Wujolgi Maber!
1. Kwer mene ma miyo kare maber loyo me miyo caden bot dano, dok pingo?
1 Pe tye kwer mukene ma miyowa kare maber me miyo caden bot dano calo Nipo ma wakwero mwaka ki mwaka-ni. Tam kong: I mwaka me ticwa-ni, wageno ni dano milion apar ki wiye gibibedo tye i kwer me Nipo, dok gibiwinyo pwony i kom mar aryo ma pud dong loyo mar ducu, ma kinyuto botwa pi mic me ginkok-ki. (Jon 3:16; 15:13) Gibipwonyo lok i kom mot ma gitwero nongone pi mic me ginkok ma Jehovah omiyo-ni. (Ic. 65:21-23) Ento pe lalok keken aye bimiyo caden i kare me kwer man. Jo ducu ma gitye gibibedo ki kare me miyo caden magwar ki jolo wele maber.—Rom. 15:7.
2. Watwero jolo wele ki yomcwiny nining?
2 Ka io con, ma ka bedo mere mot kun ikuro ni cokke ocakke, pingo pe ikwany kare me lok ki jo ma gubedo cok kwedi kun ititte botgi? Wele mogo giromo bedo lwor pienni pe gingeyo ngo ma timme i kwer me Nipo. Ka wamotogi kun wabwunyo ki yomcwiny, ci bikweyo cwinygi dok bimiyo giwinyo agonya. Ka wamito ngeyo ka ce ngat moni obino pien onongo karatac me lwongo, ci watwero penye ka man obedo tyen me acelle me bino i cokkewa, nyo ka tye ngat mo ma en ngeyo i kacokke. Itwero bene kwaye me bedo kacel kwedi wek wunywak kwede Baibulli ki bukki me wer. Ka wutye ka tic ki Ot me Ker pi kwer man, itwero tic ki cawa manok me nyuto bote jami ma pigi tego i Ot me Ker. I nge pwony, cwal cawa mo manok me gamo lapeny ma en tye kwede. Ka ce mitte ni kacokkewu myero oa woko oyotoyot me weko kabedo pi kacokke mukene, ci iromo wacci: “Amito ngeyo tammi i kom pwony ma wanongo tin-ni. Tika tye yo mo ma watwero rwatte doki?” Ci iket yub mo me medde ki dongo mitine i nino mukene. Luelda tutwalle, myero gubed atera me cuko cwiny latit kwena mo keken ma ticce okwe woko ma obino pi kwer man.
3. Pingo pire tek ni watute matek me konyo welle ma gibino pi kwer me Nipo?
3 Man bibedo tyen mukwongo bot wele mapol me neno yomcwiny, kuc, ki note ma watye kwede i paradic me cwiny calo jo pa Jehovah. (Jab. 29:11; Ic. 11:6-9; 65:13, 14) Tam ango ma wele gibidok kwede gang? Lagam me lapeny meno jenge i kom kit ma wajologi kwede.