ISIFUNDO 7

Iyiqiniso

Luka 1:3

OKUFANELE UKWENZE: Sebenzisa imithombo enobufakazi obunokwethenjelwa ukuze izilaleli zakho zikwazi ukufinyelela iziphetho ezikahle.

Sebenzisa imithombo ethembekile. Izinto okhuluma ngazo zisekele eZwini likaNkulunkulu. Wufunde ngokuqondile umBhalo uma kungenzeka. Uma uzokhuluma ngamaqiniso angokwesayensi, izindaba, indaba eyenzeka ngempela noma uzosebenzisa obunye nje ubufakazi, hlolisisa kusenesikhathi ukuthi umthombo wakho uthembekile yini nokuthi okutholile kuwo okwakamuva.
Yisebenzise kahle imithombo yakho. Chaza umBhalo ngendlela evumelana nomongo walelo vesi, umyalezo weBhayibheli lilonke nezincwadi ezivela ‘encekwini ethembekileyo neqondayo.’ (Math. 24:45) Sebenzisa ulwazi oluthola kweminye imithombo ngendlela umbhali wayo ayibeke ngayo, unganezeli noma ushintshe lokho okuthola emthonjeni.

Ungakhulisi noma wenze ihaba ngamaqiniso nezibalo. Qikelela ukuthi uma kuthiwa “abanye abantu” awushintshi kube “iningi labantu,” noma lapho kuthiwa “ngezinye izikhathi” ushintshe kube “ngaso sonke isikhathi” nokuthi uma kuthiwe “uma kungenzeka” uthi “kungenzeka.”
Bonisa ubufakazi bendaba ngendlela ecacile. Ngemva kokufunda umBhalo noma kokucaphuna umthombo othile, buza imibuzo engeke iziphoxe izilaleli zakho noma wenze umfanekiso ukuze uzisize zikwazi ukuzifikela esiphethweni.