Ti ki Yo me Cako Lok ma Tugo Miti
1. Ngo ma watwero pwonyone ki i yo mapatpat ma Lukricitayo me kare macon gutiyo kwede me cako lok ki dano?
1 Lukricitayo me kare macon gutito kwena maber-ri bot dano me kaka ki dini mapatpat. (Kol. 1:23) Kadi bed ni gutito kwena acel keken—i kom Ker pa Lubanga—yo ma gutito kwede olokke ma lubbe ki jo ma winyogi. Me labolle, i kare ma Petero onongo tye ka lok ki Lujudaya ma giworo Ginacoya adada, en ocako ki nyamo lok pa lanebi Joel. (Tic 2:14-17) Ki tungcel, nen kit ma Paulo onyamo kwede lok matut ki Lugrik i Tic pa Lukwena 17:22-31. I kareni, jo me wang tic mogo gijolo Ginacoya, dok man miyo wabedo agonya me lok kwedgi i kom Baibul ka wacito i ot ki ot. Ento, omyero wagwokke ka watye ka lok ki jo ma gipe ki miti i kom Baibul nyo dini, nyo jo ma gitye i dini mapat ki pa Lukricitayo.
2. I yo ango ma watwero tic ki bukke ma watero dwe ki dwe me konyo jo ma giworo Baibul, kacel ki jo ma pe gijolo bene?
2 Ti Maber ki Bukke ma Watero Dwe ki Dwe: Pi mwaka me ticwa man, bukke ma wabitero bibedo ka lokke i nge dwe aryo aryo, dok wabitero tutwalle magajin, trak, ki brocuwa. Kadi dano me wang ticwa pe gimito lok i kom Baibul, pud watwero nywako lok kwedgi kun watiyo ki bukke ma gudo cwinygi. Kadi bed pe wakwano ginacoya mo nyo waloko i kom Baibul i limwa mukwongo, ento ka rwod ot onyuto miti ci waromo dok cen ki yub me konye wek odong niyene i kom Lacwec ki Lokke. Ki tungcel, ka watye ka tito kwena i kabedo ma danone woro Baibul, watwero tic ki bukkewa kacel ki yo me cako lok mupore. Watwero bene tic ki buk me Baibul Pwonyo nyo brocuwa me Winy Lok pa Lubanga nyo Winy Lok pa Lubanga Wek Ibed Kwo Nakanaka kadi bed pe gitye i kin bukke ma watye ka tero i dwe meno. Gin ma pire tek aye ni wati ki yo me pwony ma tugo mitigi.
3. I yo ma nining ma cwiny dano me wang ticwa tye calo ngom?
3 Yub Ngom me Coyo Kodi: Cwiny dano obedo calo ngom i yo mapol adada. (Luka 8:15) Ngom mukene mito ayuba maber ka wek kodi me ada omok matek ci odong. Lukricitayo me cencwari me acel gupito kodi i kit ngom mapat pat, ci meno okelo botgi yomcwiny ki yengo. (Tic 13:48, 52) Watwero nongo adwogi ma rom ka waketo cwinywa i kom yo ma watiyo kwede me cako lok.