KIT ME JWAYO CWINY ME ADAGE

3 | Jwa Adage Woko Ki I Tammi

Baibul Waco Ni:

“Wuwek Lubanga olok tamwu odok nyen, wek omi wuniang i gin ma Lubanga mito, gin maber, ma yomo cwinye, ma roc mo pe iye.”—JO ROMA 12:2.

Tyen Lokke:

Gin ma watamo pire tek bot Lubanga. (Jeremia 17:10) Omyero wagwokke ki lok nyo timo jami ma kelo adage, ento omyero watim makato. Tim me adage cakke ki tam ma watamo kacel ki cwinywa. Pi meno, omyero wajwa cutcut tam mo keken i kom jami ma kelo adage. Meno keken aye kit me ‘loko tamwa’ kun walwenyo ki cwiny me adage.

Gin ma Itwero Timone:

Ngi kong kit ma itamo nyo iwinyo kwede i kom jo mukene—tutwalle jo me rok nyo lobo mapat ki megi. Pennye kekeni ni: ‘An anenogi nining? Tamma i komgi tika rwatte ki lok ma angeyo i komgi? Nyo mono alubo tam me apokapoka?’ Gwokke ki neno nyo kwano jami ma tye i Intanet ma nyayo adegadega ki tim gero.

Lok pa Lubanga konyowa me jwayo adage woko ki i tamwa ki cwinywa

Ngiyo tamwa ki cwinywa i yo ma opore pe yot kare ducu. Ento Lok pa Lubanga twero konyowa me “poko par ki tam mabecone ki maracone ma tye i i dano.” (Jo Ibru 4:12) Omyero wamedde ki ngiyo lok ma i Baibul. Por gin ma Baibul waco ki gin ma itamo, dok itute matek me pwonyo kit me tam i yo ma yomo cwiny Lubanga. Lok pa Lubanga twero konyowa me lweny ki adage ma omoko matek calo “cel gogo” i tamwa ki cwinywa.—2 Jo Korint 10:4, 5.

Gin Mutimme i Kwo—STEPHEN

Oloko Kit ma En Onongo Tamo Kwede

Stephen kacel ki wadine gukato ki i adegadega ma muni gutimo i komgi. Macalo adwogine, en odonyo i gurup pa jo me wibye ma gitiyo ki tim gero me lweny pi twero pa dano. Lacen, en bene ocako timo tim gero. Stephen owaco ni: “I nino mo, an ki lurema mogo waneno filim mo ma nyuto kit ma opii me Afrika gudeno kwede can i lobo Amerika. Kiniga omakowa adada ma oweko wacako lweny i kom bulu ma gitye muni i ot cinema meno. Lacen wacito i kabedo ma muni bedo iye, kun wayenyo jo mukene me agoya.”

Cwiny Stephen olokke woko i kare ma ocako kwano Baibul kacel ki Lucaden pa Jehovah. Wiye po ni: “Pien onongo aneno tim me apokapoka i kwona pi bedo ocol, abedo ki ur madit i kare ma aneno kit ma Lucaden gimare kwede i kingi. Me labolle, i kare ma Lacaden mo ma tye muno onongo tye ka cito i lobo mukene, en oweko lutinone bot jo me ot mo ma gitye ocol. Medo i kom meno, jo me ot mo ma gitye muni gujolo bulu ma tye ocol me bedo i ganggi.” Stephen oneno ni Lucaden gubedo jo me ot ma gimare, dok man okonye me niang ni Lucaden gitye ka cobo cikke pa Yecu ni lulub kore gibinyuto mar me ada.—Jon 13:35.

Gin ango ma okonyo Stephen me juko tim gero ki jwayo cwiny me adage? Ginacoya ma tye i Jo Roma 12:2 okonye me timo alokaloka. En owaco ni: “Aniang ni omyero alok kit ma atamo kwede. Onongo mitte ni ajuk tim gero dok apwony ni bedo ngat ma kelo kuc obedo yo me kwo maber loyo ducu.” Stephen dong onongo mit pa kwo labongo tam me adage i cwinye pi mwaki makato 40 kulu.