Ingabe Usuku Lwethu Lokufa Selunqunyiwe Kakade?

Impendulo yeBhayibheli

Cha, usuku lwethu lokufa alunqunywa kusengaphambili. Kunokuba lisekele inkolelo yokudalelwa, iBhayibheli lithi ngokuvamile ukufa kubangelwa ‘isenzakalo esingalindelekile.’—UmShumayeli 9:11.

IBhayibheli alisho yini ukuthi ‘kunesikhathi sokufa’?

Liyasho, umShumayeli 3:2 uthi kunesikhathi “sokuzalwa nesikhathi sokufa, isikhathi sokutshala nesikhathi sokusiphula okutshaliweyo.” (IBhayibheli LesiZulu Elivamile) Nakuba kunjalo, umongo waleli vesi ubonisa ukuthi iBhayibheli likhuluma ngezinto ezivamile eziqhubeka zenzeka ekuphileni. (UmShumayeli 3:1-8) UNkulunkulu akasibekeli isikhathi sokufa njengoba engamphoqi nomlimi ukuba atshale ngesikhathi esithile. Kunalokho, iphuzu liwukuthi kufanele sigweme ukuba matasa kakhulu ngezinto ezivamile zansuku zonke size singamnaki uMdali wethu.—UmShumayeli 3:11; 12:1, 13.

Iminyaka yokuphila ingelulwa

Naphezu kokungaqiniseki kokuphila, singakwazi ukuphila isikhathi eside uma senza izinqumo ezihlakaniphile. IBhayibheli lithi: “Ukufundisa kohlakaniphileyo kungumthombo wokuphila, ukuze kudedwe ezihibeni zokufa.” (IzAga 13:14) Ngendlela efanayo, uMose watshela ama-Israyeli ukuthi uyengaphila ‘izinsuku ezinde’ uma elalela imiyalo kaNkulunkulu. (Duteronomi 6:2) Ngokuphambene nalokho, singakufishanisa ukuphila kwethu ngokwenza izinto ezimbi noma eziwubuwula.—UmShumayeli 7:17.

Nokho, kungakhathaliseki ukuthi sihlakaniphe kangakanani nokuthi siqaphe kangakanani ngeke sakwazi ukubalekela ukufa. (Roma 5:12) Nokho, lesi simo sizoshintsha ngoba iBhayibheli lithembisa isikhathi lapho ukufa ‘kungayikuphinde kube khona.’—IsAmbulo 21:4.