KIT ME JWAYO CWINY ME ADAGE

2 | Pe Icul Wang Gin Marac

Baibul Waco Ni:

“Pe wucul wang gin marac ki gin marac i kom dano mo. . . . Ka ce twerre ki tung botwu, myero wubed ki kuc ki dano ducu. Luwota ma amaro, pe wucul kwor, . . . pien yam gicoyo ni, ‘“An aye ma abiculo kwor, abiculo wange lacen,” man Rwot [Jehovah] ma owaco.’”—JO ROMA 12:17-19.

Tyen Lokke:

Ka ngat mo oketo awano i komwa, ngene kene ni wakeco, ento Lubanga pe mito ni watem culo wang gin marac meno. Me ka meno, en mito ni wadi cwinywa pien en ocikke ni ebikwanyo tim me ngolo kop alenga ducu.—Jabuli 37:7, 10.

Gin ma Itwero Timone:

Ka dano ma gitye ki roc giculo wang gin marac, cwiny me adage meno nya medde ameda. Dong, ka ngat mo ocwero cwinyi nyo oketo awano i komi, pe icul wange. Tute matek me diyo cwinyi kun itere i yo me kuc. I kine mukene, cayo bal meno woko weko pe iwinyo malit tutwal. (Carolok 19:11) I kare mogo, twero mitte ni idot bal meno wek kicob lokke woko. Me labolle, ka kitimo bal mo i komi ci itwero yero me dotone bot polic nyo lutela mupore.

Culo wang gin marac medo peko ameda

Ento ket kong ni itamo ni pe tye yo mo me cobo pekone i yo me kuc? Nyo itute me cobone i yo me kuc ento pe onyako nyige? Pe icul wang gin maracki gin marac. Timo meno bimedo peko man ameda. Ka iyero me cayo bal meno ci ibijuko nya pa cwiny me adage. Itwero pwonnye bene me geno yo pa Lubanga me cobo peko. Baibul waco ni, “Gen en, ci en bikonyi.”—Jabuli 37:3-5.

Gin Mutimme i Kwo—ADRIÁN

Oloyo Cwiny me Culo Kwor

I kare ma en tye ki mwaka apar ki wiye, Adrián onongo cwinye opong ki adage dok onongo ka ngat mo owane, en bene wano ngat meno. En owaco ni: “Onongo pol kare anywako i lweny ki muduku, dok tyen mapol kiweka i teng gudi ma nongo koma opong ki remo kun kitamo ni ato woko.”

Adrián ocako kwano Baibul ma onongo tye ki mwaka 16. En owaco ni: “Ma onongo atye ka medde ki kwanna me Baibul, aniang ni omyero atim alokaloka i kita.” Onongo mitte ni en ojwa cwiny me adage woko dok owek tim bwami. En opwoyo tutwalle pwony ma tye i Jo Roma 12:17-19 ma waco ni pe omyero kicul wang bal mo. En owaco ni: “Acako ye ni Jehovah aye bikelo ngolo kop atir i yone ki karene. Motmot ajuko lweny ki tim gero.”

I otyeno mo, gurup pa bulu ma yam gilwenyo ki gurup pa Adrián macon-ni gucako lweny i kome. Laditgi odange ni: “Nyutiwa tekoni!” Adrián otito ni: “Cutcut awinyo calo omyero alweny i komgi.” Ento me kaka lweny, en olego lega macek bot Jehovah ci oa woko ki kenyo.

Adrián omedde ni: “Orwone aneno laditgi, ento i cawa meno, en onongo tye kene. Kiniga me culo wang gin mutimme opong i cwinya adada, ento alego lalingling bot Jehovah kun abako doga ni okonya. Atamo ni en bicako lweny, ento ki ur madit en obino bota ci owacca ni: ‘Timma kica pi gin ma otimme laworo otyeno. I ada, amito bedo calo in. Amito kwano Baibul.’ Cwinya obedo yom adada ni onongo ajuko kinigana! Ki pwoc madit, acako kwano Baibul kwede.”