Yecu Obedo Lalamdogwa Madit ma Lakica

1-2. (a) Pingo Jehovah ocwalo Wode i lobo? (b) Gin ango ma wabinyamo i pwony man? (Jo Ibru 5:​7-9)

MWAKI ma romo 2,000 angec, Jehovah ocwalo Wode ma en maro loyo i lobo kany. Pingo? Tyen lok acel obedo me gonyo dano ki i opii me bal ki to ki dong me jwayo pekki ducu ma Catan okelo. (Jon 3:16; 1 Jon 3:8) Jehovah bene onongo ngeyo ni ka Yecu kong okwo macalo dano, ci meno biyubbe me bedo Lalamdog Madit ma lakica dok ma paro piwa. Yecu odoko Lalamdog Madit i nge nongo batija i mwaka 29 K.M.a

² I pwony man, wabinyamo kit ma kwo pa Yecu i lobo oyube kwede me doko Lalamdog Madit ma lakica. Ka wawoto ki dongo ngecwa i kom kit ma Yecu “oteggi” kwede pi ticce, wabinongo ni yot me lega bot Jehovah, kadi bed cwinywa otur pi balwa kacel ki goro ma watye kwede.—Kwan Jo Ibru 5:​7-9.

WOD PA LUBANGA ME AMARA OBINO I LOBO

3-4. Gin ango ma Yecu ojalo i kare ma en obino i lobo, dok kwone i lobo obedo nining?

³ Pol pa wan dong wakato ki i alokaloka mo i kwowa, calo a woko ki i kabedo ma wamaro kun nongo waweko lupacowa ki luremwa i ngewa. Jolo alokaloka ma kit meno pe yot. Ento pe tye ngat mo keken ma okato ki i alokaloka mapol calo Yecu. En aye onongo obedo cwec mukwongo dok lamalaika ma pire tek loyo bot Jehovah. Jehovah onongo mare dok kare ducu Yecu onongo bedo ma cwinye yom pien tiyo kacel ki Wonne. (Jab. 16:11; Car. 8:30) Kadi bed kit meno, Jo Pilipi 2:7 waco ni Yecu “oweko meno ducu,” kun jalo jami ducu ma onongo tye kwede i polo wek ekwo i kin dano ma gitye ki roc i lobo kany.

⁴ Tam bene i kom mwaki mogo mukwongo me kwo pa Yecu i lobo. Lunyodo pa Yecu onongo gubedo lucan. Wangeyo man pien mot ma lunyodone gutero i ot pa Lubanga i nge nywalle obedo winyi aryo matino keken. (Levi 12:8; Luka 2:24) I kare ma Kabaka Kerode oniang i kom nywal pa Yecu, en otemme me neke woko. Me laro kwo pa Yecu ki i cing Kerode, lunyodone guringo gukanne i Ejipt pi kare mo. (Mat. 2:​13, 15) Kwo pa Yecu i lobo pud dong obedo pat adada ka kiporo ki kwone ma i polo!

5. Gin ango ma Yecu oneno i kare ma en tye i lobo, dok jami magi oyubbe nining me bedo Lalamdog Madit ma lakica? (Nen bene cal.)

⁵ I kare ma Yecu tye i lobo, en oneno kit ma dano onongo gideno kwede can. Yecu oniang kit ma ngat moni winyo kwede ka orwenyo danone me amara. Labongo akalakala mo, onongo tye dano mapol ma Yecu ngeyogi ma guto i kare ma en tye i lobo, nen calo kadi wa wonne Yucepu. I kare me ticce me pwony, Yecu orwatte ki ludobo, lutowang, jo ma komgi okwe, ki dong lunywal ma gurwenyo lutinogi, dok kica omake i komgi. (Mat. 9:​2, 6; 15:30; 20:34; Mar. 1:​40, 41; Luka 7:13) Tye lok ada ni, i kare ma Yecu onongo tye i polo, en oneno dano ma gitye ka deno can i lobo. Ento i kare ma en dong tye i lobo macalo dano, en onongo dong twero niang maber kit ma dano giwinyo kwede ka gitye ka deno can. (Ic. 53:4) Kwo ma Yecu okato ki iye i lobo oweko en oniang cwercwiny ki arem ma dano winyo ka gitye ka deno can. Dok calo dano ducu, Yecu bene ool, cwinye otur, dok okumo.

YECU ONYUTO CWINY ME KICA BOT DANO

6. Gin ango ma wapwonyo ki i lok pa lanebi Icaya madok i kom kica ma Yecu onyuto bot dano? (Matayo 12:​17, 20)

⁶ I kare me ticce me pwony, Yecu onyuto kica bot jo ma goro ki jo ma onongo kiterogi marac. Timo meno omiyo Yecu ocobo lok ma Jehovah otito kun tiyo ki lanebi Icaya. I Cik Macon, jo ma gitek kiporogi ki poto ma kionyo iye pii muromo nyo yadi maboco. (Jab. 92:12; Ic. 61:3; Jer. 31:12) Ento lucan ki jo ma kiterogi marac kiporogi ki lagada ma otyer nyo mac tara ma cok to, ma gin ducu konygi pe bot dano. (Kwan Matayo 12:​17, 20) Jehovah oweko lanebi Icaya otiyo ki lapor magi me tito mar kacel ki kica ma Yecu binyutone bot dano ma onongo kiterogi marac.

7-8. Yecu ocobo lok pa lanebi Icaya nining?

⁷ Matayo onyuto ni Yecu ocobo lok pa lanebi Icaya i kare ma en ocoyo ni: “En pe bituro lagada mo ma otyer, dok pe bineko mac tara ma cok to.” Tango mogo ma Yecu otimogi okonyo jo ma onongo kiterogi marac dok gigoro calo lagada ma otyer nyo gipe ki gen mo calo mac tara ma cok to. Me labolle, Yecu orwatte ki laco mo ma two dobo oromo kome ducu. Laco meno onongo nen calo winyo ni epe ki gen mo keken me cang ki me bedo kacel ki lureme ki dong jo ganggi. (Luka 5:​12, 13) Yecu bene orwatte ki laco mo ma ladingit dok ma te lebe oto. Go kong kit ma laco meno onongo winyo kwede ka neno dano gitye ka boko lok ento en pe twero niang gin mo keken ma gitye ka lokone. (Mar. 7:​32, 33) Ento tye dok gin mukene.

⁸ I kare pa Yecu, Lujudaya mapol onongo giye ni dano ma gitye ki goro nyo ma komgi lit nongo kitye ka miyogi pwod pi balgi nyo bal pa lunywalgi. (Jon 9:2) Pi niye man ma pe tye kakare-ni, oweko pol kare onongo kitero lugoro marac adada. Ento Yecu ocangogi dok okonyogi me ngeyo ni Lubanga paro pigi. Man pwonyowa gin ango i kom kit ma Yecu winyo kwede i komwa i kare-ni?

9. I yo ma nining ma Jo Ibru 4:​15, 16 nyuto ni Yecu bene winyo arem pa dano ma gitye ki roc?

⁹ Kwan Jo Ibru 4:​15, 16. Watwero bedo ki tekcwiny ni Yecu kare ducu bibedo ki kica i komwa. Man tyen lokke ngo? Ngat ma lakica obedo ngat ma winyo arem pa ngat mukene. Ka wakwano ki i Baibul kit ma Yecu okonyo kwede dano, watwero neno ni en onongo winyo arem pa dano. En pe ocango dano mere pien ni obedo ticce. En onongo paro pigi adada dok mito konyogi. Me labolle, i kare ma en ocango ladobo mo, en onongo twero cangone ki ka mabor, ento kica otugo cwinye me gudo kom laco meno. Dok man aye nen calo tyen mukwongo ma kigudo kom ladobo meno i nge mwaki mapol! Dok i kare ma Yecu oyabo it laco mo ma ladingit, en otero laco meno i kabedo ma oling mot ma dano pe iye. Tam bene i kom gin mutimme i kare ma dako mo ma onongo labalo ento ongut woko olwoko tyen Yecu ki pig wange kun dunyo ki yer wiye. Laparicayo mo ocayo dako-ni ento Yecu opwoyo dako meno dok omiyo tira magwar bot Laparicayo-ni. (Mat. 8:3; Mar. 7:33; Luka 7:44) Dong watwero neno ni Yecu pe okwero jo ma komgi lit nyo jo ma gutimo bal madongo. Me ka meno, en ojologi dok onyutigi mar. Watwero bedo ki gen ni en winyo aremwa bene.

KIT MA WALUBO KWEDE LANEN PA LALAMDOGWA MADIT I KARE-NI

10. Jami mene ma watwero tic kwedgi i kare-ni me konyo ludingit ki lutowang? (Nen bene cal.)

¹⁰ Macalo lulub kor Yecu, watute matek me lubo lanene ki nyuto mar kacel ki kica bot jo mukene. (1 Pet. 2:21; 3:8) Kadi bed pe watwero timo tango me cango lutowang ki ludingit, ento watwero konyogi me pwonyo lok i kom Jehovah ki me nyikke cok kwede. Me labolle, bukkewa ma jenge i Baibul dong tye nonge i leb pa ludingit makato 100. Dok me konyo lutowang, bukkewa me brail tye nonge i leb makato 60. Medo i kom meno, i vidiowa ma nonge i leb makato 100, kimedo iye dwan ngat ma tito gin ma tye ka timme. Jami magi ducu kitimo me konyo ludingit ki lutowang me nyikke cok ki Jehovah kacel ki Wode.

11. I yo ma nining ma dul pa Jehovah nyuto kwede cwiny me kica ma Yecu tye kwede pi dano ducu? (Tic pa Lukwena 2:​5-7, 33) (Nen bene cal.)

¹¹ Dul pa Jehovah tute matek me konyo dano ma i kabedo ducu me nyikke cok ki Jehovah. Wii opo ni i nge cer pa Yecu, en oonyo cwiny maleng i kom lupwonnyene wek gubed ki kero me tito kwena bot jo ducu ma gubino i kwer me Pentekote i “leb tugi kikome.” (Kwan Tic pa Lukwena 2:​5-7, 33.) I te tela pa Yecu, dul pa Jehovah dong tye ka yubo bukke ma jenge i Baibul i leb makato 1,000 kulu, dok leb mogo i kingi jo manok keken aye giloko. Me labolle, leb pa rok mogo ma gukwongo kwo Tung Kumalo ki Tung Kupiny me lobo Amerika dong jo manok keken aye giloko i kare-ni. Kadi bed kit meno, dulwa oyubo bukke i leb makato 160 pa rok magi, wek jo ma giloko leb magi gubed ki kare me winyo kwena maber. Labol mukene obedo leb pa jo Romani. Jo ma giloko leb man ginok dok gikwo i lobe mapatpat i Tung Kunyango me Ulaya. Kibedo ka unogi teretere pi mwaki mapol. Kadi bed kit meno, bukkewa tye nonge i leb makato 20 pa jo Romani. Dano alip mapol ata ma giloko leb Romani dong gujolo ada.

12. Gin ango mukene ma dul pa Jehovah timo pi dano i kare-ni?

¹² Medo i kom konyo dano me pwonyo lok ada, dul pa Jehovah bene konyo jo ma can ma poto atura otimme i kabedogi. Omege ki lumege alip mapol gijalle me miyo kony bot utmege ma gimito kony. Dulwa bene yubo kabedo me woro ka ma dano giromo gure iye me pwonyo lok i kom mar pa Lubanga pigi.

LALAMDOGWA MADIT TWERO KONYI

13. I yo mapatpat ango ma Yecu konyowa kwede i kare-ni?

¹³ Kit macalo Yecu obedo lakwat ma lakica-ni, en miniwa jami ducu ma mitte botwa me bedo cok ki Jehovah. (Jon 10:14; Ep. 4:7) I kare mogo, cwinywa twero tur ma miyo wabedo calo lagada ma otyer nyo mac tara ma cok to. Watwero bedo ki turcwiny pi two malit ma watye kwede, pi gin mo marac ma watimo nyo pi winnye manok ma wabedo kwede ki ngat mo i kacokke. Twero bedo tek botwa adada me keto tamwa i kom gen ma watye kwede pi anyim ento wabedo ka tamo pi pekki ma watye ka kato ki i iye i kare-ni keken. Wii opo ni, Yecu niang pekki ducu ma itye ka wok ki iye ki kit ma iwinyo kwede. Kit macalo kica mako kwede Yecu i komi, en bene tye ki miti me konyi. Me labolle, en twero tic ki cwiny maleng me mini teko i kare ma iwinyo calo ipe ki kero. (Jon 16:7; Tito 3:6) Medo i kom meno, Yecu twero tic ki “mot ma gubedo dano” kacel ki luye luwotwa mukene me cuko cwinywa ki dong me konyowa.—Ep. 4:​8, NWT.

14. Gin ango ma waromo timone ka cwinywa otur?

¹⁴ Ka cwinyi otur, wii opo ni Yecu obedo Lalamdogwa Madit, dok itam i kom kit ma meno gudi kwede. Wii opo ni Jehovah ocwale i lobo pe me to piwa keken, ento bene me niang peko ma wan dano ma watye ki roc wakato ki iye. Ka cwinywa otur pi balwa nyo goro ma watye kwede, Yecu tye atera me konyowa “i kare ma mitte” kikome.—Ibru 4:​15, 16.

15. Gin ango ma okonyo omego mo acel me dwogo cen i kacokke?

¹⁵ Yecu bene tiro jone ka gitye ka tute me yenyo ki konyo jo ma gua woko ki bot Jehovah me dwogo cen. (Mat. 18:​12, 13) Nen kong gin mutimme i kom Stefano.b I nge mwaki 12 ma dong kikwanye woko ki i kacokke, en omoko tamme me bino i cokke. En owaco ni: “Pe obedo yot bota me bino i cokke, ento onongo amito ni adwog cen ka tic pi Jehovah kacel ki omege ki lumege. Luelda ma gurwatte kweda guweko awinyo agonya. I kare mogo onongo awinyo marac adada pien ni aweko Jehovah, dok onongo amito ilo cinga woko. Ento luelda gupoyo wiya ni Jehovah gin ki Yecu pe gimito ni ail cinga woko. I kare ma kidwoka cen i kacokke, dano ducu ma i kacokke gujolo an kacel ki jo me ganga ki yomcwiny madit. Lacen, dakona ocako kwano Baibul dok i kare-ni watiyo pi Jehovah kacel.” Labongo akalakala mo, Lalamdogwa Madit cwinye bedo yom adada ka oneno jo ducu ma i kacokke gitute me konyo jo ma gungut me dwogo cen i kacokke!

16. Pingo itye ki pwoc me bedo ki Yecu macalo Lalamdog Madit dok ma lakica?

¹⁶ I kare ma Yecu tye i lobo, en obedo ka miyo kony bot dano i cawa ma mitte kikome. I kare-ni bene, watwero bedo ki gen ni en bikonyowa i cawa mo keken ma wamito kony. Dok i lobo manyen, en bijwayo bal kacel ki roc ducu ki i komwa. Wapwoyo Lubangawa Jehovah pi marowa matek mumiyo en omiyo botwa Wode me bedo Lalamdogwa Madit dok ma lakica!