Tika Jehovah Bigamo Legana?

1-2. Pingo kare mogo watwero winyo calo Jehovah pe tye ka gamo legawa?

“BED ki yomcwiny i Rwot [Jehovah], ci en bimiyi gin ducu ma cwinyi mito.” (Jab. 37:4) Man pud dong obedo cikke mamwonya ya! Ento tika omyero watam ni Jehovah bimiyo botwa jami ducu ma wapenye pire cutcut? Pingo lapeny man pire tek? Tam kong i kom labol magi. Laminwa mo ma wiye nono olego Jehovah ni omyero kilwonge i Cukul pi Lutit Kwena me Ker-ri. Ento mwaki mapol okato, ma pe kimedo ki lwonge. Omego mo matidi olego Jehovah ni ocange ki i two malit ma en tye ka canne kwede wek ebed ki kare me cobo tic mapol i kacokke. Ento alokaloka mo obedo pe. Lunyodo mo ma gitye Lucaden gulego ni latingi myero omedde ki bedo i ada. Ento latingi omoko tamme me weko Jehovah woko.

² Twero bedo ni in bene ilego Jehovah pi gin mo, ento pe imedo ki nongo gin meno. Macalo adwogine, itwero tamo ni Jehovah gamo lega pa jo mukene ento pe megi. Nyo itwero tamo ni gwok itimo gin mo marac. Laminwa mo ma nyinge Janeb owinyo kit meno. En kacel ki cware gulego Jehovah pien onongo gitye ki miti matek me tic i Betel. En owaco ni: “Onongo aye ada ni ma pe orii kibilwongowa i Betel.” Ento mwaki mapol okato dok pe kilwongogi i Betel. Jane owaco ni: “Cwinya ocwer dok wiya onywene. Abedo ka pennye kekena ni ngo marac ma atimo ma ocwero cwiny Jehovah. Onongo alego atir ni kilwongwa me tic i Betel. Pingo en pe ogamo legana?”

3. Ngo ma wabinyamo i pwony man?

³ I kare mukene, watwero bedo ka pennye ka Jehovah ada winyo legawa. Kadi wa co mogo ma lugen ma gukwo i kare macon bene gubedo ki tam ma kit meno. (Yubu 30:20; Jab. 22:2; Kab. 1:2) Ngo ma twero weko imoko ni Jehovah bigamo legani? (Jab. 65:2) Me konyowa gamo lapeny meno, wabinyamo lapeny adek magi: (1) Gin ango ma Jehovah bitimo? (2) Ngo ma Jehovah mito ki botwa? (3) Pingo twero mitte ni walok legawa?

NGO MA JEHOVAH BITIMO?

4. Ma lubbe ki Jeremia 29:​12, Jehovah ocikke me timo gin ango?

⁴ Jehovah ocikke ni ebiwinyo legawa. (Kwan Jeremia 29:12.) Lubangawa marowa pien watiyo pire ki gen, pi meno en kare ducu ciko ite me winyo legawa. (Jab. 10:17; 37:28) Ento, meno pe te lokke ni en biminiwa jami ducu ma walego pire. Twero mitte ni wakur wang ma wao i lobo manyen me nongo lagam pi jami mogo ma walego pire.

5. Gin ango ma Jehovah tamo iye ka en tye ka winyo legawa? Tit kong.

⁵ Jehovah tamo i kom kit ma legawa kubbe kwede ki yubbe. (Ic. 55:​8, 9) But yubbe meno kwako pongo lobo ki jo ma luwiny ma guribbe i te Locce. Ento Catan owaco ni dano gibibedo maber ka gilone kengi. (Acak. 3:​1-5) Me moko ni lok pa Catan meno obedo lok goba, Jehovah oye ni dano kong gulone kengi pi kare mo. Ento, loc pa dano okelo pol pa pekki ma wakato ki iye i kare-ni. (Latit. 8:9) Wangeyo ni Jehovah pe bikwanyo pekki magi ducu i kare-ni. Ka ni Jehovah otim meno, ci jo ma pe giye i kom Lubanga gitwero tamo ni dano aye tye ka cobo pekki magi. Gitwero tamo ni dano gitwero lone kengi labongo Lubanga.

6. Pingo omyero waye ni Jehovah kare ducu timo gin ma atir dok i yo me mar?

⁶ Jehovah twero gamo lega aryo marom aroma i yo mapatpat. Me labolle, i kare ma Kabaka Kejekia onongo kome lit adada, en obako doge bot Jehovah ni ocange. Jehovah ogamo legane kun cange woko. (2 Luker 20:​1-6) Ki tungcel, i kare ma lakwena Paulo obako doge bot Jehovah ni okwany ‘okuto ma kirwako i kome,’ ma nen calo obedo peko me yotkom, Jehovah pe okwanyo peko meno. (2 Kor. 12:​7-9) Nen kong bene gin mutimme i kom lakwena Yakobo ki Petero. Kabaka Kerode onongo mito neko gin aryo ducu. Jo me kacokke gulego matek pi Petero dok nen calo gulego pi Yakobo bene. Kineko Yakobo woko, ento kicwalo lamalaika me laro Petero. (Tic 12:​1-11) Watwero pennye kekenwa ni, ‘Pingo Jehovah olaro Petero ento pe Yakobo?’ Baibul pe tittiwa.c Ento watwero bedo ki gen ni Jehovah “maro . . . ngolo kop atir.” (Jab. 33:5) Dok wangeyo ni Jehovah onongo maro Petero ki Yakobo. (Yabo 21:14) I kare mukene, Jehovah pe oromo gamo legawa i yo ma wageno. Ento pien waye ni Jehovah kare ducu timo gin ma atir dok i yo me mar, pe wabedo ka nguru i kom kit ma en oyero me gamo kwede legawa.​—Yubu 33:13.

7. Gin ango ma omyero wagwokke ki timone, dok pingo?

⁷ Myero wagwokke ki poro kwowa ki kwo pa jo mukene. Me labolle, watwero lego Jehovah ni okonywa i yo mo, ento pe wanongo gin ma walego pire. Lacen, watwero winyo ni ngat mukene olego pi gin acel-lu ci Jehovah ogamo legane. Gin ma kit meno otimme i kom laminwa mo ma nyinge Anna. En olego ni cware Matthew, ma onongo tye ki mwaka 39, ocang woko ki i two kanca. I kare meno, lumege aryo ma gutii onongo bene gitye ka yelle ki two kanca. Anna olego matek pi Matthew kacel ki pi lumege magi. Lumege aryo magi gucang ento Matthew oto woko. I acakkine, Anna opennye kekene ka ce lumege magi gucang pien Jehovah aye ma okonyogi. Dok ka Jehovah aye ma okonyogi, ci pingo pe ogamo legane me konyo Matthew? Ngene kene ni, pe wangeyo pingo lumege aryo magi gucang. Ento gin ma wangeyo aye ni Jehovah bigiko pekki ducu dok en tye ki miti madit me cero lureme ma guto.​—Yubu 14:15.

8. (a) Ma lubbe ki Icaya 43:​2, Jehovah konyowa nining? (b) Lega twero konyowa nining ka watye ka kato ki i pekki? (Nen vidio ma wiye tye ni Lega Konyowa me Kanyo Peko.)

⁸ Jehovah bikonyowa kare ducu. Macalo Wonwa ma lamar, Jehovah cwinye pe bedo yom ka watye ka deno can. (Ic. 63:9) Kadi bed kit meno, en pe gengo pekkiwa ducu, ma Baibul poro ki pii ma i kulu nyo leb mac. (Kwan Icaya 43:2.) Ento, en ocikke ni ebikonyowa ka ‘watye ka wok’ ki i pekki magi. Dok kadi bed wakat ki i peko ma nining i kare-ni, en bineno ni wagwoko watwa kwede obedo matek. Jehovah bene miniwa cwiny mere maleng me konyowa me ciro pekki. (Luka 11:13; Pil. 4:13) Macalo adwogine, watwero bedo ki gen ni kare ducu wabibedo ki gin ma mitte kikome me kanyo pekki ki me medde ki bedo lugen bote.d

NGO MA JEHOVAH MITO KI BOTWA?

9. Ma lubbe ki Yakobo 1:​6, 7, pingo omyero wagen ni Jehovah bikonyowa?

⁹ Jehovah mito ni wagene. (Ibru 11:6) I kare mukene, pekkiwa twero nurowa adada. Watwero bene cako bedo ki akalakala ka ce Jehovah bikonyowa. Ento Baibul cuko cwinywa ni ki teko pa Lubanga, watwero ‘kalo wi cel.’ (Jab. 18:29) Dong me ka weko akalakala magi bedo ka dongo i cwinywa, omyero waleg ki niye matek kun wageno ni Jehovah bigamo legawa.​—Kwan Yakobo 1:​6, 7.

10. Mi labol ma nyuto tute ma twero mitte ki botwa i nge lega bot Jehovah pi gin mo.

¹⁰ Jehovah mito ni watim jami ma rwatte ki legawa. Me labolle, omego mo twero lego Jehovah ni okonye wek kimine kare ki i dog ticce me cito i gure madit. Jehovah twero gamo lega meno nining? En twero miyo ki omego-ni tekcwiny me lok ki ladit ticce. Ento bimitte ni omego-ni kikome aye ocit bot ladit ticce me penye. Twero mitte ni en openy tyen mapol. En bene romo dyere me tic i nino mukene wek ebed agonya i nino me gure madit. Dok ka mitte, en twero ye ni kingol centene pien pe ebitiyo i nino meno.

11. Pingo omyero waleg teretere pi jami ma wamito ki bot Jehovah?

¹¹ Jehovah mito ni waleg teretere pi jami ma pigi tego botwa. (1 Tec. 5:17) Kit ma watwero neno kwede ki i lok pa Yecu, pe kibigamo legawa mogo cutcut. (Luka 11:9) Dong pe omyero wail cingwa woko! Leg ki cwinyi ducu dok teretere. (Luka 18:​1-7) Ka wamedde ki lega pi gin moni, wanyuto ki Jehovah ni gin meno pire tek adada botwa. Wanyuto bene ni watye ki niye ni en twero konyowa.

PINGO TWERO MITTE NI WALOK LEGAWA MOGO?

12. (a) Lapeny mene ma watwero pennye kwede madok i kom legawa, dok pingo? (b) Watwero lega i yo ma nyuto woro bot Jehovah nining? (Nen bok ma wiye tye ni “Tika Legana Nyuto Woro pi Jehovah?”)

¹² Ka pe wanongo gin ma walego pire, watwero pennye ki lapeny adek. Lapeny me acel tye ni, ‘Tika atye ka lega pi gin ma atir?’ Pol kare watamo ni wangeyo gin maber loyo piwa. Ento jami mogo ma walego pire pe oromo bedo ber piwa. Ka watye ka lega pi peko moni, twero bedo ni Jehovah tye ki yo me cobo peko meno maber loyo yowa. Dok oromo bedo ni jami mogo ma wapenyo pire pe rwatte ki miti pa Jehovah. (1 Jon 5:14) Me labolle, tam kong i kom lunyodo ma kiloko i komgi i acakki me pwony man. Gupenyo Jehovah ni ogwok latingi wek omedde ki bedo i ada. Meno gire nen calo lega maber. Ento Jehovah pe diyo ngat mo keken me tic pire. En mito ni wan ducu, kadi wa lutinowa, guyer me tic pire. (Nwo. 10:​12, 13; 30:​19, 20) Pi meno, lunyodo-ni onongo gitwero penyo Jehovah ni okonygi me gudo cwiny latingi wek latin meno omar Jehovah dok odok Lareme.​—Car. 22:6; Ep. 6:4.

13. Ma lubbe ki Jo Ibru 4:​16, Jehovah bikonyowa awene? Tit kong.

¹³ Lapeny me aryo twero bedo ni, ‘Tika man aye kare pa Jehovah me gamo legana?’ Watwero winyo calo wamito lagam pi legawa cutcut. Ento ki lok ada, Jehovah aye ngeyo kare maber loyo me konyowa. (Kwan Jo Ibru 4:16.) Ka pe wanongo gin ma walego pire cutcut, waromo tamo ni lagam pa Jehovah tye ni ‘Pe.’ Ento lagamme twero bedo ni ‘Pudi.’ Me labolle, tam kong i kom omego matidi ca ma olego ni Jehovah ocange woko. Ka onongo Jehovah ocange woko i yo me tango, Catan onongo oromo moro adot ni omego-ni omedde ki tic pi Jehovah pien Jehovah ocango twone. (Yubu 1:​9-11; 2:4) Medo i kom meno, Jehovah dong otyeko keto kare ma en bicango iye two ducu. (Ic. 33:24; Yabo 21:​3, 4) Nio wa i kare meno, pe omyero watam ni Jehovah myero ocang twowa woko i yo me tango. Dong omego-ni twero penyo Jehovah ni omine teko ki wic ma opye mot me kanyo twone ki me medde ki tic pi Lubanga ki gen.​—Jab. 29:11.

14. Pwony ango ma wanongo ki i labol pa Jane?

¹⁴ Nen kong labol pa Jane, ma olego me cito ka tic i Betel. I nge mwaki abic, en oniang ni Jehovah ogamo legane ento i yo mapat. Jane owaco ni: “Jehovah otiyo ki kare meno me pwonya jami mapol ki me konya me doko Lakricitayo mucwiny. Onongo mitte ni gena i kome odong. Onongo bene mitte ni apwony kit me kwano Baibul i yo matut. Dok onongo mitte ni apwony ni atwero bedo ki yomcwiny ka mo keken ma atye ka tic iye pi Jehovah.” Lacen kilwongo Jane gin ki cware me cito i tic me limo adwol. Ka en otamo i kom jami mukato, Jane waco ni: “Jehovah gire ogamo legana ento pe i yo ma onongo an abyeko. Otera kare me niang ni lagam pa Jehovah obedo calo mic mamwonya adada. Atye ki pwoc madit ni abedo ki kare me nongo mar kacel ki kicane.”

15. Pingo omyero pe waleg pi gin acel keken? (Nen bene cal.)

¹⁵ Lapeny me adek twero bedo ni, ‘Tika mitte ni aleg pi gin mukene?’ Ber gire me lego pi gin ma wamito-ni kikome. Ento i kare mukene, twero bedo ber pe me lego pi gin acel keken wek waniang gin ma Jehovah mito piwa. Nen kong labol pa laminwa ma wiye nono ca ma obedo ka lega pi mitine me cito i Cukul pi Lutit Kwena me Ker-ri. En mito cito i cukul man wek ebed ki kare me tic ka ma can lutit kwena tye iye. Dong ka en woto ki lega ni kilwonge i cukul man, en twero bene penyo Jehovah ni okonye me niang yo mukene me medo ticce pi Jehovah. (Tic 16:​9, 10) I nge lega i kom lok man, en twero penyo laneno me adwolgi ka ce kacokke mo macok tye ki can lutit kwena. Nyo en twero coyo waraga bot jang gang kal me penyo ka ma can lutit kwena tye iye.e

16. Gin ango ma watwero bedo ki gen iye?

¹⁶ Kit ma wapwonyo kwede, watwero bedo ki gen matek ni Jehovah bigamo legawa i yo ma atir dok me mar. (Jab. 4:3; Ic. 30:18) I kare mukene, pe wanongo lagam ma wamito. Ento Jehovah pe bicayo legawa. En marowa matek. Dok pe biwekowa matwal. (Jab. 9:10) Pi meno, medde ki ‘geno Lubanga kare ducu,’ kun ilego bote ki cwinyi ducu.​—Jab. 62:8.