Ukubhekana Nokukhumbula Ekhaya Enkonzweni KaNkulunkulu

UJESU KRISTU wayala abalandeli bakhe: “Hambani nenze izizwe zonke abafundi.” (Mathewu 28:19) KumaKristu amaningi, ukufeza lokho kuthunywa kuye kwasho ukwamukela izimo ezinzima kude nasekhaya. Ababonisi abajikelezayo, omkabo, nabanye bashiya izinto eziningi ngemuva ngenxa yenkonzo kaNkulunkulu. Ukukhumbula ekhaya kungaba inselele yangempela kubo bonke laboFakazi BakaJehova.

Ukukhumbula ekhaya kwenzeka lapho izinkumbulo zikwenza ucabange ngokulondeka nothando kwesikhathi esidlule esijabulisayo. Lokhu kungavusa imizwelo enamandla uze uzizwe ucindezelekile futhi ungakwazi ukuqhubeka. Eqinisweni, ngemva kokuthengisa izimpahla zabo nokuthatha uhambo olubizayo oluya kwelinye izwe, abanye baye bayeka ababekuhlelile baphindela ekhaya. Ukukhumbula ekhaya kwabanqoba.

Ukuhlaselwa okunjalo kwemizwelo kuvamile lapho usanda kuthutha, kodwa ngabanye kuqhubeka sonke isikhathi sokuphila. Ngemva kweminyaka engu-20 ehambile, uJakobe ‘wayelangazelela nokulangazelela indlu kayise.’ (Genesise 31:30) Obani abangalindela ukuhlaselwa ukukhumbula ekhaya? Kubangelwa yini? Umuntu angabhekana kanjani nemizwa enjalo?

Yini Ebangela Ukudabuka?

Ukukhumbula ekhaya kungagadla kunoma ubani. U-Amytis, indodakazi yenkosi yaseMediya u-Astyages, ngokusobala wayenazo zonke izizathu zokujabula: ingcebo, udumo, umuzi omuhle. Nokho, wayekhumbule ekhaya ezintabeni zaseMediya kakhulu kangangokuba umyeni wakhe, iNkosi uNebukadinesari, wazama ukumduduza ngokwakha insimu endaweni ephakeme yaseBabiloni.

Ukukhumbula ekhaya kungaba okuvivinya ngokukhethekile lapho ukuphila kubonakala kunzima kakhulu kunalokho okwakuyikho ngaphambi kokuba umuntu athuthe. Lapho abantu bakwaJuda bethunjwa, babubula: “Ngasemifuleni yaseBabele sahlala khona, sakhala, lapho sikhumbula iSiyoni. Siyakuhlabelela kanjani ihubo likaJehova kwelinye izwe na?”—IHubo 137:1, 4.

Ziningi izinto ezingabangela ukucindezela kokukhumbula ekhaya. UTerri, owayethuthile eCanada, uthi: “Ngolunye usuku kwawa isithombe somkhaya kwenye incwadi. Lapho ngisicosha, ngokungazelele isikhukhula sokukhumbula ekhaya semuka nami, futhi ngakhala.” UChris, owathutha eNgilandi waya ezweni elimpofu kakhudlwana, uyavuma: “Ukuzwa nje isigqi sengoma endala noma iphunga lokudla engikujwayele kwakungangenza ngilangazelele izinto engangizishiye ngemuva.”—Qhathanisa noNumeri 11:5.

Izibopho zomkhaya eziqinile ngokuvamile zinengxenye kulokhu. URoseli, owazalelwa eBrazil manje ohlala ezweni elingumakhelwane, uyaphawula: “Ngiphatheka kabi lapho ngizwa izindaba ezimbi ezivela ekhaya futhi ngingeke ngikwazi ukuba lapho ukuze ngisize. Ngezinye izikhathi lapho ngingezwa lutho kuba kubi kakhulu bese ngiqala ukucabanga izinto ezingekho.” UJanice wathutha eNyakatho Melika waya edolobheni elincane elisezindaweni ezishisayo zase-Amazon. Uthi: “Ngikhumbula ekhaya lapho ngizwa izindaba ezinhle ezivela ekhaya. Ngizwa ngendlela abazijabulisa ngayo ndawonye, bese ngifisa sengathi ngabe benginabo.”

Ukukhumbula ekhaya akubangelwa nje ukushiya abantu. ULinda uyachaza: “Ngangikhungatheka lapho ngingazi ukuthi zithengwaphi izinto engangizidinga. Ngangingawazi amanani noma indlela yokuhweba. Ukuba nemoto kwakunezindleko ezinkulu, futhi ngaso sonke isikhathi ngangisunduzwa lapho ngizama ukugibela izinto zokuthutha zomphakathi ezigcwalayo. Lokhu kwamane nje kwangenza ngalangazelela ikhaya.” Ephawula ngegebe elingokwesiko nelezomnotho, uJanet uthi: “Ubumpofu babungiphatha kabi. Ngangingakaze ngibone abantu becela ukudla, noma imikhaya emikhulu ihlala ndawonye ekamelweni elilodwa ingenamanzi. . . . Izinto ezinjalo zangiphatha kabi kakhulu kangangokuba ngaba nomuzwa wokuthi ngangingasenakuhlala lapho.”

Ukubhekana Nemizwa Yakho

Akumelwe sidumazeke ngokuba nemizwa engokomzwelo enamandla ngabantu esibathandayo noma ngezindawo esizijwayele esakhulela kuzo. UJehova uNkulunkulu wasinikeza imizwelo ukuze sijabulele ubuhlobo bomuntu siqu obufudumele. Ababonisi abangamaKristu bebandla lase-Efesu babengamadoda avuthiwe ngokomzwelo. Kodwa kwenzekani lapho ukubahambela kukamphostoli uPawulu kusondela ekupheleni? Phela, “bakhala kakhulu bonke‚ bamgona uPawulu ngentamo‚ bamanga”! (IzEnzo 20:37) Yiqiniso, lesosenzakalo sasingahileli ukukhumbula ekhaya. Kodwa, sisinikeza okuthile esingakucabangela. Kuvamile ukuba sibe nemizwa ethile, kodwa akumelwe siyivumele isilawule. Khona-ke, ungabhekana kanjani ngokuphumelelayo nokukhumbula ekhaya?

Ukufunda ukukhuluma ulimi lwendawo kuyisihluthulelo sokuzizwa uzinzile. Imizwa yokukhumbula ekhaya ingase ijule lapho ukukhulumisana kuphazamiseka ngenxa yokuthi kudingeka ubhekane nolimi ongalwazi. Ngakho-ke, uma kungenzeka, funda ukukhuluma nokufunda ulimi lwendawo ngaphambi kokuba uthuthele kuyo. Uma ungenakukwenza lokho, gxila ezifundweni zolimi phakathi namasonto okuqala ambalwa ngemva kokuba usufikile. Yilokho okuyokushukumisa kakhulu futhi kukwenze ube sethubeni elingcono lokufunda lololimi. Uma lamasonto uwasebenzisela ngokuyinhloko ekutadisheni ulimi, ngokushesha uyoqala ukujabulela izingxoxo, futhi lokho kungasiza ekunciphiseni imizwa yokukhumbula ekhaya.

Thola abangane abasha ngokushesha ngangokunokwenzeka, ngoba lokhu kuyokusiza ukuba uzizwe usekhaya. Ibandla loFakazi BakaJehova liyindawo engcono kakhulu yokuthola abangane bangempela. Thatha isinyathelo kuqala futhi ube nesithakazelo kwabanye. Zama ukwazi izizinda zabo, imikhaya yabo, izinkinga zabo, nezithakazelo zabo. Memela okholwa nabo ekhaya lakho. Kamuva, uyothola ukuthi abanye bayoba nesithakazelo kuwe.

Phakathi kwabantu bakaNkulunkulu, ubungane bungaqina njengezibopho zomkhaya. UJesu wathi: “Owenza intando kaNkulunkulu nguye ongumfowethu nodadewethu nomame.” (Marku 3:35) UKristu futhi waqinisekisa abalandeli bakhe: “Akukho-muntu oshiye indlu‚ noma abafowabo‚ noma odadewabo‚ noma unina‚ noma uyise‚ noma abantwana‚ noma amazwe ngenxa yami nangenxa yevangeli‚ ongayikwamukeliswa ngekhulu: manje kulesisikhathi izindlu‚ nabafowabo‚ nawodadewabo‚ nawonina‚ nabantwana‚ namazwe kanye nokuzingelwa‚ nasenkathini ezayo ukuphila okuphakade.” (Marku 10:29, 30) Njengoba sinobuzalwane obungokomoya obumangalisa kanjalo, asisodwa ngisho nasendaweni entsha.

Ukulondoloza ubungane nalabo obashiye ekhaya nakho kungakusiza ukuba ubhekane nokukhumbula ekhaya. Ungase umangale ukuthola ukuthi manje njengoba usuthuthile, ukukhulumisana ngencwadi kungcono kakhulu, njengoba cishe uyocabanga ngokwengeziwe ngalokho oyokusho. Kuyoba nezinto ezijabulisayo ongazisho. UJanet, ophawulwe ekuqaleni, uyasikisela: “Ukushayela ucingo ezindaweni ezikude kuyabiza, kodwa ukuthumela ikhasethi eliqoshiwe ngeposi kushibhile uma kuqhathaniswa. Ukukhuluma emshinini kuzwakala kungajwayelekile ekuqaleni. Nokho, uma uxoxa nothile ngombhobho, kulula futhi kuyathakazelisa.” Ungase futhi ucele ukuba naye athumele ikhasethi eliqoshiwe.

UShirley, owathutha e-United States waya eLatin America eminyakeni engu-25 edlule, uthi: “Njalo ngibhala ngokuhlangenwe nakho okwakhayo kunokubhala ngezinkinga. Lokhu kuyabakhuthaza abanye ukuba baqhubeke bengibhalela.” Nokho, qaphela. Ukubhala izincwadi njalo kungakuvimbela ukuba uthole abangane abasha. UDel, owathutha eCanada waya kwelinye izwe, uthi: “Gwema ukuhlala ekhaya ulokhu uzindla ngezinto ozikhumbulayo. Kunalokho, phuma uyojabulela indawo yakini entsha.”

Jwayelana nemikhuba yendawo entsha, umlando, izinto ezihlekisayo, nezindawo ezithakazelisayo nezinhle. Lokhu kuyokusiza ukuba ungagxili ezicini ezingathandeki. Futhi uma uhlose ukuhlala endaweni othuthele kuyo, kungcono ukuba ungavakasheli ezweni lakini ngokushesha kakhulu noma njalo. Kuthatha isikhathi eside ukwakha ubungane obusha nokujwayela indawo entsha. Ukuvakashela ekhaya isikhathi eside kuyayiphazamisa leyonqubo. Lapho usuzinzile endaweni entsha, ungakujabulela ukuvakashela ekhaya—bese ubuya. Okwamanje, yiba matasa wakha uthando ngekhaya lakho elisha.

Hlala Ubheke Phambili

UJehova wasinikeza wonke umhlaba ukuba ube ikhaya lethu. (IHubo 115:16) Uma sinomoya wobuKristu wenjabulo, ukuphila kungajabulisa kunoma yiliphi izwe. Uma uthutha ukuze uyothuthukisa izithakazelo zoMbuso futhi ushumayele izindaba ezinhle kwelinye izwe noma kwenye indawo ezweni lakini, yenza kanjalo ulindele izinto ezijabulisayo. Bheka phambili ekutholeni abangane abasha, ekufundeni ngemikhuba ehlukene, ekwenzeni abafundi, noma ekwenzeni izinto ezinomvuzo enkonzweni kaNkulunkulu.

UJehova uNkulunkulu ungomunye uMngane oyoba nawe ngaso sonke isikhathi, kungakhathaliseki ukuthi ukuphi. (IHubo 94:14; 145:14, 18) Ngakho hlala useduze naye ngomthandazo. (Roma 12:12) Lokhu kuyokusiza ukuba ukhumbule injongo yakho ekuphileni njengenceku kaNkulunkulu. U-Abrahama noSara bakhumbula injongo yabo lapho beshiya umuzi wabo onethezekile edolobheni lase-Uri. Belalela umyalo kaJehova, bashiya abangane nezihlobo. (IzEnzo 7:2-4) Uma ngabe babelokhu bekhumbula futhi belangazelela indawo ababeyishiyile, babeyoba nethuba lokuphindela kuyo. Kodwa babezenza bafanelekele indawo engcono—ekugcineni ukuphila emhlabeni oyipharadesi ngaphansi koMbuso kaNkulunkulu ongokwasezulwini.—Heberu 11:15, 16.

Ukushumayela emasimini akwamanye amazwe noma lapho isidingo sabamemezeli boMbuso sisikhulu khona ezweni lakini kungabeka inselele enkulu. Kodwa futhi kuwumsebenzi onezithelo nonomvuzo omkhulu. (Johane 15:8) Futhi uma ungase ugubuzelwe imicabango ephambene okwesikhashana, inganqotshwa ngokukhumbula njalo umgomo wakho nokubheka phambili. Udade ongashadile oyisithunywa sevangeli wathi: “Lapho ngizwa ngifikelwa ukudabuka, ngizama ukucabanga ngomhlaba omusha nendlela sonke isintu esiyoba umkhaya owodwa ngayo.” Imicabango ejabulisayo enjengalena ingakusiza ukuba ulondoloze injabulo yakho futhi unganqotshwa ukukhumbula ekhaya.

[Isithombe ekhasini 29]

Ukukhumbula ekhaya akudingeki ukuba kuphazamise inkonzo yobuKristu