IZWE LIGCWELE IZIYALUYALU

3 | Vikela Ubudlelwane Onabo Nabanye

OKWENZA KUBALULEKE

Njengoba izingcindezi ezibangelwa iziyaluyalu zaleli zwe zanda, abantu abaningi, bengahlosile ababuqinisi ubudlelwane babo nabanye.

Abantu bayazihlukanisa nabangani babo.
Abantu abashadile ababonisani umusa futhi lokhu kuyanda.
Abazali abayinaki indlela izingane zabo ezicindezeleke ngayo.

Okufanele Ukwazi

Ukuba nabangani kubalulekile ngoba bayasisiza sihlale sinempilo enhle futhi singacindezeleki kakhulu, ikakhulukazi ngezikhathi ezinzima.
Ukucindezeleka okubangelwa iziyaluyalu zezwe, kungase kwenze umndeni wakho ube nezinkinga ngokungalindelekile.
Imibiko yezindaba ingase izithuse kakhulu izingane zakho kunalokho ongase ukucabange.

Ongakwenza Manje

IBhayibheli lithi: “Umngane weqiniso ubonisa uthando ngaso sonke isikhathi futhi uba umfowenu ngesikhathi sosizi.”—IzAga 17:17.

Cabanga ngomuntu okusekelayo nokunikeza iseluleko esihle. Ukwazi nje ukuthi kunomuntu okukhathalelayo kungakunika amandla okubhekana nezinkinga zosuku.

UNGAZIVIKELA KANJANI?—Izinto Ezingakusiza

Phakathi nezikhathi zeziyaluyalu, vikela ubudlelwane onabo nabanye ngokwenza lezi zinto

QINISA UMSHADO WAKHO

Qinisa umshado wakho

IBhayibheli lithi: “Ababili bangcono kunoyedwa . . . Ngoba uma kuwa oyedwa, lo omunye angamvusa umngane wakhe.” (UmShumayeli 4:9, 10) Abantu abashadile kufanele bafane nomshayeli wendiza nomsizi wakhe abanomgomo owodwa, hhayi njengabashayeli bezindiza zempi abashayela izindiza ezingafani ezizoshayisana.

Nquma ukuthi ngeke ukhiphele ukucindezeleka kwakho koshade naye. Isineke nokubekezela kuhamba ibanga elide.
Xoxa noshade naye ngezinkinga onazo, okungenani kanye ngesonto. Khumbula ukuthi kufanele nihlasele inkinga—ningahlaselani nodwa.
Bekani isikhathi sokwenza izinto nobabili enizijabulelayo.
Zikhumbuzeni izikhathi ezimnandi enake naba nazo nindawonye, mhlawumbe ngokubuka izithombe zomshado wenu noma ezinye izikhathi ezimnandi enazijabulela.

“Abantu abashadile bangase bangavumelani kukho konke, kodwa lokhu akusho ukuthi abakwazi ukubambisana njengeqembu. Abashadile bangenza isinqumo ndawonye bese beyabambisana ekwenzeni leso sinqumo sibe impumelelo.”—UDavid.

UNGABALAHLI ABANGANI BAKHO

Ungabalahli abangani bakho

Cabanga ngezindlela ongabasekela ngazo abangani bakho, hhayi nje ukuthi kube yibo kuphela abakusekelayo. Lapho usiza abanye, usuke uzisiza nawe.
Thinta abanye babangani bakho nsuku zonke uzwe ukuthi baqhuba kanjani.
Buza abangani bakho ukuthi babhekane kanjani nezinkinga ezifana nalezo obhekene nazo.

“Lapho ungasazi ukuthi uthatheni uhlanganise nani, abangani bayokunika inhlansi yethemba. Bangakusiza bakubonise indlela efanele, ngisho noma bengakwenza lokho ngokukukhumbuza izinto ozaziyo. Abangani bakho bayakukhathalela futhi bayazi ukuthi nawe uyabakhathalela.”—UNicole.

SEKELA IZINGANE ZAKHO NJENGOMZALI

Sekela izingane zakho njengomzali

IBhayibheli lithi: ‘Shesha ukulalela, wephuze ukukhuluma.’ (Jakobe 1:19) Uma uqala ukukhuluma nezingane zakho zingase zikuthole kunzima ukukutshela izinto ezizikhathazayo nezizesabayo, kodwa uma uzilalela ngesineke, uyozisiza ukuba zikhulume nawe ngokukhululekile.

Yenza kube lula ukuba izingane zakho zikutshele indlela ezizizwa ngayo. Ezinye izingane zikuthola kulula ukukhuluma lapho isimo sikhululekile njengalapho nisemotweni noma lapho nizihambela, kunokuba uzihlalise phansi.
Qiniseka ukuthi izingane zakho azizibuki kakhulu izindaba ezinemibiko ephazamisayo.
Tshela izingane zakho ukuthi yiziphi izinyathelo ozithathile ukuze ugcine umndeni wakho uphephile.
Hlela ukuthi niyokwenzenjani uma kuba nezimo eziphuthumayo, bese niyakuprakthiza zingakafiki.

“Xoxa nezingane zakho, uzinike ithuba lokuveza indlela ezizizwa ngayo. Kungenzeka zikufihlela izinto ezizesabayo, ezizikhathazayo nezizicasulayo. Zitshele ukuthi nawe uyaba nemizwa efanayo, nokuthi yini oye wayenza ukuze ubhekane naleyo mizwa.”—UBethany.