Iyofika Nini Impi Ye-Armagedoni?

‘Ngabona, bheka! isixuku esikhulu, okungekho muntu owakwazi ukusibala, siphuma kuzo zonke izizwe nezinhlanga nabantu nezilimi siphuma osizini olukhulu.’—ISAMBULO 7:9, 14.

IMPI ye-Armagedoni isinuka emakhaleni. Kungani kunjalo?

Kakade isikhona inhlangano yomhlaba wonke yabantu abakhonza uJehova nabaphila ngezimiso zokuziphatha eziphakeme zeBhayibheli. Zisekelwa uNkulunkulu, izigidi zabantu ezivela kuzo zonke izizwe, izinhlanga nezilimi zibuthana ndawonye ukuze zakhe ubuzalwane obunobunye nothando. Lobo buzalwane buphakathi koFakazi BakaJehova.—Johane 13:35.

Kungensuku zatshwala uSathane uzobutha amabutho akhe futhi ahlasele laba bantu abanokuthula nababonakala bengenakuzivikela. (Hezekeli 38:8-12; IsAmbulo 16:13, 14, 16) Ungaqiniseka kanjani ukuthi lokhu kuyiqiniso? IBhayibheli lichaza izenzakalo ezithile ezisisiza sibone ukuthi impi ye-Armagedoni izofika nini. Eziningi zalezi zenzakalo elizichazayo sezenzekile.

Izenzakalo Ozibona Zenzeka

Abafundi bakaJesu bambuza ukuthi abantu bayobona ngani uma ‘isiphelo sesimiso sezinto’ sesisondele. (Mathewu 24:3) UJesu waphendula ngokukhomba esikhathini athi ngaso, “isizwe siyovukela isizwe nombuso uvukele umbuso, futhi kuyoba khona ukusweleka kokudla nokuzamazama komhlaba ezindaweni ngezindawo.” Wabe esethi: “Zonke lezi zinto ziwukuqala kwemihelo yokucindezeleka.” (Mathewu 24:7, 8) Umphostoli uPawulu wachaza isikhathi esifanayo ngokuthi ‘izinsuku zokugcina,’ athi ngazo kuyoba khona “izikhathi ezibucayi okunzima ukubhekana nazo.” (2 Thimothewu 3:1) Wena ubona sengathi akuzona yini izinsuku esiphila kuzo ezichazwa yilezi ziprofetho?

Kungani lesi sikhathi sasiyoba nzima kangaka? Umphostoli uJohane wanikeza impendulo lapho ebikezela ukuthi uSathane namademoni akhe babeyoba “nesikhathi esifushane” sokwenza umsebenzi wabo emhlabeni. USathane wayeyobe “ethukuthele kakhulu” ngalesi sikhathi. (IsAmbulo 12:7-12) Uyawubona yini umoya wentukuthelo nobudlova kubantu namuhla, hhayi nje endaweni eyodwa kodwa emhlabeni wonke?

UJesu wabuye wathi phakathi nalesi sikhathi sobunzima obukhulu, kuyokwenziwa umsebenzi oyingqayizivele. Wathi: “Lezi zindaba ezinhle zombuso [kaNkulunkulu] ziyoshunyayelwa emhlabeni wonke owakhiwe ngenjongo yobufakazi ezizweni zonke; khona-ke ukuphela kuyofika.” (Mathewu 24:14) Namuhla, emazweni angaphezu kuka-235, oFakazi BakaJehova bashumayela izindaba ezinhle zoMbuso kaNkulunkulu ngezilimi ezingaphezu kuka-500. Omagazini ababili abasekelwe eBhayibhelini ababanyathelisayo, INqabayokulinda ne-Phaphama!, basakazwa kabanzi emhlabeni wonke ukwedlula noma imuphi umagazini. OFakazi baye bahumushela neBhayibheli ezilimini ezingaba ngu-100. Umsebenzi wabo wenziwa izisebenzi zokuzithandela futhi usekelwa ngokuphelele iminikelo yokuzithandela. Akukhona yini ukuthi lo mkhankaso wokushumayela omkhulu kangaka uwukugcwaliseka kwesiprofetho sikaJesu?

IBhayibheli libuye likhulume ngezenzakalo eziyoholela ngokuqondile empini ephakathi kukaJehova uNkulunkulu nalabo abamphikisayo. Cabanga ngalezi ziprofetho ezintathu ozozibona zigcwaliseka.

Izenzakalo Ozozibona Zenzeka Maduze

Isiprofetho 1. IBhayibheli lithi izizwe ziyokwenza isimemezelo esibalulekile ‘sokuthula nokulondeka.’ Ziyocabanga ukuthi zikwazile ukuxazulula izinkinga ezinkulu. Nokho, izinto eziyokwenzeka ngemva kwalesi simemezelo ziyobe zingabonisi neze ukuthi kunokuthula.—1 Thesalonika 5:1-3.

Isiprofetho 2. Ngokulandelayo ohulumeni abahlukahlukene bayonquma ukulwa nezinhlangano zezwe zenkolo. EBhayibhelini labo hulumeni bamelelwa isilo sasendle; futhi izinkolo zezwe zamanga zimelelwa owesifazane ogibele isilo. (IsAmbulo 17:3, 15-18) Ngokungazi, lesi silo esingokomfanekiso siyokwenza intando kaNkulunkulu ngokubhuqa izinkolo eziqamba amanga zithi zimelela uNkulunkulu.

Ngendlela engokomfanekiso, umphostoli uJohane uyichaza kanje le ndaba: “Izimpondo eziyishumi owazibona, nesilo sasendle, lezi ziyosizonda isifebe zisenze incithakalo zisihambise nqunu, ziyoyidla ziyiqede inyama yaso futhi zisishise ngomlilo siphele. Ngoba uNkulunkulu ukufake ezinhliziyweni zazo ukuba zifeze umqondo wakhe.”—IsAmbulo 17:16, 17.

Isiprofetho 3. Ngemva kokuhlaselwa kwenkolo yamanga ngempumelelo, uSathane uyovivisa izizwe ukuba zihlasele labo abakhulekela uJehova uNkulunkulu.—IsAmbulo 7:14; Mathewu 24:21.

Uzothinteka Kanjani?

Uma ubungakalitholi ithuba lokufunda iBhayibheli ngokucophelela, ungase ukuthole kunzima ukukholelwa ukuthi lezi zenzakalo ezichazwe ngenhla zizokwenzeka. Kodwa kunesizathu esihle sokuthemba ukuthi yonke imininingwane izogcwaliseka nokuthi lezi zenzakalo zizokwenzeka maduze. Umlando omude weziprofetho zeBhayibheli esezigcwalisekile usinikeza isiqiniseko.a

Zinike isikhathi sokuthola ukuthi kungani oFakazi BakaJehova beqiniseka ukuthi ‘impi yosuku olukhulu lukaNkulunkulu uMninimandla onke’ inuka emakhaleni nokuthi akudingeki uyesabe. Bavumele baxoxe nawe ngalokho iBhayibheli elithi kumelwe ukwenze ukuze ube phakathi kwabantu uJehova uNkulunkulu azobavikela. (IsAmbulo 16:14) Okufundayo kungase kushintshe umbono wakho ngekusasa.

[Umbhalo waphansi]

[Amazwi acashunwe esihlokweni ekhasini 8]

Kungenzeka yini ukuthi umsebenzi woFakazi BakaJehova uwukugcwaliseka kwesiprofetho seBhayibheli?