Izaba UJehova Uzibheka Kanjani?

INDODA yathi: “Owesifazane onginike yena ukuba abe nami, unginikile isithelo somuthi ngadla.” Owesifazane waphendula: “Inyoka—ingikhohlisile, ngadla.” La mazwi ashiwo abazali bethu bokuqala u-Adamu no-Eva kuNkulunkulu, aphawula ukuqala komlando wesintu omude wokwenza izaba.—Gen. 3:12, 13.

Isahlulelo uJehova asikhipha ku-Adamu no-Eva ngenxa yokungalaleli kwabo ngamabomu sabonisa ngokucacile ukuthi izaba zabo zazingamukeleki. (Gen. 3:16-19) Ngakho-ke, ingabe kufanele siphethe ngokuthi uJehova akazamukeli zonke izaba? Noma ingabe zikhona azamukela njengezifanele? Uma kunjalo, singazihlukanisa kanjani? Ukuze siphendule le mibuzo, ake siqale ngokucabangela incazelo yegama elithi izaba.

Izaba yizizathu ezinikezwayo ukuze kuchazwe ukuthi kungani okuthile kwenziwe, kungenziwanga, noma kungeke kuze kwenziwe. Izaba zingase zibe incazelo ezwakalayo yokwehluleka ukwenza okuthile noma zingase zibe ukuxolisa okuqotho okwenza kube nezizathu zokubonisa umusa noma zokuthethelela. Nokho, njengoba kwenzeka ku-Adamu no-Eva, izaba zingase futhi zibe ibhaxa, isizathu esingamanga esishiwo ngenjongo yokwemboza iqiniso. Njengoba izaba zivame ukuba ezalolu hlobo, ngokuvamile ziyasoleka.

Lapho senza izaba—ikakhulu ezihlobene nenkonzo yethu kuNkulunkulu—kumelwe siqaphele ukuba sigweme ‘ukuzikhohlisa ngokucabanga okungamanga.’ (Jak. 1:22) Ngakho, ake sixoxe ngezibonelo ezimbalwa eziseBhayibhelini kanye nezimiso eziyosisiza ukuba ‘siqhubeke siqinisekisa ukuthi kuyini okwamukelekayo eNkosini.’—Efe. 5:10.

Lokho UJehova Alindele Ukuba Sikwenze

EZwini likaNkulunkulu sithola imiyalo eqondile okudingeka siyilalele njengabantu bakaJehova. Ngokwesibonelo, umyalo kaKristu othi ‘sihambe siyokwenza abantu bazo zonke izizwe babe abafundi’ usasebenza kubo bonke abalandeli bakaKristu beqiniso. (Math. 28:19, 20) Empeleni, ukufeza lo myalo kubaluleke kangangokuthi umphostoli uPawulu wathi: “Maye kimi uma ngingazimemezelanga izindaba ezinhle!”—1 Kor. 9:16.

Ngaphezu kwalokho, abanye abaye bafunda iBhayibheli nathi isikhathi eside basemadolonzima ukushumayela izindaba ezinhle zoMbuso kaNkulunkulu. (Math. 24:14) Abanye ababehlanganyela emsebenzini wokushumayela sebeyekile. Iziphi ezinye zezizathu ezinikezwa yilabo abangahlanganyeli emsebenzini wokushumayela? Esikhathini esidlule, uJehova wasabela kanjani kulabo ababemadolonzima ukulalela imiyalo yakhe eqondile?

Izaba UNkulunkulu Angazamukeli

“Unzima kakhulu.” Ukushumayela kungase kubonakale kunzima kakhulu, ikakhulu kulabo abanamahloni ngokwemvelo. Nokho, cabanga ngalokho esingakufunda esibonelweni sikaJona. Wanikwa isabelo asithola sinzima kakhulu—uJehova wamtshela ukuba ayomemezela imbubhiso eyayisizokwehlela abaseNineve. Kulula ukubona isizathu sokuba uJona akuthole kusabisa ukufeza lesi sabelo. INineve laliyinhloko-dolobha yase-Asiriya, futhi abase-Asiriya babenedumela lokuba nonya olukhulu. Kungenzeka ukuthi uJona wazibuza: ‘Ngizoya kanjani kulaba bantu? Bazongenzani?’ Akuphelanga zinsuku zingaki, wabaleka. Kodwa uJehova akazange azamukele izaba zikaJona. Kunalokho, uJehova waphinde wamthuma ukuba ayoshumayela kubantu baseNineve. Kulokhu, uJona wasifeza ngesibindi isabelo sakhe futhi uJehova wambusisa.—Jona 1:1-3; 3:3, 4, 10.

Uma ucabanga ukuthi isabelo sokushumayela izindaba ezinhle sinzima kakhulu kuwe, khumbula ukuthi “zonke izinto zingenzeka kuNkulunkulu.” (Marku 10:27) Ungaqiniseka ngokuthi uJehova uzokuqinisa lapho uqhubeka umcela ukuba akusize nokuthi uyokubusisa lapho uqunga isibindi sokufeza inkonzo yakho.—Luka 11:9-13.

“Angithandi.” Yini ongayenza uma ungenaso isifiso esisuka enhliziyweni sokufeza inkonzo yakho yobuKristu? Khumbula ukuthi uJehova angasebenza ngaphakathi kuwe futhi athinte izifiso zakho. UPawulu wathi: “UNkulunkulu nguye osebenza ngaphakathi kini, ngentando yakhe, ukuze nithande futhi nenze.” (Fil. 2:13) Ngakho, ungacela uJehova ukuba akwenze ufune ukwenza intando yakhe. INkosi uDavide yenza lokho kanye. Yanxusa uJehova: “Ngihambise eqinisweni lakho.” (IHu. 25:4, 5) Ungenza okufanayo ngokuthandaza ngobuqotho ukuba uJehova akushukumisele ukuba ufune ukwenza lokho okumjabulisayo.

Kuyavunywa ukuthi lapho sikhathele noma sidumazekile, ngezinye izikhathi singase siziphoqe ukuba siye emhlanganweni eHholo LoMbuso noma sihlanganyele enkonzweni. Uma kunjalo, ingabe kufanele siphethe ngokuthi asimthandi ngempela uJehova? Lutho neze! Izinceku zikaNkulunkulu ezithembekile zesikhathi esedlule nazo kwadingeka zizikhandle ukuze zenze intando kaNkulunkulu. Ngokwesibonelo, uPawulu wathi ‘wayewutuba umzimba wakhe,’ ngokomfanekiso, ukuze alalele imiyalo kaNkulunkulu. (1 Kor. 9:26, 27) Ngakho, ngisho nalapho kudingeka ukuba siziphoqe ukuze sifeze inkonzo, singaqiniseka ngokuthi uJehova uzosibusisa. Ngani? Ngenxa yokuthi siziphoqa ukuba senze intando kaNkulunkulu ngesizathu esifanele—sishukunyiswa uthando ngoJehova. Ngokwenza lokho, sinikeza impendulo ekumangaleleni kukaSathane kokuthi izinceku zikaNkulunkulu ziyomphika uma zivivinywa.—Jobe 2:4.

“Ngimatasa kakhulu.” Uma ungahlanganyeli enkonzweni ngoba unomuzwa wokuthi umatasa kakhulu, kubaluleke kakhulu ukuba uzihlele kabusha izinto eziza kuqala kuwe. UJesu wathi: “Qhubekani nifuna kuqala umbuso.” (Math. 6:33) Ukuze usebenzise lesi simiso esiyisiqondiso, kungase kudingeke wenze ukuphila kwakho kube lula noma unciphise isikhathi obusisebenzisela ukuzijabulisa bese usisebenzisa enkonzweni. Yiqiniso, ukuzijabulisa nezinye izinto zomuntu siqu zinendawo ekuphileni, kodwa azizona izaba ezizwakalayo zokudebeselela inkonzo. Inceku kaNkulunkulu ibeka izithakazelo zoMbuso kuqala ekuphileni kwayo.

“Angifaneleki.” Ungase ube nomuzwa wokuthi awufaneleki ukuba ube yisikhonzi sezindaba ezinhle. Ezinye izinceku zikaJehova ezithembekile zangezikhathi zeBhayibheli zaba nomuzwa wokuthi zazingakufanelekele ukusingatha imisebenzi uJehova ayezabela yona. Cabanga nje ngoMose. Lapho uJehova emthuma ngokuqondile, uMose wathi: “Uxolo, Jehova, kodwa angilona iqaphuqaphu, kusukela izolo noma ngaphambi kwalokho noma kusukela ukhulumé nenceku yakho, ngoba nginomlomo onensayo nolimi olunensayo.” Nakuba uJehova amqinisekisa, uMose waphendula: “Uxolo, Jehova, ngicela uthumele ngesandla salowo ozomthuma.” (Eks. 4:10-13) UJehova wasabela kanjani?

UJehova akazange athi kuMose akasiyeke leso sabelo. Nokho, uJehova wamisa u-Aroni ukuba asize uMose ekusingatheni lo msebenzi. (Eks. 4:14-17) Ngaphezu kwalokho, eminyakeni eyalandela, uJehova wamsekela uMose futhi wamnikeza noma yini ayeyidinga ukuze aphumelele ekufezeni izabelo ayemnika zona. Namuhla, ungaqiniseka ngokuthi uJehova uyoshukumisela amanye amaKristu anokuhlangenwe nakho ukuba akusize ekufezeni inkonzo yakho. Ngaphezu kwakho konke, iZwi likaNkulunkulu lisiqinisekisa ngokuthi uJehova uyosenza sifanelekele umsebenzi aye wasiyala ukuba siwenze.—2 Kor. 3:5; bheka ibhokisi elithi “Iminyaka Ejabulisa Kunayo Yonke Ekuphileni Kwami.”

“Kunomuntu ongiphathe kabi.” Abanye bayeka ukuhlanganyela enkonzweni noma ukuya emihlanganweni yebandla ngoba othile ebaphathe kabi, becabanga ukuthi ngokuqinisekile uJehova uyozamukela lezi zaba zokuphola kwabo ngokomoya. Nakuba kuqondakala ukuthi siyacasuka lapho othile esiphatha kabi, kodwa ingabe lokho kuyizaba ezifanele zokuyeka ukuhlanganyela emisebenzini yobuKristu? Kungenzeka ukuthi uPawulu nomKristu akanye naye uBarnaba baphatheka kabi ngemva kokungezwani kwabo okwaholela ‘ekuqhumeni kwentukuthelo enkulu.’ (IzE. 15:39) Kodwa ingabe ukhona kubo owayeka ukuhlanganyela enkonzweni ngenxa yalokho? Lutho neze!

Ngokufanayo, lapho omunye umKristu ekuphathe kabi, khumbula ukuthi isitha sakho akuyena umfowenu ongumKristu ongaphelele kodwa uSathane, ofuna ukukushwabadela. Nokho, uDeveli ngeke aphumelele uma ‘umelana naye, uqinile okholweni.’ (1 Pet. 5:8, 9; Gal. 5:15) Uma unokholo olunjalo, ngeke nanini ‘udumazeke.’—Roma 9:33.

Kuncane Engikwazi Ukukwenza

Lezi zibonelo ezimbalwa esixoxe ngazo zenza kube sobala ukuthi azikho izaba ezingokomBhalo ezifanele zokungayifezi imiyalo eqondile kaJehova, kuhlanganise nowokushumayela izindaba ezinhle. Noma kunjalo, singase sibe nezizathu ezizwakalayo zokwenza okuncane enkonzweni yethu. Eminye imithwalo yethu yemfanelo engokomBhalo ingase inciphise isikhathi esisibekele umsebenzi wokushumayela. Kungenzeka futhi ngezinye izikhathi ukuthi sikhathele ngempela noma sigula kakhulu kangangokuthi singakwazi ukwenza okuningi ebesingathanda ukukwenza enkonzweni kaJehova. Nokho, iZwi likaNkulunkulu lisiqinisekisa ngokuthi uJehova uyasazi isifiso senhliziyo yethu futhi uyakucabangela ukulinganiselwa kwethu.—IHu. 103:14; 2 Kor. 8:12.

Ngakho-ke, kudingeka siqaphele ukuba singazahluleli noma sahlulele abanye ngendlela eqatha kulezi zindaba. Umphostoli uPawulu wabhala: “Ungubani wena ukuba wahlulele inceku yomunye yasendlini? Ima noma iwe enkosini yayo siqu.” (Roma 14:4) Kunokuba siqhathanise isimo sethu nesabanye, kufanele sikhumbule ukuthi “ngamunye wethu uyozilandisela kuNkulunkulu.” (Roma 14:12; Gal. 6:4, 5) Lapho sithandaza kuJehova futhi simtshela izaba zethu, ngamunye wethu ufuna ukwenza lokho ‘ngonembeza othembekile.’—Heb. 13:18.

Okwenza Ukukhonza UJehova Kusijabulise

Sonke singamkhonza uJehova ngenhliziyo ejabulayo ngoba izimfuneko zakhe zinengqondo futhi ziyafinyeleleka njalo—kungakhathaliseki ukuthi zinjani izimo zethu ekuphileni. Kungani sisho njalo?

IZwi likaNkulunkulu lithi: “Ungabagodleli okuhle labo okubafanele, lapho kusemandleni esandla sakho ukukwenza.” (IzAga 3:27) Yini oyiphawulile kulesi saga ngokuphathelene nezimfuneko zikaNkulunkulu? UJehova akakuyali ukuba ulwele ukwenza okulingana nokusemandleni esandla somfowenu kodwa ukuyala ukuba umkhonze ngalokho ‘okusemandleni esandla sakho.’ Yebo, ngamunye wethu—kungakhathaliseki ukuthi ubuthaka kangakanani noma ukuthi isandla sakhe sinamandla kangakanani—angamkhonza uJehova ngenhliziyo yakhe yonke.—Luka 10:27; Kol. 3:23.

[Ibhokisi/Isithombe ekhasini 14]

“Iminyaka Ejabulisa Kunayo Yonke Ekuphileni Kwami”

Ngisho noma singaba nezimo ezisilinganiselayo ngokwenyama noma ngokomzwelo, akufanele ngokuphamazela siphethe ngokuthi ziyosenza singakwazi ukuhlanganyela ngokugcwele enkonzweni. Ngokwesibonelo, cabanga ngalokho okwenzeka ku-Ernest, umzalwane waseCanada.

U-Ernest wayenamalimi futhi enamahloni kakhulu. Ngemva kokulimala kabi eqolo, kwadingeka ayeke umsebenzi wakhe wokwakha. Nakuba ayesekhubazekile, wakwazi kuzo lezo zimo ezishintshile ukuchitha isikhathi esengeziwe enkonzweni. Isikhuthazo asithola emihlanganweni yebandla sokungenela inkonzo yamaphayona asizayo samthinta inhliziyo. Nokho, wayenomuzwa wokuthi akayifanelekeli le nkonzo.

Ehlose ukuzanelisa ngokuthi ukuba iphayona elisizayo kwakungaphezu kwamandla akhe, wafaka isicelo sokuba iphayona elisizayo inyanga eyodwa. Wamangala kakhulu lapho ekwazi ukuwufinyelela kahle umgomo. Wabe esecabanga, ‘Ngiyazi ukuthi anginakuphinde ngiwuhlanganise.’ Ukuqinisekisa lokhu, wafaka isicelo senyanga yesibili—nakulokhu, wawufinyelela umgomo.

U-Ernest wakhonza njengephayona elisizayo unyaka wonke, kodwa wathi, “Ngiyaqiniseka kodwa ukuthi ngeke ngikwazi ukuba iphayona elivamile.” Nakulokhu, wafuna ukuzanelisa, wafaka isicelo senkonzo yamaphayona avamile. Wethuka lapho ekwazi ukuqeda unyaka wakhe wokuqala ekhonza njengephayona elivamile. Wanquma ukuqhubeka futhi wabusiswa ngenjabulo yokukhonza njengephayona elivamile iminyaka emibili kwaze kwaba yilapho efa ngenxa yezinkinga ezahambisana nokulimala kwakhe. Nokho, ngaphambi kokuba afe, wayevame ukutshela ababemvakashele ehlengezela izinyembezi, “Iminyaka engayichitha ngikhonza uJehova njengephayona yaba iminyaka ejabulisa kunayo yonke ekuphileni kwami.”

[Isithombe ekhasini 13]

Singanqoba noma iziphi izithiyo ezingasenza singayifezi inkonzo

[Isithombe ekhasini 15]

UJehova uyajabula lapho simkhonza ngomphefumulo wonke ngokwenza konke izimo zethu ezisivumela ukuba sikwenze