KIT ME JWAYO CWINY ME ADAGE

4 | Nong Kony Pa Lubanga Me Loyo Adage

aibul Waco Ni:

“Nyig ma nyak pi cwiny maleng gin aye mar, yomcwiny, kuc, diyo cwiny, kica, ber, gen, mwolo, gwokke ken.”—JO GALATIA 5:22, 23.

Tyen Lokke:

Loyo cwiny me adage pe twere labongo kony pa Lubanga. Cwiny maleng pa Lubanga romo konyowa me dongo kit mabeco ma pe watwero dongone piwa kenwa. Dong, me kaka temo loyo adegadega kekenwa, omyero wajenge i kom kony ma Lubanga miyo. Ka watimo meno, ci waromo nongo adwogi maber calo lakwena Paulo ma ocoyo ni: “Tek madwong me twero obedo gire pa Lubanga, pe oa ki botwa.” (2 Jo Korint 4:7) Ki lok ada, wabibedo ki kero me waco ni: “Kony ma amito-ni a ki bot Rwot [Jehovah].”—Jabuli 121:2.

Gin ma Itwero Timone:

“Jehovah oloko an laco ma yam ger, adoko laco ma maro kuc.”—WALDO

Leg bot Jehovah, kun ibako dogi bote pi cwiny maleng. (Luka 11:13) Lege pi kony me nyako nyig mabeco magi i kwoni. Kwan pwony ma i Baibul i kom kit mabeco calo mar, kuc, diyo cwiny, ki jukke ken; ma gikonyowa me loyo kit maraco. Yeny yo me dongo kit mabeco magi i kwoni. Mak lurem ki jo ma gimito dongo kit mabeco magi. Lurem magi giromo ‘tugo cwinyi i mar ki tiyo tic mabeco.’—Jo Ibru 10:24.

Gin Mutimme i Kwo—WALDO

Oloyo Adage ki Tim Gero

Laco mo ma nyinge Waldo okato ki i kwo matek adada i kare ma en tye ka dongo. En owacci: “Pol kare onongo walwenyo ki lucat jayi ma i dye boma . . . I kare mo, gurup ma onongo gimaro lweny kwedwa guculo lanek mo ma oywek ni oneka woko ento abwot ki bur me pala ma kicoba kwede keken.”

Waldo cwinye pe obedo yom i kare ma dakone ocako kwano Baibul ki Lucaden pa Jehovah. En owaco ni: “Onongo adag Lucaden pa Jehovah adada, dok adange ki yet i komgi tyen mapol. Ento kare ducu gugama ki kuc.”

I nge kare mo, Waldo bene ocako kwano Baibul. En owacci: “Onongo pe yot bota me keto gin ma atye ka pwonyone i tic. Onongo atamo ni pe abitwero loyo kiniga kacel ki gero ma atye kwede.” Ento gin mo ma en opwonyo ki i Baibul okelo alokaloka madit i kwone.

Waldo otito ni: “I nino mo acel, Alejandro, lapwonya me Baibul, openya ni akwan Jo Galatia 5:22, 23. . . . Alejandro otitta ni pe atwero nyako nyig mabeco-ni pira kena, ento Lubanga aye bikonya ki cwiny mere maleng. Lok ada meno oweko aniang maber ni twerre me loyo kiniga kacel ki gero ma atye kwede-ni!”

Waldo obedo ki kero me jwayo cwiny me adage pien en oye ni Lubanga okonye. En owaco ni: “Wadina ki lurema pe gitwero ye kit ma alokke kwede.” Waldo omedo ni: “Jehovah oloko an laco ma yam ger, adoko laco ma maro kuc.”