Ukubuka Okwezwe
“Ngandlela-thile, ukuba umongameli kwenza umuntu abe nomuzwa wokuthi kufanele athandaze.”—UBARACK OBAMA, UMONGAMELI WASE-UNITED STATES OF AMERICA.
Lapho becelwa ukuba bakhethe indlela yokuveza ukuziqhenya ngobuzwe babo, abantu base-Argentina abangamaphesenti angu-56 abaneminyaka ephakathi kweyishumi kuya kwengu-24 bathi bakhetha ukugqoka ijezi leqembu lesizwe lebhola.—I-LA NACIÓN, E-ARGENTINA.
Imiphumela yocwaningo oluthile yembula ukuthi “cishe ingxenye eyodwa kwezintathu yokudla okukhiqizwayo iyalahleka noma kulahlwe, okulingana namathani ayizinkulungwane eziyizigidi ezingu-1,3 ngonyaka.”—INHLANGANO YOKUDLA NEZOLIMO YEZIZWE EZIHLANGENE, E-ITALY.
“Namuhla, imibiko yezimpi igcwele emhlabeni wonke, ngakho ibutho Lezwe Lethu kufanele lihlale likulungele ukuvikela abantu balo nakho konke elikubheka njengokungcwele kunoma yini eshiwo isitha esivela ngaphandle.”—INZALAMIZI UKIRILL, UMPHATHI WESONTO LOBU-ORTHODOX ERUSSIA.
Iningi lezingozi zemigwaqo ezabikelwa inkampani yomshuwalense eJalimane ngo-2010 zenzeka phakathi kuka-7:00 ekuseni no-8:00 ntambama. “Enye yezindlela ezibaluleke kakhulu zokugwema ingozi, ukuzinika isikhathi esanele sokufika ngesikhathi emsebenzini ekuseni,” kusho isikhulu sale nkampani.—I-PRESSEPORTAL, EJALIMANE.
Abaholi Abasebancane EMalaysia
EMalaysia kunohlelo oludumile lwethelevishini oluwumncintiswano wokukhetha i-imam enhle, noma umholi wenkolo yamaSulumane. Lolu hlelo olunesihloko esithi “Imam Muda,” noma “Umholi Osemncane,” luqoshelwa eKuala Lumpur. Abaqhudelana kulo mncintiswano baphakathi kweminyaka engu-18 kuya kwengu-27, futhi abanezizinda ezihlukahlukene, ngokuvamile baphuma kancane kancane kuze kusale oyedwa. Imiklomelo ihlanganisa imali nemoto entsha, kodwa odle umhlanganiso uthola umsebenzi wokuba i-imam, umfundaze wokuyofunda eSaudi Arabia, akhokhelwe nezindleko zohambo olungcwele oluya eMecca. Abaqhudelanayo kufanele bayazi kahle imisebenzi ye-imam, bakwazi ukuphikisana ngezenkolo nangezindaba ezisematheni, futhi bayazi ngekhanda i-Koran. Umsunguli walolu hlelo uthi injongo yakhe “ukukhanga intsha” ukuba ingenele inkolo yamaSulumane.
Izenzo Zobuwula Kuyi-Internet
Abantu abaningi abasebenzisa i-Internet abayiboni ingozi engase ivele ngokuhamba kwesikhathi yokufaka imininingwane yabo eyimfihlo ezingosini zokuxhumana. Kodwa, ubuwula obenza kuyi-Internet bungakubangela izinkinga kamuva ekuphileni kwakho. NgokukaTimothy Wright onguthisha-nhloko, futhi ocashunwe ephephandabeni lase-Australia i-Sydeny Morning Herald, “ubuchwepheshe banamuhla benza ukuba inkulumo ewubuwula, ukunyundela, izithombe ezingafaneleki noma ukwambula imininingwane yomuntu eyimfihlo kuhlala unomphela kuyi-Internet futhi kungatholwa yinoma ubani okufunayo.” Lokhu kusho ukuthi “amaphutha enziwa umuntu lapho eneminyaka engu-15, asengavunjululwa umqashi ngemva kweminyaka eyishumi kamuva,” kusho uWright.