Kelhọm Oḍuom Olhoghi Dị Ka/bi

1. Eeghe kụ iḍighi kụ yira koḅẹm bọ mọ oḍuomolhoghi phọ Ebraham o/bi nyodị?

AZIHOVA aguanhaan oyaghirị phọ odị Ebraham mọ odị kamoọgh ni moọny dị oomo areelhe aḅirinhi phọ komooghọm ḍisẹph. (Gen. 15:5; 22:18) Loor iduọn Ebraham amhoọgh bọ omheeraam dị akpạr aghị esi Enhaạn, odị akuphom ni owol mọ oguanhaan phọ Enhaạn katu ni onọ. Ghalhamọ r’iduọn phọ ni, mem dị Ebraham mamhạn 100 asiạ kụ anhịr phọ odị mamhạn 90 asiạ, bịn moọny bidị ko/mhạr ri. (Gen. 21:1-7) Toroboiperolbọ, aBaibul phọ aḅẹm mọ: “Ebraham ameeraam ni . . . kụ atuạn bọ aḍighinom odẹ ibadị areelhe phọ. ldiphọ aḍinyạ iigbia phọ eḅẹm” bọ. (Rom. 4:18) Oḍuom olhoghi phọ o/bi nyodị. Eekunha phọ odị amhoọgh ni moọny, Aizịk. Eeghe kụ ingọ bọ Ebraham akpọ oḅio phọ?

2. Eeghe kụ iḍighi kụ Ebraham akuphom bọ owol mọ oguan phọ aZihova kamunughan ni?

² Loor iduọn Ebraham amhoọgh bọ siya dị ekpạr r’aZihova, odị “akuphom owol mọ Enaạn ketue ni eḍighi ipẹ dị aguanaan bọ.” (Rom. 4:21) AZihova asighẹ ni Ebraham, kụ agbeelhom nyodị m’oye elhiom eḍighinhom iyaạr loor emhụ omheeraam mọ odị. (Jems. 2:23) Idiphọ Rom 4:18 phọ eḅẹm bọ, Ebraham amhoọgh ni omheeraam r’oḍuom olhoghi. Ooḅeghiọn ipẹ aPọl aghaạph bọ ilọ oḍuom olhoghi siphẹ Rom emhụ phọ 5.

3. APọl aghaạph ika ilọ oḍuomolhoghi?

³ APọl aghaạph ni iyaạr phọ yira otuạn bọ okuphom owol mọ “oḍuom ologhi phọ ophọn iyira ru/bi ghan.” (Rom. 5:5) Odị aḅilhẹ kẹn ulhoghonhaạn iyira ḍighaạgh olhegheri idị yira kotue okparamhị oḍuom olhoghi phọ ayira. Iduọn yira rooḅeghiọn bọ Rom 5:1-5, gbirima idị oḍuom olhoghi phọ anạ aghị ghisigh rakpạr ghan iduọn amem mọ rekị bọ. Emhuoghaạph phọ ephẹn phọ kiḍeenhaan iyira idị yira kotue okparamhị oḍuom olhoghi phọ ayira opuemhi ipẹ edi bọ nyiidiphọ. Ophụr ooḅeghiọn ookiạ oḍuom olhoghi dị aPọl aḅẹm mọ iyira ku/bi.

OOKIẠ OḌUOM OLHOGHI PHỌ AYIRA

4. Eeghe kụ edị oghaạph siphẹ Rom 5:1, 2?

⁴ Bạl Rom 5:1, 2. APọl agẹ ikpo onhụ phọ ipẹ phọ aghiọm ookpomhoghan phọ arọl bọ Rom. Abumor r’abumaranhi phọ abuphẹ phọ motuughạ ilọ aZihova r’aZizọs, omoọgh omheeraam, oḅilhẹ oḍighi Kristẹn. Esi iduọn phọ, “Enaạn metuạn bọ omeeraam mọ esighenọm mọ [bidị] awe aruukuan,” kụ asagharạn bidị uwaloor iigbia. Ii, bidị ukạr kụ omhoọgh ookiạ oḍuom olhoghi.

5. Eeghe oḍuomolhoghi kụ edị abuphẹ osagharạn bọ uwaloor iigbia phọ omhoọgh?

⁵ Onyebel roten kụ aPọl agẹ aghiọm Kristẹn phọ epẹ Efesọs osagharạn bọ uwaloor iigbia phọ ilọ oḍuom olhoghi phọ Enhaạn angọ bọ bidị. Oḍuom olhoghi phọ opọ phọ aḅaramaạm omhoọgh “aḍisẹph phọ dị aguanaan bọ.” (Efẹ. 1:18) APọl aghị ni ghisigh aḅenhị buọ aKolosị phọ ekpisi phọ bidị komoọgh bọ ḍisẹph phọ aḍiphẹ phọ. Odị aḅẹm mọ, “Enaạn meselemi iseenaan inyina epẹ k’akẹ.” (Kọl. 1:4, 5) Esi iduọn phọ, aKristẹn phọ osagharạn bọ opogh rokiọm ghisigh dị koḅeton bidị mem dị bidị omhugh, okeelhom k’akẹ otooghị r’aKraist.—1 Tẹs. 4:13-17; Ogan. 20:6.

6. Eeghe kụ edị oniin odị osagharạn uwaloor iigbia phọ aghaạph ilọ oḍuomolhoghi phọ odị?

⁶ AKristẹn phọ osagharạn bọ uwaloor iigbia phọ omaghamhị ni maạr oḍuomolhoghi phọ opọ phọ. Umor phọ Frederick Franz, aḍighi aani bọ oniin onyọ abuẹn phọ aghaạph ni kekpom mọ: “Oḍuomolhoghi phọ ophọn phọ katu ni onọ. Kụ torobọ onyọ ayoor dị aḍighi aani pakirị 144,000 phọ, oḍighi bọ ḍibạm aḍita phọ kamoọgh ni ruunmo phọ Enhaạn maguanhaan bọ nyodị eten dị u/gbiom olhoghi.” Mem dị odị rokumu Enhaạn eten dị ekpẹ oḍuomolhoghi esi ibadị asiạ, lhạ phọ 1991 Umor phọ Franz aghaạph ni mọ: “[Yoor] okiọm ni ghisigh omaghamhị maạr iboom oḍuomolhoghi phọ ayoor. . . . Iduọn yoor oghiọm bọ ghisigh rokori, kụ edị yoor rosereghiạn ghan bịn. Ekpeanhaạn ni okori, ghalhamọ kesighẹ ni irubal asiạ. Nyiidiphọ mị amaghamhị maạr oḍuomolhoghi phọ ophọn phọ apu mem dị meten.”

7-8. Eeghe oḍuomolhoghi kụ edị ogbogh opol arebenhẹ aZihova omhoọgh? (Rom 8:20, 21)

⁷ Ogbogh opol abuphẹ rooḅereghị bọ aZihova omoọgh onhọn odọ oḍuomolhoghi. Oniin phọ oḍuomolhoghi phọ opọ Ebraham amhoọgh aani bọ—aghuḍum k’agee-pọ siẹn ade phọ eeḍiạn itooghị Omhạr phọ k’Enhaạn. (Hib. 11:8-10, 13) APọl agẹ ni ilọ ookiạ oḍuomolhoghi phọ ophọn phọ rakori bọ buphẹ omhoọgh bọ. (Bạl Rom 8:20, 21.) Eḅẹl amem mọ nạ atuughạ bọ ilọ aruguanhaan aBaibul dị kemite ghisigh, oghẹn kụ akạr aḅeraạn nyinhạ? Oguanhaan phọ aḅẹm bọ mọ nạ kamunughan ḅilhẹ ikarạph ka/ḍighi ghan mun ḍughụm? Obobọ olhoghi anạ kụ aḅaạl olhegheri mọ koḅerion ni buọ ephomhoghiạn anạ esi aḍuugh ḍughụm? Iikia i/lo, “oḍuomologhi phọ ophọn” phọ aḍighi ni idị nạ agbon ghisigh phọ.

⁸ Mughumọ yira omoọgh oḍuomolhoghi oghelhọm aghuḍum k’agee-pọ epẹ k’akẹ obobọ siẹn ade phọ, oḍuomolhoghi phọ opọ phọ ungọ ni iyira riphigh otuạn obo. Kụ yira kotue ni okparamhị oḍuomolhoghi phọ opọ phọ. Ipẹ aPọl aḅilhẹ bọ aghaạph eegholhomhi ni idị yira kotue oḍighi iduọn phọ. Nyiidiphọ, ooḅeghiọn ipẹ odị aghaạph bọ ilọ oḍuomolhoghi phọ ayira. Iphẹn phọ keḍighi idị yira kokuphom owol mọ ipẹ yira oḍuom bọ olhoghi kemite ni.

ILỌ OKPARAMHỊ OḌUOMOLHOGHI PHỌ AYIRA

9-10. Idiphọ eḍeenhaan phọ aPọl emạ bọ emiteom, eeghe kụ edị aKristẹn kogon omhiịn? (Rom 5:3) (Miịn kẹn sifoto phọ.)

⁹ Bạl Rom 5:3. Lọgh elhegh mọ iiḅaghamhị ketue ni ekparamhị aani oḍuomolhoghi phọ ayira. Eeni iphẹn phọ keḍigh ni iikia esi ayira. Kuolọ, ephigh phọ pọ, oomo abumatuạn aKraist kotue ni osoman iiḅaghamhị. Ooḅeghiọn eḍeenhaan aPọl. Odị aḅenhị we aTesalonikạ mọ: “Mem mọ yira orolạn bọ, yoor iphụr ri inyina rurụ mọ igbiphoghọm kemite ni. Kụ idiphọ nyina elegheri bọ ni, iphẹn kụ okaraghị idị memite bọ.” (1 Tẹs. 3:4) Kụ buọ aKorịnt phọ odị aḅenhị mọ: “Iḅeraạn ni iyoor lọ nyina kelegheri aani ilọ iminimiịn phọ yoor omiinọm bọ . . . Yoor [ugbi] ghan mọ ilọ aghuḍum i/lo mun.”—2 Kọr. 1:8; 11:23-27.

¹⁰ AKristẹn ḍio arodon kotue ni kẹn osoman aani odọ kirokirọ iiḅaghamhị. (2 Tim. 3:12) Kokaạph aani ika ilọ anạ? Moghol li emhụ iduọn nạ amheeraam bọ Zizọs aḅilhẹ radạph nyodị ogbiphoghọm nyinhạ ḍughụm? Arighirị r’asiya anạ otue ni ogilaạm nyinhạ. Eeni kẹn bidị mokạr ri ozoọm nyinhạ eten dị i/nighẹ. Oḍighi oye dị akpẹ oḍuomolhoghi otu oḍighi mekọm ni iiḅaghamhị engọ nyinhạ ḍughụm? (Hib. 13:18) Nạ masoman ghan ni isophoghom abuọ agomẹt phọ loor oghaạph iiḅi iinhaghạn? Etigheri torobọ odọ iiḅaghamhị dị eeni yira kosoman, aPọl aḅẹm mọ yira obo ni. Eeghe kụ iḍighi?

11. Eeghe kụ iḍighi kụ ewạ bọ dị yira kosopha okparạm atorobọ iiḅaghamhị lọ iteẹny iyira?

¹¹ Yira kotue ni obo mem dị yira osoman iiḅaghamhị loor esi ipẹ keḍuạ bọ emite. Rom 5:3 eḅẹm mọ, “iiḅaghamị ritughemị ghan iyira okparạm.” Oomo aKristẹn kosoman ni iiḅaghamhị, kụ iḍighi kụ torobọ onyọ aKristẹn amoọgh omhoọgh okparạm. Esi iduọn phọ, ewạ dị yira kosopha okparạm ghan atorobọ iiḅaghamhị dị iteẹny iyira. Yira oḍighi iduọn phọ kụ edị yira komiịn mem dị aruguanhaan phọ yira oḍuom bọ olhoghi kemunughan. I/wạ mọ oghịgh aani buphẹ aZizọs atomaạm bọ iizuphạ phọ emhelheghu bọ de asighiigh. Bidị umheeraam ni oghaạph phọ r’ibo, kuolọ “mem lọ iminimiịn, mughumọ igbiphoghọm” etuạn oghaạph phọ eru, bịn bidị omheel. (Mat. 13:5, 6, 20, 21) Okạr oghaạph, re/dugh ghan okaran iiḅaghamhị, kuolọ yira okparạm kingọ ni iyira suọ. Eghẹn eten?

12. Eeghe asuọ kụ edị yira komoọgh mem dị yira okparaghạm iiḅaghamhị kirokirọ?

¹² Onyọ amatuạn phọ Jems aghaạph ni suọ okparạm ghan iiḅaghamhị. Odị agẹ mọ: “Kụ okparạm mọ anyina ku/dugh r’amem odaanaạn oomo phọ inẹ, obọ aroozọ phọ anyina ekuạ eḅilẹ emunughan, dị r’iyaạr inyina ki/bịph.” (Jems. 1:2-4) AJems aghaạph eten dị eghịgh mudị okparạm amoọgh oḍighi oḍighi. Eeghe kụ oḍighi phọ ongọ bọ okparạm? Okparạm katue ni alhoghonhaạn nyinhạ ḍighaạgh obughẹ eegharạ okori, omhoọgh omheeraam, ḅilhẹ r’obeḍenhọm Enhaạn. Toroboiperolbọ, enhọn eten edi ni dị yira kotue omooghọm suọ mem dị yira okparạm iiḅaghamhị.

13-14. Eeghe kụ reḍuạ ghan kemite mem dị yira okparạm, kụ ika kụ edị retir ghan oḍuomolhoghi phọ ayira? (Rom 5:4)

¹³ Bạl Rom 5:4. APọl aḅẹm mọ okparạm mọ ayira raḍighi ghan idị Enhaạn kameeraam mọ aroozọ phọ ayira “enighẹ ni.” Mem dị nạ akparạm pọ nạ mamhoọgh kuuḅi aghisigh aZihova. Iphẹn phọ re/mạ ghan mọ olhoghi aZihova raḅaạl ghan mem dị yira romiinhọm iiḅaghamhị. Kparipẹ ghụn, olhoghi odị raḅaạl ghan mem dị yira okparạm. P’eeghe imạ!—Ps. 5:12.

¹⁴ Ka/bula mọ Ebraham amhoọgh ni kuuḅi aghisigh aZihova mem mọ akparaghạm bọ odẹgh ophogh kirokirọ. AZihova amhạgh nyodị mọ oyaghirị onọ kụ asighẹ nyodị idiphọ oye elhiom eḍighinhom iyaạr. (Gen. 15:6; Rom. 4:13, 22) Kotue ni okaạph aani igina phọ ilọ ayira. Iyaạr dị rengọ ghan aZihova ibo k’/eepoogh arukumuan dị yira rokelhọm obobọ rukumuan dị yira mokumuan. Kuolọ aloor esi okparạm mọ ayira. Kụ etigheri siạ phọ ayira, sidọl phọ, obobọ olhegheri iyaạr ayira, oomo phọ ayira kotue ni okparạm. Nạ asoman ni nyiidiphọ iiḅaghamhị? Eḍighi idiphọ, pọ eedereghị ni nyinhạ mọ nạ raḍighi ni idị olhoghi aZihova aḅaạl. Olhegheri iphẹn phọ ketue ni itir iyira egey eten. Ketue ni ekparamhị oḍuomolhoghi phọ ayira.

OḌUOMOLHOGHI DỊ AKPẠR

15. APọl aghiọm ghisigh aghaạph eeghe, kụ uḍighi ika kụ ketue bọ egbaragbaramhị buniin awe?

¹⁵ Idiphọ aPọl aghaạph bọ, yira romoọgh ghan kuuḅi aghisigh aZihova esi okparạm iiḅaghamhị kirokirọ. Lọgh elhegh ipẹ aPọl aghiọm bọ ghisigh raghaạph phọ, odị aḅẹm mọ: “Yira motuạn iduọn phọ omoọgh aani oḍuom ologhi, oḍuom ologhi phọ ophọn iyira ru/bi ghan.” (Rom. 5:4, 5) Iphẹn phọ etue ni egbaragbaramhị buniin awe. Eeghe kụ iḍighi? Loor esi dị epẹ omhạn, odaphạn ipẹ ogẹ bọ Rom 5:2, aPọl aḅẹm ni mọ aKristẹn phọ odi bọ Rom omoọgh ni oḍuomolhoghi, “oḍuom ologhi . . . ophin aani abin eegu phọ Enaạn.” Esi iduọn phọ, ibadị otue ni opuru mọ, ‘Eḍighi maạr dị aKristẹn phọ abuphẹ phọ momhoọgh ni oḍuomolhoghi, uḍighi ika kụ aPọl aḅilhẹ bọ agholhom oḍuomolhoghi siphẹ oghaạph phọ odị?’

16. Ika kụ idị oḍuom olhoghi oye ramiigh ghan bọ obụgh? (Miịn kẹn sifoto phọ.)

¹⁶ Yira kotue ni onaghanhạn idị iphẹn aPọl aghaạph bọ remạ ghan, esi ooḅeghiọn omhiịn mọ oḍuomolhoghi aḍighi iyaạr dị rabụgh ghan ni. Esi oghaạph omaaniọm: Nạ aatughiạn ni eḅẹl amem mọ nạ anhaghạn bọ ilọ ookiạ oḍuomolhoghi phọ odi bọ siphẹ Ekpo Onhụ phọ Enhaạn? Mem mọ amuphẹ phọ, eeni nạ uutughiạn mọ oopho asiḍum bịn. Kuolọ, iduọn nạ ralegheri bọ kabughẹ ilọ aZihova r’aruguanhaan aBaibul phọ, bịn nạ aru akuphom owol mọ oḍuomolhoghi phọ ophọn phọ katu ni onọ.

17. Ika kụ idị oḍuomolhoghi phọ anạ rakị ghan ghisigh kabụgh mem dị nạ maḅọgh loor angọ aZihova aḅilhẹ aḍiiny muụm?

¹⁷ Ghalhamọ r’amem dị nạ maḅọgh ni loor angọ aZihova aḅilhẹ aḍiiny muụm, bịn oḍuom olhoghi phọ anạ akiọm ni ghisigh rabụgh idiphọ nạ ratuughạ bọ kabughẹ aḅilhẹ alhegheri iboom aZihova. (Hib. 5:13–6:1) Eeni ipẹ oghaạph bọ siphẹ Rom 5:2-4 memitenhaan aani ni nyinhạ. Nạ masoman ni iiḅaghamhị kirokirọ, kuolọ nạ ukparạm ghan ni, kụ epẹ eekunha phọ nạ amhoọgh kuuḅi aghisigh Enhaạn. Loor iduọn nạ alhegheri bọ mọ aZihova apomhoghiạn aḅilhẹ asereghiạn nyinhạ, nạ mamhoọgh nyiidiphọ iboom ariphigh otuạn ogon araraạr phọ aZihova aguanhaan bọ. Oḍuomolhoghi phọ anạ makpạr apu ipẹ arọl ghan bọ eḅẹl amem mọ. Makạr atu onọ esi anạ. Manme nyinhạ iboom, matir torobọ agạ aghuḍum mọ anạ aḅilhẹ ranme eten phọ nạ razoọm ghan bọ buọ eghunotu anạ, osopha anạ, ghalhamọ r’ipẹ nạ raḍighinhom ghan bọ mem mọ anạ.

18. Eeghe okuphom owol kụ edị aZihova angọ?

¹⁸ Otelhedom mọ aḅarạm ni iyaạr dị emhạn maạr agey dị egbolhomaam oḍuomolhoghi phọ nạ amhoọgh bọ mem mọ nạ mamhoọgh bọ kuuḅi aghisigh Enhaạn. Odị angọ nyinhạ okuphom owol mọ oḍuomolhoghi phọ anạ kamunughan ni. Uḍighi ika kụ nạ kameeraam bọ ni? Siphẹ ipẹ aPọl agẹ bọ aghiọm Kristẹn phọ, odị aḅarạm ni okuphom owol phọ Enhaạn engọ bọ mọ: “Oḍuom ologhi phọ ophọn iyira ru/bi ghan, idị eḍighi bọ Enaạn mesighẹ uwaloor iigbia phọ opọ dị ungọ bọ iyira eloghọm iloghi phọ ayira ephomoghiạn phọ odị emuzeḍi.” (Rom. 5:5) Nạ amoọgh oomo ariphigh otuạn okuphom owol oḍuomolhoghi phọ opọ phọ—aḍighi bọ oḍuomolhoghi phọ anạ.

19. Eeghe kụ edị nạ akuphom owol ilọ oḍuomolhoghi phọ anạ?

¹⁹ Gbirima oguanhaan phọ aZihova aguan bọ Ebraham ḅilhẹ r’ipẹ Enhaạn esighẹ bọ nyodị, kụ aghol bọ mọ oyaghirị Onọ. ABaibul phọ aḅẹm mọ: “Kụ Ebraham makparạm bọ ni akori kụ aạr bọ ipẹ Enaạn eguanaan bọ.” (Hib. 6:15; 11:9, 18; Rom. 4:20-22) Dị iikia i/lo, odị o/mhoọgh mabi. Nạ kameeraam ni r’iitakụ mọ eḍighi maạr dị nạ aphamhanhạm ni dọl dị ekpẹ oḍuomolhoghi pọ oḍuomolhoghi phọ anạ nyinhạ ka/bi. Oḍuomolhoghi phọ anạ onọ ni, iyaạr otuạn omhoọgh ibo, ka/mabi! (Rom. 12:12) APọl agẹ mọ: “Enaạn phọ eḍighi bọ zin oḍuom ologhi imuzeḍinaan inyina oomo oḅaạl ologhi r’eephọ, Ioor omeeraam mọ anyina esi odị, pidị iikpọ uwaloor iigbia phọ eḍighi idị oḍuom oIoghi phọ anyina kapoph ghan bịn akiọm ghisigh.”—Rom. 15:13.