Izikhombo Ze-Ncwajana YoMhlangano Wokuphila Nenkonzo
SEPTHEMBA 4-10
AMAGUGU ASEZWINI LIKANKULUNKULU | HEZEKELI 42-45
“Abantu Babezophinde Bakhonze UJehova Ngendlela Ehlanzekile!”
(Hezekeli 43:10-12) “Kepha wena ndodana yomuntu, yazisa indlu ka-Israyeli ngale Ndlu, ukuze izizwe ilulazekile ngenxa yeziphambeko zayo, futhi kumelwe ilinganise isifanekiso. 11 Uma empeleni izizwa ilulazekile ngenxa yakho konke ekwenzile, umklamo wesisekelo seNdlu, nohlelo lwayo nezindawo zayo zokuphuma nezindlela zayo zokungena, nayo yonke imiklamo yayo yesisekelo nayo yonke imininingwane yayo, nayo yonke imiklamo yayo yesisekelo nayo yonke imithetho yayo, yazise kona futhi ukulobe phambi kwamehlo ayo, ukuze iwuqaphele wonke umklamo wayo wesisekelo nayo yonke imininingwane yayo futhi empeleni iyifeze. 12 Lona ngumthetho weNdlu. Phezu kwesiqongo sentaba yonke indawo yayo nxazonke iyinto engcwelengcwele. Bheka! Lona ngumthetho weNdlu.
‘Beka Inhliziyo Yakho’ Ethempelini LikaNkulunkulu!
3 Lo mbono obanzi, othatha izahluko ezingu-9 zencwadi kaHezekeli, wanika abaseJudiya ababedingisiwe isithembiso esiqinisa ukholo. Ukukhulekela okuhlanzekile kwakuzobuyiselwa! Emakhulwini eminyaka kusukela ngaleso sikhathi, kuze kube ngisho nasosukwini lwethu, lo mbono uye waba umthombo wesikhuthazo kubathandi bakaJehova. Kanjani? Ake sihlole lokho okwakushiwo umbono kaHezekeli ongokwesiprofetho kuma-Israyeli adingisiwe. Wakhiwa yizingxenye ezine eziyinhloko: ithempeli, abapristi, isikhulu nezwe.
it-2-E 1082 ¶2
Ithempeli
Umbono wethempeli kaHezekeli. Ngo-593 B.C.E., ngonyaka we-14 ngemva kokuba kubhujiswe iJerusalema nethempeli likaSolomoni, umpristi ongumprofethi uHezekeli, wanikwa umbono. Wazibona ephezu kwentaba ephakeme kakhulu lapho abona khona ithempeli elikhulu likaJehova. (Hez 40:1, 2) UHezekeli wayalwa ukuba atshele “indlu ka-Israyeli” konke akubonile ukuze alulaze futhi enze amaJuda ayesekudingisweni aphenduke. Akungabazeki ukuthi lokho uHezekeli akubona kwakufanele kududuze nalawo athembekile. (Hez 40:4; 43:10, 11) Kulo mbono wanikwa imininingwane eqondile yezilinganiso zethempeli. Lapho kulinganiswa, kwakusetshenziswa “umhlanga” (ongamamitha angu-3,11 ubude) ‘nengalo’ (engamasentimitha angu-51,8 ubude). (Hez 40:5) Lokhu kunakisiswa kwezilinganiso kuye kwaholela abanye ukuba bakholelwe ukuthi lo mbono wethempeli wawubonisa indlela okwakufanele kwakhiwe ngayo ithempeli elakhiwa uZerubhabhele kamuva ngemva kokubuya ekudingisweni. Noma kunjalo, abukho ubufakazi obuqinisekisiwe balokho.
(Hezekeli 44:23) “‘Kufanele bafundise abantu bami umehluko phakathi kwento engcwele nento engcolile; futhi kufanele babenze bawazi umehluko phakathi kokungcolile nokuhlanzekile.
(Hezekeli 45:16) “‘Bonke abantu bezwe bayowukhipha lo mnikelo wesikhulu kwa-Israyeli.
‘Beka Inhliziyo Yakho’ Ethempelini LikaNkulunkulu!
10 Yeka indlela konke lokhu okumelwe ukuba kwabakhuthaza ngayo labo badingiswa! Umkhaya ngamunye waqinisekiswa ukuthi wawunefa ezweni. (Qhathanisa noMika 4:4.) Ukukhulekela okuhlanzekile kwakuyoba sendaweni ephakeme, enkabeni yalelo lizwe. Futhi phawula ukuthi embonweni kaHezekeli, isikhulu, njengabapristi, sasiyohlala ezweni elinikelwe abantu. (Hezekeli 45:16) Ngakho ezweni elibuyiselwe, abantu babeyonikelela umsebenzi walabo uJehova ayebamisele ukuba bahole, babasekele ngokubambisana nesiqondiso sabo. Kukonke, leli lizwe lalifanekisela ukuhleleka, ukubambisana nokulondeka.
Ukumba Sifuna Ingcebo Engokomoya
(Hezekeli 43:8, 9) Ngokubeka kwayo umbundu wayo kanye nombundu wami nensika yayo yomnyango eceleni kwensika yomnyango wami, kukhona udonga phakathi kwami nayo. Yalingcolisa igama lami elingcwele ngezinto zayo ezinengekayo ezenzile, kangangokuthi ngayiqothula ngentukuthelo yami. 9 Manje mayisuse ubufebe bayo nezidumbu zamakhosi ayo kube kude nami, ngokuqinisekile ngizohlala phakathi kwayo kuze kube nini nanini.
it-2-E 467 ¶4
Igama
Isizwe sakwa-Israyeli esasibizwa ngegama likaNkulunkulu sahluleka ukuphila ngemiyalo yakhe elungile. Lokho kwalingcolisa igama likaNkulunkulu. (Hez 43:8; Amose 2:7) Ukungathembeki kwama-Israyeli kwenza uNkulunkulu wawajezisa. Lokho kwenza ezinye izizwe zaphinde zakhuluma kabi ngegama likaNkulunkulu. (Qhathanisa neHubo 74:10, 18; Isaya 52:5.) Ngenxa yokuthi lezi zizwe zazingaboni ukuthi nguJehova owayejezisa u-Israyeli, zacabanga ukuthi izinhlekelele ezazehlela u-Israyeli zazibangelwa ukuthi uJehova wayesehluleka ukuvikela abantu bakhe. Ukuze ahlanze igama lakhe elase lingcolisiwe, uJehova wathatha isinyathelo sokubuyisela insali ka-Israyeli ezweni layo.—Hez 36:22-24.
(Hezekeli 45:9, 10) “Yilokhu iNkosi EnguMbusi uJehova ekushilo, ‘Kwanele ngani zikhulu zakwa-Israyeli!’ “‘Susani ubudlova nokuphanga, nenze ubulungisa nokulunga. Susani ukuqhwaga kwenu kubantu bami,’ kusho iNkosi EnguMbusi uJehova. 10 ‘Kufanele nibe nesikali esinembile ne-efa elinembile nebhathi elinembile.
it-2-E 140
Ubulungisa
Ngakho-ke, uJehova ubelokhu elindele kufanele ukuba labo abafuna ukusondelana naye bafunde imithetho yakhe yokulunga bese bephila ngayo. (Isaya 1:17, 18; 10:1, 2; Jer 7:5-7; 21:12; 22:3, 4; Hez 45:9, 10; Amose 5:15; Mika 3:9-12; 6:8; Zak 7:9-12)
Ukufundwa KweBhayibheli
(Hezekeli 44:1-9) Yangibuyisa ngendlela yesango lendlu engcwele, elingaphandle elibheke empumalanga, lalivaliwe. 2 Khona-ke uJehova wathi kimi: “Ngokuqondene naleli sango, liyohlala livaliwe. Ngeke livulwe, futhi akukho muntu nje oyongena ngalo; ngoba uJehova, uNkulunkulu ka-Israyeli, ungene ngalo, kumelwe lihlale livaliwe. 3 Nokho, isikhulu—njengesikhulu, sona siyohlala khona, ukuze sidle isinkwa phambi kukaJehova. Siyongena ngendlela yasemphemeni wesango, futhi siyophuma ngendlela yawo.” 4 Yabe isingiletha phambi kweNdlu ngendlela yesango elisenyakatho, ukuze ngibone, bheka! inkazimulo kaJehova yayigcwalise indlu kaJehova. Ngawa ngobuso. 5 Khona-ke uJehova wathi kimi: “Ndodana yomuntu, beka inhliziyo yakho futhi ubone ngamehlo akho, nangezindlebe zakho uzwe konke engikukhuluma nawe ngazo zonke izimiso zendlu kaJehova nangayo yonke imithetho yayo, futhi ubeke inhliziyo yakho endleleni engenayo yeNdlu kanye nazo zonke izindawo zokuphuma zendlu engcwele. 6 Uthi eKudlubulundeni, endlini ka-Israyeli, ‘Yilokhu iNkosi EnguMbusi uJehova ekushilo: “Kwanele ngani ngenxa yazo zonke izinto zenu ezinengekayo nina ndlu ka-Israyeli, 7 lapho ningenisa abezinye izizwe abangasokile enhliziyweni futhi abangasokile enyameni, ukuba babe sendlini yami engcwele bayingcolise, yebo indlu yami; lapho nethula isinkwa sami, amanoni negazi, kuyilapho belokhu bephula isivumelwano sami ngenxa yazo zonke izinto zenu ezinengekayo. 8 Futhi anisinakekelanga isibopho esiphathelene nezinto zami ezingcwele, futhi naningabamisi abanye esikhundleni senu njengabanakekeli besibopho sami endlini yami engcwele.”’ 9 “‘Yilokhu iNkosi EnguMbusi uJehova ekushilo: “Akukho muntu wesinye isizwe, ongasokile enhliziyweni futhi ongasokile enyameni, ongangena endlini yami engcwele, okungukuthi, noma yimuphi ongowesinye isizwe ophakathi kwabantwana bakwa-Israyeli.”’
SEPTHEMBA 11-17
AMAGUGU ASEZWINI LIKANKULUNKULU | HEZEKELI 46-48
“Izibusiso Eziyojabulelwa U-Israyeli Obuyiselwe Ezweni Lakhe”
(Hezekeli 47:1) Kancane kancane yangibuyisela emnyango weNdlu, bheka! kwakukhona amanzi ephuma ngaphansi kombundu weNdlu ngasempumalanga, ngoba ingaphambili lendlu lalibheke empumalanga. Amanzi ayehla ephuma ngaphansi, ohlangothini lweNdlu olusesandleni sokunene, eningizimu ye-altare.
(Hezekeli 47:7-12) Lapho ngibuyela, bheka! kwakukhona imithi eminingi kakhulu osebeni lwesifufula, nganeno nangaphesheya. 8 Yaqhubeka yathi kimi: “La manzi aya esifundeni esisempumalanga futhi kumelwe ehle adabule i-Araba. Futhi kumelwe afike olwandle. Njengoba efika olwandle, amanzi alo ayaphulukiswa. 9 Kuyothi yonke imiphefumulo ephilayo eswebezelayo ithole ukuphila, kuyo yonke indawo lapho sifika khona lesi sifufula esiphindwe kabili. Kuyoba khona izinhlanzi eziningi kakhulu, ngoba kulapho lapho la manzi ngokuqinisekile eyofika khona, namanzi olwandle ayophulukiswa, futhi kuyophila yonke into lapho kufika khona lesi sifufula. 10 “Abadobi bayokuma eceleni kwaso kusukela e-Eni-Gedi kuze kube se-Eni-egilayimi. Kuyoba khona igceke lokweneka amanetha ahudulwayo. Izinhlanzi zakhona ziyoba khona ngezinhlobo zazo, njengezinhlanzi zasoLwandle Olukhulu, ziyoba ziningi kakhulu. 11 “Kukhona izimbuku zaso namaxhaphozi aso, kona ngeke kuphulukiswe. Ngokuqinisekile kuyonikelwa kusawoti. 12 “Eceleni kwalesi sifufula, osebeni lwaso nganeno nangaphesheya, kuyomila zonke izinhlobo zemithi yokudla. Amaqabunga ayo ngeke abune, nezithelo zayo ngeke ziphele. Iyothela izithelo ezintsha ngezinyanga zayo, ngoba amanzi ayo—avela kuyo kanye indlu engcwele. Izithelo zayo ziyoba ngezokudla namaqabunga ayo abe ngawokuphulukisa.”
‘Beka Inhliziyo Yakho’ Ethempelini LikaNkulunkulu!
11 Ingabe uJehova wayezolibusisa izwe labo? Isiprofetho siphendula lo mbuzo ngomfanekiso okhuthazayo. Kunomsele ogeleza usuka ethempelini, uya uvuleka njengoba wehla, uze ungenele oLwandle Olufile usuwumfula. Ufika khona uvuselele amanzi angenakuphila, bese kuchuma ibhizinisi lokudoba ogwini. Osebeni kunemithi eminingi ethela izithelo unyaka wonke, ezinikeza ukudla neziphilisayo.—Hezekeli 47:1-12.
12 Kubadingiswa, lesi sithembiso sasenanela futhi siqinisekisa iziprofetho zokubuyiselwa zangaphambili ababezazisa kakhulu. Izikhathi ezingaphezu kwesisodwa, abaprofethi bakaJehova abaphefumulelwe babelichaze ngamagama achaza ipharadesi izwe lakwa-Israyeli eselivuselelwe laphinde lahlalwa. Ukuvuselelwa kwezingwadule kwakuyisiprofetho esiphindaphindwayo. (Isaya 35:1, 6, 7; 51:3; Hezekeli 36:35; 37:1-14) Ngakho abantu babengalindela ukuthi izibusiso zikaJehova ezinikeza ukuphila zaziyogeleza njengomfula zisuka ethempelini elivuselelwe. Ngenxa yalokho, isizwe esifile ngokomoya sasiyovuseleleka. Abantu ababuyiselwe babeyobusiswa ngamadoda angokomoya avelele—amadoda alungile naqine njengemithi egudle usebe embonweni, amadoda ayeyohola ekuvuseleleni izwe eliyincithakalo. No-Isaya wayebhale ‘ngemithi yokulunga eyayiyokwakha izincithakalo ezindala.’—Isaya 61:3, 4.
(Hezekeli 47:13, 14) Yilokhu iNkosi EnguMbusi uJehova ekushilo: “Nansi indawo enizozabela yona njengefa ibe yizwe lezizwe eziyishumi nambili zakwa-Israyeli, kube neziqephu ezimbili zendawo ezinikwa uJosefa. 14 Niyolizuza njengefa, yilowo nalowo ngokufanayo nomfowabo, izwe engaphakamisa isandla ngifunga ukulinika okhokho benu; futhi leli zwe kumelwe liwele kini ngenkatho njengefa.
‘Beka Inhliziyo Yakho’ Ethempelini LikaNkulunkulu!
10 Yeka indlela konke lokhu okumelwe ukuba kwabakhuthaza ngayo labo badingiswa! Umkhaya ngamunye waqinisekiswa ukuthi wawunefa ezweni. (Qhathanisa noMika 4:4.) Ukukhulekela okuhlanzekile kwakuyoba sendaweni ephakeme, enkabeni yalelo lizwe. Futhi phawula ukuthi embonweni kaHezekeli, isikhulu, njengabapristi, sasiyohlala ezweni elinikelwe abantu. (Hezekeli 45:16) Ngakho ezweni elibuyiselwe, abantu babeyonikelela umsebenzi walabo uJehova ayebamisele ukuba bahole, babasekele ngokubambisana nesiqondiso sabo. Kukonke, leli lizwe lalifanekisela ukuhleleka, ukubambisana nokulondeka.
(Hezekeli 48:9, 10) “Ngokuqondene nomnikelo okufanele niwunikele kuJehova, ubude buyoba yizingalo eziyizinkulungwane ezingamashumi amabili nanhlanu ububanzi bube izinkulungwane eziyishumi. 10 Kulezi zingalo kufanele kube khona umnikelo ongcwele wabapristi, enyakatho izingalo eziyizinkulungwane ezingamashumi amabili nanhlanu, entshonalanga kube ububanzi obuyizinkulungwane eziyishumi, empumalanga ububanzi obuyizinkulungwane eziyishumi, eningizimu ubude obuyizinkulungwane ezingamashumi amabili nanhlanu. Indlu kaJehova engcwele kumelwe ibe phakathi kwazo.
Ukumba Sifuna Ingcebo Engokomoya
(Hezekeli 47:1) Kancane kancane yangibuyisela emnyango weNdlu, bheka! kwakukhona amanzi ephuma ngaphansi kombundu weNdlu ngasempumalanga, ngoba ingaphambili lendlu lalibheke empumalanga. Amanzi ayehla ephuma ngaphansi, ohlangothini lweNdlu olusesandleni sokunene, eningizimu ye-altare.
(Hezekeli 47:8) Yaqhubeka yathi kimi: “La manzi aya esifundeni esisempumalanga futhi kumelwe ehle adabule i-Araba. Futhi kumelwe afike olwandle. Njengoba efika olwandle, amanzi alo ayaphulukiswa.
(Hezekeli 48:30) “Lena kuyoba yimigwaqo ephuma emzini: Emngceleni osenyakatho, kuyoba isilinganiso esiyizingalo eziyizinkulungwane ezine namakhulu amahlanu.
(Hezekeli 48:32-34) “Emngceleni osempumalanga kuyoba yizingalo eziyizinkulungwane ezine namakhulu amahlanu, namasango amathathu, yebo isango likaJosefa, elilodwa; isango likaBhenjamini, elilodwa; isango likaDani, elilodwa. 33 “Umngcele oseningizimu uyoba yizingalo eziyizinkulungwane ezine namakhulu amahlanu isilinganiso sawo, ube namasango amathathu, isango likaSimeyoni, elilodwa; isango lika-Isakare, elilodwa; isango likaZebhuloni, elilodwa. 34 “Umngcele osentshonalanga uyoba yizingalo eziyizinkulungwane ezine namakhulu amahlanu, kukhona amasango amathathu, isango likaGadi, elilodwa; isango lika-Asheri, elilodwa; isango likaNafetali, elilodwa.
‘Beka Inhliziyo Yakho’ Ethempelini LikaNkulunkulu!
14 Ingabe lezi zenzakalo zaziwukuphela kokugcwaliseka kombono kaHezekeli? Cha; kunokungaphezulu kakhulu kwalokho okuboniswayo. Cabanga: Ithempeli elabonwa uHezekeli lalingenakwakhiwa ngempela ngendlela elichazwe ngayo. Yiqiniso, amaJuda awuthatha ngokungathi sína lowo mbono futhi aze ayisebenzisa ngokoqobo eminye yemininingwane yawo. Nokho, ithempeli lasembonweni lilonke lalilikhulu kakhulu kangangokuthi lalingenakulingana nakulingana eNtabeni iMoriya, okwakwakhiwe kuyo ithempeli langaphambili. Ngaphezu kwalokho, ithempeli likaHezekeli lalingekho emzini kodwa lalisendaweni ethé qékelele, kanti ithempeli lesibili lakhiwa lapho elokuqala lalikade likhona, emzini waseJerusalema. (Ezra 1:1, 2) Futhi, akukho mfula ongokoqobo owake wageleza usuka ethempelini laseJerusalema. Ngakho u-Israyeli wasendulo wabona ukugcwaliseka okuncane kuphela kwesiprofetho sikaHezekeli. Lokhu kusikisela ukuthi kumelwe kube khona ukugcwaliseka okukhulu okungokomoya kwalo mbono.
(Hezekeli 47:6) Yathi kimi: “Ukubonile lokhu ndodana yomuntu?” Khona-ke yangihambisa yangibuyisela osebeni lwesifufula.
it-2-E 1001
Ndodana Yomuntu
EmiBhalweni YesiHebheru, le nkulumo ivela kakhulu encwadini kaHezekeli, lapho uNkulunkulu ebiza khona lo mprofethi izikhathi ezingu-90 ngokuthi “ndodana yomuntu.” (Hez 2:1, 3, 6, 8) Kubonakala sengathi indlela lesi siqu esisetshenziswe ngayo senzelwe ukugcizelela ukuthi lo mprofethi umane nje ungumuntu wasemhlabeni. Lesi siqu siwenza ube sobala umehluko okhona phakathi kwakhe njengomkhulumeni ongumuntu noMthombo womyalezo wakhe, okunguNkulunkulu oPhezukonke. Umprofethi uDaniyeli naye ubizwa ngalesi siqu kuDaniyeli 8:17.
Ukufundwa KweBhayibheli
(Hezekeli 48:13-22) “Eceleni nje kwendawo yabapristi, amaLevi kufanele abe nezingalo eziyizinkulungwane ezingamashumi amabili nanhlanu ubude, neziyizinkulungwane eziyishumi ububanzi; sebubonke ubude buyizinkulungwane ezingamashumi amabili nanhlanu nobubanzi buyizinkulungwane eziyishumi. 14 Akufanele bathengise noma iyiphi ingxenye yawo, futhi umuntu akufanele awenane, noma abangele ukuba ingxenye yezwe eyikhethelo isibili isuke kubo; ngoba uyinto engcwele kuJehova. 15 “Ngokuqondene nezingalo eziyizinkulungwane ezinhlanu ezisele ebubanzini eziseceleni kwezinkulungwane ezingamashumi amabili nanhlanu, zona ziyinto engcolile yomuzi, zingezendawo yokuhlala, namadlelo. Umuzi kumelwe ube phakathi kwazo. 16 Yilezi izilinganiso zomuzi: umngcele osenyakatho yizingalo eziyizinkulungwane ezine namakhulu amahlanu, umngcele oseningizimu yizinkulungwane ezine namakhulu amahlanu, umngcele osempumalanga yizinkulungwane ezine namakhulu amahlanu, umngcele osentshonalanga yizinkulungwane ezine namakhulu amahlanu. 17 Umuzi kumelwe ube nedlelo, enyakatho izingalo ezingamakhulu amabili namashumi amahlanu, eningizimu amakhulu amabili namashumi amahlanu, empumalanga amakhulu amabili namashumi amahlanu, entshonalanga amakhulu amabili namashumi amahlanu. 18 “Indawo esele ebudeni iyolingana ncamashí nomnikelo ongcwele, izingalo eziyizinkulungwane eziyishumi empumalanga, neziyizinkulungwane eziyishumi entshonalanga; kufanele ilingane ncamashí nomnikelo ongcwele, umkhiqizo wayo kumelwe ube ngowesinkwa sabakhonza umuzi. 19 Labo abakhonza umuzi abavela kuzo zonke izizwe zakwa-Israyeli bayoyilima. 20 “Usuwonke umnikelo uyizingalo eziyizinkulungwane ezingamashumi amabili nanhlanu ngezinkulungwane ezingamashumi amabili nanhlanu. Kufanele ninikele ngengxenye enezinhlangothi ezine ezilinganayo njengomnikelo ongcwele kanye nefa lomuzi. 21 “Indawo esele kuyoba ngeyesikhulu, kulolu hlangothi nakuloluya hlangothi lomnikelo ongcwele nolwefa lomuzi, eceleni kwendawo eyizingalo eziyizinkulungwane ezingamashumi amabili nanhlanu yomnikelo kuze kube semngceleni osempumalanga; nasentshonalanga eceleni kwendawo eyizingalo eziyizinkulungwane ezingamashumi amabili nanhlanu kuze kube semngceleni osentshonalanga. Isabelo sesikhulu siyolingana ncamashí nezabelo. Umnikelo ongcwele nendlu engcwele yeNdlu kuyoba phakathi nako. 22 “Ngokuqondene nefa lamaLevi nefa lomuzi, kufanele abe phakathi kwalokho okungokwesikhulu. Indawo ephakathi komngcele kaJuda nomngcele kaBhenjamini iyoba eyesikhulu.
SEPTHEMBA 18-24
AMAGUGU ASEZWINI LIKANKULUNKULU | DANIYELI 1-3
“Ukuba Qotho KuJehova Kuyazuzisa”
(Daniyeli 3:16-20) UShadiraki, uMeshaki no-Abhedinego baphendula, bathi enkosini: “O Nebukhadinezari, akunasidingo sokuba sikuphendule ngokuqondene nalokhu. 17 Uma kumelwe kube njalo, uNkulunkulu wethu esimkhonzayo uyakwazi ukusophula. Uyosophula esithandweni somlilo esivuthayo nasesandleni sakho nkosi. 18 Kodwa uma kungenjalo, makwazeke kuwe, nkosi, ukuthi onkulunkulu bakho akubona onkulunkulu esibakhonzayo, futhi umfanekiso wegolide owumisile ngeke siwukhulekele.” 19 Khona-ke uNebukhadinezari wagcwala ukufutheka, futhi isimo sobuso bakhe sabashintshela oShadiraki, uMeshaki no-Abhedinego. Wakhuluma wathi isithando somlilo masibaselwe ngokuphindwe kasikhombisa ukwedlula inkambiso ebilandelwa yokusishisisa. 20 Futhi wathi emadodeni athile anamandla ayesebuthweni lakhe lempi, mawabophe uShadiraki, uMeshaki no-Abhedinego, ukuze abaphonse esithandweni somlilo esivuthayo.
Hlala Uqotho EMbusweni KaNkulunkulu
15 Sifuna ukukhonza uJehova sinonembeza omuhle, ngakho, ngezinye izikhathi siyobonakala sihluke kakhulu kwesisebenza nabo, esifunda nabo, omakhelwane noma izihlobo. (1 Petru 2:19) UJesu wasixwayisa ngokuthi abanye bayosizonda imbala ngenxa yokuhluka kwethu. Khumbula ukuthi abaningi babantu abasiphikisayo abazi ngoMbuso kaNkulunkulu. Ngakho abaqondi ukuthi kungani kubaluleke kangaka kithi ukuba qotho eMbusweni kaNkulunkulu kunakohulumeni babantu.
16 Ukuze sibe qotho kuJehova, kumelwe silalele yena kungakhathaliseki ukuthi yini abanye abantu abangase bayenze noma bayisho kithi. (Daniyeli 3:16-18) Ikakhulu intsha ingakuthola kunzima ukuhluka kwabanye. Bazali, sizani izingane zenu zibe nesibindi esikoleni. Izingane zenu zingase zesabe ukwenqaba ukushayela ifulege indesheni noma ukuhlanganyela kweminye imikhosi yobuzwe. Ekukhulekeleni kwenu komkhaya, ningafunda ngendlela uJehova azizwa ngayo ngalezi zinto. Zifundiseni indlela yokukuchaza ngokucacile nangenhlonipho lokho ezikukholelwayo. (Roma 1:16) Uma kudingeka, zisizeni izingane zenu nangokukhuluma nothisha bazo nibachazele esikukholelwayo.
(Daniyeli 3:26-29) Khona-ke uNebukhadinezari wasondela emnyango wesithando somlilo esivuthayo. Wakhuluma wathi: “Shadiraki, Meshaki no-Abhedinego, nina zinceku zikaNkulunkulu oPhezukonke, phumani nize lapha!” Ngaleso sikhathi uShadiraki, uMeshaki no-Abhedinego babe sebephuma emlilweni. 27 Ababusi bezifunda, izinduna nababusi nezikhulu eziphakeme zenkosi ababehlangene babewabona la madoda ukuthi umlilo wawungabanga namandla emizimbeni yawo, kungekho nalunwele lwekhanda lawo olwaluhangukile, ngisho neziphuku zawo zazingazange zishintshwe nephunga lomlilo ngokwalo lalingazange lihlale kuwo. 28 UNebukhadinezari wakhuluma wathi: “Makatuswe uNkulunkulu kaShadiraki, uMeshaki no-Abhedinego, othumele ingelosi yakhe yophula izinceku zakhe ezithembele kuye futhi ezishintshe izwi lenkosi ngokwalo zanikela imizimba yazo, ngoba zingenakukhonza futhi zingenakukhulekela noma yimuphi unkulunkulu ngaphandle kukaNkulunkulu wazo. 29 Futhi ngikhipha umyalo, wokuthi noma yimuphi umuntu wanoma yisiphi isizwe, iqembu lesizwe noma ulimi, osho noma yini embi ngoNkulunkulu kaShadiraki, uMeshaki no-Abhedinego kufanele ahlahlelwe, futhi indlu yakhe kufanele iphendulwe indlu yangasese yomphakathi; njengoba nje engekho omunye unkulunkulu okwaziyo ukukhulula njengalona.”
Yiba Nesibindi—UJehova Unawe!
13 Ngekhulu lesikhombisa B.C.E., izinceku zikaJehova ezingamaHebheru ezintathu zanikezwa ubufakazi obucacile bokuthi uNkulunkulu uyaluvuza ukholo nesibindi. INkosi uNebukhadinezari yaqoqela ndawonye izikhulu zaseBhabhiloni futhi yayala ukuba zikhulekele isithombe esikhulu segolide. Noma ubani owayengeke asikhulekele wayeyophonswa esithandweni somlilo. AmaHebheru amathathu atshela uNebukhadinezari ngenhlonipho: “UNkulunkulu wethu esimkhonzayo uyakwazi ukusophula. Uyosophula esithandweni somlilo esivuthayo nasesandleni sakho nkosi. Kodwa uma kungenjalo, makwazeke kuwe, nkosi, ukuthi onkulunkulu bakho akubona onkulunkulu esibakhonzayo, futhi umfanekiso wegolide owumisile ngeke siwukhulekele.” (Dan. 3:16-18) Ukukhululwa kwala maHebheru amathathu ngokumangalisayo kuchazwe ngokucacile kuDaniyeli 3:19-30. Nakuba cishe kuyinto engase ingenzeki ukuba sisongelwe ngokuphonswa esithandweni somlilo, siyabhekana novivinyo lobuqotho bethu futhi singaqiniseka ukuthi uNkulunkulu uyosibusisa uma sibonisa ukholo nesibindi.
Ukumba Sifuna Ingcebo Engokomoya
(Daniyeli 1:5) Ngaphezu kwalokho, inkosi yabamisela isabelo sansuku zonke ezibilibocweni zenkosi nasewayinini layo, ukuba bondliwe nokondliwa iminyaka emithathu, ukuze kuthi ekupheleni kwayo bame phambi kwenkosi.
(Daniyeli 1:8) Kodwa uDaniyeli wanquma enhliziyweni yakhe ukuthi wayengeke azingcolise ngezibiliboco zenkosi nangewayini layo. Futhi wayelokhu ecela esikhulwini segceke esiyinhloko ukuba angazingcolisi.
it-2-E 382
UMeshaki
Zintathu izizathu ezazingenza bacabange ukuthi izibiliboco zenkosi ‘zingabangcolisa’: (1) AbaseBhabhiloni babedla izilwane uMthetho KaMose owawuthi zigcolile; (2) babengeke baqikelele ukuthi izilwane zophiswe kahle, mhlawumbe ezinye zaziklinyiwe; (3) izizwe ezazingamkhonzi uNkulunkulu zazivame ukuqale zinikele izilwane konkulunkulu bazo, bese zibheka ukudliwa kwenyama yalezo zilwane njengengxenye yokukhonza onkulunkulu.—Dan 1:8; qhathanisa neyoku-1 Korinte 10:18-20, 28.
(Daniyeli 2:44) “Ezinsukwini zalawo makhosi uNkulunkulu wezulu uyomisa umbuso ongeke neze uchithwe. Futhi lowo mbuso ngeke udluliselwe kwabanye abantu. Uyochoboza uqede yonke le mibuso, wona uqobo ume kuze kube nini nanini;
w12 6/15 17, ibhokisi
INKULUMO ETHI “YONKE LE MIBUSO” IBHEKISELA KUMIPHI IMIBUSO?
Isiprofetho esikuDaniyeli 2:44 sithi uMbuso kaNkulunkulu “uyochoboza uqede yonke le mibuso.” Leso siprofetho sibhekisela kuphela emibusweni efanekiselwa izingxenye ezihlukahlukene zesithombe.
Kuthiwani ngayo yonke eminye imibuso yabantu? Isiprofetho esifanayo esikusAmbulo sembula umbono obanzi kunalowo osencwadini kaDaniyeli. Sibonisa ukuthi ‘amakhosi omhlaba wonke owakhiwe’ ayobuthwa ukuba alwe noJehova ‘osukwini olukhulu lukaNkulunkulu uMninimandla onke.’ (IsAm. 16:14; 19:19-21) Ngakho, akuyona kuphela imibuso esesithombeni ezobhujiswa e-Armagedoni, kodwa nayo yonke eminye imibuso yabantu.
Isihluthulelo Sezwe Elinenjabulo
Impendulo itholakala kuDaniyeli 2:44: “Ezinsukwini zalawo makhosi uNkulunkulu wasezulwini uyakumisa umbuso ongasoze wachithwa nobukhosi bawo bungayikushiyelwa kwabanye abantu, kepha uyakuchoboza, uqede yonke le mibuso [eyenziwe abantu], wona uqobo ume phakade.” (Omalukeke sizenzele.) Kungani uMbuso kaNkulunkulu kuyodingeka ‘uyichoboze’ imibuso yasemhlabeni? Yingoba le mibuso iyaphikelela ibhebhethekisa umoya wokwedelela uNkulunkulu wokuzinqumela ngokwabo, umoya owahlwanyelwa nguSathane lé ensimini yase-Edene. Ngaphezu kokuphikisana nalokho okulungele isintu, labo abazama ukubhebhethekisa lowo moya baziqhatha noMdali. (IHubo 2:6-12; IsAmbulo 16:14, 16) Ngakho, kumelwe sizibuze, ‘Ingabe thina sisekela ukubuswa nguNkulunkulu noma siphikisana nakho?’
Ukufundwa KweBhayibheli
(Daniyeli 2:31-43) “Wena nkosi, ububhekile, futhi, bheka! nanku umfanekiso othile omkhulu. Lowo mfanekiso, obumkhulu futhi okukhanya kwawo bekungaphezu kokuvamile, ubumi phambi kwakho, futhi ukubonakala kwawo kwesabisa. 32 Ngokuqondene nalowo mfanekiso, ikhanda lawo bekungelegolide elihle, isifuba sawo nezingalo zawo kungokwesiliva, isisu sawo namathanga awo kungokwethusi, 33 imilenze yawo kungeyensimbi, izinyawo zawo ingxenye kuyinsimbi nengxenye kuwubumba olubunjiwe. 34 Uqhubekile ubuka kwaze kwaqheshulwa itshe kungengazandla, lawushaya umfanekiso ezinyaweni zawo zensimbi nobumba olubunjiwe lazichoboza. 35 Ngaleso sikhathi insimbi, ubumba olubunjiwe, ithusi negolide, konke kuhlangene, kuchotshoziwe kwaba njengamakhoba avela esibuyeni sasehlobo, futhi umoya wakuphephula kangangokuba akutholakalanga ngisho nomncane umkhondo wako. Kepha itshe elishaye umfanekiso, libé yintaba enkulu futhi lagcwala umhlaba wonke. 36 “Yilo leli iphupho, futhi incazelo yalo sizoyisho phambi kwenkosi. 37 Wena nkosi, nkosi yamakhosi, wena uNkulunkulu wamazulu akuniké umbuso, amandla, nezikhwepha nesithunzi, 38 futhi anikelé esandleni sakho izilwane zasendle nezidalwa ezinamaphiko zamazulu nomaphi lapho abantwana babantu behlala khona, nakwenzé umbusi phezu kwakho konke, wena ngokwakho uyikhanda legolide. 39 “Ngemva kwakho kuyovela omunye umbuso ongaphansi kunawe; nomunye umbuso, wesithathu, wethusi, oyobusa phezu komhlaba wonke. 40 “Ngokuqondene nombuso wesine, uyoba namandla njengensimbi. Njengoba nje insimbi ichoboza futhi igaya yonke into, kanjalo, njengensimbi ephihlizayo, uyoyichoboza futhi uyiphihlize yonke lena. 41 “Njengoba ubonile ukuthi izinyawo nezinzwane ingxenye beziwubumba olubunjiwe lombumbi futhi ingxenye ziyinsimbi, lowo mbuso uyoba ohlukene, kodwa okuthile kokuqina kwensimbi kuyoba kuwo, njengoba nje uboné insimbi ixubene nobumba olumanzi. 42 Njengoba izinzwane zezinyawo ingxenye ziyinsimbi nengxenye ziwubumba olubunjiwe, ngokwengxenye umbuso uyoba namandla futhi ngokwengxenye ube ophuka kalula. 43 Njengoba ubone insimbi ixubene nobumba olumanzi, bayoxubana nenzalo yabantu; kodwa ngeke banamathelane, lona kulowaya, njengoba nje insimbi ingaxubani nobumba olubunjiwe.
SEPTHEMBA 25–OKTHOBA 1
AMAGUGU ASEZWINI LIKANKULUNKULU | DANIYELI 4-6
“Ingabe Uyaqhubeka Ukhonza UJehova?”
(Daniyeli 6:7-10) Zonke izikhulu eziphakeme zombuso, izinduna nababusi bezifunda, izikhulu eziphakeme zasebukhosini nababusi, baye bacebisana ukuba bamise isimiso sobukhosi nokuba baphoqelele umthetho ovimbelayo, wokuthi noma ngubani owenza isicelo kunoma yimuphi omunye unkulunkulu noma umuntu ezinsukwini ezingamashumi amathathu ngaphandle kokusenza kuwe nkosi, kufanele aphonswe emgodini wezingonyama. 8 Manje nkosi, kwangathi ungasimisa lesi simiso futhi uwusayine lo mbhalo, ukuze ungashintshwa, ngokuvumelana nomthetho wamaMede namaPheresiya, ongenakwenziwa ize.” 9 Ngokuvumelana nalokhu, iNkosi uDariyu yawusayina lo mbhalo nalo mthetho ovimbelayo. 10 Kodwa uDaniyeli, lapho nje esazi ukuthi umbhalo wawusayiniwe, wangena endlini yakhe, amafasitela egumbi lakhe elisophahleni evulekele ngaseJerusalema, yebo kathathu ngosuku wayeguqa ngamadolo ethandaza futhi edumisa phambi kukaNkulunkulu wakhe, njengoba ayevame ukwenza ngaphambi kwalokhu.
Basha—Qondiswani Yizwi LikaNkulunkulu
16 Kungani kufanele ufune ukulalela uJehova ngisho nalapho uwedwa? Khumbula lokhu: Ungamzwisa ubuhlungu uJehova noma wenze inhliziyo yakhe ijabule. (Gen. 6:5, 6; IzAga 27:11) Izenzo zakho ziyamthinta uJehova ngoba ‘uyakukhathalela.’ (1 Pet. 5:7) Ufuna ukuba umlalele ukuze kuzuze wena. (Isaya 48:17, 18) Lapho ezinye zezinceku zikaJehova kwa-Israyeli wasendulo zingasinaki iseluleko sakhe, zamzwisa ubuhlungu. (IHu. 78:40, 41) Ngakolunye uhlangothi, uJehova wamthanda kakhulu umprofethi uDaniyeli, ngoba ingelosi yambiza ngokuthi ‘umuntu ofiseleka kakhulu.’ (Dan. 10:11) Kungani? Ngoba wahlala eqotho kuNkulunkulu hhayi kuphela lapho ephambi kwabantu kodwa nasekusithekeni.—Funda uDaniyeli 6:10.
Ingabe Unombono KaJehova Ngezinto Ezingcwele?
12 Akumangalisi ukuthi izinto eziningi ezihlobene nokuphila kwamalungu agcotshiwe ebandla lobuKristu nabangane bawo zibhekwa njengezingcwele. Ubuhlobo bethu noJehova buyinto engcwele. (1 IziKronike 28:9; IHubo 36:7) Buyigugu kakhulu kithi kangangokuthi asivumeli lutho nanoma ubani ukuba angene phakathi kwethu noNkulunkulu wethu, uJehova. (2 IziKronike 15:2; Jakobe 4:7, 8) Umthandazo ufeza indima ebalulekile ekulondolozeni kwethu ubuhlobo obuseduze noJehova. Umthandazo wawungcwele kakhulu kumprofethi uDaniyeli kangangokuthi wanamathela emkhubeni wakhe wokuthandaza kuJehova ngisho noma lokho kwakufaka ukuphila kwakhe engozini. (Daniyeli 6:7-11) “Imithandazo yabangcwele” noma yamaKristu agcotshiwe ifaniswa nempepho eyayisetshenziswa ekukhulekeleni ethempelini. (IsAmbulo 5:8; 8:3, 4; Levitikusi 16:12, 13) Lokhu kufaniswa kwayo nempepho kugcizelela ubungcwele bomthandazo. Yeka ukuthi kuyilungelo elingakanani ukuthi siyakwazi ukukhuluma noMbusi wendawo yonke! Shono sibheka umthandazo njengongcwele ekuphileni kwethu!
(Daniyeli 6:16) Ngenxa yalokho inkosi yayala, bamletha uDaniyeli futhi bamphonsa emgodini wezingonyama. Inkosi yakhuluma yathi kuDaniyeli: “UNkulunkulu wakho oqinisela njalo ekumkhonzeni, yena ngokwakhe uzokophula.”
(Daniyeli 6:20) Njengoba yayisondela emgodini, yamemeza uDaniyeli ngezwi elidabukile. Inkosi yakhuluma ithi kuDaniyeli: “O Daniyeli, nceku kaNkulunkulu ophilayo, ingabe uNkulunkulu wakho oqiniselayo ekumkhonzeni ukwazile ukukophula ezingonyameni?”
Kungani Kufanele Sithandaze Singaphezi?
2 UJehova wayembheka kanjani uDaniyeli? Lapho ingelosi uGabriyeli ifika izophendula omunye wemithandazo kaDaniyeli, yathi lo mprofethi “ungumuntu ofiseleka kakhulu,” noma “indoda ethandeka kakhulu.” (Daniyeli 9:20-23; The New English Bible) Esiprofethweni sikaHezekeli, uJehova wakhuluma ngoDaniyeli njengendoda elungileyo. (Hezekeli 14:14, 20) Kusobala ukuthi njengoba isikhathi sihamba imithandazo kaDaniyeli yamakhela ubuhlobo obuseduze noNkulunkulu wakhe, into eyavunywa nanguDariyu.—Daniyeli 6:16.
(Daniyeli 6:22, 23) UNkulunkulu wami uthumele ingelosi yakhe yavala umlomo wezingonyama, futhi azizange zingibhubhise, njengoba nje ngitholakale ngimsulwa phambi kwakhe; naphambi kwakho futhi nkosi, akukho senzo esilimazayo engisenzile.” 23 Khona-ke inkosi yathokoza kakhulu, yayala ukuba uDaniyeli akhushulwe emgodini. UDaniyeli wakhushulwa emgodini, futhi wayengenamyocu, ngoba wayethembele kuNkulunkulu wakhe.
“Umoya Nomlobokazi Bathi: ‘Woza!’”
15 Ngemva kokuba uDaniyeli ehlale ubusuku emphandwini wezingonyama, inkosi uqobo lwayo yaya lapho yafike yamemeza: “O Daniyeli, nceku kaNkulunkulu ophilayo, ingabe uNkulunkulu wakho oqiniselayo ekumkhonzeni ukwazile ukukophula ezingonyameni?” UDaniyeli waphendula ngokushesha: “O nkosi, phila kuze kube nini nanini. UNkulunkulu wami uthumele ingelosi yakhe yavala umlomo wezingonyama, futhi azizange zingibhubhise, njengoba nje ngitholakale ngimsulwa phambi kwakhe; naphambi kwakho futhi nkosi, akukho senzo esilimazayo engisenzile.” UJehova wambusisa uDaniyeli ngoba ‘waqinisela ekumkhonzeni.’—Dan. 6:19-22.
Ukumba Sifuna Ingcebo Engokomoya
(Daniyeli 4:10, 11) “‘Manje ngiboné imibono yekhanda lami ngisembhedeni wami, bheka! umuthi maphakathi nomhlaba, okuphakama kwawo bekukukhulu. 11 Lo muthi uye wakhula waba namandla, futhi ukuphakama kwawo ekugcineni kufinyelele emazulwini, futhi ubonakala nasemkhawulweni wawo wonke umhlaba.
(Daniyeli 4:20-22) “‘Umuthi owubonile, okhule waba mkhulu futhi waba namandla futhi okuphakama kwawo ekugcineni kufinyelele emazulwini futhi ubonakala emhlabeni wonke, 21 amahlamvu awo emahle, izithelo zawo ziyinsada, futhi obekukhona kuwo ukudla kwabo bonke; obekuhlala ngaphansi kwawo izilwane zasendle, kuhlala emagatsheni awo izinyoni zezulu, 22 nguwe nkosi, ngoba udlondlobele waba namandla, futhi ubukhulu bakho budlondlobele bafinyelela emazulwini, nobubusi bakho emkhawulweni womhlaba.
Amaphuzu Avelele Encwadi KaDaniyeli
4:10, 11, 20-22—Yini eyayifanekiselwa umuthi omkhulu owabonwa uNebukhadinezari ephusheni? Ekuqaleni umuthi wawumelela uNebukhadinezari njengenkosi yombuso wezwe. Nokho, njengoba lowo mbuso owawumelelwe wakhula waze wafinyelela “emkhawulweni wawo wonke umhlaba,” kumelwe ukuba umuthi ufanekisela okuthile okukhulu kakhulu. UDaniyeli 4:17 uhlobanisa leli phupho nokubusa ‘koPhezukonke’ isintu. Ngenxa yalokho umuthi wawufanekisela nobukhosi bukaJehova bendawo yonke, ikakhulukazi maqondana nomhlaba. Ngakho, leli phupho ligcwaliseka kabili—ekubuseni kukaNebukhadinezari nasebukhosini bukaJehova.
(Daniyeli 5:17) Ngaleso sikhathi uDaniyeli waphendula wathi phambi kwenkosi: “Izipho zakho mazibe ngezakho, namaxosho akho wanike abanye. Nokho, ngizoyifundela inkosi umbhalo ngokwawo, futhi ngizoyazisa incazelo.
(Daniyeli 5:29) Ngaleso sikhathi uBhelishazari wayala, futhi bamembathisa uDaniyeli ngezinsomi, bamfaka umgexo wegolide entanyeni yakhe; futhi bamemezela ngokuphathelene naye ukuthi wayezoba ngumbusi wesithathu embusweni.
Imibuzo Evela Kubafundi
Lapho umHeberu obizwa ngokuthi uDaniyeli engeniswa ekugcineni, inkosi yaphinda yamemezela isipho sayo—ukugqokisa uDaniyeli okububende, ukumgqokisa umgexo wegolide, nokumenza abe umbusi wesithathu embusweni. Umprofethi waphendula ngenhlonipho: “Izipho zakho mazibe-kuwe, umuphe omunye imivuzo yakho, nokho ngiyakufundela inkosi umbhalo, ngiyazise incazo.”—Daniyeli 5:17.
Ngakho-ke uDaniyeli wayengadingi ukufumbathiswa noma ukukhokhelwa ukuze anikeze incazelo. Inkosi yayingazigcina izipho zayo noma izinikeze omunye umuntu. UDaniyeli wayeyonikeza incazelo, hhayi ngenxa yomvuzo, kodwa ngenxa yokuthi wayenikezwe amandla okwenza kanjalo uJehova, uNkulunkulu weqiniso, lowo osahlulelo sakhe ngeBabiloni sasisondela.
Njengoba sifunda kuDaniyeli 5:29, ngemva kokuba uDaniyeli efundile futhi wachaza amazwi njengoba ayeshilo ukuthi wayezokwenza, inkosi yayaleza ukuba okungenani imivuzo inikezwe uDaniyeli. UDaniyeli akazigqokanga ngokwakhe izingubo nomgexo. Wazigqokiswa ngokusho kombusi ongenakuphikiswa, iNkosi uBelishasari. Kodwa lokhu akuphikisani noDaniyeli 5:17, lapho umprofethi akwenza kwakhanya ukuthi isisusa sakhe sasingesona esobugovu.
Amagama Amane Águqula Izwe
22 Yasombululwa kanjalo-ke impicabadala. IBabiloni elinamandla lase lizowela emabuthweni amaMede namaPheresiya. Nakuba ayedunyazwe yilesi simemezelo sembubhiso, uBelishasari waligcina izwi lakhe. Wayaleza izinceku zakhe ukuba zembathise uDaniyeli okububende, ahlobe ngomgexo wegolide, futhi wambeka waba umbusi wesithathu embusweni. (Daniyeli 5:29) UDaniyeli akakwenqabanga lokhu kudunyiswa, eqaphela ukuthi kwakubonisa udumo olufanele uJehova. Yebo, kungenzeka ukuthi uBelishasari wayenethemba lokwenza ngcono isahlulelo sikaJehova ngokuhlonipha umprofethi waKhe. Uma kunjalo, wayesindwe izinyawo.
Ukufundwa KweBhayibheli
(Daniyeli 4:29-37) Ekupheleni kwezinyanga eziyishumi nambili wayezihambahambela esigodlweni sobukhosi saseBhabhiloni. 30 Inkosi yakhuluma yathi: “Akulona yini leli iBhabhiloni Elikhulu, mina ngokwami engilakhele indlu yobukhosi ngezikhwepha zamandla ami futhi engilakhele isithunzi sobukhulu bami obubabazekayo?” 31 Ngesikhathi leli zwi lisesemlonyeni wenkosi, kwaba khona izwi elehla livela emazulwini lithi: “O nkosi Nebukhadinezari, kuthiwa kuwe, ‘Umbuso usukile kuwe, 32 futhi uyaxoshwa wena esintwini, indawo yakho yokuhlala izoba kanye nezilwane zasendle. Uzonikwa izimila zasendle ukuba udle njengezinkomo, futhi kuzodlula phezu kwakho izikhathi eziyisikhombisa, uze wazi ukuthi oPhezukonke unguMbusi embusweni wabantu, nokuthi uwunika lowo afuna ukumnika wona.’” 33 Ngawo lowo mzuzwana leli zwi lagcwaliseka kuNebukhadinezari, futhi waxoshwa esintwini, waqala ukudla izimila njengezinkomo, umzimba wakhe wamanziswa amazolo ezulu, izinwele zakhe zakhula zaze zaba zinde njengezinsiba zezinkozi nezinzipho zakhe njengamazipho ezinyoni. 34 “Ekupheleni kwezinsuku, mina Nebukhadinezari, ngaphakamisela amehlo ami emazulwini, futhi ukuqonda kwami kwaqala ukubuyela kimi; ngamtusa oPhezukonke, futhi ngamdumisa ngamkhazimulisa Yena ophila kuze kube nini nanini, ngoba ububusi bakhe bungububusi kuze kube nini nanini nombuso wakhe ungowezizukulwane ngezizukulwane. 35 Bonke abakhileyo emhlabeni babhekwa njengabangelutho, futhi wenza ngokwentando yakhe phakathi kwebutho lamazulu nakwabakhileyo emhlabeni. Futhi akukho muntu onganqanda isandla sakhe noma ongathi kuye, ‘Ubuwenzani?’ 36 “Ngaso leso sikhathi ukuqonda kwami kwaqala ukubuyela kimi, futhi ngenxa yesithunzi sombuso wami ubukhulu bami obubabazekayo nokukhanya kwami kwaqala ukubuyela kimi; ngisho nezikhulu zami eziphakeme zasebukhosini nabahlonishwa bami baqala ukungifuna ngentshiseko, ngamiswa kabusha embusweni wami, futhi kwenezelwa kimi ubukhulu obungaphezu kobuvamile. 37 “Manje mina, Nebukhadinezari, ngidumisa ngiphakamise futhi ngikhazimulise iNkosi yamazulu, ngenxa yokuthi yonke imisebenzi yayo iyiqiniso nezindlela zayo ziwubulungisa, nangenxa yokuthi labo abahamba ngokuziqhenya iyakwazi ukubathobisa.”