KIT ME JWAYO CWINY ME ADAGE

1 | Pe Ipok Kin Dano

Baibul Waco Ni:

“Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”—TIC PA LUKWENA 10:34, 35.

Tyen Lokke:

Lubanga Jehovaha pe poko kinwa ma lubbe ki rok, kaka, rangi del kom, nyo tekwarowa. Me ka meno, en neno gin ma pire tek loyo—ma obedo tamwa ki mitiwa. Baibul bene waco ni, ‘Dano neno kom ma woko, ento Jehovah neno cwiny.’—1 Camuel 16:7.

Gin ma Itwero Timone:

Kadi bed ni pe watwero ngeyo ngo ma tye i cwiny dano, pud watwero tute me lubo lanen pa Lubanga kun pe wapoko kin dano. Watute me niang kit pa dano ki acel acel ento pe macalo gurup. Ka iwinyo calo itye ki cwiny marac i kom jo mukene—gwok nyo i kom jo me kaka nyo rok moni—leg bot Lubanga wek okonyi me jwayo cwiny ma kit meno woko. (Jabuli 139:23, 24) Ka ilego bot Jehovah ni okonyi ibed ngat ma pe poko kin dano, itwero geno ni en biwinyo legani dok bikonyi.—1 Petero 3:12.

a Jehovah nyo Yawe obedo nying Lubanga.—Nia 3:15, lok ma i tere piny.

“Ma naka yam onongo peya abedo piny kacel ki muno mo ma kuc tye i kinwa . . . Ento i kare-ni dong adoko ngat acel i kin utmege milion mapol.”—TITUS

Gin Mutimme i Kwo—TITUS

Oloyo Cwiny me Adage

Laco mo ma nyinge Titus onongo kiniga make matek pi cik me apokapoka ma kwako rok mapatpat. Pi man, en odonyo i gurup pa co mogo ma giwinyo kit meno bene. En owaco ni: “Onongo wacito i kabedo mapatpat i bomawa ka ma pe kijolo iye ocol, calo otel nyo ka mato kongo, ki miti me tugo lweny.” Titus owaco ni pien cwinye onongo opong ki kiniga, omiyo edoko ger adada, dok omedo ni: “Ka acako laro lok ki ngat mo, kadi bed en laco nyo dako, onongo aneno ni an aye acako donge.”

Titus ocako loko kwone i kare ma ocako kwano Baibul ki Lucaden pa Jehovah. Kwano lok me Baibul ogudo cwinye matek. Gin ma ogudo cwinye loyo obedo cikke pi anyim ma “to bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”—Niyabo 21:3, 4.

I acakkine, Titus olwenyo matek ki cwiny me adage. En owaco ni, “Obedo tek adada me loko tamma ki kit ma onongo atimo kwede jami.” Ento gin ma okonye aye lok ma kicoyo i Tic pa Lukwena 10:34, 35, ni Lubanga pe poko kin dano.

Adwogine obedo nining? Titus otito ni: “Amoko ni Lucaden pa Jehovah aye dini me ada i kare ma aneno mar ma tye i kingi, kadi bed gia ki i rok nyo kaka mapatpat. Kadi wa i kare ma peya anongo batija macalo Lacaden, omego mo ma muno olwonga gange ka cam. Onongo tye calo lek. Ma naka yam onongo peya abedo piny kacel ki muno mo ma kuc tye i kinwa, makatone cam i gange. Ento i kare-ni dong adoko ngat acel i kin utmege milion mapol.”