Iqiniso Nge-Armagedoni

‘Imimoya yamademoni . . . yaphuma yaya emakhosini ezwe lonke. . . , yawahlanganisela endaweni ethiwa ngesiHebheru iHar–Magedoni.’ (Omalukeke sizenzele.)—ISAMBULO 16:14, 16, IBhayibheli lesiZulu elivamile.

I-ARMAGEDONI ebuye ibizwe ngokuthi “iHar–Magedoni,” iyigama lendawo. Nokho kubonakala sengathi le ndawo ayikaze ibe khona emhlabeni.

Pho-ke, lisho ukuthini ngempela leli gama elithi “Armagedoni”? Kungani livame ukuhlotshaniswa nesehlakalo esinjengempi?

Ukubuthelwa Endaweni Okuthiwa I-Armagedoni

Igama lesiHebheru lokuqala elithi Har–Magedon ngokwezwi nezwi lisho “iNtaba yaseMegido.” Nakuba ingekho intaba engokoqobo ebizwa ngalelo gama eyake yaba khona, ikhona indawo ebizwa ngokuthi iMegido. Isempambana-mgwaqo enkulu enyakatho-ntshonalanga nendawo eyayihlala isizwe sakwa-Israyeli wasendulo. Izimpi eziningi eziwumnqamula-juqu zazilwela bude buduze naleyo ndawo. Ngakho-ke, igama elithi Megido lahlotshaniswa kanjalo nempi.a

Nokho, ukubaluleka kwangempela kweMegido akukhona ukuthi yiziphi izimpi ezazilwela khona, kodwa ukuthi kungani zaziliwa. IMegido yayiyingxenye yeZwe Lesithembiso uJehova alinika ama-Israyeli. (Eksodusi 33:1; Joshuwa 12:7, 21) Wafunga ukuthi uyowavikela kubahlaseli futhi wabavikela. (Duteronomi 6:18, 19) Ngokwesibonelo, kwakuseMegido lapho uJehova avikela khona ama-Israyeli ngokuyisimangaliso ekuhlaseleni kwamabutho enkosi yaseKhanani uJabini nesikhulu sayo sebutho uSisera.—AbaHluleli 4:14-16.

Ngakho-ke, igama elithi “Har–Magedon,” noma “Armagedoni,” limelela into ebaluleke kakhulu. Lihlobene nokubhekana ubuso nobuso, lapho amaqembu amabili anamandla etholana phezulu.

Isiprofetho esisencwadini yesAmbulo sikhuluma ngesikhathi esizayo esiseduze lapho uSathane namademoni beyoshukumisela ohulumeni babantu ukuba babuthe amabutho abo, ngaleyo ndlela yendelelo, babekele inselele abantu bakaNkulunkulu nomsebenzi wabo. Kuyofa izigidi zabantu lapho uNkulunkulu enqoba labo bahlaseli.—IsAmbulo 19:11-18.

Kungani uNkulunkulu ochazwa iBhayibheli ‘njengonesihe, owephuza ukuthukuthela nochichima umusa wothando,’ eyobulala abantu abaningi kangaka? (Nehemiya 9:17) Ukuze sikuqonde lokhu okuzokwenziwa uNkulunkulu, kudingeka siphendule imibuzo emithathu: (1) Ubani osusa impi? (2) Kungani uNkulunkulu engenela? (3) Ukungenela kwakhe kuyoba namuphi umphumela ohlala njalo emhlabeni nakubantu abakuwo?

1. UBANI OSUSA IMPI?

Impi ye-Armagedoni ayisona isenzo sonya lukaNkulunkulu. Kunalokho, uNkulunkulu uyovikela abantu abalungile kulabo abafuna ukubabulala. Kule mpi, abasusa uchuku ‘amakhosi omhlaba wonke owakhiwe,’ okungababusi bomhlaba. Kungani ehlasela? Njengoba kunguSathane olawula imibuso, uyoshukumisa amanxusa ezempi nohulumeni ukuba baphume bonke ngothi lwabo bayohlasela labo abakhulekela uJehova uNkulunkulu.—IsAmbulo 16:13, 14; 19:17, 18.

Ngenxa yokuthi inkululeko yokukhuluma neyenkolo igcizelelwa kakhulu emazweni athile namuhla, umbono wokuthi ohulumeni bayozama ukuhlasela noma ukuqeda nyá noma iyiphi inhlangano yenkolo ungase uzwakale uyimbudane. Nokho, ukuhlasela okunjalo kwenzekile ekhulwini lama-20 leminyaka futhi kusenzeka namanje.b Nakuba kunjalo, kunezinto ezimbili ezihluke kakhulu ekuhlaseleni okudlule nalokhu okuhlotshaniswa ne-Armagedoni. Okokuqala, ukuhlasela kuzokwenzeka emhlabeni wonke. Okwesibili, indlela uJehova uNkulunkulu azosabela ngayo iphakeme kakhulu kunanoma iyiphi ake alwa ngayo ngaphambili. (Jeremiya 25:32, 33) IBhayibheli liyichaza ngokuthi ‘impi yosuku olukhulu lukaNkulunkulu uMninimandla onke.’

2. KUNGANI UNKULUNKULU ENGENELA?

UJehova uyala labo abamkhulekelayo ukuba babe nokuthula futhi bathande izitha zabo. (Mika 4:1-3; Mathewu 5:43, 44; 26:52) Ngakho ngeke bathathe izikhali bazivikele lapho kufika le mpi enzima. Ukube uNkulunkulu ubengeke angenele aphephise abantu bakhe, bebeyoqothulwa. Ngaleyo ndlela igama noma idumela likaJehova uNkulunkulu beliyohlanjalazwa. Uma laba bahlaseli bebeyokwazi ukuqeda abantu baKhe, bekuyokwenza uJehova abonakale engenalo uthando, ubulungisa noma amandla. Okuyinto engeke yenzeka!—IHubo 37:28, 29.

UNkulunkulu akafune kubhubhisa muntu, ngakho ngomusa, unikeza izixwayiso zalokho azokwenza. (2 Petru 3:9) Ngezindaba ezigcinwe eBhayibhelini, ukhumbuza wonke umuntu ukuthi esikhathini esedlule uye wabaphindiselela abantu bakhe lapho behlaselwa. (2 AmaKhosi 19:35) IBhayibheli libuye lixwayise ngokuthi lapho uSathane nabantu abalawulwa nguye behlasela abantu bakaNkulunkulu esikhathini esizayo, uJehova uyongenela abalwele. Eqinisweni, iZwi likaNkulunkulu labikezela kudala ukuthi uJehova uyobhubhisa ababi. (IzAga 2:21, 22; 2 Thesalonika 1:6-9) Ngaleso sikhathi abahlaseli bayovele bazibonele ukuthi balwa noMninimandla onke uqobo lwakhe.—Hezekeli 38:21-23.

3. LE MPI IYOBA NAMUPHI UMPHUMELA OHLALA NJALO?

Impi ye-Armagedoni iyosindisa ukuphila kwezigidi zabantu. Empeleni iyoba isiqalo senkathi yokuthula emhlabeni.—IsAmbulo 21:3, 4.

Incwadi yesAmbulo ikhuluma ‘ngesixuku esikhulu’ esingenakubalwa esiyosinda kule mpi. (IsAmbulo 7:9, 14) Ngaphansi kokuqondisa kukaNkulunkulu, laba bantu bayosiza ekubuyiseleni umhlaba ube yiPharadesi uJehova ayelihlosile ekuqaleni.

Siyazi yini ukuthi abantu bakaNkulunkulu bayohlaselwa nini?

[Imibhalo yaphansi]

[Isithombe ekhasini 6]

UJehova uNkulunkulu uye wabalwela abantu bakhe esikhathini esedlule

[Isithombe ekhasini 7]

UJehova uyophinde alwele abantu bakhe empini ye-Armagedoni