Ikusasa Libuphatheleni UbuKristu?
INGABE umhlaba uzoguqulelwa ebuKristwini, noma ubuKristu buzophela? Ingabe ubuKristu buye bahlala bumsulwa njengomthombo wokukhanya ezweni elimnyama, noma buye bangcoliswa? Lena imibuzo esasikhathaza nanamuhla.
Esebenzisa umfanekiso olula, uJesu wabonisa ukuthi ngokushesha nje ngemva kokutshala imbewu yobuKristu, isitha, uSathane, sasizophazamisa. (Mathewu 13:24, 25) Ngakho, kwakungeyona nje intuthuko yomphakathi eyabangela ukuba ubuKristu buguqulwe phakathi namakhulu ambalwa okuqala ngemva kwenkonzo kaJesu. Kwakuyisenzo sesitha, isenzo sikaSathane. Namuhla amasonto eLobukholwa aqhubekisela phambili amaphutha enziwa esikhathini esidlule futhi ayavuna ngalokho.—2 Korinte 11:14, 15; Jakobe 4:4.
Ukuhlaselwa KobuKristu Ngesinyelela
UJesu wabikezela ukuthi izimfundiso zakhe zaziyohlanekezelwa. Wathi: “Umbuso wamazulu uye waba njengomuntu owahlwanyela imbewu enhle ensimini yakhe. Ngesikhathi abantu besalele, isitha sakhe safika sahlwanyela ukhula phakathi kukakolweni, sahamba.” Okumangazayo ukuthi lapho izinceku zale ndoda ziyitshela ngalesi senzo esibi futhi zicela imvume yokubutha ukhula, yathi: “Cha; ukuze kungenzeki nangengozi ukuba, ngesikhathi nibutha ukhula, nisiphule nokolweni kanye nalo. Kuyekeni kukhule ndawonye kokubili kuze kube sekuvuneni; ngenkathi yokuvuna ngizotshela abavuni ngithi, Buthani ukhula kuqala nilubophe izinyanda ukuze lushiswe, bese nibuthela ukolweni enqolobaneni yami.”—Mathewu 13:24-30.
Njengoba uJesu uqobo achaza, emfanekisweni wakhe umuntu owatshala imbewu ensimini umelela uJesu, futhi imbewu ayitshala imelela amaKristu eqiniso. Isitha esatshala ukhula phakathi kukakolweni simelela “uDeveli.” Ukhula lumelela amadoda ayizihlubuki angenamthetho aqamba amanga athi ayizinceku zikaNkulunkulu. (Mathewu 13:36-42) Umphostoli uPawulu wanikeza imininingwane eyengeziwe maqondana nalokho okwakuzokwenzeka. Wathi: “Ngiyazi ukuthi ngemva kokuhamba kwami kuzongena izimpisi ezicindezelayo phakathi kwenu futhi ngeke ziwuphathe ngozwela umhlambi, naphakathi kwenu ngokwenu kuzovela amadoda, akhulume izinto ezisontekile ukuze amonyule abafundi ukuba bawalandele.”—IzEnzo 20:29, 30.
UbuKristu Buyahlanekezelwa
Ingabe lokho uJesu enza umfanekiso ngakho nalokho uPawulu akubikezela kwenzeka? Kwenzeka ngempela. Amadoda ahahela izikhundla aqala ukulawula ibandla elamiswa uJesu futhi alisebenzisela izinzuzo zawo siqu. UJesu watshela abalandeli bakhe: “Aniyona ingxenye yezwe.” (Johane 15:19) Nakuba kunjalo, amadoda alangazelela ukuthola amandla akha ubuhlobo nababusi amisa namasonto oMbuso, aqongelela ingcebo futhi azizuzela namandla amakhulu. La masonto afundisa “izinto ezisontekile.” Ngokwesibonelo, afundisa abantu ukuba bakhulekele uMbuso futhi banikele ukuphila kwabo kuwo ngokuya empini. Lokho kuye kwabangela ukuba labo okuthiwa amaKristu bahileleke eziMpini Zokholo nasekubulaleni abantu ababebabheka njengamaqaba. Baya nasempini babulala ‘abafowabo’ abakanye nabo enkolweni eyodwa. Ngokuqinisekile abazange baphishekele inkambo yobuKristu yokungathathi-hlangothi nokubonisa uthando komakhelwane.—Mathewu 22:37-39; Johane 15:19; 2 Korinte 10:3-5; 1 Johane 4:8, 11.
Kusobala-ke ukuthi amasonto osekuphele amashumi eminyaka ezibiza ngokuthi angamaKristu, angamaKristu mbumbulu. Njengoba sibonile esihlokweni esandulele, lokhu kusenza sibone ukuthi kungani kunomkhuba oqhubekayo wokuhlukana kwamasonto abe amahlelo, amasonto azigaxa kwezombangazwe namasonto ayishaya indiva imithetho kaNkulunkulu. Lesi sithelo esibi kangaka asiwona umphumela wobuKristu beqiniso, kodwa siwumphumela wobuKristu-mbumbulu obatshalwa uDeveli. Iphokophelephi-ke le nkolo yamanga? Njengoba uJesu abonisa emfanekisweni wakhe, ngeke ife ngenxa yokungasekelwa. Iyokwahlulelwa futhi ibhujiswe.
AmaKristu Eqiniso Akhanya Ebumnyameni
Nokho, umfanekiso kaJesu ubonisa ukuthi kukhona okumelwe kwenzeke ngaphambi kokuba “ukhula” oluwubuKristu bamanga lubuthwe bese lushiswa. Emakhulwini eminyaka adlule “ukhula” oluwubuKristu bamanga luye lwanda kakhulu kangangokuthi ubungabonakali nhlobo “ukolweni” owubuKristu beqiniso. Kodwa uJesu wachaza ukuthi ukolweni wawuyohlukaniswa nokhula phakathi “nokuvuna,” okuyisikhathi athi simelela “isiphelo sesimiso sezinto.” Wabuye wathi: “Ngaleso sikhathi abalungileyo bayokhanya ngokukhazimulayo njengelanga.” (Mathewu 13:39-43) Ubufakazi bubonisa ukuthi besilokhu siphila esiphelweni sesimiso sezinto kusukela ngeMpi Yezwe I, eyaqala eminyakeni engu-90 edlule. (Mathewu 24:3, 7-12) Ingabe le ngxenye yesiprofetho sikaJesu iye yagcwaliseka nayo?
AmaKristu eqiniso aye ahlukaniswa ‘okhuleni’ olungamasonto eLobukholwa. OFakazi BakaJehova ‘bakhanya ngokukhazimulayo njengelanga,’ besiza abanye ukuba bazi uNkulunkulu weqiniso, uJehova. OFakazi abazehlisi izindinganiso zakhe. Kodwa abantu ababa oFakazi, ngokuvamile kumelwe benze izinguquko ezinkulu ekuphileni kwabo ukuze balalele izimiso zobuKristu ezitholakala eBhayibhelini.
OFakazi BakaJehova abanazinhlelo zokuzijabulisa emihlanganweni yabo, kodwa banezinhlelo zemfundo yeBhayibheli. Babonisa uthando olufudumele futhi banobungane, okuyizimfanelo abazifunda ngokutadisha imiBhalo. Bakholelwa ukuthi uNkulunkulu uyoguqula umhlaba ube ipharadesi enze ukuba abamnene bahlale kuwo, njengoba nje ayehlosile ekuqaleni. Kodwa umhlaba kumelwe uhlanzwe kuqala kususwe ithonya elibi lenkolo yamanga, iBhayibheli eliyibiza ngokuthi iBhabhiloni Elikhulu. Ngokwesiprofetho seBhayibheli, uJehova uzoletha lolo shintsho olukhulu maduze nje.—Mathewu 5:5; IsAmbulo 18:9-10, 21.
Lapho isintu sesikhululiwe emikhubeni ekhohlisayo yenkolo yamanga, ukukhulekela kobuKristu beqiniso kuyokwenza bonke abantu basemhlabeni babe nobunye. Yeka ikusasa elihle lobuKristu beqiniso obatshalwa uJesu! Kuyobuyiselwa iPharadesi lase-Edene emhlabeni onokuthula, ongasayikuphinde ube nezinkolo ezingenabunye ezitshala ukwehlukana!
[Isithombe ekhasini 7]
“Isitha sakhe safika sahlwanyela ukhula.”—Mathewu 13:25
[Izithombe ekhasini 8, 9]
Umenywa ngokufudumele kunoma iliphi iHholo LoMbuso LoFakazi BakaJehova, lapho kutholakala khona imfundo yeBhayibheli yamahhala
[Isithombe ekhasini 9]
“Bese nibuthela ukolweni enqolobaneni yami.”—Mathewu 13:30