LAPENY MA KIGAMO ME BAIBUL
Tika nino mo wabibedo ki gamente acel ma loyo lobo ducu?
Gamente ma loyo lobo ducu twero noto dano me rok weng nining? ICAYA 32:1, 17; 54:13
Tam kong adwogi maber ma dano binongone ka gamente acel keken aye loyo lobo ducu. I kareni, dano mapol peko odiyogi pien gitye lucan kun kitung cel jo mukene gulony adada. Ento gamente ma loyo lobo ducu dok niang pekki ma dano tye iye binenone ni emiyo jami ma mitte bot lucan. Tika itamo ni nino mo acel dano gibiketo gamente ma kit meno?—Kwan Jeremia 10:23.
Nicakke wacon, gamente mapat pat pe gumiyo jami ma mitte bot jo ma tye i te telagi, tutwalle lucan. Gamente mogo giloyo jo mukene tektek. (Latitlok 4:1; 8:9) Ento, Lubanga Won Twer Ducu ocikke me kelo gamente ma bileyo ka wang gamente ducu. Lalocce bimiyo jami ma mitte bot dano ducu.—Kwan Icaya 11:4; Daniel 2:44.
Gin Ango ma Ker pa Lubanga Bitimone?
Lubanga Jehovah oyero Laloc mupore ma biloyo lobo ducu—Wode, ma en aye Yecu. (Luka 1:31-33) I kare ma Yecu tye i lobo, en obedo ki miti madit me konyo dano. Ka dong tye Kabaka, en binoto dano me rok weng dok larogi ki i pekkigi ducu.—Kwan Jabuli 72:8, 12-14.
Tika dano ducu gibijolo Yecu macalo Lalocgi? Pe. Ento Jehovah diyo cwinye. (2 Petero 3:9) En tye ka miyo kare bot dano me ye Yecu macalo Laloc. Cokcok-ki, Yecu bijwero jo maraco ki i lobo dok bikelo kuc kacel ki ber bedo i twok lobo lung.—Kwan Mika 4:3, 4.