Tika Itwero Nywako i Tic me Miyo Caden Otyeno?
1. Ma lubbe ki lok ma i buk me Daily Life in Bible Times, lakwena Paulo onongo woto i ot ki ot cawa mene?
1 Ma lubbe ki lok ma kicoyo i buk me Daily Life in Bible Times, lakwena Paulo pol kare owoto i tic me pwony i ot ki ot “cakke cawa 10 me otyeno nio wa i cwiny dyewor.” Pe wangeyo gire ka meno onongo kit yub pa Paulo, ento wangeyo ni Paulo onongo mitine tye me ‘tiyo jami ducu pi lok me kwena maber.’ (1 Kor. 9:19-23) Man onongo kwako keto yub mogo me wot i ot ki ot i cawa ma en romo lok ki dano mapol.
2. Ngo mumiyo otyeno obedo kare maber me nywako i tic me pwony?
2 Lutit kwena me kabedo mapol giwoto i ot ki ot odiko i nino mogo me cabit. Ento i kabedowu, meno mono aye pud obedo cawa maber loyo me cito i ot ki ot? Ma dok i kom wang ticgi, lapainia acel owaco ni: “Pol kare pe inongo ngati mo gang i dyeceng. Ento i poto ceng pol pa dano nongo gitye gang.” Miyo caden otyeno twero weko wanongo kare me tito kwena maber-ri bot co mapol. Pol kare nongo rwod ot tye obedo mot dok ye boko lok. Ka opore piwu, luelda myero guyub cokke me cito ka pwony i otyeno.
3. Watwero nyuto diro nining ka watye ka nywako i miyo caden otyeno?
3 Ti ki Diro: Ka itye ka nywako i tic me miyo caden otyeno, mitte ni iti ki diro. Me labolle, ka io bot rwod ot i cawa ma pe ber bote, calo i cawa ma en tye ka cam, bedo ber ka iwacce ni ibidwogo i nino mukene. Ka idwongo doggola, cung ka ma rwod ot twero neni iye, nyut-te bote oyotoyot dok itit tyen lok me lim-mi. Bedo me ryeko bene ka wutiyo otyeno ma nongo piny peya oyuto. Pe imedde ki tic ka cawa dong okato woko ma miyo iyelo jo ma gitye ka yubbe me nino. (2 Kor. 6:3) Wugwokke ki tic i kabedo ka ma kingeyo ni tim aranyi dwong iye i dyewor.—Car. 22:3.
4. Mot ango ma wanongo pi nywako i tic me miyo caden otyeno?
4 Mot ma Wanongo: Ticwa me pwony keliwa yomcwiny madwong ka wanongo dano ma watwero miyo botgi caden. Ka wamiyo cawa muromo pi miyo caden, ci wabedo ki kare me konyo jo mukene pien Lubanga mito “laro jo ducu, dok mito ni jo ducu gunge lok me ada.” (1 Tem. 2:3, 4) Tika iromo loko yubbi wek inywak i miyo caden ki otyeno?