Yam Kong Itiyo Calo Painia Marii?
1. Mot ango ma dano tye ka nongo mitte, ento ngo ma jo mukene gunongo ni pore pigi?
1 Mwaka ki mwaka, dano alip mapol ginongo mit pa tic me ‘pwonyo dano ki tito lok me kwena maber-ri’ calo jo ma gitiyo pi kare malac. (Tic 5:42) Ento, jo mukene guweko tic macalo painia woko pi tyen lok mapol. Ka onongo yam itiyo calo painia marii, dong ingiyo kwoni i kare-ni me neno ka gwok dok iromo timo tic man?
2. Pingo jo ma con kong gutiyo macalo painia marii myero dok gungi kwogi i kare-ni?
2 Kwo Lokke: Oromo bedo ni gin ma onongo oweko ijuko tic calo painia-ni dong peke. Me labolle, ka iweko tic macalo painia pien onongo pe itwero tic pi cawa 90 dwe ki dwe, tika dok iromo cako tic man kit ma dong mitte ni iti pi cawa 70 keken-ni? Gwok nyo tic me gwoko jo me odi nyo dog ticci dong pe pol calo i kare ma iweko tic macalo painia woko-ni? Lamego mo acel ma ojuko tic macalo painia pi peko me goro kom, onongo kero me dok cen i tic meno odoco ma mwakane 89. En onongo dong orii pi kare makato mwaka acel labongo cito i ot yat kun winyo ni yotkome-ni twero miyo etiyo calo painia odoco!
3. I yo ma nining ma jo me odi giromo ribbe me konyo dano acel i kingi wek oti tic macalo painia?
3 Gwok pe in aye yam itiyo calo painia, ento ngat acel i kin jo me otwu ojuko tic man wek ekony gwoko ngat mo ma kome lit i kinwu, calo lanyodo mutii woko. (1 Tem. 5:4, 8) Ka kumeno, ci in nyo ngat mo i kin jo me otwu, tika wuromo konyo i timo tic man? Pingo pe wulok iye kacel? (Car. 15:22) Ka ce jo me ot guribbe wek ngat acel i kingi oti macalo painia, gin ducu giwinyo calo gitye ka nywako i tic meno.
4. Ngo ma iromo timone ka pe itwero dok i tic macalo painia kombeddi?
4 Pe cwinyi otur ka kwoni kombeddi pe ye ni idok i tic macalo painia marii. Miti ma itye kwede me tic macalo painia yomo cwiny Jehovah. (2 Kor. 8:12) Ti ki diro ma inongo i kare ma onongo itye painia ca maber i ticci me pwony kombeddi. Ket mitini i lega, dok ibed ki wang ma twolo me neno kare mo keken me loko kwoni. (1 Jon 5:14) Gwok nyo i anyim, Jehovah biyabo boti ‘doggola malac me tic’ wek inong yomcwiny me tic calo painia doki!—1 Kor. 16:9.