Bok Me Lapeny

◼ Ngo ma myero okonywa me moko ka ce mitte ni wami buk bot ngat moni?

Gin ma pire tek aye miti ma ngat moni tye kwede. Ka ce ngat meno onyuto miti me ada, waromo miyo magajin aryo, brocuwa acel, nyo buk mukene mapat. Pud waromo miyo buk kadi ka waniang ni ngat meno centene me amiya pi konyo tic me tito kwena i twok lobo ducu-ni tidi nyo pe. (Yubu 34:19; Yabo 22:17) Kitungcel, pe waromo miyo bukkewa ma pigi tego bot ngat mo ma cwinye nok.—Mat. 7:6.

Rwod ot romo nyuto miti nining? Gin ma nyuto aye ka en tye ki miti me lok kwedwa. Ka en keto cwinye ka watye ka lok kwede, gamo lapeny, ki dong miyo tamme. Lubo lok ma watye ka kwanone ki i Baibul nyuto woro pi Lok pa Lubanga. Pol kare ber tutwal me penyo en ka ce en bikwano buk ma wabimiye-ni. Lutit kwena myero guti ki ryeko me niang ka ngat moni tye ki miti. Me laporre, ka watye ka miyo caden i teng gudo, pe pore me miyo magajin, brocuwa, nyo buk ata bot ngat mo keken ma tye ka kato. Ka cwinywa gung i kom miti ma ngat moni onyuto, ci bedo ber ka wamiyo trak nyo karatac calo me lwongo pi cokkewa.

I yo acel-lu, wel bukke ma latit kwena moni gamo myero olubbe ki wel bukke ma latit kwena meno mito pi ticce me pwony ento pe ma lubbe ki tekone me miyo mot. Cente ma wamiyo pe tye me culo pi bukkewa ento me tyelo kor ticwa ducu ma kwako tito kwena i twok lobo lung. Labongo paro pi wel cente ma watye kwede, pwoc ma watye kwede biweko wamiyo mot me teno kor tic me Ker-ri ki i kom cente ma ticce tye botwa, ento pe ki i kom cente ma ticce pe botwa. (Mar. 12:41-44; 2 Kor. 9:7) Man bene bimiyo wagamo bukke ma wamitogi keken, ma weko pe wabalogi abala.

[Boro buk i pot karatac 2]

Lutit kwena myero guti ki ryeko me niang ka ngat moni tye ki miti