1 | Umthandazo—‘Phonsa Zonke Izinkathazo Zakho Kuye’

IBHAYIBHELI LITHI: “Niphonse zonke izinkathazo zenu [kuNkulunkulu], ngoba uyanikhathalela.”—1 PETRU 5:7.

Lokho Okukushoyo

UJehova uNkulunkulu usicela ukuba simtshele noma yini esisindayo nesikhathazayo. (IHubo 55:22) Singathandazela noma yini, kungakhathaliseki ukuthi ibukeka incane noma inkulu. Uma ibalulekile kithi, ibalulekile nakuJehova. Ukuthandaza kuye kuyisinyathelo esibalulekile sokuthola ukuthula kwengqondo.—Filipi 4:6, 7.

Indlela Lokhu Okungasiza Ngayo

Uma sinesifo sokuphazamiseka kwengqondo, singazizwa singenabani. Abanye abantu bangase bangakuqondi ngokugcwele esibhekene nakho. (IzAga 14:10) Uma sithandaza kuNkulunkulu ngokusuka enhliziyweni, simtshele indlela esizizwa ngayo, uzosilalela ngozwela futhi uzoyiqonda indlela esizizwa ngayo. UJehova uyakubona konke esibhekene nakho nokusikhathazayo futhi ufuna sithandaze kuye nganoma yini.—2 IziKronike 6:29, 30.

Ukukhuluma noJehova ngomthandazo kwenza siqiniseke nakakhulu ngokuthi uyasikhathalela. Singazizwa njengomhubi owathandaza wathi: “Ukubonile ukuhlupheka kwami; uyazi ngokucindezeleka kwami okukhulu.” (IHubo 31:7) Ukwazi nje ukuthi uJehova uyakubona okusikhathazayo kungasisiza sibhekane nezikhathi ezinzima. Akagcini nje ngokukubona okusikhathazayo kodwa ukuqonda ukudlula noma ubani esibhekene nakho. Uphinde asisize ngokusikhuthaza nangokusiduduza ngeZwi lakhe, iBhayibheli.

Indlela IBhayibheli Elimsiza Ngayo UJulian

Indlela Okungithinta Ngayo Ukukhathazeka Ngokweqile

“Nginesifo sokukhathazeka kakhulu nesokufuna yonke into ihambe ngendlela efanele (i-anxiety ne-OCD). Ngivele ngikhathazeke kakhulu kungonakele lutho. Lapho ngithi konke kusahamba kahle, kuvele kushintshe kungazelelwe, ngizizwe sengikhathazeke kakhulu ngaphandle kwesizathu. Ngikhathazeka nakakhulu uma ngiphakathi kwabantu. Okungikhathaza kakhulu ukuthi bacabangani ngami.

“Labo abaziyo ukuthi nginale nkinga, bangisiza kakhulu. Ngiyavuma ukuthi ngezinye izikhathi izinto abangitshela zona kusuke kungezona engifuna ukuzizwa. Noma kunjalo, ngiyayazisa kakhulu imizamo yabo.

“Ngenxa yokuthi nginesifo sokukhathazeka kakhulu nesokufuna yonke into ihambe ngendlela efanele, ngezinye izikhathi kuba nzima ukuthandaza. Kudinga umzamo omkhulu ukuthi ngigxilise ingqondo lapho ngikhuluma noJehova ngomthandazo. Ngivele ngicabange izinto eziningi ngesikhathi esisodwa—okwenza ingqondo yami igcine isididekile. Uma ingqondo yami ilokhu izulazula, kuba nzima ukutshela uJehova engikucabangayo nendlela engizizwa ngayo.”

Indlela IBhayibheli Elingisiza Ngayo

“Lapho ngitadisha iBhayibheli, ngiye ngafunda ukuthi akudingeki ngibe iqaphuqaphu noma ngenze imithandazo emide ukuze yamukeleke kuNkulunkulu. Uma ngihluleka ukusho indlela engizizwa ngayo, ngivele ngithandaze ngithi: ‘Jehova, ngicela ungisize.’ Ngivele ngibone ukuthi uJehova uyangiqonda ngoba unginika lokho kanye engikudinga ngaleso sikhathi. Ngaphezu komthandazo, ngiye ngafuna usizo lokwelashwa kodokotela. Ngiyajabula ukusho ukuthi ngenxa yalolu sizo engilutholile, sengingcono kakhulu. Nakuba kudingeka ngizikhandle ukuze ngithandaze kuBaba wami osezulwini uJehova, ngiyakwenza ngoba ngiyaqiniseka ukuthi uyangithanda futhi ufuna ukungisiza.”