Pak Jehovah i Cokke Madit
1, 2. Gurre madit miyowa kare me timo gin ango, dok yo acel ma watwero timone kwede aye ngo?
1 Gurrewa madito miyowa kare me pako Jehovah mwaka ki mwaka. Cwinywa bedo calo pa Daudi, ma owero ni: “Abimiyi pwoc madit mada i cokke madit; abipaki ka ma lwak jo mapol gugurre iye.” (Jab. 35:18) Ngo ma watwero timone me neno ni wan macalo lwak acel wakelo pak i kom Jehovah i Gurre Madit me Distrik ma wiye tye ni “Winy Lubanga,” ma tye ka bino-ni?
2 Yo acel ma watwero timo kwede man aye i kitwa. Jo ma giloyo kabedo mo acel ka ma gurre madit maro bedo iye guwaco ni: “Ma lubbe ki gurrewu madito, watyeko tito ki dul dini mukene ma gimito pango kabedowa-ni me gurregi me bino ka neno kit ma Lucaden pa Jehovah giyubo kwede gurre, pien yubwu tye ma lamal ma pe twere.” Dong kit ma wanen kwede, winye ma tye i kinwa, ki kitwa, miyo wan ki acel acel wakelo pak ma kit man, ma i adane opore pi Lubangawa.—1 Pet. 2:12.
3, 4. I kagurre kacel ki i nge gurre, mwolo bikonyowa me rukke i yo ma opore ki Lukricitayo nining?
3 Kit ma Wanen Kwede: Omyero warukke ki mwolo ma nongo wanen maber me wek wakel pak bot Jehovah. (1 Tem. 2:9) Buk me Ministry School, pot karatac 132, waco ni: “Ngat ma mwol pe tamo tam me cwero cwiny jo mukene dok pe mito ni eywa tam pa dano i kome dok tutwal.” Bongi ma pe rwatte dong gunya ata i lobo mapol. Ento, Jehovah pwoyo tuttewa me bedo jo ma cung pi en maber. (Tic 15:14) Kadi bed ni gurre-ni oromo bedo i bar me tuko nyo kabedo mogo ma kiyubo me galowang, ento i nino adek meno, gurrewa-ni nongo pud obedo “cokke madit.” Pi meno, ka wagurre i nyim Jehovah, omyero warukke i yo ma oporre ma rwatte me bino i nyim Ngat Madit loyo ducu.—1 Tekwaro 29:11.
4 Myero bene waket cwinywa i kit ma wanen kwede i nge cawa me gure i nino adek-ki ducu. Kadi bed wabimito ruko bongo ma nongo miyo wabedo agonya i kare ma watye nono ka yweyo nyo ka camo cam ka ma kiwilo iye cam mucek me acama, pire tek ni rukkewa ki kit ma wanen kwede omyero pud orwatte ki kit pa “jo ma woro Lubanga.” (1 Tem. 2:10) Bongo moni pe bedo ber pien ni jo me lobo gimaro. (1 Jon 2:16, 17) Buk pa wan Lukricitayo nyuto cal ma tiyo macalo lapor me ruk me mwolo ma opore pi co wa ki mon pi kit kare mo keken. Ruko bajwa i kare ma nongo watye i boma ka ma gurre tye iye-ni konyo me poyo wiwa ni wan wabedo Lukricitayo i kare ducu.—2 Kor. 6:3, 4.
5. Lanen maber ango ma jo me kare pa Ejira gumiyo?
5 Wor Meja pa Jehovah: I kare ma Ejira onongo tye ka yubbe me kwano Ginacoya, “dano ducu gua malo gucung” pi woro ki kuro pwony ma onongo gicok nongone. I kare ma Ejira onongo tye ka medde ki kwan, “dano ducu guciko itgi ka winyo lok.” (Nek. 8:3, 5, 6) Gin guniang ni Jehovah aye onongo tye ka lok kwedgi, man omiyo guwinyo lok ki woro madit atika. Wan mono bene wawinyo lok kit meno i kare me gurrewa?
6, 7. Watwero nyuto woro pi meja me cam me cwiny pa Jehovah nining?
6 Rwot Laloc Mamalo me polo ki lobo otedo karama piwa. (Ic. 25:6; 1 Kor. 10:21) Ka waneno bedo tye i dog meja me cam me cwiny pa Jehovah calo gin ma pire tek, ci wabibedo tye pi nino adek me gurre-ni ducu. Dong mono ityeko yubo yub pi kabuto, kit me cito, ki lego kare ki ka ma itiyo iye? Tika dong iyubo kare ma oromo me yubbe ki me wot ma miyo io con ka ma gurre bibedo iye wek inong kabedo, ki dok me rwatte ki omegiwa, kun iribbe kwedgi i wero wer me pako Jehovah ki lega mukwongo?—Jab. 147:1.
7 Bedo ki woro pi meja pa Jehovah bimiyo waketo cwinywa i kom pwony ma nongo kitye ka pwonyone dok wakwero bedo ka lok atata ki jo ma tye ka ngetwa, bedo ka camo jami, nyo wot atata. Jehovah tye ka miyo cam me cwiny ma wamito tutwal i kare-ni kun tiyo ki lagwok ot ma lagen dok maryek. (Mat. 24:45) Omyero ngat mo i kinwa pe okeng yub-bi. Lunyodo omyero gubed kacel ki lutinogi dok gukonygi me niang maber.—Nwo. 31:12.
8. Kikwayowa me timo gin ango pi cam me dyeceng, dok pingo?
8 Kikwayowa me bino ki cam me dyeceng wek pe wawek kagurre me cito ka nongo cam ki woko i kare me yweyo me dyeceng. Obedo me pwoc tutwal ni welle mapol gulubo lok man i gurre me mwaka ma okato. Bibedo ber tutwal ka jo ducu gulubo lok man i mwaka-ni! (Ibru 13:17) Yub man miyo kare maber me nongo yomcwiny me bedo kacel ki omegiwa dok kelo ribbe ki kuc, man miyo deyo bot Jehovah.—Jab. 133:1.
9, 10. Kit kare ango ma gurre madit miyo botwa me pako Jehovah?
9 Miyo Caden ma Pe Iyubbe Iye: I kare ma nongo watye ka cito nyo ka dwogo ki ka ma kigurre iye, wabedo ki kare me pako Jehovah ki dogwa. (Ibru 13:15) Ka watye ka camo cam ka ma kicato iye cam nyo lok ki lutic ma tiyo kunnu, omyero wayenyu yo me miyo caden botgi. Tamwa kacel ki cwinywa bipong ki lonyo me cwiny. Wanywaku wunu jami mabeco magi ki jo ma warwatte kwedgi kadi bed ni nongo pe wayubbe pire.—1 Pet. 3:15.
10 Wakuru kare man me pako Jehovah “i dye lwakke ma gucokke” ki twon arima madit. (Jab. 26:12) Waribbe wunu kacel me pako Jehovah i Gurre Madit ma wi lokke tye ni “Winy Lubanga.”
[Bok i pot karatac 4]
Lok me Poyo Wic ma Mako Gurre Madit me Distrik
◼ Cawa me Yub: Yub-bi bicakke cawa 3:30 me odiko i nino adek-ki ducu. Kibiyabo dogola cawa 2:00 kikome me odiko. Dakika manok ma nongo cokke me odiko peya ocakke, won kom bibedo piny i wi abam kun nongo kiketo wer me Ker woto kikoko. I cawa meno wan ducu omyero wabed piny wek yub ocakke i yo maber. Yub-bi bitum cawa 11:05 me otyeno i Ceng Abic ki Abicel ki cawa 10:10 me otyeno i Ceng Cabit.
◼ Ka Gwoko Giwot: Ka ma kigwoko iye giwot maber bibedo tye i kabedo me gurre ducu labongo cul mo, dok kibimiyone ma lubbe ki ngat ma okwongo bino wiya ti. Baj me gurre madit aye bibedo macalo gin ma nyuto anga ma myero kimiye ka gwoko giwote.
◼ Gwoko Kabedo: Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel.
◼ Miyo Mot: Lim mapol mitte pi yubo gurre madit me distrik. Watwero nyuto pwocwa ki miyo motwa pi konyo tic me ker i wi lobo ducu ki i Ot me Kerwa nyo ki i gurre madit.
◼ Jo ma itgi oding: Jo ma itgi oding omyero gumi ngec con bot jo ma gineno lok me yubo gurre madit wek kiyub kabedo mo ma rwatte pigi.
◼ Cam me Dyeceng: Tim ber ibin ki cam me dyeceng me kaka weko kagurre me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jammi madongo me mako cam, jami ma obedo gilac, ki kongo ma mero dano pe bimitte i kabedo me gurre madit.
◼ Mako Dwan: Kit gin lamak dwan mo keken omyero pe kikub ki tol mo me mac alektrik nyo tol me lakub dwan i gurre, gin lamak dwan omyero kiti kwede i yo ma pe yelo jo mukene.
◼ Mako Cal: Ka i mako cal, pe iti ki mac lamak cal i kare ma cokke tye ka wot anyim.
◼ Jami Matino ma Kok ki Cim Cing: Jami ma kit magi omyero gubed ma pe giromo yelo dano.
◼ Two ki Awano ma Bino Atura: Ka two mo ocakke atura i kagurre madit, tim ber itit ki lajol welo mo ma tye cok kwedi, en bimiyo ngec meno cut Kama Kimiyo iye Kony wek ngat ma tye ki ngec i miyo kony oyot onen lit pa twone kacel ki mine kony.
◼ Kabedo me Buto: (1) Pe iwek kigwok ot buto mapol ma pe ibiromo tic kwedgi ducu, dok pe iwek wel dano gukat wel ma mitte me buto i ot moni. (2) Ka dong pe imito ot ma ipenyo ni kikan piri, mi ngecce bot wegi ot labongo galle. (3) Pe ited tedo ka ma pe kiyubo me tedo nyo i ot buto ka ma dano mapol buto iye nikwanyo ka kimini twero. (4) Pe ibal angica, cai kawa, ma wegi odi me buto gimiyo ki wellegi abala. (5) Bed ki kit ma cwiny maleng nyako ka itye ka lok ki jo ma gitiyo i kabedo ma ibuto iye, tutwalle i kare ma nongo tic omakogi mada.