Izikhombo Ze-Ncwajana YoMhlangano Wokuphila Nenkonzo
OKTHOBA 2-8
AMAGUGU ASEZWINI LIKANKULUNKULU | DANIYELI 7-9
“Isiprofetho SikaDaniyeli Sabikezela Ngokufika KukaMesiya”
(Daniyeli 9:24) “Kunamasonto angamashumi ayisikhombisa anqunyelwe abantu bakini nomuzi wakini ongcwele, ukuba kukhawulwe iseqo, kuqedwe nyá isono, kwenziwe isihlawulelo ngenxa yesiphambeko, kungeniswe ukulunga kuze kube nini nanini, kunyatheliswe uphawu embonweni nakumprofethi, nokuba kugcotshwe iNgcwelengcwele.
it-2-E 902 ¶2
Amasonto Angu-70
Ukukhawuka kweseqo nesono. Ukunqunywa kukaJesu noma ukufa kwakhe, ukuvuswa nokuvela kwakhe phambi kukaNkulunkulu ezulwini ‘kwakhawula iseqo, kwaqeda nyá isono, kwenza isihlawulelo ngenxa yesiphambeko.’ (Dan 9:24) Isivumelwano soMthetho sabonisa ukuthi amaJuda ayeyizoni, sawalahla futhi sawenza aba aqalekisiwe ngenxa yokwephula lesi sivumelwano. Kodwa lapho isono ‘sivama’ ngokuba sicace noma senziwe sibe sobala ngoMthetho KaMose, umusa kaNkulunkulu wavama ngisho nakakhulu ngoMesiya wakhe. (Ro 5:20) Ngomhlatshelo kaMesiya, iseqo nesono sezoni eziphendukayo singacinywa kusulwe nenhlawulo obekufanele ikhokhwe.
(Daniyeli 9:25) Kufanele wazi futhi uqonde ukuthi kusukela ekuphumeni kwezwi lokuba kubuyiselwe futhi kwakhiwe kabusha iJerusalema kuze kufike uMesiya uMholi, kuyoba ngamasonto ayisikhombisa, namasonto angamashumi ayisithupha nambili. Liyobuya futhi empeleni lakhiwe kabusha, libe nesigcawu nomsele wamanzi olizungezile, kodwa ezikhathini ezinzima.
it-2-E 900 ¶7
Amasonto Angu-70
Ukufika KukaMesiya Ngemva ‘Kwamasonto Angu-69.’ Ngokuphathelene ‘namasonto angu-62’ alandelayo (Dan 9:25), lawo ayingxenye yamasonto angu-70 nokukhulunywe ngawo ngemva kwamasonto angu-70, wona azoqhubeka ebalwa lapho sekuphele ‘amasonto angu-7.’ Ngenxa yalokho, “kusukela ekuphumeni kwezwi” lokwakha kabusha iJerusalema kuze kufike “uMesiya uMholi,” kuyoba “amasonto” angu-7 ahlangene nangu-62, noma “amasonto” angu-69—iminyaka engu-483—kusukela ku-455 B.C.E. kuya ku-29 C.E. Njengoba kushiwo ngenhla, ekwindla yonyaka ka-29 C.E., uJesu wabhapathizwa, wagcotshwa ngomoya ongcwele, futhi waqala inkonzo yakhe ‘njengoMesiya uMholi.’—Luka 3:1, 2, 21, 22.
(Daniyeli 9:26, 27a) “Ngemva kwamasonto angamashumi ayisithupha nambili uMesiya uyonqunywa, angasalelwa lutho. “Umuzi nendawo engcwele kuyochithwa abantu bomholi ozayo. Futhi isiphelo sawo siyoba ngesikhukhula. Kuyoba nempi kuze kube sekupheleni; okunqunyiwe yizincithakalo. 27 “Kumelwe agcine isivumelwano sisebenza ngenxa yabaningi isonto elilodwa; futhi engxenyeni yesonto uyobangela ukuba kukhawuke umhlatshelo nomnikelo wesipho.
it-2-E 901 ¶2
Amasonto Angu-70
“Uyonqunywa” engxenyeni yesonto. UGabriyeli waqhubeka wathi kuDaniyeli: “Ngemva kwamasonto angamashumi ayisithupha nambili uMesiya uyonqunywa, angasalelwa lutho.” (Dan 9:26) Kwaba sesikhathini esithile ngemva ‘kwamasonto angu-7 ahlangene nangu-62,’ empeleni ngemva kweminyaka emithathu nengxenye, lapho uKristu anqunywa khona ngokubulawa esigxotsheni sokuhlushwa, enikela ngakho konke ayenakho kube umhlatshelo wabantu. (Isaya 53:8) Ubufakazi bubonisa ukuthi uJesu wachitha ingxenye yokuqala ‘yesonto’ eshumayela. Kwesinye isenzakalo, cishe ekupheleni kuka-32 C.E., wenza umfanekiso okusobala ukuthi wayefanisa kuwo isizwe samaJuda nomkhiwane (qhathanisa noMathewu 17:15-20; 21:18, 19, 43) ongathelanga “iminyaka emithathu.” Umngcini-sivini wathi kumnini-sivini: “Nkosi, wuyeke nakulo nyaka, ngize ngimbe emaceleni awo ngifake umquba; uma-ke uthela isithelo esikhathini esizayo, kuhle; kodwa uma ungatheli, uyowugawula.” (Luka 13:6-9) Kungenzeka wayekhuluma ngesikhathi ayesichithe eshumayela kulesi sizwe esingasabeli, leso sikhathi esase siqhubeke iminyaka emithathu, futhi sesizongenela onyakeni wesine.
it-2-E 901 ¶5
Amasonto Angu-70
“Ingxenye yesonto” izoba maphakathi neminyaka engu-7, noma sekudlule iminyaka emithathu nengxenye yalelo ‘sonto’ elimelela iminyaka. Njengoba ‘isonto’ lama-70 laqala cishe ekupheleni kuka-29 C.E. lapho uJesu ebhapathizwa futhi egcotshwa khona ukuba abe uKristu, ingxenye yalelo sonto (iminyaka emithathu nengxenye) yayizoqhubeka kuze kube sentwasahlobo ka-33 C.E., ngePhasika langalowo nyaka (ngoNisan 14). Lolu suku kubonakala sengathi kwakungu-Ephreli 1, 33 C.E., ngokwekhalenda likaGregory. (Bheka esithi LORD’S EVENING MEAL [Time of Its Institution].) Umphostoli uPawulu usitshela ukuthi uJesu ‘wayezele ukuzokwenza intando kaNkulunkulu’ yokuba ‘aqede okokuqala [imihlatshelo neminikelo engokoMthetho] ukuze amise okwesibili.’ Lokhu wakwenza ngokunikela ngomzimba wakhe waba umhlatshelo.—Heb 10:1-10.
Ukumba Sifuna Ingcebo Engokomoya
(Daniyeli 9:24) “Kunamasonto angamashumi ayisikhombisa anqunyelwe abantu bakini nomuzi wakini ongcwele, ukuba kukhawulwe iseqo, kuqedwe nyá isono, kwenziwe isihlawulelo ngenxa yesiphambeko, kungeniswe ukulunga kuze kube nini nanini, kunyatheliswe uphawu embonweni nakumprofethi, nokuba kugcotshwe iNgcwelengcwele.
Imibuzo Evela Kubafundi
Yagcotshwa nini ‘iNgcwelengcwele,’ njengoba kubikezelwe kuDaniyeli 9:24?
UDaniyeli 9:24-27 uyisiprofetho esiphathelene nokubonakala ‘koGcotshiweyo, uMbusi’—uKristu. Ngakho, ukugcotshwa ‘kweNgcwelengcwele’ okwabikezelwa akubhekisele ekugcotshweni kweNgcwelengcwele yethempeli laseJerusalema. Kunalokho, elithi ‘iNgcwelengcwele’ libhekisela endlini engcwele kaNkulunkulu esezulwini—iNgcwelengcwele yasezulwini—ethempelini elikhulu likaJehova elingokomoya.—Heberu 8:1-5; 9:2-10, 23.
Laqala nini ukusebenza ithempeli likaNkulunkulu elingokomoya? Cabanga ngalokho okwenzeka lapho uJesu eziletha ukuba azobhapathizwa ngo-29 C.E. Kusukela ngaleso sikhathi ekuphileni kwakhe, uJesu wagcwalisa amazwi eHubo 40:6-8. Kamuva umphostoli uPawulu wabonisa ukuthi uJesu wayethandaze wathi kuNkulunkulu: “Umhlatshelo nomnikelo awukufunanga, kodwa ungilungiselele umzimba.” (Heberu 10:5) UJesu wayazi ukuthi uNkulunkulu ‘wayengafunanga’ ukuba kuqhutshekwe kunikelwa imihlatshelo yezilwane ethempelini laseJerusalema. Kunalokho, uJehova wayelungiselele uJesu umzimba ophelele wobuntu ukuze anikele ngawo njengomhlatshelo. Ebonisa isifiso sakhe esisuka enhliziyweni, uJesu waqhubeka wathi: “Bheka! Ngizile (emqulwini wencwadi kulotshiwe ngami) ukuba ngenze intando yakho, O Nkulunkulu.” (Heberu 10:7) Wasabela kanjani uJehova? IVangeli likaMathewu lithi: “Ngemva kokubhapathizwa uJesu wakhuphuka masinyane emanzini; futhi, bheka! amazulu avuleka, wabona umoya kaNkulunkulu wehla njengejuba uza phezu kwakhe. Bheka! Futhi, kwaba khona izwi livela emazulwini elathi: ‘Lena iNdodana yami, ethandekayo, engiyamukele.’”—Mathewu 3:16, 17.
Ukwamukela kukaJehova uNkulunkulu ukulethwa komzimba kaJesu njengomhlatshelo kwasho ukuthi kwase kune-altare elikhulu kune-altare elingokoqobo lasethempelini laseJerusalema. Leli kwakuyi-altare ‘lentando’ kaNkulunkulu, noma ilungiselelo lokwamukela ukuphila kukaJesu kobuntu njengomhlatshelo. (Heberu 10:10) Ukugcotshwa kukaJesu ngomoya ongcwele kwasho ukuthi manje uNkulunkulu wayeseliveze lonke ilungiselelo lethempeli lakhe elingokomoya. Ngakho, lapho uJesu ebhapathizwa, indawo kaNkulunkulu yokuhlala yasezulwini yagcotshwa, noma yahlukaniselwa ukuba ‘yiNgcwelengcwele’ elungiselelweni lethempeli elikhulu elingokomoya.
(Daniyeli 9:27) “Kumelwe agcine isivumelwano sisebenza ngenxa yabaningi isonto elilodwa; futhi engxenyeni yesonto uyobangela ukuba kukhawuke umhlatshelo nomnikelo wesipho. “Ophikweni lwezinengiso kuyoba khona obangela incithakalo; futhi into enqunyiwe iyothululekela naphezu koyincithakalo, kuze kufike ukuqothula.”
Amaphuzu Avelele Encwadi KaDaniyeli
9:27—Isiphi isivumelwano ‘esagcinwa sisebenza ngenxa yabaningi’ kwaze kwaphela isonto lama-70 leminyaka, noma ngo-36 C.E.? Isivumelwano soMthetho saqedwa ngo-33 C.E. lapho uJesu ebethelwa. Kodwa, ngokugcina isivumelwano sika-Abrahama sisebenza ku-Israyeli wenyama kuze kube ngu-36 C.E., uJehova welula inkathi yokubonisa amaJuda umusa okhethekile ngenxa yokuthi ayeyinzalo ka-Abrahama. Isivumelwano sika-Abrahama siyaqhubeka sisebenza ngokuqondene ‘no-Israyeli kaNkulunkulu.’—Galathiya 3:7-9, 14-18, 29; 6:16.
Ukufundwa KweBhayibheli
(Daniyeli 7:1-10) Ngonyaka wokuqala kaBhelishazari inkosi yaseBhabhiloni, uDaniyeli wabona iphupho nemibono yekhanda lakhe esembhedeni wakhe. Ngaleso sikhathi waliloba phansi leli phupho. Wazilandisa ngokuphelele zonke izindaba. 2 UDaniyeli wakhulumela phezulu wathi: “Ngabona emibonweni yami ebusuku, bheka laphaya! imimoya emine yamazulu yayinyakazisa ulwandle olukhulu. 3 Izilo ezine ezinkulu zaziphuma olwandle, ngasinye sihlukile kwezinye. 4 “Esokuqala sasifana nengonyama, futhi sasinamaphiko okhozi. Ngaqhubeka ngibhekile aze ahluthwa amaphiko aso, saphakanyiswa emhlabeni samiswa ngezinyawo ezimbili njengomuntu, futhi sanikwa inhliziyo yomuntu. 5 “Futhi, bheka laphaya! esinye isilo, esesibili, sona sifana nebhere. Olunye uhlangothi lwaso lwaphakanyiswa, futhi kwakunezimbambo ezintathu emlonyeni waso phakathi kwamazinyo aso; yilokhu okwakushiwo kuso, ‘Vuka, udle inyama eningi.’ 6 “Ngemva kwalokhu ngaqhubeka ngibhekile, futhi, bheka laphaya! esinye isilo, esifana nengwe, kodwa emhlane waso sasinamaphiko amane esidalwa esindizayo. Lesi silo sasinamakhanda amane, futhi impela sanikwa ububusi. 7 “Ngemva kwalokhu ngaqhubeka ngibhekile emibonweni yasebusuku, futhi, bheka laphaya! isilo sesine, esasesabeka, sethusa futhi sinamandla ngokungajwayelekile. Sasinamazinyo amakhulu ensimbi. Sasishwabadela sichoboza, futhi okusele sasikunyathela ngezinyawo. Sasihlukile kuzo zonke ezinye izilo ezazingaphambi kwaso, futhi sasinezimpondo eziyishumi. 8 Ngaqhubeka ngibheké izimpondo, bheka! kwavela phakathi kwazo olunye uphondo, oluncane, futhi kwaba nezintathu ezimpondweni zokuqala ezancothulwa phambi kwalo. Bheka! Kwakunamehlo afana namehlo omuntu kulolu phondo, futhi kwakunomlomo okhuluma izinto ezinkulu. 9 “Ngaqhubeka ngibhekile kwaze kwaba nezihlalo zobukhosi ezibekwayo futhi oMdala Wezinsuku wahlala phansi. Izembatho zakhe zazimhlophe njengeqhwa, futhi izinwele zekhanda lakhe zazinjengoboya obuhlanzekile. Isihlalo sakhe sobukhosi sasingamalangabi omlilo; amasondo aso ayengumlilo ovuthayo. 10 Kwakukhona umfudlana womlilo ugeleza uphuma phambi kwakhe. Kwakukhona izinkulungwane eziyinkulungwane ezazilokhu zimkhonza, nezinkulungwane eziyishumi eziphindwe kazinkulungwane eziyishumi ezazilokhu zimi khona kanye phambi kwakhe. INkantolo yahlala, futhi kwaba khona izincwadi ezavulwa.
OKTHOBA 9-15
AMAGUGU ASEZWINI LIKANKULUNKULU | DANIYELI 10-12
“UJehova Walibona Kusengaphambili Ikusasa Lamakhosi Ayezobusa”
(Daniyeli 11:2) Manje ngizokutshela okuyiqiniso: “Bheka! Kusazoba namakhosi amathathu azomela iPheresiya, eyesine izoqongelela ingcebo enkulu kunawo wonke amanye. Iyothi nje ingaba namandla engcebweni yayo, yenze ukuba konke kuvukele umbuso waseGrisi.
Amakhosi Amabili Angqubuzanayo
5 Amakhosi okuqala amathathu kwakunguKoresi Omkhulu, uCambyses II noDariyu I. Njengoba uBardiya (noma mhlawumbe umzenzisi ogama lakhe linguGaumata) abusa izinyanga ezingu-7 kuphela, lesi siprofetho asizange sikuhlanganise ukubusa kwakhe okufushane. Ngo-490 B.C.E., inkosi yesithathu, uDariyu I, wazama ukuhlasela iGrisi okwesibili. Kodwa abasePheresiya banqotshwa eMarathon futhi babalekela e-Asia Minor. Nakuba uDariyu akulungiselela ngokucophelela ukubuye ahlasele iGrisi, akakwazanga ukukwenza lokho waze washona ngemva kweminyaka emine. Lokho kwasalela indodana yakhe eyamlandela, inkosi “yesine,” uXerxes I. WayeyiNkosi u-Ahashiveroshi eyashada no-Esteri.—Esteri 1:1; 2:15-17.
6 UXerxes I ngempela ‘wabavusa bonke ukulwa nombuso waseJavani,’ okusho ukuthi izifundazwe zamaGreki ezizimele njengeqoqo. “Enxenxwa izinduna ezifuna ukuvelela,” kusho incwadi ethi The Medes and Persians—Conquerors and Diplomats, “uXerxes wahlasela esebenzisa ibutho lasezweni nelasolwandle.” Isazi-mlando esingumGreki uHerodotus, wekhulu lesihlanu B.C.E., ubhala athi “asikho isenzo esingaqhathaniswa nalesi.” Ukulandisa kwakhe kuthi ibutho lasolwandle “selilonke lalingamadoda angu-517 610. Inani lemigundatshani lalingu-1 700 000; abamahhashi babengu-80 000; kuleli nani kumelwe kwenezelwe nama-Arabhu ayehamba ngamakamela, nabaseLibya ababelwa ngezinqola zempi, engingabalinganisela ku-20 000. Khona-ke, ingqikithi yamabutho asezweni nawasolwandle ifinyelela emadodeni angu-2 317 610.”
(Daniyeli 11:3) “Inkosi enamandla iyokuma ibuse ngokubusa okuhlanganisa indawo ebanzi futhi yenze ngokwentando yayo.
Amakhosi Amabili Angqubuzanayo
8 Kuyakuvela inkosi enamandla eyakubusa ngokubusa okukhulu, yenze njengentando yayo,” kusho ingelosi. (Daniyeli 11:3) U-Alexander oneminyaka engu-20 ubudala ‘wavela’ njengenkosi yaseMakedoniya ngo-336 B.C.E. Waba “inkosi enamandla”—u-Alexander Omkhulu. Efuqwa yicebo likayise, uPhilip II, wadla izifundazwe zasePheresiya eMpumalanga Ephakathi. Lapho ewela umfula i-Ewufrathe neTigris, ibutho lakhe lamadoda angu-47 000 lahlakaza amabutho kaDariyu III angu-250 000 eGaugamela. Ngemva kwalokho, uDariyu wabaleka futhi wabulawa, lwaphela kanjalo uhlu lwamakhosi asePheresiya. Manje iGrisi yaba umbuso wezwe, futhi u-Alexander ‘wabusa ngokubusa okukhulu, wenza njengentando yakhe.’
(Daniyeli 11:4) Lapho isimile, umbuso wayo uyokwaphuka futhi uhlukaniselwe emimoyeni emine yamazulu, kodwa kungabi senzalweni yesizukulwane sayo futhi kungabi ngokuvumelana nokubusa kwayo ebibusé ngakho; ngoba umbuso wayo uyosishulwa, unikwe abanye ngaphandle kwalaba.
Amakhosi Amabili Angqubuzanayo
11 Ngemva kokufa kuka-Alexander, umbuso wakhe ‘wahlukaniselwa emimoyeni yomine yezulu.’ Ojenene bakhe abaningi baxabana njengoba babephangelana ngezindawo. UJenene Antigonus I owayeyichide wazama ukulawula wonke umbuso ka-Alexander. Kodwa wabulawa empini yase-Ipsus ePhrygia. Ngonyaka ka-301 B.C.E., ojenene abane baka-Alexander babephethe izintambo endaweni enkulu eyayinqotshwe umkhuzi wabo. UCassander wabusa eMakedoniya naseGrisi. ULysimachus waphatha e-Asia Minor naseThrace. USeleucus I Nicator wathola iMesopotamiya neSiriya. Kanti uPtolemy Lagus wathola iGibithe nePalestina. Njengokusho kwezwi lesiprofetho, umbuso omkhulu ka-Alexander wahlukana waba imibuso yamaGreki emine.
Ukumba Sifuna Ingcebo Engokomoya
(Daniyeli 12:3) “Abanokuqondisisa bayokhanya njengokukhanya komkhathi; nalabo abaletha abaningi ekulungeni, njengezinkanyezi kuze kube nini nanini, yebo kuze kube phakade.
w13 7/15 13 ¶16, umbhalo osekugcineni
“Bhekani! Nginani Izinsuku Zonke”
UDaniyeli 12:3 uthi “abanokuqondisisa [amaKristu agcotshiwe] bayokhanya njengokukhanya komkhathi.” Lapho besesemhlabeni, benza lokhu ngokuhlanganyela emsebenzini wokushumayela. Nokho, uMathewu 13:43 ubhekisela esikhathini lapho beyokhanya khona ngokukhazimulayo eMbusweni wasezulwini. Esikhathini esidlule sasicabanga ukuthi yomibili le miBhalo ibhekisela emsebenzini ofanayo—umsebenzi wokushumayela.
(Daniyeli 12:13) “Kepha wena, hamba uye ekupheleni; uyophumula, kodwa uyosukuma umele isabelo sakho ekupheleni kwezinsuku.”
UJehova Uthembisa UDaniyeli Umvuzo Omuhle Kakhulu
18 Incwadi kaDaniyeli iphetha ngesithembiso esimnandi kakhulu uNkulunkulu ake wasenza kumuntu. Ingelosi kaJehova yatshela uDaniyeli: “Uyosukuma umele isabelo sakho ekupheleni kwezinsuku.” Yayisho ukuthini ingelosi? Njengoba ‘ukuphumula’ ebisanda kukhuluma ngakho kuwukufa, isithembiso sokuthi uDaniyeli ‘wayeyosukuma’ esikhathini esithile kamuva sasisho into eyodwa—uvuko! Eqinisweni, ezinye izazi ziye zagomela ngokuthi uDaniyeli isahluko 12 ungowokuqala ukukhuluma ngovuko ngendlela ecacile emiBhalweni YesiHeberu. (Daniyeli 12:2) Nokho, kulokhu zishaye phansi. UDaniyeli wayelazi kahle ithemba lovuko.
Ukufundwa KweBhayibheli
(Daniyeli 11:28-39) “Iyophindela emuva ezweni layo nenani elikhulu lezimpahla, futhi inhliziyo yayo iyomelana nesivumelwano esingcwele. Iyokwenza ngokuphumelelayo futhi ngokuqinisekile iphindele ezweni layo. 29 “Iyophindela emuva ngesikhathi esimisiwe, futhi empeleni iyoza imelane neningizimu; kodwa kulokhu kokugcina ngeke kube njengasekuqaleni. 30 Iyohlaselwa imikhumbi yaseKitimi, futhi kuyomelwe idangale. “Empeleni iyophindela emuva futhi isivumelwano esingcwele iyosijikijela ngamazwi asilahlayo, yenze ngokuphumelelayo; kuyomelwe iphindele emuva futhi iyobanaka labo abashiya isivumelwano esingcwele. 31 Kuyoba khona izingalo eziyokuma, zivela kuyo; futhi ziyoyingcolisa indlu engcwele, inqaba, zisuse isici esihlala sikhona. “Ngokuqinisekile ziyomisa isinengiso esibangela incithakalo. 32 “Labo abenza ngokonakala esivumelwaneni, iyobaholela ekuhlubukeni ngamazwi abushelelezi. Kodwa abantu abamaziyo uNkulunkulu wabo, bayonqoba futhi benze ngokuphumelelayo. 33 Labo abanokuqondisisa phakathi kwabantu, bayodlulisela ukuqonda kwabaningi. Ngokuqinisekile bayokhutshekiswa ngenkemba nangelangabi, ngokuthunjwa nangokuphangwa, izinsuku ezithile. 34 Kodwa lapho bekhutshekiswa bayosizwa ngosizo oluncane; futhi abaningi bayozihlanganisa nabo ngobushelelezi. 35 Abanye balabo abanokuqondisisa bayokhutshekiswa, ukuze kwenziwe umsebenzi wokucwenga ngenxa yabo futhi ukuze kwenziwe ukuhlanza futhi kwenziwe mhlophe, kuze kube sesikhathini sokuphela; ngoba sisazoba sesikhathini esimisiwe. 36 “Le nkosi empeleni iyokwenza ngokwentando yayo, iyoziphakamisa izikhulise ngaphezu kwabo bonke onkulunkulu; iyokhuluma izinto ezimangalisayo ngokumelene noNkulunkulu wonkulunkulu. Iyophumelela kuze kube yilapho ukulahlwa kuyobe sekuphelelisiwe; ngoba okunqunyiwe kumelwe kwenziwe. 37 Ngeke imnake uNkulunkulu wawoyise; futhi ngeke isinake isifiso sabesifazane nabo bonke abanye onkulunkulu, kodwa iyoziphakamisa ngaphezu kwawo wonke umuntu. 38 Kodwa kulesi sikhundla sayo iyonika unkulunkulu wezinqaba inkazimulo; futhi iyonika unkulunkulu oyise abangazange bamazi inkazimulo ngegolide nangesiliva nangetshe eliyigugu nangezinto ezifiselekayo. 39 Iyokwenza ngokuphumelelayo ngokumelene neziphephelo ezinezivikelo eziqine kunazo zonke, ikanye nonkulunkulu wezinye izizwe. Noma yibaphi abayiqaphelayo iyobenza bavame inkazimulo, futhi iyobenza babuse phakathi kwabaningi; empeleni iyokwaba umhlaba ngentengo.
OKTHOBA 16-22
AMAGUGU ASEZWINI LIKANKULUNKULU | HOSEYA 1-7
“UJehova Uyalujabulela Uthando Oluqotho—Kuthiwani Ngawe?”
(Hoseya 6:4, 5) “O Efrayimi, ngizokwenzenjani ngawe? O Juda, ngizokwenzenjani ngawe, lapho umusa wenu wothando unjengamafu asekuseni nanjengamazolo amukayo ekuseni? 5 Yingakho kuyomelwe ukuba ngibambe ngabaprofethi; kuyomelwe ngibabulale ngamazwi omlomo wami. Futhi izahlulelo phezu kwenu ziyoba njengokukhanya okuphumayo
Vumela ‘Umthetho Womusa Wothando’ Uqaphe Ulimi Lwakho
18 Uthando oluqotho kufanele lube sobala kukho konke ukusebenzelana kwethu nabanye abakhulekeli bakaJehova. Ngisho nasezimweni ezinzima, umthetho womusa wothando kufanele ungasuki olimini lwethu. UJehova akazange ajabule lapho umusa wothando wabantwana bakwa-Israyeli uba “njengamazolo amukayo ekuseni.” (Hos. 6:4, 6) Ngakolunye uhlangothi, uJehova uyajabula lapho esibona siwubonisa njalo umusa wothando. Cabanga ngendlela abusisa ngayo labo abawuphishekelayo.
(Hoseya 6:6) Ngoba ngijabulele umusa wothando, hhayi umhlatshelo; nolwazi ngoNkulunkulu kuneminikelo yokushiswa ephelele.
Amaphuzu Avelele Encwadi KaHoseya
6:6. Ukusenza umkhuba isono kubonisa ukuntula uthando oluqotho ngoNkulunkulu. Awukho umhlatshelo ongokomoya ongakwenza kuthetheleleke lokhu.
UJehova Ukwazisa Kakhulu Ukulalela Kwakho
7 Kule ndaba, khumbula ukuthi esikhathini esidlule, uJehova wembulela abantu bakhe basendulo ukuthi ukulalela kwakubaluleke ngisho nangaphezu kwemihlatshelo yezilwane. (IzAga 21:3, 27; Hoseya 6:6; Mathewu 12:7) Kungani kwakunjalo, kanti nguye uJehova owayeyale abantu bakhe ukuba benze leyo mihlatshelo? Kakade, umuntu owenza umhlatshelo uwenza ngasiphi isisusa? Ingabe uwenzela ukujabulisa uNkulunkulu? Noma ingabe umane nje ugcina isiko elithile? Uma umkhulekeli efisa ngempela ukujabulisa uNkulunkulu, uyoqikelela ukuthi ulalela yonke imiyalo yakhe. UNkulunkulu akayidingi imihlatshelo yezilwane, kodwa into eyigugu esingamnika yona ukumlalela.
Ukumba Sifuna Ingcebo Engokomoya
(Hoseya 1:7) Kodwa indlu yakwaJuda ngizoyibonisa isihe, futhi ngizoyisindisa ngoJehova uNkulunkulu wayo; kodwa ngeke ngiyisindise ngomnsalo noma ngenkemba noma ngempi, ngamahhashi noma ngezinkweli zamahhashi.”
Amaphuzu Avelele Encwadi KaHoseya
1:7—Indlu yakwaJuda yaboniswa nini isihe futhi yasindiswa? Lokhu kwagcwaliseka ngo-732 B.C.E., ezinsukwini zeNkosi uHezekiya. Ngaleso sikhathi, uJehova waqeda usongo lwabase-Asiriya eJerusalema ngokuthumela ingelosi ukuba ibulale abantu abangu-185 000 emabuthweni esitha ngobusuku obubodwa. (2 AmaKhosi 19:34, 35) Ngaleyo ndlela uJehova wasindisa uJuda ngengelosi, hhayi “ngomnsalo noma ngenkemba noma ngempi, ngamahhashi noma ngezinkweli zamahhashi.”
(Hoseya 2:18) Bona ngokuqinisekile ngiyobenzela isivumelwano ngalolo suku ngokuphathelene nesilo sasendle nesidalwa esindizayo samazulu nento enwabuzelayo yasemhlabathini, futhi umnsalo nenkemba nempi ngiyokwephula kuphele ezweni, ngiyobalalisa ngokulondeka.
Isiprofetho SikaHoseya Sisisiza Ukuba Sihambe NoNkulunkulu
16 UNkulunkulu wafeza nalesi sithembiso: “Ngokuqinisekile ngiyobenzela isivumelwano ngalolo suku ngokuphathelene nesilo sasendle nesidalwa esindizayo samazulu nento enwabuzelayo yasemhlabathini, futhi umnsalo nenkemba nempi ngiyokwephula kuphele ezweni, ngiyobalalisa ngokulondeka.” (Hoseya 2:18) Insali yamaJuda eyabuyela ezweni layo yahlala ngokulondeka, ingesabi zilwane. Lesi siprofetho sagcwaliseka nango-1919 C.E., lapho insali ka-Israyeli ongokomoya ikhululwa ‘eBhabhiloni Elikhulu,’ umbuso wezwe wenkolo yamanga. Manje ihlala ngokulondeka futhi ijabulela ukuphila epharadesi elingokomoya nabangane bayo, abanethemba lokuphila phakade emhlabeni. Azikho izici zobulwane phakathi kwala maKristu eqiniso.—IsAmbulo 14:8; Isaya 11:6-9; Galathiya 6:16.
Lapho Sekubusa Ubumbano Emhlabeni Wonke
Empeleni, okuphilayo emhlabeni kuyojabulela uhlobo olusha lobumbano, ngoba uNkulunkulu uyofundisa abantu bakhe abaqotho indlela yokulinakekela kahle ikhaya labo eliwumhlaba. Ngomqondo ongokomfanekiso, ‘uyokwenza nesivumelwano’ nazo zonke izilwane zasendle, azenze zizithobe ngokuthula kubantu.—Hoseya 2:18; Genesise 1:26-28; Isaya 11:6-8.
Ukufundwa KweBhayibheli
(Hoseya 7:1-16) “Ngesikhathi engiyoletha ngaso ukuphulukiswa ku-Israyeli, isiphambeko sika-Efrayimi naso empeleni siyambulwa, nezinto ezimbi zaseSamariya; ngoba bazijwayeze amanga, futhi isela liyangena; ngaphandle iviyo labaphangi liyahlasela. 2 Futhi abasho enhliziyweni yabo ukuthi ngiyobukhumbula bonke ububi babo. Manje izenzo zabo zibahaqile. Sebephambi kobuso bami. 3 Bajabulisa inkosi ngobubi babo, nezikhulu ngenkohliso yabo. 4 Bonke bayiziphingi, njengesithando somlilo esibaselwa ngumbhaki, oyeka ukuhlokoza ngemva kokuxova inhlama kuze kube yilapho isibilile. 5 Ngosuku lwenkosi yethu, izikhulu zizigulisile—kukhona ukufutheka ngenxa yewayini. Yelule isandla sayo kanye nabahleka usulu. 6 Ngoba basondeze inhliziyo yabo eduze ngokungathi bayisondeza esithandweni somlilo; siyavutha ngaphakathi kubo. Umbhaki wabo ulele ubusuku bonke; ekuseni isithando somlilo sivutha ngokungathi ngumlilo ovutha amalangabi. 7 Bonke bashisa njengaso isithando, futhi empeleni bashwabadela abahluleli babo. Amakhosi abo awile wonke; ayikho neyodwa kuwo engimemezayo. 8 “U-Efrayimi, uzihlanganisa yena siqu nezizwe. U-Efrayimi uye waba yiqebelengwane eliyindilinga elingazange liphendulwe. 9 Izihambi ziwadlile amandla akhe, nokho yena akazi. Futhi, izinwele ezimpunga zibe mhlophe kuye, kodwa yena akazi. 10 Ukuziqhenya kuka-Israyeli kufakaze kwamlahla, futhi akazange abuyele kuJehova uNkulunkulu wakhe, futhi akazange amfune ngenxa yakho konke lokhu. 11 U-Efrayimi unjengejuba elingenangqondo elingenayo inhliziyo. Ubize iGibhithe; uye e-Asiriya. 12 “Nomaphi lapho eya khona ngiyokwelulela inetha lami phezu kwakhe. Njengezidalwa ezindizayo zamazulu ngiyomehlisela phansi. Ngiyomyala ngokuvumelana nombiko oya enhlanganweni yakhe. 13 Maye kuye, ngoba ungibalekele! Makaphangwe, ngoba weqé umthetho wami! Mina ngamkhulula, kodwa yena ukhulumé amanga ngisho nangami. 14 Nakuba aqhubeka ehewula emibhedeni yakhe, akazange acele kimi usizo ngenhliziyo yakhe. Ngenxa yokusanhlamvu kwakhe newayini elimnandi ubelokhu ezula; ubelokhu engifulathela. 15 Mina, ngamyala; ngaziqinisa izingalo zakhe, kodwa waqhubeka eceba okubi ngami. 16 Wabuya, kodwa engabuyeli kokuphakeme; wayesenjengomnsalo oxegayo. Izikhulu zakhe ziyowa ngenkemba ngenxa yokulahlwa ulimi lwazo. Lokhu kuyoba ngukuhlekwa kwazo usulu ezweni laseGibhithe.”
OKTHOBA 23-29
AMAGUGU ASEZWINI LIKANKULUNKULU | HOSEYA 8-14
“Nikela Ngokungcono Kakhulu KuJehova”
(Hoseya 14:2) Thathani amazwi nibuyele kuJehova. Yishoni kuye, nonke nina bantu nithi, ‘Kwangathi ungaxolela isiphambeko; wamukele okuhle, futhi njengembuyiselo sizonikela kuwe ngamaduna ezinkomo ezindebe zethu.
Ukunikela Imihlatshelo Ejabulisa UNkulunkulu
Ngaphezu kwalokho, iBhayibheli libonisa ukuthi amazwi ethu okudumisa angabhekwa njengemihlatshelo esiyinikela kuJehova. Umprofethi uHoseya wasebenzisa inkulumo ethi “amaduna ezinkomo ezindebe zethu,” ebonisa ukuthi uNkulunkulu ubheka amazwi ethu okumdumisa njengomunye wemihlatshelo emihle kakhulu. (Hoseya 14:2) Umphostoli uPawulu wanxusa amaKristu angamaHebheru: “[Nikelani] kuNkulunkulu umhlatshelo wokudumisa, okuwukuthi, isithelo sezindebe ezivuma obala igama lakhe.” (Hebheru 13:15) Namuhla, oFakazi BakaJehova bazigcina bematasa kakhulu beshumayela izindaba ezinhle futhi benza abantu bazo zonke izizwe babe abafundi. (Mathewu 24:14; 28:19, 20) Banikela imihlatshelo yokudumisa uNkulunkulu imini nobusuku emhlabeni wonke.—IsAmbulo 7:15.
(Hoseya 14:4) Ngizokuphulukisa ukungathembeki kwabo. Ngizobathanda ngokuzithandela, ngoba intukuthelo yami isukile kuye.
Ukwamukelwa UNkulunkulu Kuholela Ekuphileni Okuphakade
15 Inkunzi yayiyisilwane esibiza kakhulu umIsrayeli ayengasinikela kuJehova. Ngakho, “amaduna ezinkomo ezindebe zethu” ayebhekisela emazwini aqotho, acatshangelwe kahle okudumisa uNkulunkulu weqiniso. UJehova wasabela kanjani kulabo abenza leyo mihlatshelo? Wathi: “Ngizobathanda ngokuzithandela.” (Hos. 14:4) Labo abanikela leyo mihlatshelo yokudumisa, uJehova wabathethelela, wabamukela futhi wabenza abangane bakhe.
(Hoseya 14:9) Ngubani ohlakaniphile, ukuba aqonde lezi zinto? Oqondayo, ukuba azazi? Ngoba izindlela zikaJehova ziqondile, futhi ngabalungileyo abayohamba kuzo; kodwa izeqamthetho zona, yizo eziyokhubeka kuzo.
Khonza UJehova Ngokwezindinganiso Zakhe Eziphakeme
11 UHoseya 14:9 usibonisa nemiphumela emihle yokulandela indlela eqondile. Izibusiso nezinzuzo zitholakala ngokufinyelela izimfuneko zikaNkulunkulu. NjengoMdali, uyakwazi ukwakheka kwethu. Lokho akulindele kithi kuzuzisa thina. Ukuze sifanekise ubuhlobo bethu noNkulunkulu, singase sicabange ngemoto nomakhi wayo. Umakhi uyazi ukuthi iklanywe futhi yahlanganiswa kanjani. Uyazi ukuthi idinga ukushintshwa uwoyela ngezikhathi ezithile. Kungenzekani uma ungayinaki leyo ndinganiso, mhlawumbe uthi, isahamba kahle nje? Injini ingasheshe iguge futhi ife. Kunjalo nangabantu. UMdali wethu usinike imiyalo. Ukuyigcina kuzuzisa thina. (Isaya 48:17, 18) Ukuqonda ukuthi izindinganiso ziyasizuzisa kusinikeza isizathu esengeziwe sokuphila ngazo, sigcine imiyalo yakhe.—IHubo 112:1.
Ukumba Sifuna Ingcebo Engokomoya
(Hoseya 10:12) Zihlwanyeleleni imbewu ngokulunga; vunani ngokomusa wothando. Zilimeleni umhlabathi olimekayo, lapho kusenesikhathi sokufuna uJehova aze afike anifundise ngokulunga.
“Izindlela ZikaJehova Ziqondile”
7 Uma uJehova simkhulekela ngendlela eqondile nengenabo ubuzenzisi, siyothola umusa wakhe wothando, noma uthando lwakhe oluqotho. Ama-Israyeli angalawuleki atshelwa: “Zihlwanyeleleni imbewu ngokulunga; vunani ngokomusa wothando. Zilimeleni umhlabathi olimekayo, lapho kusenesikhathi sokufuna uJehova aze afike anifundise ngokulunga.”—Hoseya 10:12.
(Hoseya 11:1) “Lapho u-Israyeli esengumfana, ngamthanda ngaleso sikhathi, futhi ngayibiza indodana yami ukuba iphume eGibhithe.
Balinda Ukufika KukaMesiya
10 Njengama-Israyeli, uMesiya wayeyobizwa aphume eGibhithe. (Hos. 11:1) Ngaphambi kokuba uHerode akhiphe isimemezelo sokuba kubulawe izingane, ingelosi yayala uJosefa, uMariya noJesu ukuba baye eGibhithe. Bahlala lapho “kwaze kwaba sekushoneni kukaHerode, ukuze kugcwaliseke lokho okwakhulunywa nguJehova ngomprofethi wakhe [uHoseya], ethi: ‘Ngayibiza indodana yami ukuba iphume eGibhithe.’” (Math. 2:13-15) Yebo, uJesu wayengeke aziqondise ngokwakhe noma iziphi zalezi zenzakalo ezabikezelwa ezihlobene nokuzalwa neminyaka yokuqala yokuphila kwakhe.
Ukufundwa KweBhayibheli
(Hoseya 8:1-14) “Emlonyeni —uphondo! Umuntu uza njengokhozi emelene nendlu kaJehova, ngesizathu sokuthi yeqe isivumelwano sami, futhi yeqe umthetho wami. 2 Ilokhu ingimemeza ithi, ‘O Nkulunkulu wami, thina, Israyeli, sazé wena.’ 3 “U-Israyeli ulahle okuhle. Umuntu oyisitha makamsukele. 4 Yena uzimisele amakhosi, kodwa hhayi ngenxa yami. Umise izikhulu, kodwa mina angazanga. Ngesiliva lakhe nangegolide lakhe uzenzele izithombe, ukuze anqunywe. 5 O Samariya, ithole lakho lilahliwe. Intukuthelo yami ibavuthele. Kuyoze kube nini bengakwazi ukuba msulwa? 6 Ngoba kusukela kwa-Israyeli bekulokhu kuyikho lokhu. Yingcweti nje ekwenzile, akuyena uNkulunkulu; ngoba ithole laseSamariya liyoba amabazelo nje. 7 “Ngoba baqhubeka behlwanyela umoya, futhi bayovuna isivunguvungu. Akukho lutho olunokusanhlamvu okumile. Akukho hlumela eliveza ufulawa. Uma kungenzeka kube khona eliwuvezayo, izihambi ziyowugwinya. 8 “U-Israyeli uzogwinywa. Manje uzoba phakathi kwezizwe, njengesitsha umuntu angajabuli ngaso. 9 Ngoba yena ukhuphukele e-Asiriya, njengedube elingalodwa. U-Efrayimi yena, uqashe izithandwa. 10 Futhi, nakuba eqhubeka eziqasha phakathi kwezizwe, manje ngizomqoqela ndawonye; futhi uzoba sezinhlungwini ezinzima isikhashana ngenxa yomthwalo osindayo wenkosi nowezikhulu. 11 “Ngoba u-Efrayimi wandise ama-altare ukuze one. Uye waba nama-altare ukuze one. 12 Ngambhalela izinto eziningi zomthetho wami; zabhekwa njengezinto eziyinqaba. 13 Balokhu benza umhlatshelo ngenyama ukuba ibe yimihlatshelo yami eyisipho, futhi balokhu bedla lokho uJehova angazange ajabule ngakho. Manje uzosikhumbula isiphambeko sabo futhi abenze balandise ngezono zabo. Bona babuyela eGibhithe. 14 U-Israyeli wamkhohlwa uMenzi wakhe wakha amathempeli; uJuda yena, wandisa imizi enezivikelo eziqinile. Mina ngokuqinisekile ngizothumela umlilo emizini yakhe futhi uzoshwabadela imibhoshongo yokuhlala yalowo nalowo.
OKTHOBA 30–NOVEMBA 5
AMAGUGU ASEZWINI LIKANKULUNKULU | JOWELI 1-3
“Amadodana Enu Namadodakazi Enu Ayoprofetha”
(Joweli 2:28, 29) Kuyothi ngemva kwalokho ngithululele umoya wami phezu kwayo yonke inhlobo yenyama, amadodana enu namadodakazi enu ngokuqinisekile ayoprofetha. Amaxhegu enu, aphuphe amaphupho. Izinsizwa zenu, zibone imibono. 29 Ngalezo zinsuku ngiyothululela umoya wami ezincekwini nasezincekukazini.
Bashukunyiswa ‘Yizinto Ezinhle Kakhulu ZikaNkulunkulu’
4 Njengoba base bethole umoya ongcwele, abafundi eJerusalema abapholisanga maseko ekuxoxeleni abanye izindaba ezinhle zensindiso, baqala ngesixuku esasibuthene ekuseni nje. Ukushumayela kwabo kwagcwalisa isiprofetho esimangalisayo, esasilotshwe nguJoweli indodana kaPhethuweli eminyakeni engamakhulu ayisishiyagalombili ngaphambili: “[Ngiyakuthulula] uMoya wami phezu kwayo yonke inyama; amadodana enu namadodakazi enu ayakuprofetha, abadala benu baphuphe amaphupho, izinsizwa zenu zibone imibono; naphezu kwezinceku nezincekukazi ngalezo zinsuku ngiyakuthulula uMoya wami . . . lungakafiki usuku olukhulu nolwesabekayo lukaJehova.”—Joweli 1:1; 2:28, 29, 31; IzEnzo 2:17, 18, 20.
5 Ingabe lokhu kwakusho ukuthi uNkulunkulu wayezovusa sonke isizukulwane sabaprofethi, abesilisa nabesifazane, abanjengoDavide, uJoweli noDebora, abasebenzisele ukubikezela izenzakalo zesikhathi esizayo? Cha. ‘Amadodana namadodakazi, izinceku nezincekukazi’ bonke abangamaKristu babeyoprofetha ngomqondo wokuthi babeyoshukunyiswa umoya kaJehova ukuba bamemezele ‘izinto ezinhle kakhulu’ uJehova ayezenzile nayesazozenza. Ngakho babeyoba abakhulumeli boPhezukonke. Nokho, sasabela kanjani isixuku?—Heberu 1:1, 2.
“Memezelani Lokhu, Phakathi Kwezizwe”
4 Ake uyibheke ngolunye uhlangothi le ndaba. UJehova uNkulunkulu watshela umprofethi uJoweli ngesikhathi lapho abantu bazo zonke izinhlobo beyoprofetha ngomqondo ongokomfanekiso: “Ngemva kwalokho ngithululele umoya wami phezu kwayo yonke inhlobo yenyama, amadodana enu namadodakazi enu ngokuqinisekile ayoprofetha. Amaxhegu enu, aphuphe amaphupho. Izinsizwa zenu, zibone imibono.” (Joweli 2:28-32) Ngosuku lwePhentekoste lika-33 C.E., umphostoli uPetru wasebenzisa la mavesi ekuthululweni komoya ongcwele phezu kwalabo ababebuthene ekamelweni eliphezulu eJerusalema, nasekushumayeleni kwabo “ngezinto ezinhle kakhulu zikaNkulunkulu” okwakuzolandela. (IzEnzo 1:12-14; 2:1-4, 11, 14-21) Manje cabanga ngesikhathi sethu. Ukugcwaliseka okukhulu kwesiprofetho sikaJoweli bekulokhu kuqhubeka kusukela ekuqaleni kwekhulu lama-20. AmaKristu agcotshwe ngomoya—awesilisa nawesifazane, asekhulile nasemasha—aqala ‘ukuprofetha,’ okusho ukuthi, ukumemezela ‘izinto ezinhle kakhulu zikaNkulunkulu,’ ezihlanganisa nezindaba ezinhle zoMbuso manje osumisiwe emazulwini.
(Joweli 2:30-32) Ngiyonika imihlola emazulwini nasemhlabeni, igazi nomlilo nezikhatha zomusi. 31 Ilanga liyophenduka ubumnyama, inyanga ibe yigazi, ngaphambi kokufika kosuku lukaJehova olukhulu nolwesabekayo. 32 Kuyothi wonke umuntu obiza igama likaJehova asinde; ngoba kuyoba khona abaphunyukile eNtabeni iZiyoni naseJerusalema, njengoba nje uJehova eshilo, naphakathi kwabasindile, uJehova ababizayo.”
Amaphuzu Avelele Encwadi KaJoweli Neka-Amose
2:32—Kusho ukuthini ‘ukubiza igama likaJehova’? Ukubiza igama likaNkulunkulu kusho ukulazi, ukulihlonipha ngokujulile, ukuncika nokuthembela kumnikazi walo.—Roma 10:13, 14.
Ukumba Sifuna Ingcebo Engokomoya
(Joweli 2:12, 13) “Namanje futhi,” kusho uJehova, “buyelani kimi ngazo zonke izinhliziyo zenu, nangokuzila ukudla nangokukhala nangokubangalasa. 13 Niklebhule izinhliziyo zenu, hhayi izingubo zenu; nibuyele kuJehova uNkulunkulu wenu, ngoba unomusa nesihe, wephuza ukuthukuthela futhi uchichima umusa wothando, futhi ngokuqinisekile uyodabuka ngenxa yale nhlekelele.
Amaphuzu Avelele Encwadi KaJoweli Neka-Amose
2:12, 13. Ukuphenduka kweqiniso kusuka enhliziyweni. Kuhilela ‘ukuklebhula izinhliziyo zethu’ ngaphakathi, hhayi ‘ukuklebhula izingubo’ zangaphandle.
(Joweli 3:14) Izixuku, izixuku zisethafeni eliphansi lesinqumo, ngoba usuku lukaJehova luseduze ethafeni eliphansi lesinqumo.
Amaphuzu Avelele Encwadi KaJoweli Neka-Amose
3:14—Liyini ‘ithafa eliphansi lesinqumo’? Liyindawo engokomfanekiso uNkulunkulu akhiphela kuyo isahlulelo. Ezinsukwini zenkosi yakwaJuda uJehoshafati, egama layo lisho ukuthi “uJehova UngumaHluleli,” uNkulunkulu wakhulula uJuda ezizweni ezazimzungezile ngokukhungathekisa amabutho azo. Ngakho, le ndawo ibuye ibizwe ngokuthi ‘ithafa eliphansi likaJehoshafati.’ (Joweli 3:2, 12) Osukwini lwethu, limelela indawo engokomfanekiso izizwe eziyochotshozelwa kuyo njengamagilebhisi esikhamweni sewayini.—IsAmbulo 19:15.
Ukufundwa KweBhayibheli
(Joweli 2:28–3:8) Kuyothi ngemva kwalokho ngithululele umoya wami phezu kwayo yonke inhlobo yenyama, amadodana enu namadodakazi enu ngokuqinisekile ayoprofetha. Amaxhegu enu, aphuphe amaphupho. Izinsizwa zenu, zibone imibono. 29 Ngalezo zinsuku ngiyothululela umoya wami ezincekwini nasezincekukazini. 30 “Ngiyonika imihlola emazulwini nasemhlabeni, igazi nomlilo nezikhatha zomusi. 31 Ilanga liyophenduka ubumnyama, inyanga ibe yigazi, ngaphambi kokufika kosuku lukaJehova olukhulu nolwesabekayo. 32 Kuyothi wonke umuntu obiza igama likaJehova asinde; ngoba kuyoba khona abaphunyukile eNtabeni iZiyoni naseJerusalema, njengoba nje uJehova eshilo, naphakathi kwabasindile, uJehova ababizayo.”
3 Ngoba, bheka! ngalezo zinsuku nangaleso sikhathi, lapho ngibuyisa abathunjiwe bakwaJuda nabaseJerusalema, 2 ngiyoqoqa futhi zonke izizwe ngizehlisele ethafeni eliphansi likaJehoshafati; ngiyozibeka ekwahluleleni kanye nazo lapho ngenxa yabantu bami nefa lami u-Israyeli, ababahlakazile phakathi kwezizwe; bahlukanisa izwe lami. 3 Babelokhu benza inkatho ngabantu bami; benana isifebe ngomntwana womfana, bethengisa umntwana wentombazane ukuze bathole iwayini, baphuze. 4 “Futhi, nihlangene ngani nami, Thire neSidoni nani nonke nina zifunda zaseFilistiya? Ingabe ningivuza ngale mpatho? Uma ningiphatha ngale ndlela, ngizoyibuyisela ngesivinini, ngokushesha, impatho yenu emakhanda enu. 5 Ngoba nina nithathé isiliva lami negolide lami, niyisé izinto zami ezinhle ezifiselekayo emathempelini enu; 6 nithengisé ngamadodana akwaJuda namadodana aseJerusalema emadodaneni amaGreki, ngenjongo yokuwadedisela kude nendawo yawo; 7 bhekani ngiyawavusa ukuba asuke endaweni eniwathengiselé kuyo, impatho yenu ngizoyibuyisela emakhanda enu. 8 Ngizothengisela esandleni samadodana kaJuda amadodana enu namadodakazi enu, futhi kumelwe bawathengisele esandleni samadoda aseSheba, esizweni esikude kakhulu; ngoba uJehova ukukhulumile.