Julai

Yecu olubo lanen pa Wonne kore ki kore i jami ducu ma en owaco dok otimo, ma meno bene kwako tango ma en otimogi. (Jon 14:9) Pwony ango ma wanongo ki i tango ma Yecu otimogi? Yecu kacel ki Wonne gimarowa adada. I kare ma Yecu onongo tye i lobo, en onyuto tut pa marre pi dano ki tic ki tekone me timo tango me konyo jo ma onongo gitye ka deno can. I nino mo acel, lutowang aryo gudange i kore ni okonygi. (Mat. 20:​30-34) Watwero neno ki kany ni “kica omako Yecu i komgi” ci en ocangogi. Kodi kica meno ma obedo lanyut me mar bene otugo cwiny Yecu me pito jo ma kec nekogi ki me cango ladobo mo. (Mat. 15:32; Mar. 1:41) Watwero bedo ki gen matek ni Jehovah, Lubanga me “kica madwong,” kacel ki Wode gimarowa matek dok giwinyo malit ka watye ka deno can. (Luka 1:78; 1 Pet. 5:7) Pud dong gitye ki miti matek ya me kwanyo pekki ducu ma nuro dano i kare-ni! w23.04 3 ¶4-5

Omyero watute matek ki kerowa ducu me gwokke ki kwano nyo winyo tam maraco mapol ma onya i lobo pa Catan. Watwero pongo tamwa ki jami mabeco ka wakwano Baibul i yo matut. Cito i cokke ki nywako i ticwa me pwony bene bigwoko tamwa. Dok Jehovah ocikke ni pe ebiweko kibitowa makato ma waromo cirone. (1 Kor. 10:​12, 13) Mitte ni wan ducu i kare-ni waleg matek makato i kare mo keken wek wamedde ki bedo lugen bot Jehovah i kare me agikki man ma kwo tek-ki. Kwany kare nino ki nino me lega ki cwinyi ducu. Jehovah mito ni ‘wayab cwinywa woko ducu bote’ i lega. (Jab. 62:8) Pak Jehovah dok ipwoye pi jami ducu ma en timo. Leg en wek okonyi me bedo ma cwinyi tek i tic me pwony. Kwaye wek okonyi me lweny ki pekki kun ikwero atematema mo keken ma ikemme kwede. Pe iwek gin mo nyo ngat mo keken ogengi ki lega bot Jehovah kare ki kare. w23.05 7 ¶17-18

Pingo wacito i cokke? Tyen lok me acel ma pire tek loyo aye me pako Jehovah. (Jab. 26:12; 111:1) Ki me aryo, wacito i cokke bene wek wacuk cwiny luwotwa i kare man ma kwo tek-ki. (1 Tec. 5:11) Ka wailo cingwa dok wamiyo lagam, nongo watye ka timo jami aryo magi ducu. Ento tye jami aryo ma twero weko bedo tek botwa me miyo lagam. Watwero bedo ki lworo me miyo lagam nyo waromo bedo ki miti me miyo lagam tyen mapol. Ento i cawa mukene pe ki romo cimowa ka wailo cingwa. Ngo ma twero konyowa me lweny ki ariya magi? Lakwena Paulo owaco ni omyero waket tamwa i kom ‘cuko cwinywa kekenwa.’ Pe wabibedo ki lworo tutwal me ilo cingwa ka wiwa opo ni watwero cuko cwiny jo mukene kadi bed wamiyo lagam mo mayot ma nyuto niyewa. Dok ka pe kicimowa tyen mapol me miyo lagam, watwero bedo ki yomcwiny ni jo mukene me kacokke gunongo kare me miyo lagam.—1 Pet. 3:8. w23.04 20 ¶1-3

Kabaka ocwalo lok angeya! Lujudaya ma onongo gubedo opii i Babilon pi mwaki 70, onongo dong gitye agonya me dok cen i lobogi, Icrael. (Ejira 1:​2-4) Jehovah keken aye onongo twero cobo gin ma kit man. Pingo watwero wacone kit meno? Lubabilon onongo pol kare pe gigonyo opiigi. (Ic. 14:​4, 17) Ento onongo kityeko turo Babilon woko, dok lalocce manyen owaco ki Lujudaya ni gitwero a woko. Lujudaya ducu, tutwalle luwi odi, onongo gitye ki tam ma pire tek me amoka: a woko ki i Babilon nyo medde ki bedo kunnu. Meno onongo pe twero bedo tam mayot me amoka. Jo mapol i kingi onongo dong gutii woko ma pe gitwero woto wot mabor meno. Kit macalo pol pa Lujudaya onongo kinywalogi i Babilon, onongo peya gukwo i kabedo mukene. Onongo pe giwinyo calo lobo Icrael obedo pacogi ento lobo ma kwarigi gua ki iye. Lujudaya mogo nen calo onongo dong gudoko lulonyo i Babilon, dok onongo giromo nongo tek me weko pacigi nyo biacaragi me cito i kabedo mukene. w23.05 14 ¶1-2

Lok pa Lubanga cuko cwinywa me medde ki dongo kit me ciro can nyo diyo cwiny, kica, kacel ki mar. Luka 21:19 waco ni: “Ka wudiyo cwinywu, ci wubilaro kwowu.” Jo Kolocai 3:12 waco ni: “Wuruk cwiny ma miyo wuparo pi can pa luwotwu.” Dok 1 Jo Tecalonika 4:​9, 10 waco ni: “Wun kikomwu yam Lubanga dong opwonyowu woko ni wumarre kekenwu. . . . Ento wabako dogwa botwu ni wumedde ka timo kit meno nakanaka.” Tyeng magi ducu kicoyogi bot lupwonnye ma onongo dong gutyeko nyuto kit me ciro can, kica ki mar. Kadi bed kit meno, onongo mitte ni gumedde ki dongo kit magi. Wan bene omyero watim meno. Me konyi, nen kit ma Lukricitayo me cencwari me acel gunyuto kwede kit magi. I nge meno, nen kit ma itwero lubo kwede lanen pa lupwonnye magi, kun inyuto ni itye ma iyubbe pi twon can madit atika-ni. Dong ka twon can madit atika-ni ocakke, nongo ityeko pwonyo kit me ciro can dok ibimoko tammi me medde ki ciro. w23.07 3 ¶4, 8

Kadi bed watye i kin jo ma kiwirogi nyo “romi mukene,” mitte ni wamedde ki wot i “Yo Maleng.” Timo man bikonyowa me medde ki woro Jehovah i kare-ni, ki dong i kare me anyim ka Ker-ri okelo kwo mamwonya i lobo. (Jon 10:16) Nicakke i mwaka 1919, co, mon, ki lutino milion mapol guweko Babilon Madit, ma en aye dini goba ducu ma i lobo-ni, dok gucako wot i Yo Maleng. Jehovah oneno ni kikwanyo ariya ducu woko ki i yo pa Lujudaya ma onongo gitye ka a ki i Babilon. (Ic. 57:14) “Yo Maleng” ma i kare-ni kono? Mwaki miya mapol ma peya mwaka 1919 oromo, Jehovah otiyo ki co ma onongo gitye ki woro matut pire me yubo yo me a woko ki i Babilon Madit. (Por ki Icaya 40:3.) Gutimo tic ma mitte wek obed yot pi jo ma cwinygi atir me a woko ki i dini goba dok guribbe kacel ki jo pa Jehovah i woro me ada. w23.05 15-16 ¶8-9

Jehovah mito ni wati pire ki yomcwiny dok labongo dic mo. (2 Kor. 9:7) Dong tika omyero wamedde ki tute me cobo yubwa me cwiny kadi bed wape ki miti? Nen kong labol pa lakwena Paulo. En owaco ni: “Acano koma, kun bene aloye calo opiina.” (1 Kor. 9:​25-27) Kadi wa i kare ma Paulo onongo pe ki miti me timo gin ma Jehovah mito, en odine kekene me timone. Tika Jehovah cwinye obedo yom pi gin ma Paulo otimo pire? Ada cwinye obedo yom! Dok Jehovah omine mot pi tutene. (2 Tem. 4:​7, 8) I yo acel-lu, cwiny Jehovah bedo yom me neno ka watute me cobo yubwa kadi bed wape ki miti me timone. Cwinye bedo yom pien en ngeyo ni kadi bed i kare mogo pe wamaro tic meno, ento watimo pi marwa pire. Kit macalo Jehovah ogoyo kwede laa i kom Paulo, En bene bigoyo laane i kom tutewa. (Jab. 126:5) Dok ka wawoto ki neno kit ma Jehovah goyo kwede laane i komwa, ci watwero cako dongo miti pi tic meno. w23.05 29 ¶9-10

Lakwena Paulo oporo jo ma pe gibibwot i nino pa Jehovah ki jo ma gitye ka nino. Pe gingeyo gin ma tye ka timme i ka ngetgi ki kit ma cawa woto kwede. Pi meno, pe gingeyo ka gin mo ma pire tek tye ka timme dok pe gidok iye. Pol pa dano ma i kare-ni, gunino woko i yo me cwiny. (Rom. 11:8) Pe giparo lanyut ma nyuto ni watye ka kwo “i kare me agikki” dok ni twon can madit atika-ni bicakke cokcok-ki. (2 Pet. 3:​3, 4) Ento, wan waniang ni pire tye ka doko tek botwa nino ducu me medde ki bedo ma wangwa twolo. (1 Tec. 5:6) Pi meno, omyero wabed ma komwa opye mot. Pingo? Wek pe warwak wiwa i tim me wibye nyo dorre mogo me jemo ma timme i lobo-ni. Lyeto ma kibiketo i komwa me donyo i jami magi bimedde ameda ka nino pa Jehovah woto ki nyiko cok. Kadi bed kit meno, pe mitte ni wabed ki par i kom kit ma wabidok kwede iye. Cwiny maleng pa Lubanga twero konyowa me bedo ma wiwa opye mot ki me moko tam me ryeko.—Luka 12:​11, 12. w23.06 10 ¶6-7

Gin ango ma itamo iye ka iwinyo nying Samson? Nen calo itamo pi laco mo ma onongo kome tek adada dok meno lok ada. Ento Samson omoko tam marac ma oweko en odeno can malit adada. Kadi bed kit meno, Jehovah oketo cwinye i kom jami ducu ma Samson otimo me tic Pire. Dok Lubanga oweko kicoyo lok madok i kom Samson i Baibul wek obed me pwony botwa. Jehovah otiyo ki Samson me cobo jami madongo me konyo jo Icrael. Mwaki miya mapol i nge to pa Samson, Jehovah oweko lakwena Paulo ocoyo nying Samson i kare ma tye ka ryeyo nying co ma gunyuto niye matek. (Ibru 11:​32-34) Lanen pa Samson twero cuko cwinywa. En ojenge i kom Jehovah kadiwa i kare ma kwo tek adada. Watwero pwonyo jami mapol ki bot Samson dok lanenne twero cuko cwinywa. w23.09 2 ¶1-2

Watwero jingo kerowa me ciro can ka wabedo ka lega bot Jehovah kare ducu kun watite parwa ducu. (1 Tec. 5:17) Twero bedo ni pe itye ka kemme ki peko mo madit i kare-ni. Kadi bed kit meno, tika ilego bot Jehovah kun ipenye pi kony ka iwinyo ni cwinyi tye ka cwer, wi onywene, nyo pe ingeyo gin me atima? Ka kare ducu ilego bot Lubanga wek okonyi ki i pekki matinotino, ci ibitimo meno bene ka itye ka kato ki i pekki madongo i anyim. Meno biweko ibedo ki gen matek ni en ngeyo awene ki gin ma myero en otim me konyi. (Jab. 27:​1, 3) Wabibedo ki kero me ciro twon can madit atika-ni ka wamedde ki bedo lugen bot Jehovah i kare-ni. (Rom. 5:3) Pingo watwero waco meno? Omege ki lumege mapol giwaco ni kare ducu ka gukato ki i peko mo matek, man konyogi me ciro peko mukene. Ka guciro peko moni ki kony pa Jehovah, meno jingo niyegi ni Jehovah tye atera me konyogi. Dong kit macalo gitye ki niye i kom Jehovah, gitwero ciro peko mukene.—Yak. 1:​2-4. w23.07 3 ¶7-8

Mwolo kacel ki kica pa Jehovah tugo cwinye me nyuto niango. Me labolle, Jehovah onyuto ni en emwol i kare ma onongo mito jwero jo maraco ma i Codom. Jehovah otiyo ki lumalaikane me waco ki Lot ni oring woko wa i kin godi. Lot obedo ki lworo me ringo wa kunnu. Pi meno, en obako doge ni kiwek en kacel ki lupacone giring i Joar, taun mo ma Jehovah onongo omoko tamme me jwerone woko bene. Jehovah onongo twero miyo rukca ni Lot myero olub gin ma En owaco-ni kikome. Me ka meno, en owinyo lok pa Lot, dok pe ojwero Joar. (Acak. 19:​18-22) Mwaki miya mapol lacen, Jehovah onyuto cwiny me kica i kom jo ma gibedo i boma me Nineve. En ooro lanebi Yona me waco ki jo Nineve ma kitgi raco-ni ni kibijwero gin kacel ki boma meno woko. Ento i kare ma jo Nineve gungut, kica omako Jehovah i komgi dok pe kijwero boma meno.—Yon 3:​1, 10; 4:​10, 11. w23.07 21 ¶5

Gin ango ma watwero pwonyo ki i lanen pa Yoaci? En onongo tye calo yat ma lwite pe odonyo matut ma ogabbe i kom yat mukene matek. I kare ma yat matek ca—Yekoyada—oto, dok yamo me pwony pa jo mungak ocako kodo, Yoaci opoto woko. Lanene nyuto ni pe omyero wabed luwiny bot Lubanga keken pien ni lupacowa nyo jo mukene me kacokke guwekiwa lanen maber. Me medde ki bedo cok ki Jehovah, myero wajing marwa kacel ki worowa pire ki kwan piwa kenwa, lwodo lok, kacel ki lega kare ki kare. (Jer. 17:​7, 8; Kol 2:​6, 7) Gin ma Jehovah mito ki botwa pe tek tutwal ma pe watwero timone. Gin ma en mito ki botwa tye kicoyo i Latitlok 12:13 [NWT], ma waco ni: “Lwor Lubanga acel me ada dok ilub cikke ducu. Pien man aye tic ma myero dano otim.” Ka walworo Lubanga, wabibedo lugen bote kadi bed wakat ki i peko i kare me anyim. Pe tye gin mo ma bibalo watwa ki Jehovah. w23.06 19 ¶17-19

Cikke pa Lubanga ma tye i Niyabo cura 21 tyeng me 5 cakke kit man, ni: “Ngat ma obedo i wi komker owacci.” (Yabo 21:5a) Tye tyen adek mapatpat i buk me Niyabo ma Jehovah kikome aye oloko. Man labol acel i kingi. Dong ngat ma omoko lok man pe obedo lamalaika, nyo kadi wa Yecu, ento Jehovah kikome! Man nyuto ni watwero geno lok ma en owaco i nge meno. Pingo? Pien Jehovah “pe loko lok goba.” (Tito 1:2) Dong lok ma wakwano i Niyabo 21:​5, 6 bicobbe ada. Nen kong nyig lok man ni: “Nen!” Nyig lok me leb Grik ma kigonyo ni “nen” kitiyo kwede tyen mapol i buk me Niyabo. Dong lok mene ma lubo? Lubanga owaco ni: “Aketo jami ducu doko nyen.” Jehovah tye ka lok i kom alokaloka ma bitimme i anyim. Ento en tye ki gen matek ni cikkene bicobbe ma oweko i leb Grik, lok ma kitiyo kwede nyuto ni alokaloka magi onongo dong gitye ka timme.—Ic. 46:10. w23.11 3-4 ¶7-8

Lakwena Petero omedde ki lweny ki gorone. Tam kong i kom labol magi. I kare ma Yecu otito kit ma ebideno kwede can ci eto wek lok pa lunebi me Baibul ocobbe, Petero ojukke matek. (Mar. 8:​31-33) Tyen mapol, Petero kacel ki lupwonnye mukene-ni gubedo ka laro dito i kingi. (Mar. 9:​33, 34) I dyewor ma Yecu peya oto, Petero oette ci otongo it laco mo woko. (Jon 18:10) I dyewor acel meno, lworo omako Petero matek i kare ma owinyo ngo ma dano gitye ka wacone i kome, dok tyen adek kulu en okwero lajwac ni pe engeyo lareme Yecu. (Mar. 14:​66-72) Yecu pe oilo cinge i kom lakwenane Petero ma onongo cwinye otur adada-ni. I kare ma kicero Yecu, en omiyo ki Petero kare me moko bote ni ada Petero pud mare. Yecu omiyo ki Petero tic me kwayo romine. (Jon 21:​15-17) Petero onongo tye atera me timo tic ma Yecu omine. Dok pi meno, Petero onongo tye i Jerucalem i nino me Pentekote dok obedo i kin jo ma kikwongo wirogi ki cwiny maleng. w23.09 22 ¶6-7

Lakwena Petero ocuko cwiny luelda luwote ni, “Wukwa romi pa Lubanga.” (1 Pet. 5:​1-4) Ka in laelda, wangeyo ni imaro utmegini dok imito cuko cwinygi. Ento i kare mogo, iromo winyo ni itye ki tic mapol nyo inongo ni iol adada ma pe iromo cobo ticci. Gin ango ma itwero timone? Tit ki Jehovah parri ducu kacel ki kit ma imito konyo kwede omege ki lumege. Petero ocoyo ni: “Ngat ma miyo kony oti macalo ngat ma tiyo ki tek ma Lubanga omiyo.” (1 Pet. 4:11) Twero bedo ni omege ki lumege gitye ka lweny ki pekki ma pe kitwero cobogi i lobo man. Ento wi opo ni “lakwat madit” Yecu Kricito, twero konyogi makato. En twero timo meno i kare-ni ki dok i lobo manyen bene. Gin ma Jehovah mito ni luelda gutim aye me maro utmege, cuko cwinygi, ki dok me bedo “lanen maber bot romi.” w23.09 29-30 ¶13-14

Gwokke ki tam pa dano ma pe gilubo cik pa Lubanga. Ka wacako tam calo jo ma pe gilubo cik pa Lubanga, ci wan bene watwero cako cayo Jehovah kacel ki cikke. (1 Kor. 3:19) “Gin ma dano me lobo man gitamo ni obedo me ryeko” pol kare weko dano pe bedo luwiny bot Lubanga. Lukricitayo mogo ma i boma me Pergamo ki Tuatira gucako lubo tam pa dano ma i ka ngetgi ma onongo gimaro tim tarwang dok giworo cal. Yecu omiyo tira magwar bot kacokke aryo magi pien gubedo ka cwako tim me tarwang. (Yabo 2:​14, 20) I kare-ni bene, kiketowa i lyeto wek waye tam ma pe tye kakare. Wadiwa kacel ki luremwa gitwero tute matek wek watam ni wan lugingi tutwal dok watur cik pa Jehovah. Me labolle, gitwero wacciwa ni cobo mitiwa me kom pe obedo gin marac dok ni cik me Baibul madok i kom kit ma atir karene dong okato woko. I kare mukene, waromo cako tamo ni tira ma Jehovah miyowa pe romo. Watwero bene donyo i atematema me ‘medo cik i kom gin ma yam gicoyo.’—1 Kor. 4:6. w23.07 16 ¶10-11

Maliam, min Yecu, onongo mito teko. En onongo pud pe ki ngec mo ka odok i kom gwoko latin ma mege, ento kimine tic me gwoko latin awobi ma bidoko Meciya. En onongo peya ongeyo laco, ento onongo mitte ni otit ki Yucepu ni etye ki ic. Tito lok meno onongo bibedo tek adada. (Luka 1:​26-33) Maliam onongo teko ma en mito nining? En oyenyo kony ki bot jo mukene. Me labolle, en openyo Gabriel ni omine ngec matut madok i kom ticce manyen-ni. (Luka 1:34) Ma pe otero kare i nge meno, en omako wot wa “i lobo ma obedo gotgot” i gang mo me Juda me limo watte Elicabet. Lim meno obedo me kony adada. Elicabet opwoyo Maliam dok Jehovah oweko en oloko macalo lanebi kun tito lok me cuko cwiny madok i kom latin ma tye i i Maliam. (Luka 1:​39-45) Maliam owaco ni Jehovah “otiyo tic matek ki bade.” (Luka 1:​46-51) Jehovah otiyo ki Gabriel kacel ki Elicabet me cuko cwiny Maliam. w23.10 14-15 ¶10-12

Jo manok keken ki i kin lupwonnye pa Kricito aye kiwirogi ki cwiny maleng. Jo magi ma welgi romo 144,000 gibitic macalo lulamdog i polo kacel ki Yecu. (Yabo 14:1) I kare ma pud gitye i lobo, Lubanga wirogi ki cwiny maleng dok lokogi gidoko lutinone kikome. Kabedo Maleng i kema cung pi wat man ma gitye kwede ki Lubanga. (Rom. 8:​15-17) Kabedo Maleng Makato Ducu i kema cung pi polo, ka ma Jehovah bedo iye. “Bongo kicika” ma onongo poko kin Kabedo Maleng ki Kabedo Maleng Makato Ducu cung pi kom Yecu. I kare ma onongo en tye ki kom me remo, onongo pe twero donyo i polo me tic macalo Lalamdog Madit i ot pa Lubanga i yo me cwiny. I kare ma Yecu omiyo kome macalo ginkok pi dano, en oyabo yo me cito i polo pi Lukricitayo ducu ma kiwirogi. Gin bene myero kong guto wek gunong mot me kwo i polo.—Ibru 10:​19, 20; 1 Kor. 15:50. w23.10 28 ¶13

Gideon obedo ma kome opye mot i kare ma jo Epraim guloko kwede ki gero. (Lungol. 8:​1-3) En pe odok i lokgi ki gero. En onyuto ni ebedo ngat mamwol ki tero ite me winyo kokogi kun bene gamo lokgi i yo me kica. Man oweko akemogi ocako dok cen i kome. Luelda ma giryek gilubo lanen pa Gideon ka gitero itgi me winyo lok ki diro kun gidok iye ki mwolo ka kiloko kwedgi i yo marac. (Yak. 3:13) I yo meno, gikonyo me gwoko kuc i kacokke. I kare ma jo mukene gupako Gideon pi loyo lweny i kom jo Midian, en odwoko pak ducu bot Jehovah. (Lungol. 8:​22, 23) I yo ma nining ma co ma kicimogi i kacokke gitwero lubo kwede lanen pa Gideon? Myero gumi pak ducu bot Jehovah pi jami ma gicobo. (1 Kor. 4:​6, 7) Me labolle, ka kipwoyo laelda mo pi dirone me pwony, en twero dok iye ni pwony man oa ki i Lok pa Lubanga dok ni wan ducu wanongo pwonnye ki i dul pa Jehovah. Luelda myero gutam ka ce gipwonyo i yo ma kelo deyo bot Jehovah nyo gitimo mere me ywayo tam pa dano i komgi. w23.06 4 ¶7-8

Ka pe wanongo gin ma walego pire, watwero pennye ki lapeny ni, ‘Tika atye ka lega pi gin ma atir?’ Pol kare watamo ni wangeyo gin maber loyo piwa. Ento jami mogo ma walego pire pe oromo bedo ber piwa. Ka watye ka lega pi peko moni, twero bedo ni Jehovah tye ki yo me cobo peko meno maber loyo yowa. Dok oromo bedo ni jami mogo ma wapenyo pire pe rwatte ki miti pa Jehovah. (1 Jon 5:14) Me labolle, tam kong i kom lunyodo ma gupenyo Jehovah ni ogwok latingi wek pe o a woko ki i ada. Meno gire nen calo lega maber. Ento Jehovah pe diyo ngat mo keken me tic pire. En mito ni wan ducu, kadi wa lutinowa, guyer me tic pire. (Nwo. 10:​12, 13; 30:​19, 20) Pi meno, lunyodo-ni onongo gitwero penyo Jehovah ni okonygi me gudo cwiny latingi wek latin meno omar Jehovah dok odok Lareme.—Car. 22:6; Ep. 6:4. w23.11 21 ¶5; 23 ¶12

Pingo kweyo cwiny jo mukene obedo yo ma pire tek me nyutigi ni wamarogi? Ma lubbe ki buk mo acel, nyig lok ma Paulo otiyo kwede pi “kwe cwiny” gonnye ni “cung i nget ngat moni me cuko cwinye ka en tye ka kato ki i peko madit.” Pi meno, ka wakweyo cwiny omego mo ma tye i can malit, wakonye me medde ki tic pi Jehovah ki gen. Dok kare ducu ka wakweyo cwiny omego nyo lamego mo, wanyutte ni wamare. (2 Kor. 7:​6, 7, 13) Cwiny me kica kubbe macok adada ki miyo kwecwiny. I yo ma nining? Ka ngat moni kica mako i kom lawote ma tye ka deno can, meno tugo cwinye me kweyo cwiny lapeko-ni ki timo gin mo me konye. Dong ka watye ki cwiny me kica, meno konyowa me kweyo cwiny jo mukene. Paulo otito kit ma kica pa Jehovah pi dano tugo kwede Cwinye me kweyo cwinygi. Paulo olwongo Jehovah ni “Won ma lakica, Lubanga ma kweyo cwiny dano ducu.”—2 Kor. 1:3. w23.11 9-10 ¶8-10

Lulub kor Kricito ducu myero gunge ni gibikato ki i can. Nen kong labol pa lakwena Paulo. En owaco bot jo ma i Tecalonika ni: “I kare ma pud watye kacel kwedwu watittiwu con ni, i kare mo i anyim wabineno can, ma dong bene otimme woko kit macalo wungeyo-ni.” (1 Tec. 3:4) Dok bot kacokke ma i Korint en ocoyo ni: “Wamito ni wuniang i kom can ma waneno . . . omiyo pe dong wabedo ki gen mo me bedo kwo doki.” (2 Kor. 1:8; 11:​23-27) I kare-ni bene, Lukricitayo omyero gunge ni gibikato ki i can mapatpat. (2 Tem. 3:12) Ka inyuto niye i kom Yecu dok icako lubo kore, twero bedo ni luremi ki wadini guteri marac. Nyo gwok ladit ticci nyo lutic luwoti giketo aunauna i komi pien ibedo ngat ma genne? (Ibru 13:18) Tika luloc me gamente guketo aunauna i komi pi tito kwena maber bot jo mukene? Paulo owaco ni watwero bedo ki yomcwiny kadi bed wakat ki i can ma nining. w23.12 10-11 ¶9-10

Yakobo okanyo pekki mapol. Awobe pa Yakobo aryo, Cimeon ki Levi, gutimo gin ma olano nying Jehovah dok okelo lewic i kom jo ganggi. Medo i kom meno, Lakeri, dako pa Yakobo ma onongo en maro adada, oto i kare ma tye ka nywalo latingi me aryone. Dok i kare ma kec opoto, onongo mitte ni Yakobo okob wa i lobo Ejipt kun onongo dong otii woko. (Acak. 35:​16-19; 37:28; 45:​9-11, 28) Kadi bed Yakobo okato ki i pekki magi ducu, en pe orwenyo niyene i kom Jehovah kacel ki Cikkene. Dok Jehovah onyuto ki Yakobo ni en tye ki Cwakke. Me labolle, Jehovah omiyo ki Yakobo jami me kom mapol adada. Tam kong bene i kom yomcwiny ma Yakobo obedo kwede i kare ma orwatte ki wode ma en onongo otamo ni oto woko—Yucepu! Wat macok ma Yakobo obedo kwede ki Jehovah okonye me kanyo pekkine. (Acak. 30:43; 32:​9, 10; 46:​28-30) Ka watye ki wat macok ki Jehovah, wan bene wabibedo ki kero me lweny ki pekki ma ngolle atura. w23.04 15 ¶6-7

I Jabuli 23, Daudi otito tekcwiny ma en tye kwede ni Jehovah mare dok bigwokke. En otito wat macok ma tye i kin en ki lakwatte Jehovah. Daudi owinyo agonya me ye ni Jehovah otele, dok en ojenge i Kome i yo ducu. Daudi onongo ngeyo ni Jehovah binyuto mare bote pi kare me kwone ducu. Gin ango ma oweko Daudi obedo ki tekcwiny ma kit meno? Daudi owinyo calo etye ki gwok maber pien Jehovah kare ducu onongo mine jami ma mitte. Daudi onongo bene ngeyo ni Jehovah tye lareme dok ni etye ki cwak pa Jehovah. Meno aye oweko en onongo tye ki tekcwiny ni kadi bed gin ango otimme i kome i anyim, Jehovah bimedde ki mine jami ma mitte. Pien Daudi onongo geno ni Jehovah mare dok bigwokke, man okonye pe me bedo ki par ento me bedo ki yomcwiny dok ma oyeng ki jami ma en tye kwede.—Jab. 16:11. w24.01 29 ¶12-13

Nicakke i kare me Lweny me Aryo me Wi Lobo, jo pa Jehovah gitye agonya me tito kwena i lobe mapol. Ki lok ada, jo mapol gubedo ki kare me ngeyo Jehovah, kacel ki luticce ma gitito kwena i wi lobo ducu-ni. I kare-ni, lumemba me Lukiko Madit gimedde ki yenyo tira ki bot Kricito. Gimito ni tira ma gimiyo obed ma rwatte ki tam ma nongo dong kimoko woko i polo. Dok gitiyo ki luneno me adwol kacel ki luelda me miyo tira bot kacokke. Luelda ma kiwirogi gitye ‘i cing Kricito tung lacuc.’ (Yabo 2:1) Ngene kene ni luelda ducu gitye ki roc dok gitimo bal. Moses ki Yocwa gutimo bal i kare mogo, kadi wa lukwena bene. (Wel 20:12; Yoc. 9:​14, 15; Rom. 3:23) Ento watwero neno ka maleng ni Yecu tye ka tiro lagwok ot ma lagen kacel ki luelda ducu ma kicimogi, dok en bimedde ki timone. Pi meno, watye ki tyen lok maber me geno tira ma en miyo kun wok ki bot jo ma en ocimogi me telo wiwa. w24.02 23-24 ¶13-14

I kare-ni, watwero yomo cwiny Jehovah ka waloko i kome i yo ma nyuto dit pa pwocwa ki marwa pire. Ka watye i tic me pwony, yubwa ma pire tek loyo aye me konyo jo mukene me nyikke cok ki Jehovah, wek gunen Wonwa ma lamar-ri kit ma wan bene wanene kwede. (Yak. 4:8) Cwinywa yom me nyuto bot dano gin ma Baibul tito i kom Jehovah, kun wanyuto kite calo mar, ngolo kop atir, ryeko, teko, ki kite mukene mamwonya. Wapako Jehovah bene ka watute ki kerowa ducu me lubo lanenne. Ka watimo meno, jo mukene gitwero neno ni wapat ki dano ma i lobo man marac-ci dok gitwero penyo pingo. (Mat. 5:​14-16) Ka warwatte kwedgi i kwowa me nino ducu, watwero bedo ki kare me tittigi pingo kitwa pat. Macalo adwogine, jo ma cwinygi atir giromo cako bedo ki miti me nyikke cok ki Lubangawa. Ka wapako Jehovah i yo magi, wayomo cwinye adada.—1 Tem. 2:​3, 4. w24.02 10 ¶7

Me doko laco muteggi i yo me cwiny, mitte ni idong diro mapatpat. Diro magi bikonyi me cobo tic ma i kacokke, me nongo ki gwoko tic ma bikonyi me gwoko jo gangi, ki me bedo ki wat maber ki jo mukene. Me labolle, pwony kit me kwan ki coc maber. Baibul waco ni laco ma kwanyo kare nino ducu me kwano ki lwodo Lok pa Lubanga bibedo ki yomcwiny dok kwone wok maber. (Jab. 1:​1-3) Ka en kwano Baibul nino ducu, en bingeyo kit ma Jehovah tamo kwede, dok bipwonyo kit me keto Ginacoya i tic. (Car. 1:​3, 4) Omegiwa ki lumegiwa gimito kony pa co ma gingeyo pwony ki miyo tira maber ki i Baibul. Ka ingeyo kwan ki coc maber, ci ibibedo ki kare me yubo pwony kacel ki miyo lagam ma konyo jo mukene dok jingo niyegi. Ibibedo ki kare me coyo lok ma pigi tego ma bikonyi me dongo niyeni ki me cuko cwiny jo mukene. w23.12 26-27 ¶9-11

Ka lworo omaki, lwod lok i kom gin ma Jehovah bitimone i kare me anyim. Lapor mo ma kinyuto i gure me rijon me mwaka 2014 onyuto wego mo ma tye ka nyamo kacel ki jo me ode kit ma lok ma i 2 Temceo 3:​1-5 twero bedo pat ka onongo tito kit ma kwo bibedo kwede i Paradic. En owaco ni: “Ento omyero iniang man ni, i lobo manyen, kare me yomcwiny madit loyo bibedo tye. Pien dano bibedo ka maro luwotgi, kun gimaro jami me cwiny, pe gibibedo luwakke ento gibibedo mwol, gibipako Lubanga, gibiwinyo lunyodogi, gibimiyo pwoc, gibibedo lugen, gibimaro jo me odigi, gibitimo kica bot dano, gibilok maber i kom jo mukene, gibibedo jo ma jukke kengi, jo ma pe ger, jo ma gimaro gin maber, jo ma gigenne, luwiny, gimine i te cik, jo ma maro Lubanga ma ka maro yomcwiny, gibimako dini dok gilubo i kitgi ducu kun giye tekone; mok matek i kom jo macalo meno.” Tika in inyamo kacel ki lupaconi nyo luye luwoti kit ma kwo bibedo kwede i lobo manyen? w24.01 6 ¶13-14

Pud dong tye me cuko cwiny me ngeyo ni watye ki cwak pa Jehovah macalo gurup! Baibul waco ni: “[Jehovah] cwinye yom i kom lwakke.” (Jab. 149:4) Ento i kare mogo, jo mukene cwinygi tur adada ma weko gipennye kekengi ni, ‘Tika Jehovah cwinye yom i koma?’ Lutic pa Jehovah mapol ma lugen ma kiloko i komgi i Baibul i kare mogo bene gunongo ni tek me ye ni Jehovah cwinye yom i komgi. (1 Cam. 1:​6-10; Yubu 29:​2, 4; Jab. 51:11) Baibul nyuto ka maleng ni dano ma gitye ki roc gitwero nongo cwak pa Jehovah. I yo ma nining? Omyero wanyut niyewa i kom Yecu Kricito dok wanong batija. (Jon 3:16) I yo meno, wanyuto ki jo mukene ni watyeko ngut i kom balwa dok wakwonge bot Lubanga me timo mitine. (Tic 2:38; 3:19) Cwiny Jehovah bedo yom i komwa ka watimo jami magi wek wanyikke cok kwede. Ka watimo gin ducu ma watwero me gwoko kwongewa me dyere, Jehovah bimiyo cwakke botwa kun nenowa macalo lureme macok.—Jab. 25:14. w24.03 26 ¶1-2

Watwero lubo lanen pa lupwonnye pa Yecu ka wamedde ki tito kwena kadi bed luloc gucikowa ni wajuk tito kwena. Waromo bedo ki gen matek ni Jehovah bikonyowa me cobo ticwa me pwony. Pi meno, leg pi tekcwiny ki ryeko. Leg pi kony pa Jehovah me lweny ki pekki. Pol pa wan watye ka deno can pi two nyo cwercwiny, to pa ngat ma wamaro, peko ma i ot, aunauna, nyo peko mo mukene. Dok pekki mogo calo two gemo ki lweny oweko odoko tek adada me kanyo pekki magi. Tit ki Jehovah kit ma iwinyo kwede kikome. Titte pi pekoni kit ma itwero titone kwede bot laremi mo macok. Bed ki gen ni Jehovah “bikonyi.” (Jab. 37:​3, 5) Mine kenwa i lego Lubanga labongo ilo cingwa bikonyowa me ‘diyo cwinywa i can.’ (Rom. 12:12) Jehovah ngeyo pekki ma luticce gitye ka kato ki iye—“dok winyo kokogi.”—Jab. 145:​18, 19. w23.05 5-6 ¶12-15

Ka watye ki tam ma pigi tego me amoka, bedo ber ka waniang “gin ma Rwot [Jehovah] mito” dok waket i tic. (Ep. 5:17) Ka wanongo cik ma igi lac ma gudo tam ma wamito moko-ni, ci nongo watye ka yenyo tam pa Lubanga i lok meno. Dong ka waketo cik ma igi lac magi i tic, wabibedo ki kare me moko tam mabeco. “Larac-ci,” ma obedo Catan dok lamonewa-ni, mito ni wamedde ki lungo wiwa ka timo jami me lobo man wek pe wabed ki cawa muromo me tic pi Lubanga. (1 Jon 5:19) Lakricitayo twero cako lungo wiye i yenyo cente, kwan i rwom ma lamal, nyo i dog ticce me ka yenyo yo me medo ticce pi Jehovah. Ka en ocako timo meno, ci binen woko ka maleng ni en tye ka tam macalo jo me lobo man ma pe giworo Jehovah. Tye lok ada ni, jami magi pe giraco, ento omyero pe waket pigi mukwongo i kwowa. w24.03 24 ¶16-17