Nen Mono Nining?

Man obedo lapeny maber me apenya i kom bukkewa mo ma wamito terone bot dano. Bukkewa mo ma doge onyamme, ma kalane olokke, ma cilo omako, nyo ma oyec balo nying dulwa dok twero dwoyo tam pa rwod ot woko ki i kom kwenane mamwonya dok ma laro kwo-ni.

Waromo gwoko bukkewa maber nining? Pol pa lutit kwena ginongo ni tye me kony, ka guketo bukkewa ma kitgi acel kacel i kicaagi. Me laporre, giromo keto bukke kacel, magajin ki brocuwa kacel, trak kacel ki dong bukke mukene-gu kacel. Ka gitye ka dwoko Baibul-gi ki bukke mukene i kicaa, gigwokke ki keto bal mo i kom bukke. Lutit kwena mukene gigwoko bukkegi i baaca ma plastic. Dong kadi watiyo ki yo mapat pat me gwoko bukkewa, pe wamito ni ngat mo owacci ticwa me pwony rac ni pien watero bukke ma pe wagwoko maber.—2 Kor. 6:3.