kanye nalezi zincwadi ezintsha kuzosiza abanhliziyo ziqotho yonke indawo ukuba uthando lwabo ngoMdali wethu lukhule.
Ukubhekana ‘Nezikhathi Ezibucayi’
Umphostoli uPawulu wabhalela uThimothewu wathi ‘izinsuku zokugcina’ ziyobonakala ‘ngezikhathi ezibucayi okunzima ukubhekana nazo.’ (2 Thim. 3:1) Izinhlekelele ezingokwemvelo nezinye ziletha izinselele nobunzima. Kodwa futhi zivulela amaKristu amathuba okubonisana uthando. Kwaba nezinhlekelele eziningi kulo nyaka wenkonzo odlule. Ake sizwe ngezimbili zazo.
Inhlekelele Yase-World Trade Center: Ukuthweswa kweziqu zekilasi lika-111 le-Watchtower Bible School of Gilead kwaba ngoMgqibelo, ngo-September 8, 2001. Ngemva kwezinsuku ezintathu, ngo-September 11, abathweswe iziqu nemikhaya yabo bavakashela i-New York City, e-United States. Lalicwathile ngalolo suku. Kwathi ngo-8:46 ekuseni, indiza ethwala abantu yashayisa isakhiwo se-World Trade Center esisenyakatho ezansi neManhattan. Ngemva kwemizuzu engemingaki enye indiza ethwala abantu yashayisa isakhiwo esiseningizimu.
Ngo-9:59 ekuseni isakhiwo esiseningizimu sabhidlika, kwagcwala uthuli nezibi kuyo yonke iManhattan esezansi. Ngemva kwalokho kwabhidlika isakhiwo esisenyakatho. Kwafa abantu ababalelwa ezinkulungwaneni ezintathu. Ngasinye salezi zakhiwo, ezaqedwa ngo-1973, sasinezitezi ezingu-110. Inhlabathi eyayivela kuzo zombili lezi zakhiwo ezibhidlikile yapheshulwa umoya yaze yayofika eBethel yaseBrooklyn, eqhele ngamakhilomitha angaphansana kwamathathu.
Abazalwane abasehhovisi legatsha lase-United States basukumela phezulu bafuna ukuthola ukuthi ibaphi oFakazi abalimele kule nhlekelele embi kangaka nokuthi babengasizwa kanjani. NgoLwesibili kusihlwa, ngo-September 11, kwase kutholakele ukuthi wonke amalungu omkhaya waseBethel aphephile—eBrooklyn, ePatterson, naseWallkill. NgoLwesine ntambama bonke abafundi baseGileyadi base bethintene neHhovisi LaseGileyadi, basho ukuthi bona nemikhaya yabo baphephile. Kanti nababonisi besifunda baseNew York abangu-37 bashayelwa ucingo. Bathinta abadala bamabandla, bona babe sebehlola ummemezeli ngamunye. NgoLwesihlanu ekuseni, ngo-September 14, igatsha lase lizwile ukuthi bangu-14 abazalwane nodade ababeshonile noma ababengatholakalanga. Alibange lisashintsha lelo nani.
Abasinda baxoxa ngabakubona. UCynthia Tucker, oyiphayona elivamile, wayesebenza e-World Financial Center phesheya komgwaqo we-World Trade Center. Wayesesitezi sika-37 lapho ebona indiza yokuqala ishayisa isakhiwo. Ngenxa yokuthi wayecabanga ukuthi kwenzeka ingozi ebucayi, waphumela phandle wabuka isakhiwo esasishayiswe indiza. Sabhidlika kwaba ubusakasaka. Kwadlula enye indiza indizela phansi. UDade Tucker wathi: “Yayingeve inkulu leya ndiza. Ngabona ukuthi izosishayisa isakhiwo. Kwakuthi angibaleke, kodwa ngavele ngakhungatheka—zayima emthumeni. Kwaba sengathi indiza inqamula phakathi esakhiweni. Ngendlela umsindo owawumkhulu ngayo kwakungathi ngisemanzini; wawugijima nomzimba wonke. Umoya wawungcolile kusengathi unenhlabathi. Kwakuphefumuleka kanzima. Abantu babebaleka beshona ngapha nangapha. Ngagijima ngangena ngaphakathi ngabukela isakhiwo sokuqala sibhidlika. Abantu babekhumula amahembe bazimboze ngawo ubuso ukuze bazivikele othulini. Abantu ababehamba nezingane nezilwane abazifuyile babephumela ngaphandle kwezakhiwo. Sonke sasithuthumela. Ngisho nezilwane zazixakekile. Ngiswele amazwi okuchaza indlela esasesaba ngayo.” UDade Tucker uyalwazisa usizo lwabadala abafika bamduduza ngamazwi aseBhayibhelini.
Ezinyangeni ezalandela, abazalwane baseNew York bahambisela umphakathi isigijimi senduduzo nethemba esiseBhayibhelini. Abazalwane abaningi bavunyelwa ukuba bayoshumayela lapho kubhidlike khona iTwin Towers. Omunye wabo kwakunguRoy Klingsporn, oyiphayona. Wathi: “Usayitsheni wombutho wasemoyeni owayenikeza usizo wabonga wathi: ‘Bonke abantu basilethela ukudla, ikhofi elishisayo, nezingubo ezomile, kodwa wena ungowokuqala osifundela umbhalo. Siyamdinga uNkulunkulu uma sekunje.’”
Ukuqhuma Kwentaba-mlilo EMpumalanga Afrika: Abafowethu abaningi empumalanga yeCongo (eKinshasa) baye babhekana nempi yombango, izifo, indlala nokusweleka kwemisebenzi. Abanye bebengababaleki noma baseyibo. Okwenezela kulezi zinkinga kwaba ukuqhuma ngokuzumayo kweNtaba iNyiragongo, intaba-mlilo engekude nedolobha laseGoma. Ekuseni ngo-January 17, 2002, le ntaba yaqala ukukhafula intuthu nomlilo. Kusihlwa yayisikhiphe udaka lwageleza luqonde eGoma. Izinkulungwane zabantu ababethukile zabalekela edolobheni eliseduze laseGisenyi, eRwanda. Kwakunesiminyaminya sabantu emigwaqweni bephethe izinto ezimbalwa ababekwazile ukuzithatha. IGisenyi nayo yayisengozini, kodwa abazalwane bakhona bahlela ukuba abazalwane baseCongo babalekele eHholo LoMbuso. Abazalwane abathile eGisenyi babavulela ngokushesha imizi yabo labo ababebalekela intaba-mlilo.
Umdala walapha wathi: “Lapho sibona lokhu, mina nabanye abazalwane saphuthuma saya emgwaqweni omkhulu oxhuma iGoma neGisenyi. Sasiphethe omagazini INqabayokulinda ne-Phaphama! sibaphakamisile. Kwakumnyama kodwa saya lapho sasizobonakala khona. Lapho abafowethu bebona omagazini, babona ukuthi singoFakazi, sabe sesibayalela iHholo LoMbuso, elalisebenza njengekamu lababaleki. Sama emgwaqweni kwaze kwasa. Ngokwenza kanjena sasilingisa lokho abazalwane baseGoma ababesenzele kona ngaphambili. Ngemva kwempi yaseRwanda, amakhulu ezinkulungwane abalekela eGoma. Ngaleso sikhathi oFakazi baseGoma babema emigwaqweni imini nobusuku bephakamise omagazini ukuze sikwazi ukubona abazalwane. Basiyalela amakamu ababaleki ayemiswe oFakazi.”
Iningi lababebalekela intaba-mlilo balala phandle. Phakathi kwabo kwakunabazalwane ababengababonanga labo ababephakamise omagazini ngenxa yesiphithiphithi noma ubumnyama. Omunye umdala wathi: “Ngakusasa ekuseni, abazalwane nodade babuyela emigwaqweni bephethe omagazini. Bayihamba yonke iGisenyi ukuze bonke abantu bababone. Babe sebebathola bonke abazalwane baseGoma ababengababonanga oFakazi ngayizolo ebusuku. Ngokushesha udaka lwentaba-mlilo lwabe selusondela ngaseHholo LoMbuso lethu. Asibange sisapholisa maseko, sahlela ukuba amanye amaHholo OMbuso amahlanu abe amakamu ababaleki.” Abazalwane abathile basemabandleni angu-24 aseGoma babalekela maphakathi neCongo, kodwa abaningi—abangaba ngu-2 000—babalekela eRwanda.
Ngokuphazima kweso ihhovisi legatsha eKigali, eRwanda, lathenga ukudla, imithi, izingubo zokulala, nezipakupaku zamanzi. Lezi zinto zabe seziphuthunyiswa emakamu. Yeka injabulo yabazalwane baseGoma lapho kufika iloli linalezi zimpahla, ngemva nje kosuku olulodwa kwenzeke inhlekelele! Abantu abangebona oFakazi basincoma besincomile lesi senzo. Umzalwane othile wezwa abantu bethi: “Ikahle-ke le nkolo. Bayathandana ngempela.”
Ingxenye eyodwa kwezintathu eGoma yacekeleka phansi. Abazalwane nodade abaningi basala bengenalutho. Kodwa oFakazi ababengazange babhidlikelwe imizi bangenisa imikhaya yabazalwane ababengasenamizi. (Roma 12:12, 13) Kamuva, abazalwane baseRwanda benza amalungiselelo okuba bonke ababaleki baseGoma baphindele emakhaya bephephile. OFakazi baseYurophu nabo basiza ngokuthumela izindiza ezimbili ezazigcwele izimpahla ezivela eBelgium.
Ukuqhuma kweNtaba iNyiragongo kwadala usizi. Kwafa abantu abaningi konakala nempahla eningi, kodwa amaKristu eqiniso azibonakalisa ngothando abonisana lona.—Joh. 13:35.
ISikole Senkonzo SoMbuso Sigcizelela Ingokomoya
ISikole Senkonzo SoMbuso saqala ngo-1959, sasithatha inyanga yonke. SasiseSouth Lansing, esifundazweni saseNew York, e-U.S.A. Kwamanye amazwe sasiqhutshelwa ezindaweni ezishiwo ngamahhovisi egatsha. Ekuqaleni kwakufunda abadala bamabandla (ababebizwa ngokuthi izinceku zamabandla) namaphayona akhethekile. Kwathi ngo-1966 kwaba noshintsho kulesi sikole; sathatha amasonto amabili kuphela futhi kwafunda abadala bodwa. Ngo-1977 kwenziwa amalungiselelo okuba izifundo zabadala zithathe amahora angu-15. Kusukela ngaleso sikhathi kube khona amakilasi ashiyashiyanayo ngobude njalo ngemva kweminyaka ethile. Kusukela ngo-1984 izinceku ezikhonzayo nazo bezilokhu ziqeqeshwa eSikoleni Senkonzo SoMbuso.
Kulo nyaka lesi sikole sibe namakilasi amathathu. Elokuqala, elalingoLwesibili kuya kuLwesine, kwakungelababonisi abajikelezayo; elesibili, elalingoLwesihlanu nangoMgqibelo, kwakungelabadala bamabandla; elesithathu, elalingeSonto, kwakungelezinceku ezikhonzayo. La makilasi agcizelela ukulondoloza ingokomoya. Endulo uMose wathandaza kuJehova, wathi: “Ngicela ungenze ngazi izindlela zakho ukuze ngikwazi, ngithole umusa emehlweni akho.” (Eks. 33:13) UMose wathandaza kanje ngemva kokuba ebone iZinhlupho Eziyishumi, wahlukanisa uLwandle Olubomvu, wakhuluma noJehova izinsuku ezingu-40 eNtabeni YaseSinayi, wanikezwa neMiyalo Eyishumi. Eseneminyaka engu-80 ubudala futhi uJehova esemsebenzise kakhulu, uMose wasiqaphela isidingo sakhe esingokomoya. Ngokuvumelana nalesi sibonelo, abadala nezinceku ezikhonzayo bakhuthazwa ukuba baqhubeke bengamadoda athuthukayo ngokomoya, kungakhathaliseki ukuthi singakanani isikhathi bekhonza uJehova.
Izinto ezazifundwa zahunyushwa zasetshenziswa amagatsha emhlabeni jikelele. Kwafika izincwadi zokubonga zivela emazweni amaningi. Umdala waseGuinea wabhala: “Angizisoli ngokuzidela engakwenza nokuhamba amakhilomitha ayinkulungwane ngiya kulesi sikole.” Nomunye wabhala: “Ngiswele amazwi okubonga loku kuqeqeshwa. Ngibonga kakhulu!”
Umzalwane waseKorea wabhala: “Lesi sikole sangisiza ngacabangisisa kahle ukuthi ngingumuntu ongokomoya yini noma cha.”
Ihhovisi legatsha lase-El Salvador labhala: “Sawathanda ngokukhethekile amalungiselelo amasha eSifundo Sencwadi Sebandla. Sinomuzwa wokuthi azosisiza sinikeze usizo olungcono noluthinta umuntu ngamunye eqenjini.”
Indikimba yabadala eJalimane yabhala: “Ukusikisela esakuthola nezinto esazifunda azinzima futhi singakwazi ukuzisebenzisa kusizakale bonke esibaphathisiwe.”
Igatsha laseSwitzerland lona lathi: “Lesi sikole sasiza sasinikeza isikhuthazo esasidingeka ukuze silwe nokunganaki okungokomoya.”
Izigigaba Ezaholela Ezinkantolo
E-ARMENIA: Icala elalithinta uLyova Margaryan laba undab’ uzekwayo. UMfoweth’ uMargaryan wabekwa icala lokwelelesa ngenxa yemisebenzi ayenzayo njengoba enguFakazi KaJehova. Phakathi kokunye, wamangalelwa ngokuthi “ushumayela ngenkolo engabhalisiwe.” Ngo-September 18, 2001, inkantolo yamthola engenacala uMfoweth’ uMargaryan. Ladluliswa icala, inkantolo yamacala adlulisiwe nayo yathi akanacala, yaveza ukuthi izimfundiso zenkolo yakhe njengomunye woFakazi BakaJehova aziphathelene nokwelelesa nokuthi uMthetho-sisekelo wase-Armenia uyazivikela. Abashushisi babe sebelidlulisela enkantolo yezwe ephakeme yamacala adlulisiwe, i-Court of Cassation. Ngo-April 19, 2002, amajaji eNkantolo ayisithupha azisekela zombili izinqumo ezithi akanacala. Nakuba sisijabulisa lesi sinqumo, abazalwane abasebasha abasezingeni lokuya empini basalokhu beboshwa futhi begqunywa ejele e-Armenia ngoba benqaba ukuya empini ngenxa yenkolo yabo.
EGEORGIA: OFakazi BakaJehova eGeorgia basalokhu behlukunyezwa nje kungabi zindaba zalutho. Kusukela ngo-October 1999, sekubikwe ukuthi zingaphezu kuka-80 iziwombe zokuhlaselwa ngendluzula kwabantu abangaphezu kwenkulungwane—amadoda, abesifazane, izingane, asebekhulile, nabakhubazekile. Imizi yoFakazi abathile yaphangwa, yapeqululwa, futhi yashiswa yaba umlotha. Sekufakwe amacala angaphezu kuka-700, kodwa akukho noyedwa oseboshiwe. Kwaze kwathi ngo-September 2001, uPetre Ivanidze nompristi wobu-Orthodox osekhishiwe esikhundleni, uVasili Mkalavishvili, babekwa amacala ngokuthinteka kwabo kuloku kuhlasela. Kodwa imizamo eminingi eyenziwe yokuqula leli cala ibhuntshile ngenxa yesimo esiye sibe senkantolo. Abalandeli babamangalelwa baye bavunyelwa ukuba bangene phakathi enkantolo begabisa ngezinkunzimalanga zeziphambano, ababekade bezisebenzisa njengezikhali ngaphambili, nangamafulege abhalwe iziqubulo ezibonisa inzondo ngoFakazi BakaJehova. Ngo-May 30, 2002 leli cala lase lihlehliswe izikhathi ezingu-7. OFakazi BakaJehova bafaka izicelo ezimbili kuyi-European Court of Human Rights (ECHR), esinye sikhala ngokuthi uhulumeni uzithele ngabandayo kube kuhlukunyezwa abantu, esinye sikhala ngesinqumo seNkantolo Ephakeme YaseGeorgia esachitha izicelo zokubhalisa izinhlangano ezimbili ezingokomthetho zoFakazi BakaJehova. Ngo-October 2001, i-ECHR yayisizihlanganisile lezi zicelo ezimbili ukuze izisingathe ngokushesha.
Ngo-July 23, 2002, oFakazi BakaJehova bafaka esinye isicelo esingokomthetho kuyi-ECHR. Kulesi kunamacala angu-30 anayo yonke imininingwane yokuhlaselwa koFakazi eGeorgia behlaselwa ontamolukhuni benkolo, abefundisi bobu-Orthodox namaphoyisa. Kunencwadi yobufakazi eqondene nelinye lalawa macala. Iningiliza ngetulo lamaphoyisa angaba yikhulu lokuchitha umhlangano onokuthula woFakazi BakaJehova ngo-September 2000. Le ncwadi yamukelwa futhi yasayinwa izikhulu eziphakeme zoMnyango Wangaphakathi wedolobha elisentshonalanga laseZugdidi.
ERUSSIA: Ngo-February 12, 2002 laqala kabusha icala lokuvala oFakazi BakaJehova eMoscow. Sekungokwesikhombisa oFakazi BakaJehova kudingeka bazivikele emacaleni afanayo angasekelwe ndawo. Ngo-April 4, 2002, ngemva kwezinyanga ezimbili kuhlolwa kabusha isicelo esivela ehhovisi lomshushisi, iNkantolo yakhipha isinqumo sokuba ongqondongqondo bafunde izincwadi zenkolo zoFakazi BakaJehova nezincwadi ezibhalelwa amabandla. INkantolo yakhipha lesi sinqumo yize umshushisi enganikezanga bufakazi obuqondile bokuthi oFakazi BakaJehova badala ukungezwani ngokwenkolo, bahlukanisa imikhaya, noma bagxambukela emalungelweni nasenkululekweni yabantu. Icala lihlehlisiwe kuze kube yilapho ongqondongqondo sebeqedile ukufunda.
ENINGIZIMU KOREA: Ekupheleni kuka-December 2001 base bengu-1 640 oFakazi BakaJehova eNingizimu Korea ababedonsa ejele ngoba benqaba ukuya empini ngenxa kanembeza. Bayanda njalo nje ngonyaka. UMthetho Wokungenela Ezempi uthi labo abangafuni ukuyolwa bangagwetshwa iminyaka engaze ibe mithathu. ENingizimu Korea ayingenwa nje eyokuthi umuntu angase angayi empini ngoba eyisikhonzi senkolo noma ngenxa kanembeza. Kusukela ngawo-1950, oFakazi abangaphezu kuka-7 000 eNingizimu Korea baye bagqunywa ejele ngoba bengafuni ukuphatha izikhali. Ecaleni eliwumhlahlandlela lango-January 29, 2002, iJaji Elikhulu uSi-hwan Park laseSeoul District Court, lathumela icala likaKyung-soo Lee eNkantolo Yomthetho-sisekelo. Leli Jaji lacela umbono ngalokho okushiwo uMfoweth’ uLee uma ethi ukungaqashelwa kwelungelo lomuntu onqaba ukuya empini ngenxa kanembeza kuphula ilungelo lakhe lenkululeko engokwenkolo nekanembeza. Lapho selisenzile lesi sicelo enkantolo, iJaji uPark lalimisa icala futhi lamdedela ngebheyili uMfoweth’ uLee. Icala liyoze liqhubeke ngemva kokuba iNkantolo Yomthetho-sisekelo isishilo ukuthi umthetho-sisekelo uthini ngalolu daba.
E-UNITED STATES: Ngo-June 17, 2002, iNkantolo Ephakeme Yase-United States yakhipha isinqumo esiyingqopha-mlando ecaleni elaliphakathi kwe-Watchtower Bible and Tract Society of New York, Inc. ne-Village of Stratton. Okwaholela kuleli cala ukuthi leli dolobha lalifundekela ngokuthi oFakazi BakaJehova mabacele imvume kumphathi-dolobha ngaphambi kokuba benze inkonzo yabo yendlu ngendlu. INkantolo yathi: “Ngenkathi kuqulwa icala [oFakazi BakaJehova] bachaza ukuthi abayiceli imvume ngoba igunya lokushumayela balinikwe imiBhalo. [OFakazi bathi:] ‘Sinomuzwa wokuthi ukuyofuna imvume yokushumayela kuziphathimandla kuyofana nokwedelela uNkulunkulu.’” INkantolo yawuhlaba yawuhlikiza lo mthetho, yathi “ubonisa ukwedelela—awudeleli nje kuphela amalungelo avikelwe iSichibiyelo Sokuqala, kodwa udelela kwawona umphakathi onenkululeko—ukuthi uma isakhamuzi sifuna ukuzixoxela nabanye kumelwe siqale sazise uhulumeni bese sithola imvume.” INkantolo yaqhubeka yathi: “Ngisho noma kuwumsebenzi wehhovisi lomphathi-dolobha ukukhipha izimvume futhi zikhishwa mahhala, umthetho othi umuntu makathole imvume ukuze axoxe nabanye uyachezuka kakhulu esikweni lesizwe sethu nakumthetho-sisekelo.”
INkantolo yabancoma noFakazi BakaJehova ngeqhaza elikhulu ababe nalo ekumiseni umthetho-sisekelo wase-United States. Yathi: “Sekuyiminyaka engaphezu kwengu-50 iNkantolo iyichitha imithetho evimbela ukukhankasa nokusakaza amapheshana endlini ngendlu. Akuthukanga nje kwenzeka ukuba iningi lala macala angqubuzana neSichibiyelo Sokuqala afakwe oFakazi BakaJehova, ngoba yinkolo yabo ethi mabakhankase endlini ngendlu.” Njengoba neNkantolo yasho, la “macala abonisa ukuthi lapho oFakazi BakaJehova bezama ukumelana nemithetho ebancisha inkululeko yokukhuluma basuke bengalweli amalungelo abo bodwa.”
Ngaphezu kwalokho, ngo-July 1, 2002, iNkantolo Ephakeme YaseSouth Carolina yasekela ilungelo lomunye uFakazi KaJehova lokwenqaba ukumpontshelwa igazi. (IzE. 15:28, 29) UCharles Harvey wahlawulisa udokotela wakhe ukuze akhokhele umonakalo owabangelwa ukungamnaki kwakhe ngamabomu njengoba ayethe akalifuni igazi. Engakahlinzwa, uMfoweth’ uHarvey wayemchazele kahle udokotela wakhe ngokuma kwakhe okusekelwe eBhayibhelini. Kodwa udokotela wayevunyelwe unina kaMfoweth’ uHarvey ongeyena uFakazi ukuba amfake igazi uMfoweth’ uHarvey uma kuphakama isimo esibucayi lapho esehlinziwe engakaphaphami. INkantolo Ephakeme YaseSouth Carolina yayichitha imvume kamama, yathi “izifiso zesiguli zokungelashwa ngendlela ethile, uma udokotela ezitsheliwe ngaphambi kokuba asihlinze leso siguli, kumelwe azilandele.” Ngakho, inkantolo yanquma ukuthi uMfoweth’ uHarvey wayenelungelo lokucela amajaji anqume ukuthi udokotela wayesiphulile yini isivumelwano sokumelapha ngaphandle kwegazi nokuthi udokotela wayephule umthetho wezokwelapha yini ngokumfaka igazi uMfoweth’ uHarvey engavumanga.
Kukhunjulwa Ubuqotho Babo
Sekuyiminyaka engaphezu kwengu-30 iBuchenwald Memorial, okwakuyikamu lokuhlushwa lamaNazi, lingathi vu ngoFakazi BakaJehova. Iziphathimandla zaseMpumalanga Jalimane zazingababheki oFakazi njengabangachazwa ngokuthi nabo babeyizisulu zombuso wamaNazi futhi bephikisana nawo. Ngisho nanamuhla abantu abaningi eJalimane bakuthola kunzima ukwamukela umlando wobuqotho boFakazi ohlukile kowabanye. Yingakho-ke u-May 9, 2002 ayewusuku olubaluleke kangaka. Uqwembe lwesikhumbuzo soFakazi abahlushwa eBuchenwald lwavulwa nguMnu. R. Lüttgenau, iphini lomqondisi we-Buchenwald and Mittelbau-Dora Memorials Foundation.
Lalicwathile ngalelo langa. Le ndawo eyayiyikamu, esegqumeni elinehlathi elibheke indawo enhle, yayihlotshiswe uhlaza oluhle lwasentwasahlobo. Nokho, le ndawo yayibizwa ngokuthi isihogo esiluhlaza saseBuchenwald. Namuhla kuye kube nzima ngezivakashi eziningi ukuba zibone ngeso lengqondo iziboshwa zalapha eseziphelelwe ithemba okwakuthi uma kubizwa amagama azo, zilunguze lapho zazihlala khona zibone yona le ndawo enhle kodwa zingenathemba lokuthi ziyoke zihlale kuyo sezikhululiwe.
Kodwa oFakazi BakaJehova bona babenethemba elisekelwe eBhayibhelini futhi bemethemba ngokuphelele uJehova. Lokhu kwabenza bakwazi ukugcina ubuqotho babo futhi balandele isibonelo sabaphostoli ngesibindi, bona abathi: “Kumelwe silalele uNkulunkulu njengombusi kunabantu.” (IzE. 5:29) Ngenxa yokholo lwabo, okungenani bangu-38 oFakazi abafela phakathi ekamu noma abafa besebenza ngaphandle. Kulolu qwembe lwesikhumbuzo kucashunwe lo mbhalo wezEnzo, olandelwa yila mazwi: “ISikhumbuzo SoFakazi BakaJehova Abahlupheka Nabafela Lapha, Beshushiswa Ngenxa Yezinkolelo Zabo Zenkolo.”
Iziboshwa ezingaba ngu-800 ezaziphawulwe ngonxantathu onsomi owawuthungelwe ezingutsheni ukuthi zingama-Bibelforscher (abaFundi BeBhayibheli) zaziphakathi kwabangaphezu kuka-250 000 ababegqunywe ngamaNazi kuleli kamu eminyakeni edlule. Babekhona oFakazi abathile ngo-1937 futhi baphoqwa ukuba basize ekwakheni leli kamu. Ngesikhathi zidedelwa iziboshwa ezazisaphila ngo-1945, oFakazi abakhululwa badumisa uJehova ngokukhululwa kwabo. Selokhu laba khona njengekamu lamaNazi, kwakuhlale kunoFakazi ababalelwa ku-300 no-450 lapha eBuchenwald.
Lolu qwembe lubeka iziboshwa ezazifaka unxantathu onsomi endaweni yazo ezifanele, phakathi kwezisulu zombuso wamaNazi. Lukhumbuza nezivakashi ngobuqotho boFakazi. UMnu. Lüttgenau wathi: “Lolu qwembe lubonisa ukuthi umphakathi wanamuhla usuyazazi izinto ezimbi ezenziwa koFakazi BakaJehova futhi uyazivuma.”
NgoLwesine ngo-March 7, 2002, izikhulu zedolobha laseKörmend enyakatho yeHungary zavula uqwembe lwesikhumbuzo soFakazi BakaJehova abathathu abafela ukholo. BabengoBertalan Szabó, Antal Hőnisch, noJán Žondor. Bobathathu benqaba ukuya empini ngesikhathi seMpi Yezwe II, babe sebebulawa phambi kwabantu. Lolu qwembe luthi: ‘Isikhumbuzo samaKristu abulawa ngoba enqaba ukuya empini ngenxa kanembeza ngo-March 1945.’ Igatsha lithi ukuze babekhona lapho kuvulwa lolu qwembe lesikhumbuzo, abantu abangaphezu kuka-500 bahamba ngezinyawo banqamula idolobha baya esakhiweni ababulawelwa kuso abazalwane.
Kumiswa IKomiti Yegatsha E-United States
NgoLwesihlanu ngo-February 9, 2001, iNdikimba Ebusayo yazisa umkhaya waseBethel yase-United States ukuthi kusukela ngo-April 1, 2001, kwakuzoqala ukusebenza iKomiti Yegatsha e-United States. Ngonyaka wenkonzo ka-2002, iKomiti Yegatsha yayiqhubeka yenza imisebenzi yayo. Igatsha lase-United States lengamele umsebenzi wokushumayela ngoMbuso e-United States kanye naseBermuda naseziqhingini zaseTurks nezaseCaicos. Bangaphezu kwesigidi abamemezeli e-United States, abangu-215 000 basemabandleni eSpanishi. Emabandleni angaphezu kuka-11 700, angaba ngu-2 600 aweSpanishi. Kulo nyaka wenkonzo odlule kwamiswa amabandla amasha angu-210. Kulawa, angu-123 aweSpanishi, angu-63 awesiNgisi, kanti angu-24 awezinye izilimi.
E-United States sekunamabandla noma amaqembu ezilimi ezingu-37 uma singasibali isiNgisi neSpanishi. Emabandleni amaningi eSpanishi nawezinye izilimi zokufika, kuba khona abangaphezu kuka-200 eNkulumweni Yeningi. Amanye amabandla abika inani lezifundo zeBhayibheli eledlula elabamemezeli. Abazalwane nodade abakhuluma isiNgisi bafunda ezinye izilimi ukuze basize kule nsimu eyanda ngokushesha kangaka.
Igatsha lase-United States linesici esingavamile, esiwukuthi izakhiwo zeBethel zisezindaweni ezintathu—eBrooklyn, ePatterson, naseWallkill. Kunamapulazi ezithelo zomkhaya waseBethel eduze kwaseSouth Lansing, eNew York, nase-Immokalee, eFlorida. Angu-5 465 amalungu omkhaya waseBethel yase-United States.
Kunamagatsha angu-109 emhlabeni. Ilungiselelo lokuba amaKomiti Egatsha anakekele izidingo ezingokomoya zabazalwane abahlala emazweni ahlukahlukene belilokhu lisebenza kusukela ngo-1976. La makomiti alandela isiqondiso esingokomBhalo nokuhola kweNdikimba Ebusayo. AmaKomiti Egatsha engamela umsebenzi wokushumayela ngezindaba ezinhle ensimini yalelo gatsha. Ikomiti inikeza amabandla amaKristu, izithunywa zevangeli, namaphayona iziqondiso azidingayo. Ihlela namabandla abe izifunda nezigodi, ituse abathile ukuba iNdikimba Ebusayo ibamise njengababonisi besifunda nabesigodi, amalungu omkhaya waseBethel, nabafundi baseSikoleni SaseGileyadi. Ngaphandle kokuqondisa inkonzo ensimini, iKomiti Yegatsha inakekela nomsebenzi waseBethel. Akungatshazwa ukuthi uJehova ubelibusisa ngokucebile leli lungiselelo.
Kuyahunyushwa Ukuze Kwaneliswe Izidingo Eziningi
Eminyakeni yamuva kuye kwatholakala intilibathwa yezincwadi ngezilimi ezandayo. Ngale ngasese, inqwaba yabahumushi abazikhandlayo balwela ukukhipha izincwadi ezinembile, eziqondakalayo, nokumnandi ukuzifunda.
Isidingo esiyinhloko sabantu bakaNkulunkulu yinguqulo yeBhayibheli enembile. Ukuze bayithole, INguqulo Yezwe Elisha isikhishwe ngezilimi ezingu-44. Kulezi zinguqulo, ezingu-29 ziphelele. Kulo nyaka wenkonzo odlule, kwaphothulwa imiBhalo YamaKristu YesiGreki ngezilimi ezintathu zabaNsundu—isiBemba, isi-Igbo, nesiLingala—kanti iBhayibheli eliphelele lakhululwa ngesiBhunu.
AmaBhayibheli asanda kukhululwa ayaziswa kakhulu. Umbiko ovela eYurophu uthi: “Abazalwane abasebenza ensimini yesiShayina balibonga ngokukhethekile iBhayibheli, bathi ‘liyinguqulo ephuma phambili.’” Amanye amaShayina afundelwayo eCanada ababaza: “Kumelwe ukuba leli Bhayibheli lahunyushwa amaShayina! Silizwa kalula!” ENingizimu Afrika umninimuzi ongumXhosa wabuza: “Nilithathephi leli Bhayibheli elifundeka kalula kangaka?” E-Albania umzalwane othile wavele nje wathi: “Indlela INguqulo Yezwe Elisha ebeka ngayo izinto yenza imicabango kaJehova ifinyelele inhliziyo.” Ummemezeli waseCroatia wabhala: “Sengiyakwazi ukuzibona ngeso lengqondo izinto, futhi kuba sengathi yimina engikhuluma lawo mazwi. Le nguqulo entsha ifundeka kalula, kodwa igcwele ukuhlakanipha. Sengiyayiqonda manje indlela ezinhle ngayo izinto ezishiwo uJehova nasifundisa zona.”
Kusadingeka izincwadi eziyisisekelo ukuze izindaba ezinhle zoMbuso zifinyelele “kuzo zonke izizwe nezinhlanga nabantu nezilimi.” (IsAm. 7:9) Eminyakeni yamuva zifeze okuhle kakhulu izincwajana zolimi lwesiLahu, olukhulunywa abantu abahlala ezintabeni ezisenyakatho yeThailand naseziqhingini eziseduze. Isithunywa sevangeli sabhala: “Incwajana yesiLahu ethi Yini UNkulunkulu Ayifunayo? iyithuluzi elihle. Akukho lapho ingafikanga khona.” Umphumela? “Simenyiwe ezindaweni eziningi, kodwa ngenxa yokuqhela kwazo nemigwaqo emibi, asikakafiki kuzo zonke. Kuyiqiniso ngempela okushiwo uMathewu 9:37 kule ndawo. Ngokwesibonelo, sezwa ukuthi kwenye indawo esebangeni elingamakhilomitha angu-160 entshonalanga yeChiang Mai, owesifazane onesithakazelo ubelokhu efundisa iqembu lezintandane ngencwajana ethi Yini UNkulunkulu Ayifunayo?”
E-United States, aboMdabu baseMelika bashunyayezwa ngolimi lwabo. Seziziningana izincwadi ezitholakala ngolimi lwesiNavajo, kanye namakhasethi encwajana ethi Yini UNkulunkulu Ayifunayo Kithi? Ummemezeli othile wabhala: “EZintabeni ZaseNavajo, kude le nensimu yethu, kunomuntu owayengumalusi oneminyaka engaphezu kwengu-80 ubudala futhi ongasaboni kahle. Umzukulu wakhe wambuza ukuthi angathanda yini ukulalela ikhasethi leBhayibheli ngolimi lwesiNavajo. Wavuma. Wavuka embhedeni ayegulela kuwo wayohlala phansi walalela. Ukube nje wabubona ubuso bakhe njengoba elalele imibhalo yeBhayibheli ngolimi lwakhe. Kuthi angikhale uma ngixoxa le ndaba. Wabe esethi, ‘Nizhoni,’ okusho ukuthi ‘kumnandi.’”
EMozambique, izincwadi zikhishwa ngezilimi ezinhlanu zakuleli zwe. Ukuze kusizwe abafundi, kwakhishwa incwajana ethi Apply Yourself to Reading and Writing ngalezi zilimi, futhi sikhuluma nje kuqhutshwa umkhankaso omkhulu wokufundisa abangafundile. Kwamhlaba umxhwele impela lokhu uMongameli uChissano waseMozambique kangangokuthi wathi uwusekela ngenhliziyo yonke umsebenzi wethu wokufundisa ngeBhayibheli nokufundisa abangafundile.
Omagazini INqabayokulinda ne-Phaphama! sebetholakala ngezilimi ezingu-146 nezingu-87—bafinyelela ezizweni eziningi ngempela. Bayaziswa emhlabeni kabanzi ngenxa yosizo lwabo olungokomoya nokuthi bayafundisa. Ngokwesibonelo, iKiribati, eyiqoqo leziqhingi ezikuyiPacific Ocean, ihlala abantu abacela ku-80 000 abakhuluma isiGilbert. Ngamunye woFakazi balapho abangaphansana kwekhulu, uye wahambisa ngenkuthalo isilinganiso somagazini abangaba ngu-20 ngenyanga kule minyaka edlule. Abamemezeli baseBulgaria abangu-1 200 bahambise omagazini abangaphezu kuka-100 000 ngo-April 2002.
Akungatshazwa ukuthi uJehova uyabahlomisa abantu bakhe ukuba benze umsebenzi ababele wona. Emhlabeni jikelele lowo msebenzi wenziwa ngezilimi eziningi.—Fil. 4:20.
Ukunikezelwa Kwamagatsha
Ngonyaka wenkonzo ka-2002 kwanikezelwa igatsha esiqhingini esihle saseCaribbean iTrinidad. Izakhiwo zegatsha zalapha zanikezelwa kuJehova ngo-1985, kodwa kusukela ngaleso sikhathi abamemezeli balapha baye banda ngamaphesenti angu-94. Ngenxa yalokho kuye kwadingeka kulungiswe izinto eziningi esakhiweni segatsha, kwenezelwe nesakhiwo esisiphinda kabili esikhona. Sekukhona izakhiwo ezintsha zokuhlala, amahhovisi, umtapo wezincwadi, indawo yokwamukela izivakashi, indlu yokudlela, nekhishi. IHholo LoMbuso elilapha nalo lalungiswa lanwetshwa. Yizisebenzi zokuzithandela zakule ndawo zodwa ezenza lo msebenzi.
Ngo-September 29, 2001, abantu abangaba ngu-220 abavela emazweni angu-14 kanye nabazalwane nodade balapha abangu-695 bathamela isimiso sokulinikezela. Bezwa imibiko emnandi ngomlando womsebenzi ongokwasezulwini, kuhlanganise nendima eyafezwa u-Evander J. Coward noWilliam R. Brown. Izithunywa zevangeli eziningana ezivela kwamanye amazwe, kanye nodade oneminyaka engu-88 ubudala osalokhu eyiphayona elivamile, balandisa okuhlangenwe nakho okuthinta inhliziyo ngezabelo zabo lapha eTrinidad kusukela eminyakeni engaphezu kwengu-50 edlule.
UStephen Lett weNdikimba Ebusayo wanikeza inkulumo yokulinikezela. Enkulumweni enesihloko esithi “Ukwazisa Izindlu ZikaJehova Zokukhulekela Zamandulo Nezamanje,” wagcizelela ukuthi ngabantu abakhulekela uJehova, akuzona izakhiwo. Ngakho uMfoweth’ uLett wabakhuthaza ngothando abazalwane ukuba babe abakhulekeli abanokwazisa ngokulalela nangendlela abaziphatha ngayo.
Ngakusasa kwaba nomhlangano okhethekile edolobheni lasePort of Spain ukuze kuze nalabo ababengezanga esimisweni sokunikezela. Kwafika abangaphezu kuka-13 000. Esiqhingini saseTobago esingumakhelwane, abazalwane abangaphezu kuka-300 balalela isimiso ngocingo. UMfoweth’ uLett wabeka inkulumo ethi “Londoloza Ubuhlobo Bakho NoJehova Ngokuhlakulela Ukuthobeka.” Bonke ababekhona ‘babejabule nje kuphela’ ngokunikezelwa kwalezi zakhiwo zegatsha ezinezelwe.—Dut. 16:15.
Muva nje kuye kwanwetshwa negatsha laseCzech Republic. USamuel F. Herd weNdikimba Ebusayo waya khona eyonikezela isakhiwo saseBethel esenezelwe namaHholo OMhlangano amabili. Isimiso sokunikezela sasingoMgqibelo ngo-May 4, 2002, kwaba khona abangu-2 125 ababezolalela inkulumo kaMfoweth’ uHerd. Ngakusasa kwaba nomhlangano okhethekile, futhi bangu-5 286 abajabulela inkulumo kaMfoweth’ uHerd eyakhayo eyayinesihloko esithi “Ukuthola Amandla Kabusha Singakhathali.” Lezi zimiso zabakhuthaza kakhulu abazalwane baseCzech Republic.
Emhlabeni wonke zingu-19 823 izikhonzi ezimisiwe ezisebenza ezakhiweni zegatsha ezinjalo. Zonke zingamalungu e-Worldwide Order of Special Full-Time Servants of Jehovah’s Witnesses (ISifungo Sezinceku ZoFakazi BakaJehova Ezisenkonzweni Ekhethekile Yesikhathi Esigcwele Emhlabeni Wonke).
[Ishadi/Izithombe ekhasini 12, 13]
EZINYE ZEZENZAKALO ZANGONYAKA WENKONZO KA-2002
September 1, 2001
September 11: Kubhidlika i-World Trade Center.
September 29: Kunikezelwa igatsha laseTrinidad.
November 20: Kuqala iZikole Zenkonzo ZoMbuso.
January 1, 2002
January 17: Kuqhuma intaba-mlilo eCongo.
April 4: Icala laseMoscow lokuvimbela oFakazi BakaJehova liyahlehliswa.
May 1, 2002
May 4: Kunikezelwa igatsha laseCzech Republic.
May 9: Kuvulwa uqwembe oluyisikhumbuzo soFakazi abahlupheka ekamu lokuhlushwa lamaNazi.
June 17: INkantolo Ephakeme Yase-United States isekela ilungelo lokushumayela endlini ngendlu ngaphandle kokuqale uthole imvume.
August 31, 2002
August 31: Bangu- 6 304 645 abamemezeli emazweni angu-234.
[Izithombe ekhasini 11]
Ngenhla: Lapho bebhekene nezinhlekelele ezinjengalezi, abafowethu nodade babonisa uthando olunjengolukaKristu
[Isithombe ekhasini 11]
Ngezansi: Leli Hholo LoMbuso laseRwanda lasetshenziswa njengekamu lababaleki
[Isithombe ekhasini 22]
IKomiti Yegatsha esanda kumiswa e-United States, kusukela kwesobunxele kuya kwesokudla: (abahlezi) uJohn Kikot, uMax Larson, uGeorge Couch, uMaxwell Lloyd; (abamile) uBaltasar Perla, uHarold Corkern, uLeon Weaver, uWilliam Van De Wall, uJohn Larson, noRalph Walls
[Isithombe ekhasini 26]
“INguqulo Yezwe Elisha” yesiBhunu
[Isithombe ekhasini 27]
Incwajana yesiNavajo ethi “Yini UNkulunkulu Ayifunayo Kithi?”
[Izithombe ekhasini 28, 29]
Abantu ababevela emazweni angu-14 bahlangana nabazalwane nodade bendawo bezothamela ukunikezelwa kwegatsha laseTrinidad
[Izithombe ekhasini 29]
Abazalwane baseCzech Republic bajabulela ukunikezelwa kwesakhiwo saseBethel esenezelwe, namaHholo OMhlangano amabili