Imibuzo Evela Kubafundi

Ukufa kwabaqotho bakaNkulunkulu ‘kuyigugu emehlweni akhe’ ngamuphi umqondo?

▪ Umhubi owayephefumulelwe wahlabelela: “Kuyigugu emehlweni kaJehova ukufa kwabaqotho bakhe.” (IHu. 116:15) Ukuphila komkhulekeli weqiniso kaJehova ngamunye kuyigugu kakhulu kuye. Nokho, la mazwi akumaHubo 116 awasho nje ukufa komuntu oyedwa.

Lapho kunikezwa inkulumo yomngcwabo womKristu, akufaneleki ukusebenzisa iHubo 116:15 kumuntu oshonile, ngisho noma efe eyinceku kaJehova eqotho. Ngani? Ngoba amazwi omhubi anencazelo ebanzi. Asho ukuthi uNkulunkulu ubheka ukufa kwabo bonke abaqotho bakhe njengeqembu njengokuwukulahlekelwa okukhulu ukuba angakuvumela ukuba kwenzeke.—Bheka amaHubo 72:14; 116:8.

IHubo 116:15 lisiqinisekisa ngokuthi uJehova ngeke avumele izinceku zakhe eziqotho njengeqembu ukuba ziqothulwe ngokuphelele emhlabeni. Eqinisweni, umlando wethu wanamuhla ubonisa uvivinyo noshushiso olukhulu esiye sadlula kulo, okuwubufakazi obucacile bokuthi uNkulunkulu akasoze avume ukuba siqothulwe.

Ngenxa yamandla akhe angenamkhawulo nangenxa yokuthi injongo yakhe iyafezeka njalo, uJehova ngeke avume ukuba siqothulwe njengeqembu. Ukube ubengavumela lokho, bekuyobonakala sengathi izitha zakhe zinamandla kunaye—into engenakwenzeka! Injongo kaJehova yokuba le mbulunga ihlalwe abaqotho bakhe ibingeke ifezeke—futhi lokho kuyinto engenakwenzeka. (Isaya 45:18; 55:10, 11) Phela, ukunikela inkonzo engcwele kuJehova bekungeke kusaba khona emhlabeni uma kungenabantu abamkhulekela besemagcekeni asemhlabeni ethempeli lakhe elikhulu elingokomoya! Besingeke sibe khona nesisekelo ‘somhlaba omusha’—umphakathi wabantu abalungile abayohlala kulo mhlaba wethu lapho sekubusa “izulu elisha.” (IsAm. 21:1) UkuBusa KukaKristu Kweminyaka Eyinkulungwane nakho bekungeke kube khona uma zingekho izikhonzi emhlabeni.—IsAm. 20:4, 5.

Isikhundla sikaNkulunkulu nedumela lakhe bekuyongabazeka uma ebengavumela izitha zakhe ukuba ziqothule bonke abantu bakhe emhlabeni. Lokho bekuyoba isisihla esikhundleni sikaJehova njengoMbusi Wendawo Yonke. Ngaphezu kwalokho, ngenxa yokuthi uyazihlonipha yena negama lakhe elingcwele, ngeke avumele ukuba abaqotho bakhe bafe bonke njengeqembu. Cabangela lokhu: Njengoba “kungekho ukungabi nabulungisa” kuNkulunkulu, ngeke ahluleke ukuvikela iqembu labantu abebelokhu bemkhonza ngobuqotho. (Dut. 32:4; Gen. 18:25) Ngaphezu kwalokho, ukuvumela izinceku zakhe ukuba ziqothulwe njengeqembu bekuyophikisana neZwi lakhe: “UJehova ngeke abalahle abantu bakhe ngenxa yegama lakhe elikhulu.” (1 Sam. 12:22) Ngempela, “uJehova ngeke abashiye abantu bakhe, noma ashiye ifa lakhe.”—IHu. 94:14.

Yeka indlela okududuza ngayo ukwazi ukuthi abantu bakaJehova abasoze bashabalala emhlabeni! Ngakho-ke, masihlale siqotho kuNkulunkulu, sithembela esithembisweni sakhe: “Noma isiphi isikhali esiyokwakhiwa ngokumelene nawe ngeke siphumelele, nanoma yiluphi ulimi oluyokuvukela ekwahluleleni uyolulahla. Leli yifa lezinceku zikaJehova, futhi ukulunga kwazo kuvela kimi.”—Isaya 54:17.

[Amazwi acashunwe esihlokweni ekhasini 22]

UNkulunkulu akasoze avuma ukuba abantu bakhe baqothulwe