Izikhombo Ze-Ncwajana YoMhlangano Wokuphila Nenkonzo
SEPTEMBER 5-11
AMAGUGU ASEZWINI LIKANKULUNKULU | IHUBO 119
“Hamba Ngomthetho KaJehova”
(IHubo 119:1-8) Bayajabula abangenaphutha endleleni yabo, Abahamba ngomthetho kaJehova. 2 Bayajabula abagcina izikhumbuzo zakhe; Bayaqhubeka bemfuna ngayo yonke inhliziyo. 3 Ngempela abazange bakwenze umkhuba ukungalungi.Bahambé ngezindlela zakhe. 4 Wena unikezé imiyalo yakho ngendlela yokuyala Ukuba igcinwe ngokucophelela. 5 Ukube izindlela zami bezimi ziqinile Ukuba ngigcine iziqondiso zakho! 6 Ukube bekunjalo bengingeke ngibe namahloni Lapho ngibheka yonke imiyalo yakho. 7 Ngizokudumisa ngobuqotho benhliziyo, Lapho ngifunda izinqumo zakho zokwahlulela ezilungile. 8 Ngiyaqhubeka ngigcina iziqondiso zakho. Mawungangishiyi ngokuphelele.
Thembela Ezwini LikaJehova
Lalela Izwi LikaNkulunkulu, Ujabule
3 Injabulo yeqiniso ixhomeke ekuhambeni kwethu ngomthetho kaNkulunkulu. (IHubo 119:1-8) Uma sihamba ngawo, uJehova uyosibheka ‘njengabangenaphutha endleleni yethu.’ (IHubo 119:1) Ukuthi asinaphutha akusho ukuthi siphelele; kunalokho, kubonisa ukuthi silwela ukwenza intando kaJehova uNkulunkulu. UNowa “akabanga naphutha phakathi kwabantu besikhathi sakhe. . . . Wahamba noNkulunkulu weqiniso.” Leyo nzalamizi ethembekile yasinda kuZamcolo nomkhaya wayo ngoba yayiphila ngendlela eshiwo uJehova. (Genesise 6:9; 1 Petru 3:20) Nokwethu ukusinda ekupheleni kwaleli zwe kuxhomeke ‘ekugcineni kwethu imiyalo kaNkulunkulu ngokucophelela,’ senze intando yakhe.—IHubo 119:4.
4 UJehova akasoze asishiya uma ‘simdumisa ngobuqotho benhliziyo, futhi siqhubeka sigcina iziqondiso zakhe.’ (IHubo 119:7, 8) UNkulunkulu akazange amshiye umholi wama-Israyeli, uJoshuwa, owalalela iseluleko ‘sokufunda incwadi yomthetho ubusuku nemini ukuze enze konke okulotshwe kuyo.’ Lokho kwamenza waphumelela, wakwazi nokwenza ngokuhlakanipha. (Joshuwa 1:8) Nalapho esezokufa, uJoshuwa wayesamdumisa uNkulunkulu, futhi yingakho akwazi ukukhumbuza ama-Israyeli: “Nazi kahle ngazo zonke izinhliziyo zenu nangayo yonke imiphefumulo yenu ukuthi akukho nelilodwa izwi kuwo wonke amazwi amahle uJehova uNkulunkulu wenu awakhulumile kini eliye laphutha.” (Joshuwa 23:14) NjengoJoshuwa nomlobi weHubo 119, singathola injabulo nempumelelo ngokudumisa uJehova, sithembele nasezwini lakhe.
(IHubo 119:33-40) O Jehova, ngifundise ngendlela yeziqondiso zakho, Ukuze ngiyigcine kuze kube sekugcineni. 34 Ngenze ngiqonde, ukuze ngigcine umthetho wakho Futhi ngiwugcine ngenhliziyo yonke. 35 Ngibangele ukuba ngihambe endleleni yemiyalo yakho, Ngoba ngiyajabula ngayo. 36 Thambekisela inhliziyo yami ezikhumbuzweni zakho, Hhayi ezinzuzweni. 37 Yenza ukuba amehlo ami adlule angakuboni okungenanzuzo; Ngilonde ngendlela yakho. 38 Feza izwi lakho encekwini yakho Elithambekisela ekukwesabeni. 39 Yenza ukuba isihlamba sami sidlule, isihlamba ebengisesaba, Ngoba izinqumo zakho zokwahlulela zinhle. 40 Bheka! Ngiyilangazelele imiyalo yakho. Ngilonde ngokulunga kwakho.
Thembela Ezwini LikaJehova
Izwi LikaJehova Linikeza Isibindi
12 Ukulandela isiqondiso sezwi likaNkulunkulu kusinika isibindi esisidingayo ukuze sibhekane nezinhlupheko zokuphila. (IHubo 119:33-40) Ngokuthobeka, sifuna ukuba uJehova asifundise ukuze sikwazi ukugcina umthetho wakhe “ngenhliziyo yonke.” (IHubo 119:33, 34) Njengomhubi, siyacela kuNkulunkulu: “Thambekisela inhliziyo yami ezikhumbuzweni zakho, hhayi ezinzuzweni,” okusho izinzuzo ezingalungile. (IHubo 119:36) Njengomphostoli uPawulu, ‘siziphatha ngokwethembeka ezintweni zonke.’ (Hebheru 13:18) Uma umqashi efuna ukuba singathembeki entweni ethile, siqunga isibindi sinamathele eziqondisweni zikaNkulunkulu—futhi uJehova uyayibusisa njalo inkambo enjalo. Eqinisweni, usisiza ukuba silawule zonke izifiso ezimbi. Ngakho-ke, masithandaze: “Yenza ukuba amehlo ami adlule angakuboni okungenanzuzo.” (IHubo 119:37) Ngeke sathanda ukuba into engenanzuzo, uNkulunkulu ayizondayo, thina siyibheke njengefiselekayo. (IHubo 97:10) Phakathi kokunye, lokhu kusenza sigweme izithombe zobulili ezingcolile nemikhuba yokusebenzelana nemimoya.—1 Korinte 6:9, 10; IsAmbulo 21:8.
(IHubo 119:41-48) Kwangathi umusa wakho wothando ungeza kimi Jehova, Insindiso yakho ngokwezwi lakho, 42 Ukuze ngiphendule ongihlambalaza ngezwi, Ngoba ngithembelé ezwini lakho. 43 Ungalisusi ngokuphelele izwi leqiniso emlonyeni wami, Ngoba ngilindé isinqumo sakho sokwahlulela. 44 Futhi ngizowugcina njalo umthetho wakho, Kuze kube nini nanini, yebo kuze kube phakade. 45 Ngizohambahamba endaweni evulekile, Ngoba ngiyifunile imiyalo yakho. 46 Futhi ngizokhuluma ngezikhumbuzo zakho phambi kwamakhosi, Futhi ngeke ngibe namahloni. 47 Ngizobonisa ukuba nothando ngemiyalo yakho Engiyithandile. 48 Ngizophakamisela izintende zami emiyalweni yakho engiyithandile, Futhi ngizozikhathaza ngeziqondiso zakho.
Thembela Ezwini LikaJehova
13 Ulwazi olunembile lwezwi likaNkulunkulu luyasiqinisa ukuze sishumayele ngesibindi. (IHubo 119:41-48) Siyasidinga isibindi ukuze ‘siphendule osihlambalazayo.’ (IHubo 119:42) Ngezinye izikhathi, singase sibe njengabafundi bakaJesu ababeshushiswa, abathandaza: “Jehova, [nika] izinceku zakho ukuba ziqhubeke zikhuluma izwi lakho ngaso sonke isibindi.” Waba yini umphumela? “Bonke ngothi lwabo bagcwala umoya ongcwele, bakhuluma izwi likaNkulunkulu ngesibindi.” Nathi le Nkosi EnguMbusi isinika isibindi sokukhuluma izwi layo singesabi.—IzEnzo 4:24-31.
14 Nathi siyoba naso isibindi esidingekayo ukuze singabi namahloni okushumayela uma silazisa “izwi leqiniso” futhi ‘siwugcina njalo umthetho kaNkulunkulu.’ (IHubo 119:43, 44) Ukulitadisha ngenkuthalo iZwi likaNkulunkulu elilotshiwe kuyasihlomisa ukuze ‘sikhulume ngezikhumbuzo zakhe phambi kwamakhosi.’ (IHubo 119:46) Umthandazo nomoya kaJehova nakho kuyosisiza sisho into efanele ngendlela efanele. (Mathewu 10:16-20; Kolose 4:6) UPawulu wakhuluma ngesibindi ngezikhumbuzo zikaNkulunkulu kubabusi bekhulu lokuqala. Ngokwesibonelo, washumayela kumbusi waseRoma uFeliksi, ‘owamlalela ngokuphathelene nokukholwa kuKristu Jesu.’ (IzEnzo 24:24, 25) UPawulu washumayela naphambi koMbusi uFestu neNkosi u-Agripha. (IzEnzo 25:22–26:32) Ngokusekelwa uJehova, nathi singaba ofakazi abanesibindi, singalokothi sibe “namahloni ngezindaba ezinhle.”—Roma 1:16.
Ukumba Sifuna Ingcebo Engokomoya
(IHubo 119:71) Kuhle ngami ukuthi ngihlushiwe, Ukuze ngifunde iziqondiso zakho.
Amaphuzu Avelele ENcwadi Yesihlanu YamaHubo
119:71—Ukuhlupheka kungaveza buhle buni? Ubunzima bungasifundisa ukuncika ngokuphelele kuJehova, ukuthandaza ngobuqotho nakakhulu nokulifunda ngenkuthalo iBhayibheli futhi sikusebenzise elikushoyo. Ngaphezu kwalokho, indlela esisabela ngayo lapho sibhekene nokuhlupheka ingembula ukushiyeka esingakulungisa ebuntwini bethu. Ukuhlupheka ngeke kusicasule uma sikuvumela kusicwengisise.
(IHubo 119:96) Ngiwubonile umkhawulo wakho konke ukuphelela. Umyalo wakho ubanzi kakhulu.
Amaphuzu Avelele ENcwadi Yesihlanu YamaHubo
119:96—Kushiwoni ngelithi ‘umkhawulo wakho konke ukuphelela’? Umhubi ukhuluma ngokuphelela ngokombono wabantu. Kungenzeka ukuthi wayecabanga ukuthi umbono womuntu ngokuphelela ulinganiselwe. Ngokuphambene, umyalo kaNkulunkulu awunamkhawulo. Isiqondiso sawo sisebenza kuzo zonke izici zokuphila.
SEPTEMBER 12-18
AMAGUGU ASEZWINI LIKANKULUNKULU | AMAHUBO 120-134
“Usizo Lwami Luvela KuJehova”
(IHubo 121:1, 2) Ngizophakamisela amehlo ami ezintabeni. Usizo lwami luzovelaphi? 2 Usizo lwami luvela kuJehova, UMenzi wezulu nomhlaba.
UJehova UnguMsizi Wethu
UMthombo Wosizo Ongadumazi
3 Umhubi waqala ngokuveza ukuthi uJehova singamethemba ngoba unguMdali: “Ngizophakamisela amehlo ami ezintabeni. Usizo lwami luzovelaphi? Usizo lwami luvela kuJehova, uMenzi wezulu nomhlaba.” (IHubo 121:1, 2) Umhubi akawaphakamiselanga kunoma iyiphi intaba amehlo akhe. Lapho kubhalwa la mazwi, ithempeli likaJehova laliseJerusalema. Lowo muzi, owawuphezulu ezintabeni zakwaJuda, wawuyindawo yokuhlala kaJehova engokomfanekiso. (IHubo 135:21) Ethembele kuJehova ukuba amsize, kungenzeka umhubi waphakamisela amehlo akhe ezintabeni zaseJerusalema lapho kwakwakhiwe khona ithempeli laKhe. Kungani umhubi ayeqiniseka kangaka ukuthi uJehova angamsiza? Yingoba ‘unguMenzi wezulu nomhlaba.’ Kunjengokungathi umhubi wayethi, ‘Nakanjani akukho lutho olungavimba uMdali onamandla onke ukuba angisize!’—Isaya 40:26.
(IHubo 121:3, 4) Akunakwenzeka ukuba avumele unyawo lwakho luntengantenge. Akunakwenzeka ukuba Lowo okuqaphile ozele. 4 Bheka! Ngeke ozele noma alale, Lowo oqaphe u-Israyeli.
UJehova UnguMsizi Wethu
4 Umhubi wabe esechaza ukuthi uJehova uhlale eziphaphamele izidingo zezinceku zakhe: “Akunakwenzeka ukuba avumele unyawo lwakho luntengantenge. Akunakwenzeka ukuba Lowo okuqaphile ozele. Bheka! Ngeke ozele noma alale, Lowo oqaphe u-Israyeli.” (IHubo 121:3, 4) Akunakwenzeka ukuba uNkulunkulu avumele abamethembayo ‘bantengantenge’ noma bawe bangabe besakwazi ukuvuka. (IzAga 24:16) Ngani? Ngoba uJehova unjengomalusi ophapheme, oqaphe izimvu zakhe. Akududuzi yini lokho? Ngeke ayeke ngisho nomzuzwana ukunaka izidingo zabantu bakhe. Ubaqaphe imini nobusuku.
(IHubo 121:5-8) UJehova ukuqaphile. UJehova ungumthunzi wakho esandleni sakho sokunene. 6 Emini ilanga ngeke likuhlabe, Noma inyanga ebusuku. 7 UJehova uyokuqapha kuyo yonke inhlekelele. Uyoqapha umphefumulo wakho. 8 UJehova uyoqapha ukuphuma kwakho nokungena kwakho Kusukela manje kuze kube nini nanini.
UJehova UnguMsizi Wethu
5 Eqiniseka ukuthi uJehova unguMvikeli oqotho wabantu bakhe, umhubi wabhala: “UJehova ukuqaphile. UJehova ungumthunzi wakho esandleni sakho sokunene. Emini ilanga ngeke likuhlabe, noma inyanga ebusuku.” (IHubo 121:5, 6) Kumuntu ohamba ngezinyawo eMpumalanga Ephakathi, indawo enomthunzi yayiba isivikelo esihle elangeni elihangulayo. UJehova unjengomthunzi kubantu bakhe, ubavikela ekushiseni okukhulu kwezinsizi. Phawula ukuthi uJehova kuthiwa ‘usesandleni sokunene.’ Empini endulo, isihlangu sasingalivikeli kangako isosha ngakwesokunene ngoba sasibanjwa ngesandla sobunxele. Umngane oqotho wayengase abe isivikelo ngokulwa emi ngakwesokunene sesosha. Njengomngane onjalo, uJehova uma ngobuqotho eceleni kwabakhulekeli bakhe, ekulungele njalo ukubasiza.
6 Ingabe uJehova uyoke ayeke ukusiza abantu bakhe? Lutho neze. Umhubi waphetha: “UJehova uyokuqapha kuyo yonke inhlekelele. Uyoqapha umphefumulo wakho. UJehova uyoqapha ukuphuma kwakho nokungena kwakho kusukela manje kuze kube nini nanini.” (IHubo 121:7, 8) Phawula ukuthi umlobi wayeka ukukhuluma ngokwamanje wakhuluma ngokuseza. Ngaphambili, evesini 5, wayethe: “UJehova ukuqaphile.” Kodwa kula mavesi, umhubi uthi: “UJehova uyokuqapha.” Ngakho, abakhulekeli beqiniso bayaqinisekiswa ukuthi uJehova uzoqhubeka ebasiza nasesikhathini esizayo. Noma bangayaphi, noma bangabhekana nayiphi inhlekelele, abasoze baba kude kakhulu ukuba abasize.—IzAga 12:21.
7 Ngempela, umlobi weHubo 121 wayeqiniseka ukuthi uMdali onguMninimandla onke uqapha izinceku zakhe ngesisa sikamalusi okhathalelayo nangeso elibukhali lomlindi ophapheme. Sinesizathu esihle sokuqiniseka njengomhubi, ngoba uJehova akashintshi. (Malaki 3:6) Ingabe lokhu kusho ukuthi siyovikelwa njalo ngokwenyama? Cha, kodwa uma nje sisathembele kuye njengoMsizi wethu, uyosilonda kuzo zonke izinto ezingasilimaza ngokomoya. Kulindelekile ukubuza, ‘UJehova usisiza kanjani?’ Ake sihlole izindlela ezine asisiza ngazo. Kulesi sihloko, sizoxoxa ngezindlela ázisiza ngazo izinceku zakhe ngezikhathi zeBhayibheli. Kwesilandelayo, sizoxoxa ngezindlela asiza ngazo abantu bakhe namuhla.
Ukumba Sifuna Ingcebo Engokomoya
(IHubo 123:2) Bheka! Njengoba amehlo ezinceku ebheke esandleni senkosi yazo, Njengoba amehlo encekukazi ebheke esandleni senkosikazi yayo, Kanjalo amehlo ethu abheke kuJehova uNkulunkulu wethu Aze asibonise umusa.
Amaphuzu Avelele ENcwadi Yesihlanu YamaHubo
123:2—Liyini iphuzu eliqukethwe umfanekiso wamehlo ezinceku? Izinceku nezincekukazi zibheke esandleni senkosi noma senkosikazi yazo ngezizathu ezimbili: ukuze ziqonde izifiso zayo nokuba zithole isivikelo nezidingo zokuphila. Ngokufanayo, sibheke kuJehova ukuze siqonde intando yakhe futhi sithole umusa wakhe.
(IHubo 133:1-3) Bheka! Yeka ukuthi kuhle futhi kumnandi kanjani Ngabazalwane ukuba bahlale ndawonye ngobunye! 2 Kunjengamafutha amahle asekhanda, Agelezela entshebeni, Intshebe ka-Aroni, Agelezela entanyeni yezingubo zakhe. 3 Kunjengamazolo aseHermoni Ehlela ezintabeni zaseZiyoni. Ngoba uJehova wayala ukuba isibusiso sibe lapho, Yebo ukuphila kuze kube nini nanini.
Amaphuzu Avelele ENcwadi Yesihlanu YamaHubo
133:1-3. Ubunye babantu bakaJehova buyaduduza, buyavuselela futhi buyaqabula. Akufanele sibungcolise ngokufunana namaphutha abanye, ngokuxabana noma ngokukhononda.
SEPTEMBER 19-25
AMAGUGU ASEZWINI LIKANKULUNKULU | AMAHUBO 135-141
“Senziwe Ngokumangalisayo”
(IHubo 139:14) Ngizokudumisa ngoba ngenziwe ngokumangalisayo ngendlela eyesabekayo. Imisebenzi yakho iyamangalisa, Njengoba nje umphefumulo wami ukuqaphela kahle.
‘Senziwe Ngokumangalisayo’
UMHLABA ugcwele indalo emangalisayo. Yaba khona kanjani? Abanye bakholelwa ukuthi yaba khona ngaphandle koMdali ohlakaniphile. Abanye bakholelwa ukuthi ukumane senqabe uMdali kusinciphisela ithuba lokuyiqonda ngokugcwele imvelo. Bakholelwa ukuthi indalo esemhlabeni iyinkimbinkimbi kakhulu, ihlukahlukene kakhulu futhi cishe imangalisa kakhulu ukuba yayingamane izivelele. Kubantu abaningi, kuhlanganise nososayensi abathile, ubufakazi bubonisa ukuthi indawo yonke yenziwa uMenzi ohlakaniphile, onamandla nonomusa.
2 Inkosi yakwa-Israyeli wasendulo uDavide nayo yayiqiniseka ukuthi uMenzi uyakufanelekela ukudunyiswa ngenxa yendalo yakhe emangalisayo. Nakuba uDavide aphila kudala ngaphambi kwenkathi yesayensi yanamuhla, waqonda ukuthi wayezungezwe izinto eziningi ezimangalisayo eziwubufakazi bomsebenzi kaNkulunkulu wokudala. Kwakudingeka nje uDavide acabange ngomzimba wakhe ukuze ikhono likaNkulunkulu elimangalisayo lokudala limhlabe umxhwele. Wabhala: “Ngizokudumisa ngoba ngenziwe ngokumangalisayo ngendlela eyesabekayo. Imisebenzi yakho iyamangalisa, njengoba nje umphefumulo wami ukuqaphela kahle.”—IHubo 139:14.
3 Ukucabanga ngokujulile kukaDavide kwamsiza ukuba abe nalokhu kuqiniseka okukhulu. Namuhla, ezifundweni zasezikoleni, kuthelevishini nakumabhayisikobho kugcwele imibono ebulala ukholo mayelana nemvelaphi yomuntu. Ukuze sibe nokholo olunjengolukaDavide, kumelwe sicabange ngokujulile. Akufanele sivumele abanye basicabangele, ikakhulu ezindabeni ezibalulekile njengokuba khona koMdali nendima yakhe.
4 Ngaphezu kwalokho, ukucabanga ngemisebenzi kaJehova kukhulisa ukumazisa kwethu futhi kusenze siqiniseke ngezithembiso zakhe zekusasa. Lokho kungasishukumisela ukuba simazi nakangcono uJehova futhi simkhonze. Ngakho ake sicabange ngendlela isayensi yanamuhla eye yasiqinisekisa ngayo isiphetho sikaDavide sokuthi ‘senziwe ngokumangalisayo.’
(IHubo 139:15, 16) Amathambo ami ayengafihlekile kuwe Lapho ngenziwa ekusithekeni, Lapho ngelukwa ezingxenyeni eziphansi impela zomhlaba. 16 Amehlo akho abona ngisho nombungu wami, Futhi zonke izingxenye zawo zazilotshiwe phansi encwadini yakho, Ngokuqondene nezinsuku ezabunjwa ngazo Kodwa kwakungakabi bikho neyodwa phakathi kwazo.
‘Senziwe Ngokumangalisayo’
7 “Amathambo ami ayengafihlekile kuwe lapho ngenziwa ekusithekeni, lapho ngelukwa ezingxenyeni eziphansi impela zomhlaba.” (IHubo 139:15) Ingqamuzana lokuqala lahlukana lakha amangqamuzana amasha nawo aqhubeka ehlukana. Kungakabiphi, amangqamuzana aqala ukuzihlukanisa, noma ukuzihlela, ngokwemisebenzi yawo aba amangqamuzana ezinzwa, awemisipha, awesikhumba, njalonjalo. Amangqamuzana ohlobo olufanayo aqoqana akha izicubu ayeseba izitho. Ngokwesibonelo, phakathi nesonto lesithathu kusukela ekuhlaleni kwesisu, waqala ukuba nohlaka lwamathambo. Lapho usunamasonto angu-7 futhi ucishe ube amasentimitha angu-2,5 kuphela ubude, wonke amathambo akho angu-206 ayesekhona, nakuba ayengakaqini.
8 Le nqubo yokukhula emangalisayo yenzeka ngaphakathi esibelethweni, ifihlekile kubantu njengokungathi kusezinzulwini zomhlaba. Ngempela, kuningi okungakaziwa mayelana nendlela esikhula ngayo. Ngokwesibonelo, yini eyatshela izakhi zofuzo ezifanele emangqamuzaneni akho ukuba ziqale inqubo yokuzihlukanisa kwamangqamuzana ngokwemisebenzi yawo? Mhlawumbe isayensi iyogcina ikutholile, kodwa njengoba uDavide aphawula evesini elilandelayo, uMenzi wethu—uJehova—ubelokhu ekuqonda ngokugcwele lokhu.
9 “Amehlo akho abona ngisho nombungu wami, futhi zonke izingxenye zawo zazilotshiwe phansi encwadini yakho, ngokuqondene nezinsuku ezabunjwa ngazo kodwa kwakungakabi bikho neyodwa phakathi kwazo.” (IHubo 139:16) Ingqamuzana lakho lokuqala lalinepulani eliphelele lawo wonke umzimba wakho. Leli pulani laqondisa ukukhula kwakho phakathi nezinyanga ezingu-9 usesibelethweni ungakazalwa naphakathi kweminyaka engaphezu kuka-20 elandelayo lapho ukhula. Phakathi nalesi sikhathi, umzimba wakho wadlula ezigabeni eziningi, zonke ziqondiswa ukwaziswa okwakufakwe kulelo ngqamuzana lokuqala.
10 UDavide wayengazi ngamangqamuzana nangezakhi zofuzo, engenaso ngisho nesibonakhulu. Kodwa wakuqonda ngokunembile ukuthi ukukhula komzimba wakhe kwakubonisa ukuthi kwakunohlelo oluthile olwaluhlelwe kusengaphambili. Kungenzeka ukuthi uDavide wayenolwazi oluthile ngendlela umbungu okhula ngayo, ngakho wayengacabanga ukuthi isinyathelo ngasinye esilandelayo kumelwe ukuba silandela umklamo nohlelo lwezikhathi oselukhona kakade. Ngolimi olusankondlo, wachaza lo mklamo ngokuthi ‘ulotshiwe phansi encwadini’ kaNkulunkulu.
11 Namuhla, kuyaziwa ukuthi izici owazithola ngofuzo kubazali nakokhokho bakho—njengobude bakho, ukuma kobuso, umbala wamehlo nowezinwele nezinye izici eziningi—zanqunywa izakhi zakho zofuzo. Ingqamuzana lakho ngalinye linezakhi zofuzo ezingamashumi ezinkulungwane, futhi isakhi ngasinye siyingxenye yeketanga elide le-DNA (deoxyribonucleic acid). Iziyalezo zokwakha umzimba wakho ‘zilotshwe’ kuyi-DNA yakho. Isikhathi ngasinye lapho amangqamuzana akho ehlukana—ukuze kube namasha noma kwakheke amanye esikhundleni samadala—i-DNA yakho idlulisela lezo ziyalezo, kanjalo ikugcine uphila futhi ubukeka ngendlela efanayo. Yeka isibonelo esivelele samandla nokuhlakanipha koMenzi wethu osezulwini!
(IHubo 139:17, 18) Ngakho, yeka indlela imicabango yakho eyigugu ngayo kimi! O Nkulunkulu, yeka ukuthi ingqikithi yayo iba ngakanani! 18 Ukube bengingazama ukuyibala, miningi ngisho kunanezinhlayiya zesihlabathi. Ngiphapheme, kodwa nokho ngisenawe.
‘Senziwe Ngokumangalisayo’
Ingqondo Yethu Eyingqayizivele
12 “Ngakho, yeka indlela imicabango yakho eyigugu ngayo kimi! O Nkulunkulu, yeka ukuthi ingqikithi yayo iba ngakanani! Ukube bengingazama ukuyibala, miningi ngisho kunanezinhlayiya zesihlabathi.” (IHubo 139:17, 18a) Nezilwane zenziwe ngokumangalisayo, futhi ezinye zinezinzwa namakhono adlula awabantu. Kodwa uNkulunkulu wanikeza abantu amakhono engqondo awadlula kude awanoma isiphi isilwane. Enye incwadi yesayensi ithi: “Nakuba thina bantu sifana ngezindlela eziningi nezinye izinto eziphilayo, sihlukile kuzo ngekhono lokucabanga nelokusebenzisa ulimi. Sihlukile nangokuba nelukuluku elikhulu lokuzazi: Sakheke kanjani? Senziwa kanjani?” Lena imibuzo noDavide azindla ngayo.
13 Okubaluleke kakhulu, sihlukile ngokuthi sinekhono lokucabanga ngemicabango kaNkulunkulu, ngokungafani nezilwane. Lesi sipho esikhethekile singenye yezindlela ezibonisa ukuthi senziwe “ngomfanekiso kaNkulunkulu.” (Genesise 1:27) UDavide wasisebenzisa kahle lesi sipho. Wazindla ngobufakazi bokuba khona kukaNkulunkulu nangezimfanelo ezinhle ezibonakala emhlabeni. UDavide wayenanezincwadi zokuqala zemiBhalo Engcwele uNkulunkulu ayezembule kuzo yena nemisebenzi yakhe. Le miBhalo ephefumulelwe yasiza uDavide ukuba aqonde imicabango, ubuntu nenjongo kaNkulunkulu. Ukuzindla ngemiBhalo, indalo nendlela uNkulunkulu asebenzelana ngayo naye kwamshukumisela ukuba adumise uMenzi wakhe.
Amaphuzu Avelele ENcwadi Yesihlanu YamaHubo
139:17, 18. Ingabe ulwazi esinalo ngoJehova luyasijabulisa? (IzAga 2:10) Uma kunjalo, sinomthombo wenjabulo ongashi. Imicabango kaJehova “miningi ngisho kunanezinhlayiya zesihlabathi.” Kuyohlale kunokuningi okufanele sikufunde ngaye.
Ukumba Sifuna Ingcebo Engokomoya
(IHubo 136:15) Owathuntuthela uFaro nebutho lakhe lempi oLwandle Olubomvu: Ngoba umusa wakhe wothando umi kuze kube nini nanini;
it-1-E 783 ¶5
Ufuduko
UJehova wakhazimulisa igama lakhe futhi wakhulula u-Israyeli ngendlela ehlaba umxhwele eyayibonisa amandla akhe. Sebewele ngokuphepha ogwini olusempumalanga loLwandle Olubomvu, uMose wahola amadodana akwa-Israyeli ngengoma, kuyilapho udadewabo uMiriyamu, ongumprofethikazi, athatha khona ithamborini wahola bonke abesifazane bashaya amathamborini futhi badansa, benanela abesilisa njengoba behlabelela. (Eks 15:1, 20, 21) Ama-Israyeli ayesehlukene ngokuphelele nezitha zawo. Lapho ephuma eGibithe avikelwa ukuze kungabi bikho muntu noma silwane okuwalimazayo; akubanga ngisho nanja eyagwavumela ama-Israyeli noma yawakhotha. (Eks 11:7) Nakuba ukulandisa kuka-Eksodusi kungasho ukuthi uFaro naye wangena nebutho lakhe lempi olwandle futhi wabulawa, iHubo 136:15 liyasho ukuthi uJehova “wathuntuthela uFaro nebutho lakhe lempi oLwandle Olubomvu.”
(IHubo 141:5) Uma olungileyo engangishaya, bekuyoba umusa wothando; Futhi uma engangisola, bekuyoba amafutha phezu kwekhanda, Ikhanda lami elingeke lithande ukuwenqaba. Bekusayoba khona ngisho nanomthandazo wami phakathi nezinhlekelele zabo.
Okwenza Ukususa Ekuhlanganyeleni Kube Ilungiselelo Lothando
Kudingeka uthando nokuqina ukuze sithole imiphumela edingekayo. Umhubi uDavide wathi: “Uma olungileyo engangishaya, bekuyoba umusa wothando; futhi uma engangisola, bekuyoba amafutha phezu kwekhanda.” (IHu. 141:5) Ngokwesibonelo: Cabanga ngomqwali wezintaba ozizwa esekhathele kakhulu ngosuku olumakhaza lwasebusika. Ungenwa amakhaza kakhulu kangangokuthi uba nesiyezi. Uma ezumeka eqhweni, uzokufa. Njengoba belinde ithimba labatakuli, ahamba naye ulokhu emshaya ngempama ukuze amenze ahlale ephapheme. Impama ingase ibe buhlungu, kodwa ingasindisa ukuphila kwakhe. Ngokufanayo, uDavide waqaphela ukuthi kungase kudingeke ukuba umuntu olungileyo amkhuze kanzima ukuze asizakale.
SEPTEMBER 26–OCTOBER 2
AMAGUGU ASEZWINI LIKANKULUNKULU | AMAHUBO 142-150
“UJehova Mkhulu Futhi Kumelwe Adunyiswe Kakhulu”
(IHubo 145:1-9) Ngizokuphakamisa, Nkulunkulu wami Nkosi, Futhi ngizolitusa igama lakho kuze kube nini nanini, yebo kuze kube phakade. 2 Usuku lonke ngizokutusa, Ngizolidumisa igama lakho kuze kube nini nanini, yebo kuze kube phakade. 3 UJehova mkhulu futhi kumelwe adunyiswe kakhulu, Ubukhulu bakhe abuphenyeki. 4 Isizukulwane ngesizukulwane siyoyitusa imisebenzi yakho, Siyolandisa ngezenzo zakho zamandla. 5 Ubukhazikhazi obukhazimulayo besithunzi sakho Nezindaba zemisebenzi yakho emangalisayo ngizozikhathaza ngakho. 6 Bayokhuluma ngamandla ezinto zakho ezisabekayo; Ubukhulu bakho bona, ngiyobumemezela. 7 Bayokhuluma ngokuchichimayo ngobukhulu bobuhle bakho, Futhi bayokhamuluka ngenjabulo ngenxa yokulunga kwakho. 8 UJehova unomusa futhi unesihe, Wephuza ukuthukuthela futhi mkhulu ngomusa wothando. 9 UJehova muhle kubo bonke, Isihe sakhe siphezu kwayo yonke imisebenzi yakhe.
Ubukhulu BukaJehova Abuphenyeki
‘Ngizomphakamisa UNkulunkulu INkosi’
3 Nakuba uDavide ayeyinkosi emiswe uNkulunkulu, wayebheka uJehova njengoyiyona Nkosi ka-Israyeli yangempela. UDavide wathi: “O Jehova, ngowakho umbuso, wena oziphakamisayo njengenhloko phezu kwakho konke.” (1 IziKronike 29:11) Futhi uDavide wayemazisa ngempela uNkulunkulu njengoMbusi. Wahlabelela: “Ngizokuphakamisa, Nkulunkulu wami Nkosi, futhi ngizolitusa igama lakho kuze kube nini nanini, yebo kuze kube phakade. Usuku lonke ngizokutusa, ngizolidumisa igama lakho kuze kube nini nanini, yebo kuze kube phakade.” (IHubo 145:1, 2) Kwakuyisifiso sikaDavide ukudumisa uJehova uNkulunkulu usuku lonke kuze kube phakade.
4 IHubo 145 liyimpendulo enamandla ekugomeleni kukaSathane kokuthi uNkulunkulu ungumbusi onobugovu ogodlela izidalwa zakhe inkululeko. (Genesise 3:1-5) Leli hubo libuye lidalule amanga kaSathane okuthi labo abathobela uNkulunkulu bamthobela kuphela ngoba kukhona abazokuthola, hhayi ngoba bemthanda uNkulunkulu. (Jobe 1:9-11; 2:4, 5) NjengoDavide, amaKristu eqiniso namuhla anikeza impendulo ekumangaleleni kukaDeveli okungamanga. Ayalazisa ithemba lawo lokuphila phakade lapho sekubusa uMbuso ngoba afisa ukudumisa uJehova lonke iphakade. Kwamanje, izigidi seziqalile ukumdumisa ngokuba nokholo emhlatshelweni kaJesu wesihlengo nangokukhonza uJehova ngokuthobeka okusuka othandweni njengabakhulekeli bakhe abazinikezele futhi babhapathizwa.—Roma 5:8; 1 Johane 5:3.
Ubukhulu BukaJehova Abuphenyeki
Izibonelo Zobukhulu BukaNkulunkulu
7 IHubo 145:3 liveza isizathu esikhulu sokudumisa uJehova. UDavide uyahlabelela: “UJehova mkhulu futhi kumelwe adunyiswe kakhulu, ubukhulu bakhe abuphenyeki.” Ubukhulu bukaJehova abunamkhawulo. Abantu ngeke bakwazi ukubuphenya, ukubuqonda noma ukubulinganisa ngokuphelele. Kodwa nakanjani sizozuza manje ngokuhlola izibonelo zobukhulu bukaJehova obungaphenyeki.
8 Zama ukukhumbula isikhathi lapho wawukude nezibani zasedolobheni futhi ubheka phezulu esibhakabhakeni ebusuku kungenamafu. Abuzange yini bukumangalise ubuningi bezinkanyezi owazibona kulowo mkhathi omnyama? Awuzizwanga yini ufisa ukudumisa uJehova ngobukhulu bakhe ekudaleni zonke lezo zinto zasemazulwini? Nokho, lokho owakubona kwakumane kuyingxenye encane nje yezinkanyezi ezisemthaleni umhlaba oyingxenye yawo. Ngaphezu kwalokho, kulinganiselwa ukuthi kukhona imithala engaphezu kwezigidi eziyizinkulungwane eziyikhulu, okubonakala emithathu yayo kuphela ngaphandle kwesibonakude. Ngempela, izinkanyezi kanye nemithala engenakubalwa eyakha zonke izinto ezisemkhathini kufakazela amandla kaJehova okudala kanye nobukhulu bakhe obungaphenyeki.—Isaya 40:26.
Ubukhulu BukaJehova Abuphenyeki
Azive Ziphakeme Izimfanelo ZikaNkulunkulu Zokuziphatha
20 Njengoba sibonile, amavesi okuqala ayisithupha eHubo 145 asinika izizathu ezizwakalayo zokudumisa uJehova ngenxa yezinto ezihlobene nobukhulu bakhe obungaphenyeki. Amavesi 7 kuya ku-9 akhulisa ubukhulu bukaNkulunkulu ngokukhuluma ngezimfanelo zakhe zokuziphatha. UDavide uhlabelela athi: “Bayokhuluma ngokuchichimayo ngobukhulu bobuhle bakho, futhi bayokhamuluka ngenjabulo ngenxa yokulunga kwakho. UJehova unomusa futhi unesihe, wephuza ukuthukuthela futhi mkhulu ngomusa wothando. UJehova muhle kubo bonke, isihe sakhe siphezu kwayo yonke imisebenzi yakhe.”
21 Lapha uDavide okokuqala uqokomisa ubuhle nokulunga kukaJehova—izimfanelo uSathane uDeveli azingabaza. Zibathinta kanjani lezi zimfanelo bonke labo abathanda uNkulunkulu futhi abathobela ubukhosi bakhe? Phela, ubuhle bukaJehova nendlela yakhe elungile yokubusa ilethela abakhulekeli bakhe injabulo enkulu kangangokuthi abayeki ukuchichima amazwi okumdumisa. Ngaphezu kwalokho, ubuhle bukaJehova bufinyelela “kubo bonke.” Kwethenjwa ukuthi lokhu kuzosiza abaningi abengeziwe ukuba baphenduke futhi babe abakhulekeli bakaNkulunkulu weqiniso kungakephuzi.—IzEnzo 14:15-17.
Lukhulu Uthando LukaJehova Oluqotho
2 UJehova ubonisa uthando ngabakhulekeli bakhe beqiniso ngendlela enhle kakhulu futhi ehlala phakade. Lolo thando luchazwa ngegama lesiHebheru elihunyushwa ngokuthi “umusa wothando” noma “uthando oluqotho.” INkosi uDavide yakwa-Israyeli wasendulo, yayiwazisa ngokujulile umusa kaNkulunkulu wothando. Ngenxa yalokho okwakwenzeke kuye nangokuzindla ngokusebenzelana kukaNkulunkulu nabanye, uDavide wayengaba nesibindi sokuhlabelela athi: “UJehova . . . mkhulu ngomusa wothando [noma, ngothando oluqotho].”—IHubo 145:8.
(IHubo 145:10-13) Yonke imisebenzi yakho iyokudumisa, Jehova, Abaqotho bakho bayokutusa. 11 Bayokhuluma ngenkazimulo yobukhosi bakho, Bakhulume nangamandla akho, 12 Ukuze benze izenzo zakhe zamandla zaziwe amadodana abantu Nenkazimulo yobukhazikhazi bobukhosi bakhe. 13 Ubukhosi bakho buwubukhosi kuze kube nini nanini, Nombuso wakho ukuzo zonke izizukulwane ezizolandela.
Lukhulu Uthando LukaJehova Oluqotho
Ukubona Abaqotho BakaNkulunkulu
3 Ekhuluma ngoJehova uNkulunkulu, uHana, umama womprofethi uSamuweli, wathi: “Uqapha izinyawo zabathembekile [noma, abaqotho] bakhe.” (1 Samuweli 2:9) Bangobani laba “abaqotho”? INkosi uDavide iyayinikeza impendulo. Ngemva kokubabaza izimfanelo zikaJehova ezimangalisayo, ithi: “Abaqotho bakho bayokutusa.” (IHubo 145:10) Ungase uzibuze ukuthi abantu bangamtusa kanjani uNkulunkulu. Ngokuyinhloko bamtusa ngokumdumisa noma ngokukhuluma kahle ngaye.
4 Abaqotho bakaJehova kungathiwa yilabo abasebenzisa imilomo yabo ukukhuluma kahle ngaye. Lapho benemibuthano nalapho besemihlanganweni yobuKristu, yini abakhuluma ngayo kakhulu? Phela, bakhuluma ngoMbuso kaJehova! Izinceku zikaNkulunkulu eziqotho zizizwa njengoDavide owahlabelela: “Bayokhuluma ngenkazimulo yobukhosi bakho [bukaJehova], bakhulume nangamandla akho.”—IHubo 145:11.
5 Ingabe uJehova uyaqaphela lapho abaqotho bakhe bemdumisa? Yebo, uyakunaka lokho abakushoyo. Esiprofethweni esiphathelene nokukhulekela kweqiniso osukwini lwethu, uMalaki wabhala: “Ngaleso sikhathi abamesabayo uJehova bakhuluma omunye komunye, yilowo nalowo nomngane wakhe, uJehova waqhubeka enakile futhi elalele. Kwalotshwa incwadi yenkumbulo phambi kwakhe yalabo abamesabayo uJehova nalabo abacabanga ngegama lakhe.” (Malaki 3:16) Kuyamjabulisa kakhulu uJehova lapho abaqotho bakhe bekhuluma kahle ngaye, futhi uyabakhumbula.
6 Izinceku zikaJehova eziqotho zingabonakala futhi ngesibindi sazo sokukhuluma nabantu abangebona abakhulekeli bakaNkulunkulu weqiniso. Ngempela, abaqotho bakaNkulunkulu ‘benza izenzo zakhe zamandla zaziwe amadodana abantu nenkazimulo yobukhazikhazi bobukhosi bakhe.’ (IHubo 145:12) Ingabe uyawabheka futhi uwasebenzise ngokugcwele amathuba okukhuluma ngobukhosi bukaJehova nabantu abangakholwa? Ngokungafani nohulumeni babantu abazodlula ngokushesha, ubukhosi bakhe bungobaphakade. (1 Thimothewu 1:17) Kuyaphuthuma ukuba abantu bazi ngobukhosi bukaJehova obuphakade futhi babe abasekeli babo. UDavide wahlabelela: “Ubukhosi bakho buwubukhosi kuze kube nini nanini, nombuso wakho ukuzo zonke izizukulwane ezizolandela.”—IHubo 145:13.
(IHubo 145:14-16) UJehova usekela bonke abawayo, Futhi uvusa bonke abakhotheme. 15 Amehlo abo bonke abheka kuwe ngethemba, Ubanika ukudla kwabo ngenkathi yako. 16 Uvula isandla sakho Wanelise isifiso sayo yonke into ephilayo.
Lukhulu Uthando LukaJehova Oluqotho
10 Yiqiniso, abanye ababusi abangabantu bayikhathalele ngobuqotho inhlalakahle yabantu babo. Kodwa ngisho nabanozwela kangakanani ababazeli eduze abantu babo. Ngempela singabuza: Ukhona umbusi onendaba nabo bonke abantu bakhe kangangokuthi uyashesha ukusiza ngamunye wabo uma kunenkathazo? Yebo, ukhona. UDavide wabhala: “UJehova usekela bonke abawayo, futhi uvusa bonke abakhotheme.”—IHubo 145:14.
11 Ziningi izinhlupheko nezinhlekelele ezehlela abaqotho bakaJehova uNkulunkulu ngenxa yokungapheleli kwabo nangenxa yokuthi baphila ezweni elisemandleni kaSathane, “omubi.” (1 Johane 5:19; IHubo 34:19) AmaKristu ayashushiswa. Amanye ezwa iminjunju yamahlala khona noma yokufelwa. Ngezinye zikhathi, amaphutha abaqotho bakaJehova angase ababangele ukuba ‘bakhothame’ ngenxa yokudumazeka. Nokho, kungakhathaliseki ukuthi behlelwa iyiphi inhlupheko uJehova uhlale ekulungele ukududuza nokuqinisa ngokomoya ngamunye wabo. INkosi uJesu Kristu nayo inesithakazelo sothando esifanayo kubantu bayo abaqotho.—IHubo 72:12-14.
Ukudla Okwanelisayo Ngenkathi Yako
12 Ngenxa yomusa wakhe omkhulu wothando, uJehova unakekela zonke izidingo zezinceku zakhe. Lokhu kuhlanganisa nokuzanelisa ngokudla okunomsoco. INkosi uDavide yabhala: “Amehlo abo bonke abheka kuwe [Jehova] ngethemba, ubanika ukudla kwabo ngenkathi yako. Uvula isandla sakho wanelise isifiso sayo yonke into ephilayo.” (IHubo 145:15, 16) Ngisho nangezikhathi zenhlekelele, uJehova angabangela ukuba izinto zenzeke ngendlela yokuthi abaqotho bakhe bathole ‘isinkwa sosuku.’—Luka 11:3; 12:29, 30.
13 UDavide wathi “yonke into ephilayo” iyaneliswa. Lokho kuhlanganisa nezilwane. Ukube bekungengenxa yenala yohlaza olusezweni nezitshalo ezisolwandle, izilwane zasemanzini, izinyoni nezilwane zasezweni bezingeke zibe nawo umoyampilo noma ukudla. (IHubo 104:14) Nokho, uJehova uyaqikelela ukuthi zonke izidingo zazo ziyaneliswa.
14 Ngokungafani nezilwane, abantu banesidingo esingokomoya. (Mathewu 5:3) Yeka ukuthi uJehova uzanelisa kahle kangakanani izidingo zabaqotho bakhe! Ngaphambi kokufa kwakhe, uJesu wathembisa ukuthi ‘inceku ethembekileyo neqondayo’ yayizonikeza abalandeli bakhe ‘ukudla okungokomoya ngesikhathi esifanele.’ (Mathewu 24:45) Insali yabangu-144 000 abagcotshiwe yakha leso sigaba senceku namuhla. Ngayo, uJehova ukulungiselele ngempela ukudla okungokomoya ngobuningi.
Ukumba Sifuna Ingcebo Engokomoya
(IHubo 143:8) Ngenze ukuba ngizwe umusa wakho wothando ekuseni, Ngoba ithemba lami ngilibeké kuwe. Ngazise indlela okufanele ngihambe ngayo, Ngoba umphefumulo wami ngiwuphakamiselé kuwe.
Phila Usuku Ngalunye Ngendlela Ekhazimulisa UNkulunkulu
UMHUBI uDavide wathandaza kuJehova: “Ngenze ukuba ngizwe umusa wakho wothando ekuseni . . . Ngazise indlela okufanele ngihambe ngayo.” (IHu. 143:8) Lapho uvuka futhi ubonga uJehova ngokuthi ukunike olunye usuku, ingabe wenza njengoDavide, ucele uJehova ukuba akuqondise ekwenzeni izinqumo nasekukhetheni inkambo engcono yokwenza izinto? Ngokungangabazeki wenza kanjalo.
Njengezinceku zikaJehova ezizinikezele, ‘kungakhathaliseki ukuthi siyadla noma siyaphuza noma senza noma yini enye,’ silwela ukuba ‘zonke izinto sizenzele inkazimulo kaNkulunkulu.’ (1 Kor. 10:31) Siyaqaphela ukuthi indlela yethu yokuphila usuku nosuku ingase ikhazimulise uJehova noma imthele ngesihlamba. Siyakhumbula nokuthi iZwi likaNkulunkulu lithi uSathane umangalela abafowabo bakaKristu “imini nobusuku,” eqinisweni, umangalela zonke izinceku zikaNkulunkulu emhlabeni. (IsAm. 12:10) Ngakho-ke, sizimisele ukunikeza impendulo ekumangaleleni kwamanga kukaSathane futhi senze inhliziyo kaJehova ijabule ngokunikela inkonzo engcwele kuBaba wethu osezulwini “imini nobusuku.”—IsAm. 7:15; IzAga 27:11.
(IHubo 150:6) Konke okuphefumulayo—makudumise uJah. Dumisani uJah!
it-2-E 448
Umlomo
Yisitho somzimba uNkulunkulu asiklamele ukuba samukele ukudla futhi sikugayele isisu, futhi abantu basisebenzisela ukukhuluma. Konke esikushoyo kufanele kumdumise. (IHu 34:1; 51:15; 71:8; 145:21) Umhubi wathi konke okuphefumulayo kuyodumisa uJehova; ngakho abantu kumelwe basebenzise imilomo yabo ukudumisa uJehova uma befuna ukuphila. Umphostoli uPawulu uchaza ukuthi ukuba nokholo kuNkulunkulu naseNdodaneni yakhe ngisho nalapho umuntu ekholwa ngayo yonke inhliziyo, akwanele. Ukholo kufanele luhambisane nokuvuma obala ukuze umuntu asindiswe.—IHu 150:6; Roma 10:10.
UJehova angafaka amazwi afanele emlonyeni wenceku yakhe ukuze yenze ngokuvumelana nenjongo nelungelo lakhe kanye namandla akhe njengoMdali. Wakwenza lokhu kubaprofethi bakhe ngokuyisimangaliso, ngokuba abaphefumulele. (Eks 4:11, 12, 15; Jer 1:9) Kwesinye isenzakalo wenza ngisho nesilwane esingakwazi ukukhuluma, imbongolo, ukuba sikhulume. (Num 22:28, 30; 2Pet 2:15, 16) Namuhla izinceku zikaNkulunkulu zingakhuluma amazwi akhe, hhayi ngokuphefumulelwa kodwa zisebenzisa iZwi lakhe elilotshiwe, aliphefumulele, elizihlomisela ngokuphelele yonke imisebenzi emihle. (2Thim 3:16, 17) Akusadingeki ukuba izinceku zikaNkulunkulu zilinde ukuza kukaKristu ukuze azilethele izindaba ezinhle noma ukuba ziye kwenye indawo ukuze zithole ezingashumayela ngakho. Sezinazo kakade, zilindele zona ukuba zizikukhulume, njengoba nje zifundisiwe: “Leli zwi liseduze kakhulu kwakho, lisemlonyeni wakho nasenhliziyweni yakho”—Roma 10:6-9; Dut 30:11-14.
Ungaletha Ukuphila Noma Ukufa. Kusobala ukuthi ukusetshenziswa kahle komlomo kubalulekile futhi yilokho uJehova akushoyo. IZwi laKhe lithi: “Umlomo wolungile ungumthombo wokuphila.” (IzA 10:11) Ngakho, umlomo kumelwe uqashelwe kakhulu (IHu 141:3; IzA 13:3; 21:23), ngoba ukusetshenziswa kabi kwawo kungalethela umniniwo inhlekelele. (IzA 10:14; 18:7) UNkulunkulu wenza ukuba umuntu ngamunye alandise ngalokho akushoyo ngomlomo wakhe. (Math 12:36, 37) Umuntu angase akhulume ngokushesha, enze isifungo ngokuphuthuma. (Shu 5:4-6) Angase akhohlise omunye umuntu, aze ambangele ukuba alahlwe, futhi naye amlahle. (IzA 26:28) Kubaluleke ngokukhethekile ukuba umuntu agade akushoyo lapho ephambi kwababi, ngoba kancane kancane angazithola esephambuka kulokho ukuhlakanipha kukaNkulunkulu kumholela khona okungase kumenze ahlambalaze igama likaNkulunkulu futhi kungase kumholele nasekufeni (IHu 39:1) UJesu wasibekela isibonelo esihle sokuzithoba entandweni kaNkulunkulu ngaphandle kokukhalaza noma aphindisele ngokuthuka abaphikisi bakhe ababi.—Isaya 53:7; IzE 8:32; 1Pet 2:23.
UmKristu ngamunye kumelwe ahlale eqaphile ngenxa yokuthi akaphelele; ngakho kudingeka ukuba ayiqaphe inhliziyo yakhe. UJesu wathi umuntu akangcoliswa okungena ngomlomo, kodwa ungcoliswa yilokho okuphuma emlonyeni, ngoba “umlomo ukhuluma ngokuchichima kwenhliziyo.” (Math 12:34; 15:11) Ngakho kumelwe siqaphe ukuba singakuvumeli ukuba sikhulume noma ngabe yini ngaphandle kokucabangisisa ngemiphumela. Lokhu kudinga ukuba umuntu ngamunye acabangisise ukuze asebenzise izinto ezinhle azifunde eZwini likaNkulunkulu.—IzA 13:3; 21:23.