Indlela Ongaphila Ngayo Ngokuncane

UKUZE uphile ngokuncane kudingeka uhlele kahle. UJesu wasigcizelela isidingo sokwenza kanjalo. Wabuza: “Ngubani kini othi efuna ukwakha umbhoshongo angahlali phansi kuqala abale izindleko, ukuze abone ukuthi unakho yini okwanele ukuba awuqede?” (Luka 14:28, 29) Ngokusebenzisa leso simiso, ungakwazi ‘ukubala izindleko’ zokuphila ngalokho onakho uma uhlela indlela ozosebenzisa ngayo imali. Kusebenza kanjani lokhu? Zama lokhu:

Lapho ufika ekhaya nomholo, bekela eceleni imali ethile ezohlelwa ngokwezidingo ezihlukahlukene zamanje nezesikhathi esizayo. (Bheka ibhokisi elisekhasini 8.) Lapho usuzihlelile izindleko, uyakwazi ukubona ukuthi imali iya kuphi nokuthi ingakanani esetshenziswa ezintweni ezingabalulekile. Lokho kamuva kuyokusiza ukuba ubone ukuthi kufanele wonge kuphi.

Ukuze wenze uhlelo lokusetshenziswa kwemali olungakusebenzela, sebenzisa la macebiso alandelayo.

Thenga Ngokuhlakanipha

Lapho uRaúl ephelelwa umsebenzi, umkakhe uBertha wayishintsha indlela yokuthenga. Uthi: “Ngangibheka amakhuphoni esaphulelo futhi ngithenge ezitolo zokudla ezinendali ezidayisa izinto ezimbili ngemali yeyodwa.” Nanka amanye amacebiso:

● Hlela ukudla kwesonto ngalinye ngokwalokho okusendalini ngaleso sikhathi.

● Thenga izithako uziphekele kunokuthenga ukudla osekuphekiwe kakade.

● Thenga kakhulu izinto ezisendalini noma ezitholakala ngobuningi ngaleso sikhathi.

● Thenga ngobuningi, kodwa uqaphele ukuba ungathengi izinto eziningi ezizobola ngokuhamba kwesikhathi.

● Yonga ngokuthenga izimpahla eziqinile ezingamasekeni.

● Hamba uyothenga ezindaweni ezinamanani aphansi, uma ukwenza kanjalo kungabizi.

● Nciphisa izikhathi zokuyothenga.a

Kubhale Phansi

UFred uthi: “Kwadingeka sibe nohlelo lokusebenzisa imali, ngakho ngangikubhala phansi lokho okudingeka sikukhokhele ngokushesha nemali esasizoyidinga kuze kuphele inyanga.” Umkakhe u-Adele, uyanezela: “Ngangazi kahle ukuthi kufanele ngisebenzise imali engakanani emakethe. Ngezinye izikhathi lapho kudingeka ngithengele izingane okuthile noma ngithenge okuthile kwasendlini, ngangibheka ukuthi sihlele ukuyisebenzisa kanjani imali bese ngicabanga, ‘Anginayo imali yokukuthenga, ngakho kuzodingeka silinde kuze kube yinyanga ezayo.’ Ukubhala phansi kwakusiza kakhulu!”

Cabanga Ngaphambi Kokuthenga

Zijwayeze ukuzibuza: ‘Ingabe ngiyayidinga ngempela le nto? Ingabe lokhu enginakho sekuguge ngempela, noma ngimane nje ngifuna okuthile okusha?’ Uma ungeke uyisebenzise njalo into, ingabe akungcono ukuyiqasha? Noma uma ubona ukuthi uzoyisebenzisa njalo, ingabe ngeke kusize ukuthenga eyisekeni elisekahle?

Nakuba ezinye zezinto ezingenhla zingase zibonakale zingasho lutho, kodwa zingawenza umehluko! Iphuzu liwukuthi, ngokuhlakulela umkhuba wokonga ezintweni ezincane, uyokwenza okufanayo nalapho usubhekene nezindleko ezinkulu.

Yonga

Ukuze unciphise ukuthenga izinto ezingadingeki, sebenzisa ukuhlakanipha. Ngokwesibonelo, u-Adele uyalandisa: “Sasinezimoto ezimbili kodwa ngokushesha sayidayisa enye sasebenzisa eyodwa. Ukuze songe uphethiloli, sasihlela ukwenza okuningi ngangokunokwenzeka phakathi nohambo olulodwa. Imali sasiyisebenzisela izinto ezibalulekile kuphela.” Ngezansi kunezinye izindlela ongonga ngazo:

● Yiba nengadi ozozitshalela kuyona imifino.

● Landela iziqondiso zomklami zokunakekela izinto ezisebenza ngogesi ukuze zihlale isikhathi eside.

● Khumula izingubo zakho ezinhle ngokushesha uma ufika ekhaya okuyinto eyokwenza ukuba zihlale isikhathi eside.

Ungazihlukanisi!

Abantu abaningi abalahlekelwa umsebenzi bayazihlukanisa kwabanye abantu. Kodwa uFred akakwenzanga lokho! Umkhaya wakhe, kuhlanganise nezingane zakhe esezikhulile, bamsekela ngozwela. Uthi: “Safunda ukuhlanganyela izinto eziningi, futhi lokhu kwasenza sasondelana. Sonke saba nomuzwa wokuthi, ‘Sibambisene.’”

UFred wathola ukuthi namanye amaKristu ayehlangana nawo njalo eHholo LoMbuso LoFakazi BakaJehova ayemqinisa. Uthi: “Ekupheleni kwemihlangano yethu yobuKristu, ngangizizwa ngikhuthazekile njalo. Wonke umuntu wayenomusa futhi ecabangela. Ngenxa yosizo lwabo nenduduzo, sabona ukuthi asisodwa.”—Johane 13:35.

Izinzuzo Zokuba Nokholo

Ukuphelelwa umsebenzi kubangele ukuba izigidi zabantu zizizwe ziyizisulu zokukhohliswa abaqashi. URaúl, ocashunwe ekuqaleni, wezwa ubuhlungu lapho elahlekelwa umsebenzi kabili—okokuqala ezweni lakubo ePeru ngemva kwalokho eNew York City. Ngemva kokulahlekelwa umsebenzi okwesibili, uRaúl waphetha ngokuthi, “Kuleli zwe lanamuhla, ayikho neze into elondekile.” Kwaphela izinyanga engawutholi umsebenzi. Yini eyamsiza ukuba abhekane nesimo? Uthi: “Ngase ngihlakulele ubuhlobo obuseduze noNkulunkulu futhi ngabona ukuthi ukuze ngithole ukulondeka kwangempela kwakufanele nje ngithembele kuye.”

URaúl ungomunye woFakazi BakaJehova, futhi ukutadisha kwakhe iBhayibheli kwamsiza wahlakulela ukholo oluqinile kuYise wasezulwini onakekelayo, othembisa ukuthi: “Angisoze ngakushiya noma ngikulahle nganoma iyiphi indlela.” (Hebheru 13:5) Zazingelula izimo. Uthi: “Sasizithandazela njalo izidingo zethu eziyisisekelo, futhi safunda ukujabulela lokho esikunikwa uNkulunkulu.” UmkaRaúl, uBertha, uyanezela: “Ngangiba novalo ngezinye izikhathi, ngizibuza ukuthi uRaúl uzowuthola yini umsebenzi. Kodwa sabona ukuthi uJehova wayeyiphendula imithandazo yethu ngokusinakekela usuku ngalunye. Ngaleyo ndlela, ngisho noma sasingenakho okuningi njengakuqala, ukuphila kwethu kwase kulula kakhulu.”

Ngenxa yokuthi uFred ungomunye woFakazi BakaJehova, ukutadisha kwakhe iBhayibheli kwayithonya ngokumangalisayo indlela asingatha ngayo isimo sakhe. Uthi: “Ngezinye izikhathi, sicabanga ukuthi sizothola ukulondeka uma sinomsebenzi, isikhundla noma imali ebhange. Kodwa ngifunde ukuthi okuwukuphela kokulondeka esinakho kuvela kuJehova uNkulunkulu kuphela, futhi ubuhlobo bethu naye kuphela obuletha ukulondeka kwangempela.”b

[Imibhalo yaphansi]

[Amazwi acashunwe esihlokweni ekhasini 9]

“Sasizithandazela njalo izidingo zethu eziyisisekelo, futhi safunda ukujabulela lokho esikunikwa uNkulunkulu”

[Ibhokisi/Ishadi ekhasini 8]

Indlela Yokwenza Uhlelo Lokusetshenziswa Kwemali

(1) Zibhale phansi izindleko zakho ezibalulekile zanyanga zonke. Gcina umbhalo wenyanga yonke wemali oyisebenzise ekudleni, ekukhokheleni indawo yokuhlala, imali yezinkonzo, izindleko zemoto nokunye. Ezikweletini ezikhokhelwa kanye ngonyaka, hlukanisa imali yazo ngo-12 ukuze uthole imali okufanele uyikhokhe nyanga zonke.

(2) Hlela izindleko zakho ngemikhakha. Lokhu kuhlanganisa izindleko zokudla, indlu, imoto nezinto zokuhamba nokunye.

(3) Cabangela ukuthi ingakanani imali oyongile ozoyisebenzisa emkhakheni ngamunye nyanga zonke. Uma kuziwa ezikweletini ezikhokhwa kanye ngonyaka, kumelwe “ubale” ukuthi kungakanani okufanele ukubekele eceleni inyanga ngayinye.

(4) Bhala phansi ingqikithi yomholo wabo bonke ekhaya. Khipha izinto ezinjengentela edonswa emholweni. Qhathanisa inani elisele nezindleko.

(5) Nyanga zonke, bekela eceleni imali edingekayo ukuze kukhokhelwe isidingo ngasinye. Uma ukhokha ngokheshe, indlela elula iwukuba nemvilophu enemali yomkhakha ngamunye. Khona-ke, njalo ngezikhathi ezithile faka imali efanele edingekayo emvilophini ukuze kukhokhelwe lezo zindleko.

Nasi isixwayiso: Uma usebenzisa ikhadi lokuthenga ngesikweleti, kwenze ngokuhlakanipha! Izinhlelo eziningi zokusetshenziswa kwemali ziye zonakala ngenxa yesilingo ‘sokuthenga manje, ukhokhe kamuva.’

[Ishadi]

(Ukuze ubone ukuthi indaba ihlelwe kanjani, bheka encwadini)

Ingqikithi Yomholo Wanyanga Zonke

INGQIKITHI YOMHOLO WANYANGA ZONKE R․․․․․ OKUNYE R․․․․․

R․․․․․

R․․․․․ Ukukhokhela Indawo Yokuhlala R․․․․․

R․․․․․ Umshuwalense/Intela R․․․․․

R․․․․․ Izinkonzo Zikamasipala R․․․․․

R․․․․․ Imoto R․․․․․

R․․․․․ Ezokuzijabulisa/Ezokuhamba R․․․․․

R․․․․․ Ucingo R․․․․․

R․․․․․ Ukudla R․․․․․

R․․․․․ Okunye R․․․․․

INGQIKITHI EBEKIWE INGQIKITHI YANGEMPELA

R․․․․․ R․․․․․

Qhathanisa Umholo Nezindleko

INGQIKITHI YOMHOLO WANYANGA ZONKE R․․․․․

ISIKWELETI ESEQILE− IBHALANSI

IZINDLEKO ZANYANGA ZONKE R․․․․․ R․․․․․