Imibiko Evelele Yonyaka Odlule
NJENGOBA izwe lidunguzela, abantu bakaNkulunkulu bajabulela isimo sokuchuma ngokomoya esilokhu sikhula siba sihle futhi sithela. (Mal. 3:12, 18) Le ntuthuko eqhubekayo isikhumbuza isithembiso sikaJesu kubafundi bakhe ngaphambi nje kokunyukela kwakhe ezulwini: “Bhekani! Nginani izinsuku zonke kuze kube isiphelo sesimiso sezinto.”—Math. 28:20.
Izenzakalo zonyaka odlule zinikeza ubufakazi obengeziwe bokuthi isithembiso sikaJesu esiduduzayo siyagcwaliseka. Okokuqala, ake sicabangele idili elingokomoya izinceku zikaJehova ezalijabulela eMihlanganweni Yesigodi ‘Yokuhamba NoNkulunkulu.’
Imihlangano Yesigodi ‘Yokuhamba NoNkulunkulu’
Umprofethi uMika wabonisa umehluko phakathi kolungileyo nongalungile lapho ebikezela: “Zonke izizwe, ziyohamba yileso naleso ngegama likankulunkulu waso; kodwa thina, siyohamba ngegama likaJehova uNkulunkulu wethu kuze kube nini nanini, yebo kuze kube phakade.” (Mika 4:5) Njengoba isikhulumi sachaza enkulumweni eyisihluthulelo, lawo mazwi afingqa isimo sengqondo samadoda okholo asendulo, njengo-Enoke noNowa, ahamba noNkulunkulu phakathi nezikhathi ezinzima kakhulu. (Gen. 5:22-24; 6:9, 22) Yeka ilungelo esinalo lokuhamba ezinyathelweni zabo!
Ingabe imihlangano yesigodi isiqinisile isinqumo sakho sokuqhubeka ‘uhamba ngegama likaJehova’? Kungani ungabuyekezi amaphuzu akho omhlangano? Ukwenza kanjalo kuyokusiza kukukhumbuze amaphuzu athile futhi uthole inzuzo ehlala njalo yale mihlangano.
Izincwadi Ezakhululwa Emhlanganweni
Ingabe insimu yebandla lakini inezilimi eziningi? Ngakho cishe usuyisebenzisile le ncwajana entsha ethi Good News for People of All Nations. Njengoba yenziwe yaba izinhlelo ezintathu ezihlukene, ezinamakhasi angu-32, angu-64, nangu-96, le ncwajana ilungiselelwe ngokukhethekile ukuba inakekele izidingo zezilimi ezahlukene zezwe ngalinye. Ngakho qiniseka ukuthi leli thuluzi elihle elisha lihlale likhona esikhwameni sakho sasensimini. Futhi lapho uhlangana nothile okhuluma ulimi ongalujwayele, siza ulandelele izinyathelo ezintathu ezibekwe ekhasini 2 layo. Kungenzeka usindise ukuphila!
Ngokuvumelana netekisi lonyaka ka-2004 elithi “Hlalani nilindile . . . Yibani abakulungele,” isikhulumi sokugcina ngosuku lwesibili lomhlangano sakhulula incwajana ethi Hlalani Nilindile! (Math. 24:42, 44) Kwangathi le ncwajana ingasiza abaningi ngokwengeziwe ukuba babone ukuphuthuma kwezikhathi zethu nokuba bacabange ngokungathí sina ngekusasa kanye nezenzakalo ezivusa amadlingozi ezisazokwenzeka. Futhi, njengoba isikhulumi sasho, kwangathi ingasisiza nathi ngabanye ukuba sibhekane ngokuphumelelayo nezingcindezi eziningi nezinkathazo zalokhu kuphila futhi sizimelele ngokomoya lapho sibhekene novivinyo.
Isikole Sababonisi Abajikelezayo
Kule minyaka eyisithupha edlule, ababonisi besifunda nabesigodi abangaphezu kuka-600 eCanada nase-United States, kanye nase-Alaska naseHawaii, baba khona emakilasini angu-13 eSikole Sababonisi Abajikelezayo esasiba seWatchtower Educational Center ePatterson, eNew York, e-U.S.A. Phakathi nonyaka wenkonzo ka-2004, isikole siye sanwetshwa kakhulu, njengoba siqhutshiwe nakwamanye amagatsha angu-87. Kwangu-23 alawa, emakilasini bekukhona nabafundi abavela ngaphandle kwezwe ebesiqhutshelwa kulo isikole. Ngokwesibonelo, iJalimane yamema abazalwane base-Austria, kwa-Israel, eMacedonia, eSwitzerland, naseTurkey. IPortugal yona yamukela abafundi abavela eLuxembourg nakwezinye iziqhingi eziningi, njenge-Azores, iCape Verde, iMadeira, neSão Tomé nePríncipe. IKenya yona yamukela ababonisi abajikelezayo abavela eTopiya, eRwanda, eTanzania, e-Uganda, nakwamanye amazwe ase-Afrika.
Izifundo zihlanganisa zonke izici zomsebenzi wababonisi besifunda nabesigodi. Umgomo uwukusiza laba bazalwane abasebenza kanzima ukuba baphumelele ngokwengeziwe ekufezeni imithwalo yabo yemfanelo eminingi, ehlanganisa ukufundisa emabandleni nasemihlanganweni nokuhola emsebenzini wokushumayela. (2 Thim. 2:2; 4:5; 1 Pet. 5: 2, 3) Lezi zifundo zibakhuthaza nokuba balondoloze ingokomoya labo siqu, basebenzise imibhalo ngokuqonda lapho besiza abanye.
Njengoba amakilasi amaningi eqhutshelwa emahhovisi egatsha, ababonisi abajikelezayo nomkabo bathola ukunambitha impilo yaseBethel. Elinye ikilasi labhala: “Sizuze kakhulu enqubweni yaseBethel yokwenza izinto. Sasijabulela kakhulu isimiso sasekuseni sokukhulekela, esihlanganisa ukufundwa kweBhayibheli kanye ne-Ncwadi Yonyaka. Naphezu komsebenzi esiwunikezwayo wangemva kwesikole, sasiba khona naseSifundweni Se-Nqabayokulinda somkhaya waseBethel ngoMsombuluko futhi sazuza ebudlelwaneni obuhle.”
Zonke izinsuku phakathi nehora lokuqala ngemva kokudla kwasemini, abanye abazalwane basebenza ngokushintshana eMnyango Wenkonzo. Bafunda ukuthi bangasebenzelana kanjani kangcono nehhovisi legatsha, ukuthi bangasilandela kanjani isiqondiso esinikezwayo, nokuthi bangayilungiselela kanjani imibiko yabo ngendlela enembile neqondakalayo.
Njalo ngoLwesihlanu abafundi namkabo balalela inkulumo. Le nkulumo ihlanganisa isikhuthazo esingokomoya esilungiselelwe ngokukhethekile lab’ odade abathembekile. Ngokwesibonelo, bayazuza ezikhumbuzweni zokuba baqhubeke bebeka isibonelo esihle sokuzithoba kwenkosikazi futhi bathola neziqondiso zokuthi bangabasekela kanjani abayeni babo ngokusebenza nodade emabandleni. Omunye umbonisi ojikelezayo wafanisa lezi zinkulumo zamasonto onke “nophudingi omnandi.”
Njengokulindelekile, lesi sikole sigcizelela kakhulu ukusetshenziswa kweBhayibheli—ikakhulukazi i-New World Translation of the Holy Scriptures—With References. Omunye umfundi eJalimane wathi: “Ngihlela ukusebenzisa i-Reference Bible esifundweni sami somuntu siqu nasemihlanganweni yebandla. Yima ngiqala ukwazisa ukuba yigugu kwayo.” Umbonisi ojikelezayo waseBrithani osengumakad’ ebona waba nomuzwa wokuthi ingokomoya lakhe nekhona lakhe lokufundisa liye lathuthukiswa ngenxa yokuthi kwakugxilwe eZwini likaNkulunkulu. Wabhala: “Ngifunde ukuthi nakuba kusiza ukusebenzisa umfanekiso omuhle nxa unikeza inkulumo, ukufunda nokuchaza imibhalo kubaluleke kakhulu.”
Abafundi abaningi babhala ngokwazisa maqondana nesikole. Omunye umzalwane e-United States wathi: “Izinhliziyo zethu zichichima ukubonga uJehova nenhlangano yakhe ngokusikhuthaza nokusihlomisela izabelo zethu. Kwangathi singakhonza ngokuqinisela okwengeziwe, ngokwazisa okujulile ngezindlela zikaJehova, nangothando olwengeziwe ngezimvu zakhe eziyigugu.” Umfundi waseFrance wabhala: “Leli kilasi lingiqaphelisise ngesidingo sokusebenzelana ngothando nabafowethu nodadewethu, nokwenza okusemandleni ethu ukubenza bajabule enkonzweni kaJehova.” Efingqa imizwa yabaningi, umbonisi ojikelezayo ePortugal wathi: “Lesi sikole siye saba okuthile okuvuza kakhulu ekuphileni kwami kobuKristu.”
Esika elijikayo, omunye uthisha wathi: “Kuyilungelo nomthwalo wemfanelo onzima ukufundisa amadoda okuyothi kamuva anikeze isiqondiso esithinta ukuphila kwezinkulungwane zabafowethu nodade. Sinethemba lokuthi ngesibusiso sikaJehova, izinzuzo zalesi sikole ziyohlala njalo.”—Jak. 3:1.
Ngasekupheleni konyaka wenkonzo ka-2004, ababonisi abajikelezayo abangaphezu kuka-1 700 base bengenile kulesi sikole, esaqhutshwa ngezilimi ezingu-14. Sizoqhubeka nangonyaka wenkonzo ka-2005 emagatsheni amakhudlwana.
Izindaba Eziphathelene Nomthetho
Ngo-May 19, 2004, i-European Court of Human Rights (ECHR) eStrasbourg, eFrance, yakhipha isinqumo ecaleni eliphakathi kukaLotter neBulgaria. Ngenkathi beyizithunywa zevangeli zoFakazi BakaJehova, abakwaLotter bafaka icala ngenxa yokuthi uhulumeni wawuzame ukubaxosha eBulgaria ngenxa yenkolo yabo. Iziphathimandla zaseBulgaria zavuma ukubakhokhela isinxephezelo nokuhlehlisa isinqumo sokubaphuca imvume yabo yokuhlala. Zaphinde zavuma futhi ukukhipha isimemezelo esicacile ngesimo esingokomthetho soFakazi BakaJehova eBulgaria, lapho babhaliswa khona ngokomthetho njengenkolo ngo-1998.
Ngo-December 16, 2003, i-ECHR yakhipha isinqumo esasivuna uSéraphine Palau-Martínez. Esinqumweni sayo esasekelwa amajaji angu-6 kwangu-7, le nkantolo yanquma ukuthi iFrance yayephule ilungelo likaDade Palau-Martínez maqondana nomkhaya wakhe. Wamangala kuyi-ECHR ngemva kokuphucwa ilungelo lokuhlala nezingane zakhe ezimbili yinkantolo yamacala adlulisiwe yaseFrance, eyanquma ukuthi kungcono ukuba “[abantwana] bangaphiliswa ngaphansi kwemithetho enokhahlo, nengabekezeleli yokukhuliswa kwabantwana . . . boFakazi BakaJehova.” Esinqumweni sayo, i-ECHR yanquma ukuthi inkantolo yamacala adlulisiwe yayenze isinqumo ngaphandle kokuqondiswa izimo zangempela laba bantwana abaphila ngaphansi kwazo futhi ingenasithakazelo enhlalakahleni yabo, nokuthi isinqumo esakhishwa sasiveza ukubandlululwa kwenkolo.
Ngemva kokukhuthazelela iminyaka yokuhlushwa izixhwanguxhwangu ezazishoshozelwa abantu abashisekela inkolo ngokweqile, abanye asebeye baboshwa, oFakazi BakaJehova eGeorgia bakwazi ukuya ngokuthula eMhlanganweni Wesigodi ‘Wokuhamba NoNkulunkulu.’ Okuthile okukhethekile kubazalwane kwaba ukukhululwa kwe-Nguqulo Yezwe Elisha YemiBhalo YamaKristu YesiGreki ngolimi lwaseGeorgia. Futhi ngo-November 28, 2003, uMnyango Wezobulungisa WaseGeorgia wabhalisa igatsha lakhona le-Watch Tower Bible and Tract Society of Pennsylvania. Ngakho, nakuba iNkantolo Ephakeme YaseGeorgia yakhipha isinqumo sokuqeda inhlangano eyayisetshenziswa oFakazi BakaJehova ngo-1998, manje kunenhlangano entsha esiqashelwa ngokomthetho, okubajabulisa kakhulu abazalwane.
Nokho, kusenamacala amaningana eGeorgia okusamelwe athethwe phambi kwe-ECHR. Noma kunjalo, kuyathokozisa ukubona isimo sabafowethu lapha sithuthuka.
Kusukela ngo-1990 abafowethu eJalimane baye bazama kodwa kwaba nhlanga zimuka nomoya ukubhalisa inhlangano yethu yenkolo ngaphansi komthetho wezinkampane zomphakathi. Ngakho lapho i-Federal Administrative Court ifuna ukuba oFakazi BakaJehova babonise ukwethembeka okungaphezu kwalokho okufunwa “uKhesari,” i-Federal Constitutional Court yasichitha lesi sinqumo njengesingahambisani nomthetho-sisekelo futhi yabuyisela icala emuva ukuba lithethwe kabusha. (Marku 12:17) Ngo-March 25, 2004, inkantolo yangaphambili yaqala ukubukeza icala kabusha. Yacela ukwaziswa okwengeziwe maqondana nokuma kwethu endabeni yegazi, ukukhuliswa kwezingane, ukususa ekuhlanganyeleni, nokungathathi hlangothi. Ijaji eliphethe icala lathi uhulumeni kumelwe asekele icala lakhe ngobufakazi obunokwethenjelwa—izibalo namaphepha asemthethweni—hhayi ngezingcaphuno ezingabazisayo ezivela kuyi-internet noma ezincwadini ezivela kubantu abanezinhloso ezimbi.
Ifomu elisetshenziselwa ukubuthela abantu ebuthweni lempi eGreece lalihlanganisa namagama athi “Chiliast noma Jehovist” njengenye yezinkolo ongakhetha kuzo. Libheka la magama njengachwensayo, igatsha laseGreece lafaka isikhalazo eMnyango Wezokuvikela. Ngo-March 24, 2004, lo mnyango wabhalela oFakazi BakaJehova uthi wawungahlosile ukudelela nokuthi “wawusuqalile nokulungisa la magama abekwe kabi.” Ifomu eselilungisiwe lifundeka kanje, “AmaKristu angoFakazi BakaJehova.”
Sekungamashumi eminyaka iPeru ilokhu iqaphela oFakazi BakaJehova njengenkolo. Nokho, ngo-November 1997, uMnyango Wezemfundo waqala ukuchitha izicelo zethu zokungakhokhiswa intela ngezincwadi zethu futhi yaqala ukufuna isamba semali ngaphambi kokuba izincwadi zethu zidedelwe zidlule ehhovisi elihlola izinto ezivela ngaphandle kwezwe. Leli cala lethulwa ezithebeni zenkantolo. Ngo-December 11, 2003, ijaji lakhipha isinqumo esavuna oFakazi BakaJehova. Lathi lokho okwenziwa umnyango “kwakungahlakaniphile futhi kungenangqondo.” Ukuziphatha kweziphathimandla, uma lisho, “kwakuwukubandlulula [futhi] kuyindelelo.” Izinkinga maqondana nokungeniswa kwezincwadi zasheshe zaxazululeka.
IPuerto Rico, izwe eliwuzibuse elisebenzelana ne-United States, inomthetho ovumela ukuba izindawo zomphakathi zivinjelwe ngamasango, izindonga nonogada. Le migoqo ithiya umsebenzi wethu wokushumayela. Amaphoyisa ombuso aye abaxosha ngisho nabamemezeli kwezinye zalezi zindawo. Imizamo yokuxazulula le nkinga ngaphandle kokuya enkantolo iye yahluleka. Manje sekufakwe icala kuyi-Federal District Court for the District of Puerto Rico, kucelwa ukuba lo mthetho kuthiwe uphula umthetho-sisekelo futhi ungqubuzana nenkululeko yenkolo neyokukhuluma. Kusalindelwe isinqumo senkantolo.
Ngo-October 28, 2003, iNkantolo Yamacala Adlulisiwe YaseBucharest yakhipha iSinqumo No. 1756, esabophezela uhulumeni waseRomania ukuba ufake oFakazi BakaJehova ohlwini lwentela lwezinkolo aqashelwayo. Ngo-February 6, 2004, i-Official Gazette No. 112 yakhipha uhlu “lwezinkolo eziqashelwa ngokomthetho eRomania.” OFakazi BakaJehova babebaliwe.
Ngo-March 21, 2004, iNkantolo Yesifunda SaseSeoul eRepublic of Korea yathola abazalwane abathathu bengenacala lokunqaba ukuya empini ngenxa yezizathu zenkolo. Kuyaqala ukuba inkantolo yaleli zwe iqaphele ukwenqaba ukuya empini ngezizathu zikanembeza noma zenkolo njengelungelo labantu. Amakhulu abafowethu eKorea njengamanje aboshiwe ngenxa “yobugebengu” ‘bokukhanda izinkemba zabo zibe ngamageja.’ (Isaya 2:4) Ngokudabukisayo, inkantolo ephakeme kanye nenkantolo yomthetho-sisekelo ziyenqaba ukuvikela abafowethu ngomthetho-sisekelo waseKorea oqinisekisa inkululeko yenkolo. Nokho isishaya-mthetho saseKorea sisanda kukhipha umthetho wokunikeza izakhamuzi eziseminyakeni yokubuthwa ithuba lokusebenzela uhulumeni.—IzAga 21:1.
Isinqumo seNkantolo Ephakame Yase-United States ecaleni elaliphakathi kwe-Watchtower ne-Village of Stratton siyaqhubeka sizuzisa oFakazi BakaJehova enkonzweni yabo yendlu ngendlu. Ngokwesibonelo, komunye umphakathi esifundazweni saseNew York, e-U.S.A., amaphoyisa ayeqhubeka efuna amaphepha emvume koFakazi ngaphambi kokuba baqale inkonzo yabo yasobala. Umphathi wamaphoyisa, ngemva kokuba azisiwe ngesimo nangesinqumo senkantolo, wabhala: “Ngiphoxekile ngezenzo zamaphoyisa ami futhi ngiyaxolisa nganoma yikuphi ukuhlukumezeka enikutholile.”
Umphakathi esifundazweni sase-Illinois wayala umnyango wamaphoyisa ukuba wazise wonke amaphoyisa kanye nezinye izisebenzi ukuthi ngenxa yesinqumo seNkantolo Ephakeme Yase-United States, “oFakazi BakaJehova abayidingi imvume ngaphambi kokuba baphume indlu ngendlu.” Iziqondiso zaqhubeka zathi: “Abadingi ukusitshela lapho beshumayela.”
Ngo-October 8, 2003 iNkantolo Ephakeme Yase-Iowa yathatha isinqumo esivuna uLester Campbell ecaleni elalihilela ukwenqaba kwakhe igazi. UMfoweth’ uCampbell wabahlawulisa ngemva kokumpontshelwa igazi lakhe ngenkathi ehlinzwa naphezu kweziqondiso zakhe ezibhaliwe nezomlomo ezenqaba ukufakelwa igazi. Inkantolo yangaphambili yayivune udokotela owayemhlinza nesibhedlela. Kodwa, iNkantolo Ephakeme Yase-Iowa yasijika isinqumo senkantolo yokuqala, yanquma ukuthi uLester Campbell wayengadingi isazi sezempilo ukuba simtshele ukuthi ukumpontshelwa igazi ngaphandle kwemvume yakhe kwakungahambisani nezimiso zokunakekela impilo. Yanquma futhi ukuthi kwakumelwe anxeshezelwe.
Ukuvinjelwa EMoscow Kanye Nomphumela Wako
I-Intermunicipal District Court YaseGolovinsky eRussia yanquma ngo-March 26, 2004 ukuvimbela yonke imisebenzi yoFakazi BakaJehova eMoscow nokuqeda inhlangano yabo engokomthetho. Leli cala ladluliswa. Ngo-June 16, 2004, iNkantolo YeDolobha LaseMoscow yasisekela isinqumo senkantolo ephansi, futhi ukuvinjelwa nokuqedwa kwenhlangano kwaba semthethweni. Abazalwane baye badlulisela icala kuyi-ECHR futhi bathemba ukuthi lizosheshe lithethwe ngenxa yezinkinga eziningi ezibangelwa yilokhu kuvinjelwa.
Noma kunjalo, ukuvinjelwa akuzange kuyephule imimoya yabazalwane. Empeleni, kuye kwabanyakazisa ukuba benze okwengeziwe enkozweni kaJehova. Intshiseko yabo isikhumbuza amazwi omphostoli uPawulu ngenkathi eyisiboshwa eRoma. Wabhala: “Izindaba zami ziye zaphumela ekuqhubekeleni phambili kwezindaba ezinhle.”—Fil. 1:12.
Ngokwesibonelo, ngo-March 2004 kwaba nenani eliphakame labamemezeli abangu-136 034 nezifundo zeBhayibheli ezingu-136 903. Kwakuqala eminyakeni engu-7 ukuba inani lezifundo lidlule inani labamemezeli! Futhi kusukela ngo-March kuya ku-June, igatsha lathola izicelo zamaphayona avamile ezingaphezu kuka-1 000, kwathi ngo-April kwaba nenani eliphakeme lamaphayona avamile angu-15 489. “Ngokufanayo,” kubika igatsha, “isinqumo sika-June 16 sashukumisela abafowethu ekubeni benze okwengeziwe.” Sabangela nabanye—kuhlanganise nabayeni abangakholwa—ukuba baqale ukuya emihlanganweni yamaKristu.
Umfundi waseyunivesithi e-United States wayeseRussia ngenkathi kukhishwa isinqumo sango-June. Igatsha liyabhala: “Weza ngokukhethekile eBethel, esemaphethelweni eSt. Petersburg, efuna ukwazi okwengeziwe ngalesi simo. Kwamhlaba umxhwele ukuhlanzeka kwendawo nendlela amukelwa ngayo.” Emangazwe ukuthi kungani umuntu engafuna ukuvimbela oFakazi BakaJehova, wacela izincwadi kanye nama-video ukuze aphindele nawo emuva eCalifornia awakhombise oprofesa bakhe bezifundo zenkolo.
Imihlangano Yesigodi EMoscow Iqhubeka Ngokuthula
Kusukela ngo-June 11 kuya ku-13, ngaphambi nje kwesinqumo senkantolo yamacala adlulisiwe esingathandeki, kwaba neMihlangano Yesigodi ‘Yokuhamba NoNkulunkulu’ emibili eMoscow, omunye waba ngoLimi Lwezandla LwaseRussia. Ekuqaleni imihlangano yayizoba ngemva kwecala, kodwa iKomiti Yegatsha yaphumelela ukuhlehlisa icala. Abafowethu babika ukuthi le mihlangano yahamba ngokushelela nokuthi iziphathimandla zedolobha zabambisana nabo. Empeleni, amaphoyisa ayeqaphe emasangweni atshelwa abaphathi: “Lapho ningenisa abantu enkundleni, ningabhemi futhi ningathuki nhlamba.”
Esiteshini saseMoscow, indoda yaqambela amanga iqembu elincane lodadewethu yathi bantshontshe imali yayo. Yaphoqa lab’ odade ukuba baye nayo esiteshini samaphoyisa. Lapho, ayisolanga nje lab’ odade kuphela kodwa nabo bonke abantu “baleli hlelo” ngokwenza isiminyaminya ngamabomu ukuze bagebenge abantu. Liphendula, iphoyisa labuka odadewethu lase libabuza, “Ningobani?”
Bekhomba amabheji abo, baphendula, “SingoFakazi BakaJehova, siya emhlanganweni wethu.”
Iphoyisa laphenduka labheka le ndoda lathi: “OFakazi BakaJehova abantshontshi. Kumelwe uxolise kubo ngoba ubadelelile.” Labe seliphendukela kodade lathi, “Sheshani niye emhlanganweni wenu.” Kule ndoda lathi, “Kodwa wena, sala lapha. Ngisafuna ukukhuluma nawe.”
Inani eliphakeme lababekhona enkundleni lalingu-21 291, kwabhapathizwa abangu-497. Emhlanganweni wolimi lwezandla, owawuseHholo LoMbuso, inani lafinyelela kwabangu-929, kwabhapathizwa abangu-19!
Ukubhekana Nezilingo EHaiti
Phakathi nonyaka ka-2004 izwe eliyisiqhingi laseHaiti labhekana nodlame, ubudlova, nokuswelakala kwezidingo eziyisisekelo, namanani aphakeme ezinto. Ukwenezela kulezi zingqinamba, izikhukhula ezadala umonakalo ngo-May zabulala abangaphezu kuka-1 500 futhi izinkulungwane zasala dengwane. Abekho oFakazi abafa, kodwa abaningana balahlekelwa yikho konke ababenakho, kuhlanganise nemizi yabo.
Noma kunjalo, abafowethu baqiniswa ubufakazi obucacile bosizo lukaJehova, isiqondiso sakhe nothando nokukhathalela okwaboniswa iNdikimba Ebusayo kanye nabazalwane bomhlaba wonke. Lolo thando lwaboniswa ngendlela engokoqobo ngosizo lwezinto ezingokwenyama ukuze kusizwe izisulu zesikhukhula. Njengokulindelekile, abazalwane bendawo nabo basizana ukuze bathole ukudla nezinye izidingo.
Igatsha laseHaiti lalibeke iso ezintweni ezenzekayo ukuze likwazi ukunikeza isiqondiso emabandleni. Ngokwesibonelo, njengoba udlame lwaludlanga enhloko-dolobha, iPort-au-Prince, iKomiti Yegatsha yacebisa abadala ukuba bahlele ukuba imihlangano ibe ngoMgqibelo esikhundleni sangeSonto mhla ka-29 February. Lokhu kwabonakala kuhlakaniphile, ngoba ngalo kanye lelo Sonto, umongameli waseHaiti owayekhungethwe izinkinga washiya isikhundla sakhe wabalekela ekudingisweni. Omunye umbiko wezindaba wathi: “Kwakhala inganono ubuqhuqhuqhu kuyo yonke inhloko-dolobha njengoba kwase kumapeketwane.” Igatsha liyabhala: “Akekho owayazi ukuthi kuzokwenzekani. Ukuba khona emhlanganweni ngeSonto kwakungenakwenzeka. Siyambonga uJehova ngokuphepha kwabafowethu.”
Kulesi sikhathi esimazonzo, amaphoyisa namavukela-mbuso nezigebengu babevimba imigwaqo, futhi uhulumeni wabeka umthetho wewashi kusukela kuhwalala kuze kube sentathakusa. Nokho ngisho nangaphambi kokuba kubekwe umthetho wewashi, amabandla ayeseyishintshile imihlangano yawo ukuze bonke bakwazi ukubuyela emakhaya kungakahlwi. Amabandla amaningi abika ukwanda emananini ababa khona emihlanganweni!
Abazalwane bazigcina bematasa nasenkonzweni yasensimini, okwabahlaba umxhwele omakhelwane. Abanye babethi, “Ukunibona nina boFakazi nishumayela kusiqinisa idolo ngempela.” Yebo, abamemezeli babehlale beqaphile futhi belokhu betshelana ukuthi kukuphi lapho izimo zazingcono khona ukuze bakwazi ukushumayela.
Ukwaziwa NjengamaKristu Kwaba Isivikelo
Igatsha laseHaiti liyabhala: “Ukwaziwa kahle omakhelwane nokuba nedumela lokungathathi hlangothi kwezombangazwe kwasiza ekuvikeleni abafowethu abaningi ekushayweni nasekugetshengweni.” Ngokwesibonelo, umbhangqwana oyizithunywa zevangeli wavinjwa amaqembu ezigelekeqe endleleni izikhathi zaze zaba ntathu. Lo mbhangqwana wenza izinto ezimbili: Waziveza njengoFakazi BakaJehova futhi wathandaza—kokubili buthule nangokuzwakalayo. Kuzo zontathu izikhathi othile wayebakhulumela, ethi oFakazi BakaJehova bangabantu abalungile abangangeni kwezombangazwe. Lo mbhangqwana wafika ngokuphepha ekhaya.
Amaqembu ahlomile aphinde avimba amalungu omkhaya waseBethel. Njengezithunywa zevangeli, nabo baziveza njengoFakazi futhi bathandaza, kwaba nemiphumela efanayo. Ngesinye isikhathi umphangi wathi: “Hambani ngokuthula, nisithandazele bo!” Elinye ilungu laseBethel lamiswa amaphoyisa emgwaqweni efuna ukusesha imoto yalo ebheka izikhali. “Izikhali enginazo mina iBhayibheli nomagazini INqabayokulinda ne-Phaphama!” kusho umzalwane. Iphoyisa lamomotheka futhi lamdlulisa. Ngemva kwalokho, base beyibona isekude imoto futhi bayidlulise ngaphandle kwemibuzo.
Igatsha labika ukuthi ezinyangeni ezalandela izinto zathi damu. Kodwa izinkinga zaqhubeka, futhi kwakusalokhu kuhlalelwe ovalweni. Ngakho, abazalwane báhlala beqaphile.
Indawo Yokunyathelisa Yase-United States Iyathuthukiswa
Ngokwesiqondiso seNdikimba Ebusayo, ngo-2002 kwahlelwa ukuba umsebenzi wokunyathelisa uhlelwe kabusha emazwekazini amahlanu—i-Afrika, i-Asia, iYurophu, iNingizimu neNyakatho Melika. Lolu hlelo luye lwaphumela ekusetshenzisweni ngokugcwele kwamagatsha, kuhlanganise nelase-United States, eselincishelwe umsebenzi.
Wonke umsebenzi wokunyathelisa, wokuhlanganiswa nowokuthunyelwa kwezincwadi e-United States uye waqoqelwa ndawonye eWallkill, eNew York, phakathi nonyaka ka-2004. Amapulani nesizathu salokhu kuqoqelwa ndawonye kwethulwa phambi kwebhodi yokuhlelwa kwedolobha ngo-August 6, 2002. Ngo-September 3 kwaba nomhlangano womphakathi, okwathi ngemva kwawo sanikezwa imvume yokugcina. Emhlanganweni waminyaka yonke we-Watch Tower Bible and Tract Society of Pennsylvania ngo-October 5, 2002, kwenziwa isimemezelo sokuthi iNdikimba Ebusayo ikuvumile ukuqoqelwa ndawonye komsebenzi okuzokwenziwa eWallkill. Kwa-odwa imishini emisha emibili yokunyathelisa okuthiwa i-MAN Roland Lithoman, futhi izakhiwo ezintsha ezazizoyihlalisa zahlelelwa ukuqedwa ngo-February 2004.
Lo msebenzi omkhulu kangaka wawuzoqedwa kanjani ngezinyanga ezingu-14 nje kuphela? Abafowethu babheka kuJehova ukuba aqondise izinto futhi ashukumise abantu ngabanye ukuba bazinikele ngokuzithandela. Ukumethemba kwabo kwavuzwa. Umsebenzi waqala ngo-February 2003, futhi ukwenezelwa kwesakhiwo sokunyathelisa kwaphela ngo-September. Umshini owodwa kwemithathu ebikhona eWallkill waqaqwa futhi wathuthelwa esakhiweni esisha esisanda kuqedwa ngo-December. Imishini emisha emibili yafika ngo-April nango-May 2004 futhi yaqala ukunyathelisa ngo-June nango-July. Yomihlanu imishini yayisisebenza ngokugcwele ngo-September.
Ngaphambili indawo yokuhlanganisa izincwadi yayithatha izitezi ezingu-11 emabhilidini amathathu esakhiweni esiku-Adams Street eBrooklyn. Manje yonke indawo yokuhlanganisa izincwadi isendaweni eyodwa eWallkill futhi ithatha indawo encane ngamaphesenti angu-58. Ukuhlanganiswa kwezincwadi ezinoqwembe oluthambile kwaqala ngo-July 2004. Kamuva kuleyo nyanga, izincwadi zokuqala ezinoqwembe oluqinile zaqala ukukhiqizwa kulolu xhaxha lwemishini engaphezu kwamamitha angu-400 ubude, eyakhiwa imishini engu-33 ehlanganiswe izimiso ezingu-70 zokuthutha izincwadi. Izingxenye zencwadi zithintwa ngesandla kanye kuphela, ekuqaleni komshini. Njengoba ikhiqiza izincwadi ezingu-120 ngomzuzu, imishini ekhipha izincwadi ezinoqwembe oluqinile idinga abantu abangu-25 kuphela ukuze isebenze—bangaphansi ngamaphesenti angu-66 kunasekuqaleni. Yonke indawo yokuhlanganisa izincwadi yaqala ukusebenza ngo-October 2004.
Kusukela ngo-November 2004, uMnyango Wokuthumela Izincwadi omusha eWallkill waqala ukusebenzisa uhlelo lwama-computer olusha oluthatha indawo encane ngamaphesenti angu-45 kunolwasekuqaleni eBrooklyn ukuze unakekele izicelo zezincwadi zamabandla. Ama-computer abala inani lezincwadi abese ekhetha ibhokisi elifanele. Isimiso sokuhambisa izincwadi esingamamitha angu-800 sithutha i-oda ngalinye siliyise endaweni ekhethekile lapho lifike lilungiselelwe khona ukuthunyelwa. Indawo izimoto ezifike zithathe kuyo izincwadi zidlule yenza kube lula ngamabandla alapha ukuba athole ama-oda awo.
Sibonga ngokusuka enhliziyweni kubafowethu nodadewethu abaningi abasisiza kulo msebenzi. Bahlanganisa amalungu omkhaya waseBethel namavolontiya esikhashana, amaqembu abazalwane abasebenza ngaphansi kokuqondisa kwamaKomiti Okwakha Ezifunda ezifundazwe ezinhlanu, nabazalwane abanikela ngokusuka enhliziyweni ngamathuluzi nangezinto zokwakha ezivela emabhizinisini abo. Futhi, sibonga ‘abaphi abanamileyo’ abaningi abasekela ngokwezimali.—2 Kor. 9:7, 11.
IBrooklyn Iyashintsha
Ukuthuthelwa komsebenzi wokunyathelisa, wokuhlanganisa nowokuthumela izincwadi eWallkill kuye kwashintsha ukubukeka kweBethel yaseBrooklyn. Ngo-April 29, 2004 kwaba nesenzakalo esiyingqopha-mlando nesithinta inhliziyo. Ngaleyo ntambama, njengoba kwakushaywa ihlombe kukhona nabachiphiza izinyembezi, uMax Larson, umbonisi wendawo yokunyathelisa weminyaka engaphezu kwengu-60, wavala umshini wokugcina wokunyathelisa eBrooklyn, kanjalo eqeda iminyaka engu-84 yokunyathelisa okuqhubekayo lapha. Indawo yokuhlanganisa izincwadi yona yavalwa emasontweni ambalwa kamuva.
Iqaphela ukuthi lezi zinguquko zazizoyinciphisa ngokuphawulekayo indawo edingekayo eBrooklyn, iNdikimba Ebusayo, ngo-June 2003, yamemezela ukuthi kungase kuthengiswe isakhiwo esiku-360 Furman Street. Incwadi yesivumelwano yasayinwa ngoLwesihlanu, ngo-June 18, 2004. Ilondolo, amahhovisi, namashabhu ayesesakhiweni esingamamitha-skwele angu-93 000 manje kuthuthelwa endaweni evuleke esakhiweni esiku-117 Adams Street.
Ngaphezu kwalokho, kwenziwa ushintsho olukhulu esakhiweni esiku-107 Colombia Heights njengoba silungiswa kabusha. Kuhlelwe ukuba indawo yokuhlala iqedwe ngasekupheleni kuka-2005, futhi umsebenzi wonke uyophela ngo-September 2006. Isakhiwo esilungisiwe siyohlalisa amalungu omkhaya waseBethel angaphezu kuka-300 futhi siyoba nesitolo esincane, iHholo LoMbuso, umtapo wezincwadi, indawo yokwamukela izivakashi, amahhovisi, ilondolo yamalungu omkhaya, kanye nengadi entsha.
Silungele Ukwanda Emhlabeni Wonke
Amagatsha aseBrazil, eBrithani, eJapane, eMexico naseNingizimu Afrika nawo aye athola imishini emisha yokunyathelisa i-MAN Roland Lithoman. IBrithani yaba igatsha lokuqala ukufaka umshini omusha, owafika ngo-July 2003, waqala ukunyathelisa ngo-October. Unyathelisa omagazini abangu-750 000 ngosuku—abayisigidi nengxenye uma kuzosetshenzwa amashifu amabili—okucishe kube inani eliphindwe kathathu kunomshini wangaphambili.
Le mishini emisha inganyathelisa amaqoqo amakhasi amaBhayibheli nawezinye izincwadi. Igatsha laseNingizimu Afrika, ngokwesibonelo, seliqalile kakade ukunyathelisa amaqoqo amakhasi e-Nguqulo Yezwe Elisha ngesiSuthu, okuwulimi lwaseNingizimu Afrika. Igatsha laseJapane libika ukuthi ngaphambili kwakulithatha usuku lonke ukushintsha kusuka ekunyatheliseni izincwadi ezincane kuya kwezinkulu. Manje sekuthatha ihora nje vo. Futhi esikhundleni sezinsuku eziyishumi ezazidingeka ukuze kunyatheliswe amapheshana ayisigidi, sekuba amahora ayisihlanu kuphela. Ezinyangeni zawo zokuqala ezintathu, umshini wokunyathelisa eJapane ukhiqize amapheshana ayizigidi ezingu-12; omagazini nezincwajana eziyizigidi ezingu-12; izincwadi ezingu-240 000; namaBhayibheli angu-48 000.
Eminye imishini emisha iyasika, ibale, ibeke ngamaqoqo, ifake ilebula futhi isonge izincwadi. Izingcwecwe zokunyathelisa sezenziwa ngokunembe kakhudlwana ngenxa yendlela entsha yokuzenza ebizwa ngokuthi i-computer-to-plate. Le ndlela iqeda isidingo sokusebenzisa ama-negative, ngaleyo ndlela kunciphe umsebenzi. Igatsha laseBrithani libika ukuthi yonke le ntuthuko ayinyusanga nje kuphela umkhiqizo kodwa futhi inciphise inani lezisebenzi ezidingekayo.
Amabombo Abheke EJalimane Ukuyoqeqeshwa
Amaqembu avela emagatsheni ayisithupha aya eJalimane embonini yakwa-MAN Roland ukuze ayoqeqeshelwa ukusebenzisa umshini. Kokuhlangenwe nakho kwabo ekuqeqesheni izisebenzi ezingebona oFakazi, othisha babelindele ukuba abafowethu babheke lesi sikhathi njengethuba lokuvakasha. Ngakho lab’ othisha bamangala futhi bahlabeka umxhwele ngokuzinikela kwabazalwane. Empeleni, oFakazi bacela ukuba basheshe baqale futhi baphuze ukushayisa ukuze bazuze ngokugcwele kule mfundo.
Kwabanye abazalwane abaqeqeshwayo ulimi lwaba yinselele ngenxa yokuthi kokubili izifundo nezincwadi zeziqondiso zokusebenzisa umshini kwakungesiNgisi. Licabangela lokhu, ithimba laseJapane lasebenza kanzima ukuze lithuthukise isiNgisi salo ngaphambi kokuya eJalimane. Abaningi baze bahlanganyela okwesikhashana emabandleni esiNgisi.
Izikhonzi ZaseBethel Zinikeza Ubufakazi Obuhle
Kamuva lapho imishini ifika emagatsheni, onjiniyela abavela kwa-MAN bafaka imishini besizwa amalungu omkhaya waseBethel. Kuwo wonke amagatsha ayisithupha, isimo esijabulisayo nesakhayo saseBethel saba nethonya elihle ezisebenzini ezingebona oFakazi. Indoda eyayixhuma umshini eLondon yathi kubazalwane: “Ngibuyele ekhaya izolo ebusuku, ngabona umakhelwane wami engadini yakhe. Bengingamthandisisi kahle, kodwa izolo ngikhulume naye imizuzu engu-20, ngathola ukuthi eqinisweni uyindoda ekahle.” Lo chwepheshe ofanayo wanezela ukuthi umkakhe uye waqaphela umehluko esimweni sakhe nasekwenzeni kwakhe izinto. Umkakhe wathi: “Usunobungane, uyamamatheka, futhi usuyababingelela abantu.”
“Bengisebenza noFakazi amasonto ayisithupha,” ephendula. “Futhi kula masonto amabili adlule, angizange ngiyithuke nakanye inhlamba. Empeleni, ngithemba ukuthi ngeke ngiphinde ngithuke futhi.”
Lapho ukufakwa komshini sekuphelile egatsheni laseLondon, isikhulu sakwa-MAN sathinta igatsha ngocingo ukuze sibonge abazalwane ngendlela abanakekela ngayo izisebenzi zale mboni. Sathi umshini ufakwe ngaphandle kwenkinga.
Kwamanye amagatsha kwahlelwa ukuba kube nendawo yokudlela yangaphakathi yokusetshenziswa yilabo ababefaka imishini emisha. Ukuba noweta abagqoke kahle bebanikeza ukudla kwasemini kwakuyinto engavamile kwabaningi, ikakhulukazi kulabo abangebona oFakazi. Omunye uchwepheshe eJapane wayengakaze asibone isakhiwo sokunyathelisa esihlanzeke nesihleleke njengalesi saleli gatsha. Wathi: “Ayikho enye indawo engcono emhlabeni wonke kunalena umuntu angase asebenze kuyo.” Waphinde wabonga ukwethembeka kwabazalwane. Ayikho enye indawo lapho ayengashiya khona amathuluzi akhe engaqashiwe, eqiniseka ukuthi ngeke antshontshwe. Efuna ukwazi okwengeziwe ngoFakazi BakaJehova, wamukela izincwadi eziningana futhi wavakashiswa ezakhiweni zegatsha.
Abazalwane eMexico bamemela ochwepheshe bakwa-MAN eSikhumbuzweni. Abane basamukela isimemo. Nokho, babengenakho okokugqoka okufanele. Ngenxa yokuthi babefuna ukuthenga amasudi, isikhonzi saseBethel sabaphelezela bayothenga. Abazalwane babanikeza amaBhayibheli futhi phakathi nenkulumo yeSikhumbuzo babasiza ukuba bathole imibhalo. Ngemva kwemihlangano, ochwepheshe laba babethatha izithombe futhi behleka kakhulu kangangokuba abaningi ebandleni bacabanga ukuthi babeyizikhonzi zaseBethel yaseJalimane.
Kuwo wonke amagatsha, abakhi nabantu esasithenga kubo izinto zokwakha banikezwa ubufakazi obuhle. Umakhi othile e-United States wabhala: “Ngihlabeke umxhwele ngezinga lenu lokuhleleka ikakhulukazi kwabantu. Angicabangi ukuthi ngake ngawujabulela kangaka umsebenzi wokwakha ukwedlula indlela engiwujabulele ngayo lapha. Inhlangano yenu inginikeza ithemba ngekusasa lesintu. Ukube umdlandla nokukhathalela bekufakeka ebhodleleni futhi kuthengiswe, iqembu lenu ngempela beliyoba nento wonke umuntu angafuna ukuyithenga.”
Indoda eyayisinikeza amapayipi omshini omusha eMexico yamangazwa umoya wokuthula owawukhona egatsheni. Yabuza imibuzo eminingi, manje yona nomkhaya wayo batadisha iBhayibheli futhi bathuthuka kahle. Induna yesikwata yenza isicelo esingavamile. “Ngokujwayelekile,” isho, “abantu basinikeza ithiphu ukuze babonise ukwazisa ngomsebenzi wethu. Kodwa, ningaba nenkinga yini uma ninganika ngamunye wethu iBhayibheli? Kulokho engikubone lapha, ngicabanga ukuthi ulwazi lweBhayibheli lubaluleke kakhulu kunemali.”
Ukunikezelwa Kwegatsha LaseNdiya
Igatsha laseNdiya liyabhala: “Usuku olwalubhekwe ngabomvu lwagcina lufikile ngo-December 7, 2003. Kwakuwusuku lokunikezelwa kwegatsha lethu elalisanda kwakhiwa eBangalore, engxenyeni eseningizimu ephakathi yeNdiya.”
Njengoba zakhiwe endaweni engamahektare angu-17, lezi zakhiwo ezingamamitha-skwele angu-30 000 zifana nedolobhana elincane. Leli igatsha lokuqala elikhulu emhlabeni ukuba lakhiwe inkontileka yangaphandle futhi linendawo yokucwengisisa amanzi okuphuza, indawo yokuhlanza amanzi angcolile abuye asetshenziswe, nomshini walo wokuphehla ugesi. Lesi sithabathaba sinamahhovisi angu-122, ahlanganisa awabahumushi abangu-80; iHholo LoMbuso elikhangayo; nendawo yokunyathelisa enkulu. Kunezakhiwo ezintathu zokuhlala ezinamakamelo athokomele, ilondolo, indawo yokudlela, kanye nekhishi elinakho konke. Wonke umsebenzi wokwakha, okwasetshenziswa kakhulu kuwo izinto zokwakha zendawo, waqedwa ngeminyaka emibili.
Umsebenzi woMbuso waqala ngo-1905 eNdiya. Manje kuhunyushwa futhi kunyatheliswe ngezilimi zaseNdiya ezingu-26. Ekunikezelweni kwalo, izithunywa zevangeli ezazikhonze eNdiya amashumi eminyaka zalandisa okuhlangenwe nakho okukhuthazayo, futhi uStephen Lett weNdikimba Ebusayo wanikeza inkulumo yokulinikezela. Kwabangu-2 933 ababekhona, kwakunezivakashi ezingu-150 ezivela emazweni angu-25.
Ukunikezelwa Kwegatsha LasePhilippines
“Sifuna nowethu umsebenzi ufane nowaseWatch Tower!” Yilokho okwashiwo abanye abakhi abangebona oFakazi eManila lapho bebona umsebenzi omuhle owenziwe egatsheni lasePhilippines. Empeleni, lapho abakwathelevishini, ababenza uhlelo olukhuluma ngemithetho yokwakha, beya kunjiniyela wedolobha, wathi: “Uma nifuna ukubona indawo elandela imithetho yokwakha ngokuphelele, hambani niye eWatch Tower.”
Abafowethu bakha isakhiwo esisha sokuhlala esinezitezi eziyishumi kanye nezakhiwo eziseceleni baphinde balungisa kabusha isakhiwo esinezitezi eziyishumi esakhiwa ngo-1991. Kungani kwakudingeka lokhu kunwetshwa? Kusukela ngo-1991 kuya ku-2003, inani labamemezeli landa ngabantu abangu-34 000, kwaphumela enanini eliphakeme labamemezeli boMbuso abangaphezudlwana kuka-144 000!
Lanikezelwa ngo-November 1, 2003. Ababekhona ekuseni ngalowo Mgqibelo libalele kwakungamalungu omkhaya waseBethel, ababeyizithunywa zevangeli kanye nezinye izimenywa zaphesheya ezivela emazweni angu-13, nabafowethu nodade basePhilippines abangaphezu kuka-2 000, okwenza inani lababekhona libe ngu-2 540. UStephen Lett waxoxa ngesihloko esithi “Ukwazisa Izindlu ZikaJehova Zokukhulekela Zamandulo Nezanamuhla.” Ngakusasa, uquqaba lwamaphayona endawo, abadala nomkabo, ingqikithi yabangu-8 151, bajabulela isimiso esikhethekile eHholo LoMhlangano LaseMetro Manila.
Emhlabeni wonke, kunengqikithi yezinceku ezimisiwe ezingu-20 092 ezisebenza emagatsheni afana nalawa. Zonke zingamalungu oHlelo Lomhlaba Wonke Lwezinceku ZoFakazi BakaJehova Ezisenkonzweni Ekhethekile Yesikhathi Esigcwele.
[Ibhokisi ekhasini 21, 22]
Ngathunjwa Emini Bebade
Emini ngoLwesihlanu, ngo-March 19, 2004, uCarl, uFakazi oneminyaka engu-20 ubudala, wayezihambela ngomgwaqo ophithizelayo ePétionville, eHaiti. Engazelele, amadoda ahlomile ayegqoke ezimnyama amphonsa evenini, amumboza ikhanda ngendwangu, yabe isisuka ngesikhulu isivinini. UCarl uyalandisa:
Sengiphumile evenini, ngayiswa ekamelweni elalinezinye izithunjwa, okwakubonakala sengathi zingabafundi baseyunivesithi ababesolwa ngokuhlanganyela ekubhikisheni kwezombangazwe. Njengoba babeya beba nodlame kakhulu, abathumbi bazamulisa inganono kaningana, babulala esinye sezithunjwa. Ngezwa ikhanda laso lithinta izinyawo zami. Baqala ukungibuza imibuzo nokungisongela. Becasukile, bangishaya bangiphonsa phezu kwesidumbu.
“Phendula imibuzo yethu!” kusho umholi wabo.
“Kodwa mina angazi lutho ngezombangazwe,” ngiphendula.
“Uma kunjalo, ngizokubulala khona manje!” ememeza.
Ngacela: “Ngaphambi kokuba ungibulale, ngivumele ngithandaze kuNkulunkulu wami, uJehova, ngimcele asize abazali bami kanye nabantwana bakithi, njengoba bengeke baphinde bangibone.”
“Sheshisa! Ngijahile,” engikhaca.
Ngenkathi ngithandaza ngokuzwakalayo, le ndoda yaphuma ekamelweni. Lapho ibuya, ngazitshela, ‘Carl, selikushonele. Usuzokufa.’ Kodwa ngamangala.
“Ingabe unguCarl wakwaSbanibani?” kubuza le ndoda.
“Yebo,” ngiphendula, ngimangazwe ukuthi ilazi kanjani igama lami.
Yachaza ukuthi ngake ngayigibelisa emotweni yami izikhashana, futhi njengoba yase yazi ukuthi ngingubani, yayingeke isangilimaza. Kubonakala sengathi yabona ukuthi yimina ngezinto engazisho emthandazweni, nakuba ikhanda lami lalimboziwe. Yaphinde yaphuma futhi yaba nengxoxo eshisayo nalabo eyayihamba nabo. Ekugcineni, othile wangingenisa evenini, sahamba, ekugcineni wangiphonsa ngaphandle emgwaqweni. Kwakuyisenzakalo esethusayo esaluqinisa kakhulu ukholo lwami kuJehova nasemandleni omthandazo.
[Ishadi/Izithombe ekhasini 12, 13]
EZINYE ZEZENZAKALO ZONYAKA WENKONZO KA-2004
Ngo-September 1, 2003
Ngo-September: Ngonyaka wenkonzo ka-2004 kuqhutshwa iSikole Sababonisi Abajikelezayo emagatsheni angu-88.
Ngo-October: Igatsha laseBrithani liqala ukunyathelisa ngomshini i-MAN Roland Lithoman.
Ngo-October 28: INkantolo YaseRomania ikhipha umyalo ohlanganisa oFakazi BakaJehova ohlwini lwentela lwezinkolo zakhona ezisemthethweni.
Ngo-November 1: Kunikezelwa igatsha lasePhilippines.
Ngo-November 28: UMnyango Wezobulungisa WaseGeorgia ubhalisa ihhovisi legatsha lakhona loFakazi BakaJehova.
Ngo-December 7: Kunikezelwa igatsha laseNdiya.
Ngo-January 1, 2004
Ngo-March 26: INkantolo YaseGolovinsky ikhipha umyalo wokuvimbela oFakazi BakaJehova eMoscow. Icala liyadluliswa.
Ngo-April: IRussia iba nenani eliphakeme lamaphayona avamile angu-15 489.
Ngo-April 29: Ngemva kweminyaka engu-84 yokunyathelisa okuqhubekayo, isakhiwo sokunyathelisa eBrooklyn siyavalwa. Kunesakhiwo esisha sokunyathelisa eWallkill.
Ngo-May 1, 2004
Ngo-May: Phakathi nodlame lwezombangazwe, kuba nezikhukhula ezinkulu eHaiti. Abekho abafowethu abafayo.
Ngo-June 16: INkantolo YeDolobha LaseMoscow ivumelana nesinqumo somhla ka-March 26. Ukuvinjelwa nokuqedwa koFakazi BakaJehova kuba ngokomthetho. Icala lidluliselwa kuyi-ECHR.
Ngo-August 31, 2004
[Isithombe ekhasini 11]
Kukhululwa “INguqulo Yezwe Elisha YemiBhalo YamaKristu YesiGreki” ngolimi lwesiGeorgia
[Izithombe ekhasini 27]
Abafowethu basebenza emshinini we-MAN owodwa kwemibili eWallkill, eNew York, e-U.S.A.
[Isithombe ekhasini 29]
Igatsha elisanda kunikezelwa eBangalore, kwelaseNdiya
[Isithombe ekhasini 30]
Igatsha lasePhilippines elinwetshiwe