Ukuthanda Kwami Umculo, Ukuphila NeBhayibheli
NJENGOBA ILANDISWA NGUBORIS N. GULASHEVSKY
Ake ucabange ngendoda eyimpumputhe eneminyaka eyevile kwengu-60 eyayisihlaselwe kabili yisifo senhliziyo esibi. Yehla izinyembezi njengoba ibonga uNkulunkulu ngokuzambula kuyo. Ngangikuleso simo eminyakeni nje engu-11 edlule.
NGAZALWA ngo-1930 edolobhaneni lase-Ukraine iTsibulev, esifundeni saseCherkassy. Ngo-1937, phakathi nomunye wemikhankaso kaStalin yokucindezela abantu, ubaba waboshwa futhi wagwetsha ngecala lokuthi “uyisitha soMbuso.” Saphucwa indawo yokuhlala, futhi abantu abaningi esasibazi baqala ukusigwema. Ngokushesha iningi labo nalo laboshwa. Lezo kwakuyizikhathi zokungathembani, ukukhaphelana nokwesaba okwakugcwele yonke indawo.
Ngemva kwezinyanga ezimbili ubaba eboshiwe, kwazalwa udadewethu uLena. Mina, umama, uLena nomfowethu uNikolai, sachitha bonke ubusika egumbini elincane elalingenamafasitela nasitofu. Ngemva kwalokho sathuthela kwamkhulu. Mina noNikolai sasinakekela indlu, sicanda izinkuni futhi silungisa izinto. Ngangikuthanda ukusebenza ngezandla. Ngangenza izicathulo futhi ngingumbazi. Ngangiwuthanda nomculo, ngakho ngazenzela i-balalaika ngokhuni (uhlobo lwesigingci), ngafunda nokuyidlala. Ngokuhamba kwesikhathi ngaqala ukudlala isigingci ne-mandolin.
Ekuqaleni, ngangibhapathizwe eSontweni LamaKatolika. Kodwa njengoba ngangingaziqondi izimfundiso noma amasiko esonto, kwakubonakala kunengqondo kimi ukukholelwa ekutheni uNkulunkulu akekho. Ngemva kweMpi Yezwe II, ngajoyina i-Komsomol (inhlangano yentsha engamaKhomanisi), futhi kwakuthi lapho kuvela ithuba, mina namanye amalungu ale nhlangano siphikisane namakholwa, sizama ukuwabonisa ukuthi uNkulunkulu akekho.
Lapho Ngiba Yimpumputhe
Ngemva kokuhlasela kwamaJalimane iSoviet Union ngo-1941, kwadlula iviyo izikhathi ezimbadlwana edolobhaneni lakithi phakathi nempi yezwe yesibili. Ngo-March 16, 1944, ngalimala lapho kuhlaselwa ngamabhomu futhi ngaba yimpumputhe. Ngaqala ukuphelelwa yithemba, futhi nginanezinhlungu.
Lapho amabutho esedlulele ngasentshonalanga futhi amaJalimane esehlehlile, ngaqala ukuhambahamba engadini ngilalele umculo wezinyoni. Engizwela, umama wayenginika ugologo ukuze ngiwuphuze, futhi abantu bendawo babengimema emicimbini yabo, lapho ngangicula khona. Ngangibhema futhi ngiphuza kakhulu ukuze ngiqede usizi. Ngokushesha ngabona ukuthi lokhu kwakungeke kuxazulule lutho.
Umama omncane, owayenguthisha, wezwa ngezikole zezimpumputhe futhi wakhuluma nomama ukuba angibhalise kwesinye sazo. Ngo-1946, ngaqala ukufunda esikoleni manje esibizwa ngokuthi yiKam’yanets’-Podil’s’kyy, lapho ngaqala khona izifundo zami. Ngafunda ukufunda nokubhala nge-Braille. Ngabuye ngaqhubeka nezifundo zami zomculo, ngichitha amahora amaningi ngifunda ubuchwepheshe bokudlala inkositini. Libona imizamo yami, iphini likathisha-nhloko langivumela ukuba ngidlale inkositini yalo. Ngafunda nokudlala upiyano.
Umuzi Wami
Ngo-1948, ngashada nomunye wothisha bakulesi sikole, owayengisiza ngezifundo zami. Umyeni wakhe wayeshone phakathi nempi, emshiya namadodakazi amabili asemancane. Ngemva kokuphothula esikoleni, ngahamba ngayohlala naye kwakhe. Ngenza okusemandleni ami ukuba ngibe umyeni nobaba omuhle, ngiziphilisa ngokudlala umculo. Ngo-1952, sathola indodana.
Ngenza amalungiselelo okwakhela umkhaya wami indlu, futhi saqasha abanye abantu ukuba basakhele isisekelo sendlu nezindonga zangaphandle, kodwa okuningi ngazenzela kona ngokwami. Ukuthinta nokubona izinto ngamehlo engqondo kwangisiza ukuba ngivale isikhala sokungaboni. Ngangibamba ukhuni, ngiluzwe, bese ngenza isithombe salo engqondweni yami. Ngemva kwalokho, ngangibaza okuthile ngalo, kuhlanganise namathuluzi okhuni. Amathuluzi ensimbi ngangiwa-oda efektri. Ngakha isitofu sezitini, ngenza impahla yendlu, ngafeza neminye imisebenzi.
Iqembu Labadlali Bamagemfe
Ngathola ukuqeqeshwa okwengeziwe emculweni futhi ngaba umculi okhokhelwayo. Ngemva kokufunda ubuchwepheshe bezinsimbi ezihlukahlukene zomculo, ngafunda ukudlala igemfe. Ngesinye isikhathi, ngalungisa igemfe elincane loqalo. Ngokuhamba kwesikhathi, ngafunda ukuzenzela amagemfe. Ngaleso sikhathi, izazi zazingacabangi ukuthi amagemfe angenziwa ngendlela yokuba akhiphe amanothi ebhesi, njengoba amagemfe amakhulu ayekhipha umsindo ophansi. Yingakho-ke nje ayengekho amaqembu abadlali bamagemfe.
Nokho, ngakwazi ukwakha igemfe elalinembobo ekhethekile eyayandisa umsindo. Lokhu kwakusho ukuthi amagemfe anebhesi ephansi ayengenziwa ngaphandle kokulahlekelwa izinga lomsindo wawo. Ngokuhamba kwesikhathi ngaqala ukwenza izinhlobonhlobo zamagemfe akhipha imisindo evumelanayo.
Ngaphambili, ngangihlele amaqembu omculo ayedlala izinsimbi ezivamile. Elinye lala maqembu lalinabadlali bezinsimbi abayizimpumputhe kuphela. Khona-ke, ngo-1960 ngahlela iqembu elalidlala amagemfe kuphela—okwakuwukuphela kwalo eSoviet Union, mhlawumbe nakuwo wonke umhlaba.
Izinto Engazithola Nezangenza Ngangabaza
Ngo-1960, ngacela uchwepheshe othile ukuba angilungisele izinsimbi ezithile zomculo, futhi waqala ukukhuluma nami ngenkolo. Njengokuvamile, ngamphikisa, ngithi uNkulunkulu akekho. Wasikisela ukuba ngilalele nje lokho ayekufunda eBhayibhelini. Njengoba ngangingakaze ngilifunde iBhayibheli, nganquma ukulalela.
Indaba kaJakobe owazikhandla ukuze ondle umkhaya wakhe yangithinta ngokujulile. Ukulalela indaba yabafowabo bakaJosefa abamthengisela ebugqilini nezilingo abhekana nazo, nendlela abathethelela ngayo kamuva, kwangenza ngakhala. (UGenesise, izahluko 37, 39-45) Ngawuthanda ngempela noMthetho Wegolide, ophathelene nokuphatha abanye ngendlela esifisa ukuphathwa ngayo. (Mathewu 7:12) Ngajwayelana ngaleyo ndlela neBhayibheli futhi ngaqala ukulithanda.
Ngaqala ukuya emihlanganweni yamaBaptist kanye nomngane wami, futhi nganikezwa “iTestamente Elisha” le-Braille engaqala ukulifunda ngokucophelela. Kodwa ngaphawula ukuphikisana phakathi kwalokho elalikusho nezimfundiso zamaBaptist. Ngokwesibonelo, njengoba iBhayibheli libonisa, uNkulunkulu noJesu bangabantu ababili abehlukene futhi uNkulunkulu mkhulu kunoJesu. (Mathewu 3:16, 17; Johane 14:28; IzEnzo 2:32) Kodwa amaBaptist ayephikelela ethi uNkulunkulu noJesu bayalingana, oyingxenye kaZiqu-zintathu. Ngalifunda kaningi ‘iTestamente lami Elisha,’ ngithinta igama ngalinye ngokoqobo, futhi ngaqiniseka ukuthi lena kwakungeyona imfundiso eseBhayibhelini.
Enguqulweni yeBhayibheli esasinayo, kwakusetshenziswa igama elithi “isihogo.” Ngazama ukusibona ngeso lengqondo isihogo esifundiswa amaBaptist—indawo yokuhlushwa phakade emlilweni. Kwakungiphatha kabi kakhulu! IBhayibheli lithi uNkulunkulu uluthando, ngakho kwakungacabangeki kimi ukuthi angenza indawo enjalo. (1 Johane 4:8) Njengoba isikhathi siqhubeka, ngaya ngisingabaza kakhulu isihogo nezinye izimfundiso zamaBaptist.
Izinguquko Ezinkulu
Ngo-1968 amadodakazi ami okutholwa ayeseshadile futhi enezingane. Ngaleso sikhathi, mina nomkami saqala ukuxabana kakhulu. Uma ngicabanga ngalezo zinsuku, ngiyazisola ngokuthi asizange sithandane futhi sibekezelelane ngokwanele. Sahlukana, futhi imishado yami emibili ngemva kwalokho nayo yachitheka.
Ngo-1981, ngathutha eKam’yanets’-Podil’s’kyy, lapho ngase ngihlale khona iminyaka engu-35, ngaya eYoshkar-Ola, eqhele ngamakhilomitha angaba ngu-600 empumalanga yeMoscow. Lapho, ngaqhubeka nemisebenzi yami yobungcweti. Elinye lamaqembu ami omculo lalinabadlali abangu-45 bamagemfe ahlukahlukene. La magemfe ayesukela kwelingamasentimitha angu-20 ubude nesentimitha elilodwa ububanzi elinomsindo ohlabayo kuya kwelingaphezu kwamamitha amathathu namasentimitha angu-20 ububanzi elinebhesi endondayo. Amakhonsathi ethu ayesakazwa emsakazweni nakumathelevishini, futhi sasidlala kulo lonke izwe.
Emncintiswaneni ka-1986 owawuhlanganisa amaqembu omculo akulo lonke elaseSoviet Union, ngathola isitifiketi nendondo ngenxa yokuthuthukisa ubuciko bokudlala igemfe. Eminyakeni eminingi kamuva kwenziwa uhlelo lwebhayisikobho olunesihloko esithi Solo for Pipe, or the Fairy Tale of a Musician. Iphephandaba i-Mariiskaya Pravda labika: “UBoris Nikolaievich Gulashevsky, okukhulunywa ngaye kulolu hlelo, wathola isitifiketi esikhethekile ngenxa yokusungula iqembu labadlali bamagemfe okuwukuphela kwalo eRussia.”
Ukufuna Iqiniso
Lapho ngithuthela eYoshkar-Ola, ngabhalisela ukusebenzisa imitapo yezincwadi, eyayinezincwadi eziningi zezimpumputhe. Ngaqala ukwazi izimfundiso zamaKatolika, zeSonto Likamoya nezamaWeseli. Ngangiya nasemihlanganweni yeSonto Lama-Orthodox. Ngamangala lapho ngithola ukuthi babefundisa izinto ezifanayo nalezo engangizizwe eSontweni LamaBaptist, engase ngazi kakade ukuthi azisekelwe eBhayibhelini.
Umpristi ongumOrthodox, u-Alexander Men, wabhala ukuthi uNkulunkulu wayenegama lakhe siqu—uYahweh. Wabuye wathi amaJuda ayeke aqhuba ukukhulekela okumsulwa, kamuva okonakaliswa izimfundiso zobuqaba nokukhulekelwa kwezithombe. Akubhala kwangihlaba umxhwele ngokujulile futhi kwaqinisa isifiso sami sokufuna iqiniso.
Ukuzimisela Okukhulu
Kwelinye lamaqembu ami omculo, kwakunomdlali womculo okuthiwa nguLiza, owayengaboni kahle, ngakho wayebhekwa njengempumputhe. Sashada ngo-1990, futhi naye waqala ukuthanda izinto ezingokomoya. Ngalowo nyaka ngahamba ngayovakashela umama, owayehlala nodadewethu, uLena, eBaranovichi, eBelarus. Umama wangicela ukuba ngiye eSontweni LamaKatolika, lapho ngafike ngadla khona uMthendeleko. Lokhu kwakuphakathi nenkathi ye-perestroika eSoviet Union, futhi umpristi wayekhuluma kakhulu ngezinguquko zezombangazwe entshumayelweni yakhe. Ngaphinde ngabona ngokuqinisekile ukuthi akukhona lokhu engangikudinga.
Ngo-1994, ngahlaselwa isifo senhliziyo kabili futhi ngabangwa nezibi. Ngalowo nyaka, umama washona. Naphezu kwakho konke, ngaqhubeka ngifunda iBhayibheli. Ngase ngilifunde izikhathi ezingu-25 “iTestamente Elisha,” kodwa ngemva kwalokho angibange ngisabala. Kodwa ngaqhubeka ngilifunda futhi ngiba nemibuzo eyengeziwe. Kwaba sobala kimi ukuthi ngangingeke ngiwaqonde amaqiniso eBhayibheli ngingedwa.
Ukukhanya Okwabangelwa Ukuqonda
Ngo-1996, oFakazi BakaJehova bangqongqoza kwami eYoshkar-Ola. Ngangibasola, njengoba amaphephandaba ayethe bayihlelo eliyingozi. Kodwa-ke ngathi, ‘Bangangenzani?’ Into yokuqala engababuza yona ukuthi bacabangani ngoZiqu-zintathu. Baphendula bathi lelo gama nalowo mqondo akukho eBhayibhelini. Ngajabula njengoba ngase ngifinyelele esiphethweni esifanayo.
Lapho ngifunda u-Eksodusi 6:3 eBhayibhelini lesiRashiya eligunyazwe isigungu sesonto, lapho kuvela khona igama likaNkulunkulu elithi Jehova, inhliziyo yami yagxumagxuma. Ngamangala ngokubona indlela izinkolo ezazikhohlisa ngayo ngokufihlela abantu leli gama. Kodwa kwangihlaba umxhwele ukubona ukuthi oFakazi babezibiza ngalelo gama loMdali futhi betshela abanye ngalo!—Isaya 43:10.
Ngabahloma imibuzo oFakazi. Ngokwesibonelo: “Kungani iBhayibheli likhuluma ngesihogo? Kungani inguqulo ethandwayo yesiRashiya egunyazwe isigungu sesonto ithi umhlaba uyoshiswa?” Nganginemibuzo eminingi, kodwa lapho ngithola izimpendulo eziseBhayibhelini, ngaqaphela ukuthi ngangithole inkolo okwase kuphele iminyaka ngiphupha ngayo. Ngigcwele izinyembezi zenjabulo, ngaguqa ngabonga uNkulunkulu.
Ngokushesha oFakazi baqala ukuya nami emihlanganweni yabo, futhi yangihlaba umxhwele indlela izilaleli ezazilalela ngayo nokuphenqwa kwamakhasi njengoba zilalele isikhulumi. Lapho isikhulumi sisho ivesi leBhayibheli, abantu babelivula emaBhayibhelini abo. Ngangingakaze ngiyibone into enjalo. Kulowo mhlangano oFakazi bacula ingoma esekelwe ku-Isaya 35:5 eyayiqala ngala mazwi: “Lapho izimpumputhe zibona.”
Ngaqala ukujabulela ukufunda iBhayibheli noFakazi izikhathi ezine ngesonto. Ngokushesha ngafunda ukuthi kungani uNkulunkulu evumela izinkinga nezimpi nokuthi uzoyisingatha kanjani imiphumela yalokho kuhlupheka. Kwangihlaba umxhwele nakakhulu ukufunda ngesithembiso sikaNkulunkulu sothando maqondana noMbuso wakhe, okuyofezwa ngawo intando yakhe yokuba abantu abalalelayo bajabulele ukuphila okuphakade emhlabeni oyipharadesi. (Genesise 1:28; Isaya 65:17-25; IsAmbulo 21:1-5) Amaqiniso eBhayibheli aya ngokuya engicacela, futhi ngo-November 16, 1997, ngabhapathizwa ngibonakalisa ukuzinikezela kwami kuNkulunkulu.
Ukukhonza UNkulunkulu Ngobunye
Ngokushesha ngemva kokubhapathizwa kwami, uLiza naye waqala ukufunda iBhayibheli. Nakuba ayekhubazekile, wathuthuka ngokushesha ngokomoya futhi wabhapathizwa ngo-1998. Kwadingeka ukuba athwalwe ukuze angene echibini lokubhapathizwa kodwa wayezimisele ukukhonza uNkulunkulu ngomphefumulo wonke. Saqasha umbhucungi womzimba, ngakho uLiza waqala ukuvocavoca umzimba. Ngokuhamba kwesikhathi, ukukhubazeka kwelapheka. Manje, akagcini nje ngokuya kuyo yonke imihlangano kodwa ushumayela endlini ngendlu futhi uya nasezindaweni ezikude eyoshumayela.
Isikhathi ngasinye lapho ngihamba ngiyoshumayela, ngithandazela isibindi. Ngemva kokuthandaza, ngithatha induku yami, ngiphume ngiye esitobhini sebhasi ngendlela engiyazi kahle. Lapho ngizwa izigi zisondela, ngiqala ingxoxo ngeBhayibheli. Lapho ngingena ebhasini, ngihlala ezihlalweni eziphakathi, ngixoxe nabantu ngeBhayibheli, ngibahambisele nezincwadi. Uma othile ebonisa isithakazelo, sinikana izinombolo zocingo.
Muva nje, ngibe nethuba lokuxoxa nothisha womculo esibhedlela. Wamangala ngokuhlakanipha okuseBhayibhelini. Lapho le ndoda ibuyela ekhaya, yaqala ukufunda iBhayibheli noFakazi BakaJehova. Esibhedlela esifanayo, ngahlangana nomqondisi wefektri yendawo, onendodana eyimpumputhe. Ngamtshela ngethemba enginalo, waba nesithakazelo futhi wawazisa kakhulu amaqiniso eBhayibheli awezwa.
Selokhu ngabhapathizwa, sengisize abantu abangu-8 ukuba nabo babe abamemezeli boMbuso futhi sengifunde iBhayibheli nabanye abaningi. UJehova uyaqhubeka esisekela kakhulu mina nomkami ngabafowethu nodadewethu abangamaKristu. Bayasifundela, futhi sixoxe nabo ngezincwadi ezisekelwe eBhayibhelini. Babuye basiqophele nezinkulumo zomhlangano nezebandla. Konke lokhu kusisize ukuba sigxilise amaqiniso eBhayibheli ezinhliziyweni zethu futhi sitshele abanye ngawo. Kanjalo ibandla liba “usizo oluqinisayo” kithi.—Kolose 4:11.
Ngachitha iminyaka eminingi ngisemculweni, kodwa manje ngiyakujabulela ukucula izingoma zoMbuso. Ngiye ngazibamba ngekhanda zonke izingoma eziseculweni lesiRashiya elithi Hubani Izindumiso ZikaJehova. Ngikholelwa ukuthi uJehova wangithola kuleli zwe elibi futhi wangisiza ukuba ngithole indlela yokuphuma ebumnyameni obungokomoya. Yingakho ngiqiniseka ukuthi ngolunye usuku uyongikhipha ebumnyameni bami obungokoqobo.
[Isithombe ekhasini 19]
Ngidlala igemfe lebhesi elinokhiye ka-C major
[Isithombe ekhasini 20]
Ngidlala inkositini, ngo-1960
[Isithombe ekhasini 20, 21]
Iqembu labadlali bamagemfe
[Isithombe ekhasini 23]
NginoLiza namuhla