Lokho Esikufunda KuJesu

Ngekusasa Lesintu

Ingabe uJesu wathembisa ukuphila ezulwini?

Yebo, wakuthembisa! UJesu ngokwakhe wavuswa kwabafileyo futhi wenyukela ezulwini ukuze abe noYise. Kodwa ngaphambi kokufa nokuvuswa kwakhe, watshela abaphostoli bakhe abangu-11 abathembekile: “Endlini kaBaba kukhona izindawo zokuhlala eziningi. . . . Ngiyahamba ngiyonilungisela indawo.” (Johane 14:2) Nokho, labo abayothola leli lungelo bayoba mbalwa. UJesu walenza lakhanya leli phuzu lapho ethi kubafundi bakhe: “Ungesabi‚ mhlambi omncane, ngoba kwathandeka kuYihlo ukuninika umbuso.”—Luka 12:32, iBhayibheli lesiZulu elivamile.

Uyokwenzani “umhlambi omncane” ezulwini?

UBaba ufuna ukuba leli qembu elincane libe yingxenye kahulumeni wasezulwini kanye noJesu. Sazi kanjani? Ngemva kokuvuswa kwakhe, uJesu watshela umphostoli uJohane ukuthi abathile abathembekile ‘babeyobusa njengamakhosi phezu komhlaba.’ (IsAmbulo 1:1; 5:9, 10) Lezi izindaba ezinhle. Esinye sezidingo ezinkulu zesintu uhulumeni omuhle. Lo hulumeni ophethwe uJesu uyofezani? UJesu wathi: “Ekudalweni kabusha, lapho iNdodana yomuntu ihlala phansi esihlalweni sayo sobukhosi esikhazimulayo, nina eniye nangilandela nani ngokwenu niyohlala ezihlalweni zobukhosi eziyishumi nambili.” (Mathewu 19:28) Uhulumeni ophethwe uJesu nabalandeli bakhe ‘uzodala kabusha,’ noma uzokwenza kabusha, izinto ezinhle ezazijatshulelwa umbhangqwana wokuqala emhlabeni ngaphambi kokuba wone.

Yiliphi ithemba uJesu alinikeza sonke isintu?

Abantu badalelwa ukuba baphile emhlabeni, ngokungafani noJesu owadalelwa ukuphila ezulwini. (IHubo 115:16) Yingakho uJesu athi: “Nina nivela ezindaweni ezingaphansi; mina ngivela ezindaweni ezingaphezulu.” (Johane 8:23) UJesu wakhuluma ngekusasa elihle elizotholwa isintu. Wake wathi: “Bayajabula abanomoya omnene, ngoba bayokudla ifa lomhlaba.” (Mathewu 5:5) Wayekhuluma ngehubo eliphefumulelwe elithi: “Abamnene bayodla ifa lomhlaba, futhi ngempela bayothola injabulo enkulu ngokuchichima kokuthula. Abalungile bayokudla ifa lomhlaba, futhi bayohlala kuwo kuze kube phakade.”—IHubo 37:11, 29.

Ngakho-ke, “umhlambi omncane” oya ezulwini akuwona wodwa ozothola ukuphila okuphakade. UJesu waphinde wakhuluma ngethemba elivulekele izigidi zabantu. Wathi: “UNkulunkulu walithanda izwe kangangokuba waze wanikela ngeNdodana yakhe ezelwe yodwa, ukuze wonke umuntu obonisa ukholo kuyo angabhubhi kodwa abe nokuphila okuphakade.”—Johane 3:16.

UNkulunkulu uzosikhulula kanjani isintu ekuhluphekeni?

UJesu wakhuluma ngokukhululeka emithonjeni emibili yokucindezeleka lapho ethi: “Manje kukhona ukwahlulelwa kwaleli zwe; umbusi waleli zwe uzophonswa ngaphandle.” (Johane 12:31) Okokuqala, abantu abangamhloniphi uNkulunkulu okuyibona ababangela ukuhlupheka bazokwahlulelwa bese bebhujiswa. Okwesibili, uSathane uzophonswa ngaphandle futhi ngeke esasidukisa isintu.

Kuthiwani ngalabo abafa bengazange bathole ithuba lokufunda ngoNkulunkulu noKristu futhi babe nokholo kubo? UJesu watshela iselelesi esasilengiswe eceleni kwakhe: “Uyokuba nami ePharadesi.” (Luka 23:43) Leso selelesi, kanye nezigidi zabanye abantu, siyothola ithuba lokufunda ngoNkulunkulu lapho uJesu esivusa ekufeni epharadesi emhlabeni. Siyoba nethuba lokuba phakathi kwabathobekile nabalungile abayothola ukuphila okuphakade emhlabeni.—IzEnzo 24:15.

Ukuze uthole ukwaziswa okwengeziwe, bheka izahluko 3 no-7 encwadini ethi Lifundisani Ngempela IBhayibheli?a

[Umbhalo waphansi]

[Isithombe ekhasini 23]

“Abalungile bayokudla ifa lomhlaba, futhi bayohlala kuwo kuze kube phakade.”—IHubo 37:29